Tokambe dimɛna la periodikɛ y’edjedja

Lam’ele ndooko onto lakoka nkondja wahɔ oma lo periodikɛ y’edjedja etena keyɔ lo lɔkɔtɔ kana dihole dikina, sho pombaka ndjikahɛ anto. Periodikɛ ɔtɔi keto koka nomialomia nsaki k’onto l’akambo wa mɛtɛ ndo mbotshutshuya dia tɛndɛ lokombo la Jehowa. (Rɔmɔ 10:13, 14) Alako wayela anɛ koka tokimanyiya dia sho nkamba la periodikɛ y’edjedja dimɛna.

• Etena katayasambisha lo mbɛtshi dia nkɛtɛ diahaleke sambishama, wɛ koka tshikɛ anto wele bu lawakawɔ periodikɛ lo dihole diahɛna ambetshetshi.

• Etena keyɛ l’esambishelo ka lo sɛkɛ l’ahole wadjasɛ anto dia nkonga, ɛnyɛlɔ ahole wakongawɔ mituka kana kawolo, mbola anto kana vɔ nangaka mbɔsa ɛngɔ kɛmɔtshi ka mbadia, ɛnyawɔ periodikɛ efula y’edjedja ndo tshikawɔ wasɔnɛ.

• Etena katshɔyɛ tembola anto l’ahole wasolawɔ ahɔndɔ la mashinyi, lo pitadi kana ahole akina wa ngasɔ wele l’ɛtshi ka nkɛtɛ k’etshumanelo kanyu, wɛ koka mbisha anto wele lɛkɔ periodikɛ mɔtshi y’edjedja. Mbala efula ekɔ dimɛna talɔmbi lotshungɔ le ɔnɔmbɔdi wa l’ahole asɔ naka nde ekɔ. Naka wɛ ambɛna di’anto wekɔ la periodikɛ yayaawaela, kete towatshikɛke nto.

• Etena kayalɔngɔsɔlayɛ dia tembola anto wakɛnya nsaki, kana yimba dia nsaki kakɛnya onto tshɛ latayatshu tembola. Onde nde ekɔ la nkumbo? Onde nde ngɛnangɛnaka minda nkɛndɔ? Onde nde ekɔ okambi wa dikambɔ? Yanga lo periodikɛ y’edjedja dia mbeya kana ekɔ sawo dimɔtshi diakokande ngɛnangɛna mbadia, oma laasɔ ko wɛ towɛnyadiɔ etena kayoyotshɔ towembola.

• Naka wɛ ambotana onto ɔmɔtshi lakɛnya nsaki la ngelo l’ɔkɔngɔ wa wɛ nkɛlakɛla dia ndjosawola la nde, ɛnyande periodikɛ y’edjedja mɔtshi yakinde kokondja.