Tokoya ɛnyɛlɔ k’amvutshi—Habakuka
1. Lande na kakokaso nshihodia woho wakayaoke omvutshi Habakuka?
1 Etena kalekaso mpomana l’akambo wa kɔlɔ l’andja ɔnɛ, sho koka ndjaoka oko wakayaoke Habakuka lakambola Jehowa ate: ‘Lande na kamɛnyayɛ awui wa kɔlɔ? Ndo lande na katshikayɛ ɔhɛnyɔhɛnyɔ?’ (Hab. 1:3; 2 Tim. 3:1, 13) Naka sho kanaka yimba lo losango laki Habakuka ndo lo ɛnyɛlɔ kande ka kɔlamelo, kete dui sɔ koka tokimanyiya etena keso lo kongɛɛ lushi la kilombo laki Jehowa.—2 Pet. 3:7.
2. Ngande wakokaso mɛnya dia tekɔ la kɔlamelo ɛlɔ kɛnɛ?
2 Tonge la kɔlamelo: Lo dihole dia nde nkɔmɔ l’ɔtɛ w’awui wa kɔlɔ wakandɛnaka, Habakuka akatshikala nge lo nyuma ndo akayasha l’olimu ande. (Hab. 2:1) Jehowa akashikikɛ Habakuka di’Ɔtɛkɛta ande wayokotshama l’etena kahombama ndo ɔnɛ ‘onto ɔlɔlɔ ayɔsɛna oma lo kɔlamelo yande.’ (Hab. 2:2-4) Kakɔna kalembetshiya dui sɔ le Akristo wasɛna l’etena kɛnɛ kambotoleka nyɔngɔmɛ lo nshi y’ekomelo? Aha mbeya etena kayoya ekomelo mboleki ohomba, koko monga l’eshikikelo ɔnɛ tɔ kayoya. Mbetawɔ totshutshuyaka dia sho nsungukala lo nyuma ndo dia mbetsha esambishelo lo dihole dia ntondo.—Hɛb. 10:38, 39.
3. Lande na kahombaso nama ɔngɛnɔngɛnɔ aso l’olimu wa Jehowa?
3 Tɔngɛnangɛnake le Jehowa: Etena kayɔlɔsha Ngɔngɔ ka la Mangɔngɔ ekambi waki Jehowa, mbetawɔ kaso kayohembama. (Ezek. 38:2, 10-12) Awui w’ata mbelaka ekakatanu wa wolo kaanga le wanɛ walɛndja. Mbo ya ndɛ shishɔka, anto koka nshisha diangɔ diawɔ ndo ekondjelo kawɔ koka nkitakita. Kakɔna kayotosala etena kayotohomana l’ekakatanu? Habakuka akalongamɛka ekakatanu wa wolo, koko nde akayashikikɛ dia nama ɔngɛnɔngɛnɔ ande l’olimu wa Jehowa. (Hab. 3:16-19) ‘Ɔngɛnɔngɛnɔ wa Jehowa’ wayotokimanyiya nto dia mbikikɛ ehemba wa lo nshi yayaye.—Neh. 8:10; Hɛb. 12:2.
4. Ɔngɛnɔngɛnɔ akɔna wakokaso nkondja nshi nyɛ kana lo nshi yayaye?
4 Wanɛ wele Jehowa ayowashimbɛ lo lushi lande la kilombo layaye wayotetemala mbetshama lo mboka ka Nzambi ka lɔsɛnɔ. (Hab. 2:14) Wanɛ wayolwama vɔ lawɔ wayeka awui wendana la Jehowa. Kaanga nshi nyɛ, sho kokaka nkamba la diaaso tshɛ diakondjaso dia mbewoya anto awui wendana la Jehowa ndo la asangwelo ande wa diambo!—Osam. 34:1; 71:17.