Tolamake timba taso
1. Naa ɔtɛ a dui wa Losanganya l’otshimbedi la l’ɔnɔnyi w’olimu 2013 ndo oyango akɔna wele la losanganya lɔsɔ?
1 Yeso akatɛ ambeki ande dia vɔ nanga Jehowa l’etema awɔ tshɛ, l’anima awɔ tshɛ ndo la timba tawɔ tshɛ. (Mat. 22:37, 38) Losanganya la distrikɛ, l’otshimbedi ndo la lânde la lushi ɔtɔi la l’ɔnɔnyi ɔnɛ lakalɔngɔswama dia tokimanyia dia sho nkeketsha lonto laso la l’etei k’otema. Oko wayonyɛna, Losanganya la distrikɛ lekɔ l’ɔtɛ a dui wata ɔnɛ: ‘Olamake otema ayɛ!’ Losanganya la lânde la lushi ɔtɔi lekɔ l’ɔtɛ a dui ɔnɛ: “Tolamake nkum’otema kaso.” Ndo Losanganya l’otshimbedi layosalema Ngɔndɔ kayaye layonga l’ɔtɛ wa dui wɔsami oma lo Mateo 22:37 wata ɔnɛ: “Tolamake timba taso.” Losanganya lɔnɛ lekɔ l’oyango wa nkimanyiya ɔmɔmɔ la l’atei aso dia nde nsɛdingola tokanyi tande hita dia nde tiɔtɔnganyiya la lolango la Jehowa.
2. Lo ambola akɔna wayotokondja ekadimwelo lo losanganya lɔsɔ?
2 Wetshelo wayoshama lɛkɔ: Lo Losanganya l’otshimbedi, tayokondja ekadimwelo lo ambola wayela anɛ:
• Ngande wakokaso mbewɔ dia mbokoya ‘tokanyi t’anto’?
• Ngande wakokaso minya okombɔ wetɛ anto wele kema Akristo totshungu lo timba tawɔ?
• Woho akɔna w’ekanelo ka yimba kakombolaso monga la tɔ?
• Ɛlɔlɔ akɔna wakondjaso lo kanaka yimba dimɛna?
• Ngande wakokaso ntshika dia Jehowa ndowanya ekanelo kaso ka yimba?
• Ngande wakoka waomi, waa wadi, ambutshi ndo ana mbisha lonya dia nkumbo monga l’ɔngɛnɔngɛnɔ?
• Ngande wakokaso ndjalɔngɔsɔla dikambo dia lushi la woke laki Jehowa?
• Kakɔna kalembetshiya mbika timba taso lo olimu w’esambishelo?
• Ɛlɔlɔ akɔna wakondja wanɛ wakamba la kɛnɛ kekawɔ?
3. Lande na kele ayonga dui di’ohomba dia sho mbɔtɔ lo nshi yakɔ hiende ya losanganya, mbidja yimba lo kɛnɛ kayotama ndo nkamba la kɛnɛ tshɛ kayotetshama?
3 Satana ekɔ lo nsala tshɛ dia ndanya timba taso. (2 Kɔr. 11:3) Diakɔ diele, sho pombaka nkokɛ timba ndo tokanyi taso. Sho pombaka ntetemala nkɛnɛmɔla yimba ya Kristo ndo nsala la wolo diaha sɛngiyama l’awui wa kɔlɔ wa l’andja ɔnɛ wa kɔlɔ. (1 Kɔr. 2:16) Ɔnkɔnɛ, toyalɔngɔsɔlɛ dia sho mbɔtɔ lo nshi yakɔ hiende ya Losanganya l’otshimbedi lɔsɔ. Katodjake yimba lo asawo tshɛ wayoshamaka. Mbidja yimba lo awui w’ohomba wayotama ayotokimanyiya dia sho mbika timba taso l’olimu wa Diolelo.—1 Pet. 1:13.