Woho wa nkamba la dibuku Kakɔna kakoka Bible tetsha?

Dibuku Bible tetsha ndo Bible etshatɔ wekɔ woho akɔ waamɛ. Abuku akɔ ahende w’oma lo ɛngɔ kombaso dihomɔ dia mbetsha wekɔ l’awui wa mɛtɛ akɔ waamɛ ndo nɔngama woho akɔ waamɛ. Koko dibuku Bible tetsha diekɔ l’ɛtɛkɛta wa wɔdu ndo wɔlɔngami. Diɔ diakatondjama dikambo di’anto wakoka monga l’okakatanu wa nshihodia dibuku Bible etshatɔ. Lo dihole dia okotsha, dibuku Bible tetsha diekɔ la nɔtɛ ya la koma yele l’elembetshielo wa wɔdu wa tɔtɛkɛta ndo awui amɔtshi wa lo tshapita. Tshapita tshɛ bu la ambola wa lo mbɔtwɛlɔ kana kiombo y’ovuswelo. Koko totshapita komɛka la awui wɔtɛkɛtami lo tshena pe w’akambo wa mɛtɛ wa lo Bible wɔtɛkɛtami lo edingɔ. Oko wele dibuku Bible etshatɔ, dibuku Bible tetsha koka kahema lo etena tshɛ oyadi diɔ bu l’atei w’ekanda walɔmbama dia kahema lo ngɔndɔ. Ngande wakokaso nkamba l’awui amɔtshi w’amɛna wele lo dibuku Bible tetsha etena kalɔmbɔlaso wekelo wa Bible?

AWUI WƆTƐKƐTAMI LO TSHENA PE: Le anto efula, shambo yalɔmbɔlaso wekelo lo mbadia odingɔ lo dibuku Bible etshatɔ ko oma laasɔ mboka dimbola ayonga dimɛna efula. Ko tɔshi dia ombeki haleke mbeya ɔtɛkɛta akɔ kana hadia dimɛna. L’etena kɛsɔ, wɛ koka nsɔna dia nkamba la dibuku Bible tetsha. Oma laasɔ, nyu koka nkamba l’awui wɔtɛkɛtami lo tshena pe lo tshapita oko etshina ka wekelo ndo ombeki mbeyaka keketshama dia ndjadia ndamɛ awui wa lo edingɔ. Etenyi tshɛ kata ɔnɛ mɛtɛ k’oma lo Bible, koka mbekama l’edja ka minitɛ oko 15. Lam’ele awui wɔtɛkɛtami lo tshena pe bu l’akambo tshɛ wa lo edingɔ, ombetsha pombaka ndjalɔngɔsɔla dimɛna ndo nama lo yimba ehomba w’ombeki. Naka ombetsha ambeka l’ombeki edingɔ, kete nyu koka nkamba l’awui wɔtɛkɛtami lo tshena pe oko ovuswelo.

NƆTƐ YA LA KOMA: Tɔtɛkɛta ndo awui akina wele lo nɔtɛ ya la koma nɔngama lo woho watanemawɔ l’edingɔ. Ombetsha koka mbɔsa yɛdikɔ ya nkɛtshanya l’ombeki awui wele lo nɔtɛ ya la koma ya lo dibuku Bible tetsha wonya wa wekelo.