Losanganya L’oyoyo La Lânde La Lushi Ɔtɔi
1 “Wambetshama oma le Jehowa.” Ɔsɔ mbayonga ɔtɛ a dui w’ɔnɔngɔ a nsanganya ya lânde ya lushi ɔtɔi yayomɛ salema lo Lovula. (Joa. 6:45) Wetshelo wa Jehowa tokimanyiyaka mɛtɛ dia sho monga la lɔsɛnɔ l’ɔngɛnɔngɛnɔ. Vɔ totshutshuyaka dia sho monga la lowando lo ekola kaso ka lo nyuma. Weolo wadjaso dia akina mboka lokumu l’ɔlɔlɔ tetɛka anto w’ohomba. Losanganya lɔnɛ la lânde la lushi ɔtɔi layɛnya etshɔkɔ wele la wanɛ wambetshama oma le Jehowa.
2 Ɛlɔlɔ wa wetshelo w’oma le Nzambi wayɛdikama la wâle waya oma l’ewo ka l’andja ɔnɛ. Tayoshihodia dimɛna dimɛna dia Jehowa toshaka wetshelo wa la diko, wetshelo w’oma lo Bible, Dui diande. Wayoka epole ɔsɛkɛ lo akambo asato w’ɔtɛmwɛlɔ aso wangɛnangɛnaso dia mbetshama oma le Nzambi. Ndo nto, ɛlɔngɔlɔngɔ wayokeketshama dia vɔ mbokoya diɛnyɛlɔ dia lo Bible di’amɛna, oko Davidi la Timɔtɛ, ndo ninga lɔsɛnɔ lawɔ la elimu wa lo nyuma eto. Mbetawɔ kaso kayokeketshama lam’ayotoka diɛnyɛlɔ dia kɔlamelo di’Ɛmɛnyi waya esombe. Wanɛ weke ka ndjakimɔ le Nzambi ndo wakotsha kɛnɛ kalɔmbama wayokoka batizama. Naka vɔ nangaka, kete vɔ pombaka mbewoya omendji-walɔmbɔla saki kawɔ edja la ntondo k’assemblée.
3 Dako di’etshina dia lo losanganya la lânde la lushi ɔtɔi diayonga l’ɔtɛ a dui wata ɔnɛ: “Wambetshama oma le Jehowa dia Sala Lolango Lande.” Diɔ diayɛnya bonde kahombaso sho tshɛ tetemala la mbeka, sho monga nge lo mbetawɔ ndo tetemala la pama. Tayokeketshama dia mbokoya Jehowa lo mbetshaka akina mɛtɛ katɔla otsha lo lɔsɛnɔ la pondjo. Akambo wasalema wayotosokoya lo sho mbika mbetawɔ kaso wayɛnya woho wakakimanyiya ekanda wa la Société anto efula dia vɔ kondja wetshelo wa Jehowa. Wayoka epole ɔsɛkɛ l’etombelo w’ɛlɔlɔ w’oma l’ekongelo ka wetshelo wa Jehowa wa l’andja w’otondo.
4 Tɔshi tɛdikɔ ta shikaa dia mbɔtɔ lo losanganya lakɔ. Tokeketsha wanɛ tshɛ wɛnya saki dia vɔ monga lawɔ. Tome ngɛnangɛna dia akambo w’amɛna efula wayôtetsha Ombetsha aso wa Woke.—Is. 30:20.