Nshi ya Eohwelo yekɔ nshi ya pamia olimu aso!
1. Naa ɛkɔkɔ watotshutshuya dia ndjasɛdingola kana sho kokaka pamia olimu aso lo Ngɔndɔ ka sato, ka nɛi ndo ka tanu?
1 Onde wɛ kokaka pamia olimu ayɛ w’esambishelo lo nshi ya Eohwelo kayaye kɛnɛ? Lo ahole efula wa l’andja, hiɛlɛlɛ mongaka dimɛna ndo yanyi ndekaka otsho otale. Apandjudi amɔtshi wakamba elimu kana wɔtɔ kalasa wayonga lo vakashi, ɔnkɔnɛ vɔ kokaka nkamba la nshi shɔ dikambo di’esambishelo. Ntatɛ Ngɔndɔ ka nɛi 2, tayonga la esambishelo ka lânde dia mbelɛ anto wayasha dia ndjɔtɔ la so lo Eohwelo kayosalema Ngɔndɔ ka nɛi 17. Oma lâsɔ, tayosala la wolo dia ntshɔ tolomialomia nsaki k’anto wakɔtɔ lo Eohwelo ndo mbaelɛ lo sawo dia lânde diayoshama lo lomingu la Ngɔndɔ ka nɛi 25. Lo mɛtɛ, tekɔ l’ɛkɔkɔ efula wa nsɛdingola woho wa sho pamia olimu aso lo Ngɔndɔ ka sato, ka nɛi ndo ka tanu.
2. Naa yoho yoleki dimɛna ya ndeka nsambisha?
2 Olimu w’ombatshi mboka wa tshanda: Yoho yoleki dimɛna ya pamia olimu aso ele monga ombatshi mboka wa tshanda. Lam’ele sho tshɛ tekɔ la wesanu efula, dui sɔ nɔmbaka dia takonge akambo la ntondo ndo nsala etshikitanu ɛmɔtshi lo ekongelo kaso. (Tuk. 21:5) Ondo wɛ kokaka taloya elimu ɛmɔtshi wele bu ohomba efula wokoyosalaka. (Fil. 1:9-11) Shi wɛ kokaka mbutɛ apandjudi akina wa l’etshumanelo nsaki kele la yɛ ka nkamba oko ombatshi mboka dia menda kana vɔ lawɔ mbeyaka kôkoya lo monga ambatshi mboka wa tshanda?
3. Ngande wakoka waa nkumbo ndjakongɛ dia ndeka nsambisha?
3 Ayonga dimɛna nyu nkɛtshanya eyango wambonyoyadjɛ oko nkumbo lo Ɔtɛmwɛlɔ anyu wa lo nkumbo wa la dikɔlɔ wa mbala kayaye. (Tuk. 15:22) Naka ase nkumbo tshɛ wayokamba kâmɛ, kete amɔtshi l’atei awɔ wayokoka nkamba oko ambatshi mboka wa tshanda ngɔndɔ ɔtɔi kana ndekana. Ko ayoyosala naka wɛ mɛnaka dia wɛ honga l’akoka wa nkamba olimu akɔ? Ase nkumbo kokaka nyomoyakongɛ dia pamia olimu awɔ lo tombaka l’akɔlɔ amɔtshi kana sambishaka efula lo waa wikɛndɛ.
4. Ɛtshɔkɔ akɔna wayotokondja lo pamia olimu aso lo nshi ya Eohwelo kayaye kɛnɛ?
4 Jehowa mɛnaka kɛnɛ tshɛ kasalaso dia mbokambɛ ndo nde mandolaka yimba yaso ya ndjahombia. (Heb. 6:10) Sho mongaka l’ɔngɛnɔngɛnɔ lo mbisha Jehowa ndo anto akina elambo aso. (1 Ek. 29:9; Etsha 20:35) Shi wɛ kokaka pamia olimu ayɛ lo nshi ya Eohwelo kayaye kɛnɛ nɛ dia dikambo sɔ diayokofudiyɛ ɔngɛnɔngɛnɔ ndo diayokela ɛtshɔkɔ efula?