“[Pɔɔlɔ] akasha Nzambi losaka ndo akakeketala”

Etena kakoke ase etshumanelo ka la Rɔmɔ dia Pɔɔlɔ ekɔ lo ndjaye, olui w’anangɛso wakande lɔkɛndɔ oko kilɔmɛtrɛ 64 dia tohomana la nde. Shɛngiya yakɔna yaki la ngandji kawɔ ka ndjahombia le Pɔɔlɔ? “Lam’akawaɛnyi Pɔɔlɔ, nde akasha Nzambi losaka ndo akakeketala.” (Ets 28:15) Kaanga mbakeyamaka Pɔɔlɔ oko onto lakatakeketshaka tshumanelo diakandatembolaka, lo diaaso sɔ, etena kakinde lo lokanu nde mbakakeketshamaka.​—2Kɔ 13:10.

Ɛlɔ kɛnɛ emendji w’etshimbedi mindaka nkɛndɔ otsha lo tshumanelo diotshikitanyi dia tokeketsha anangɛso la akadiyɛso. Oko ekambi wa Nzambi tshɛ, lo tena dimɔtshi vɔ la wɔ mongaka l’ɔlɛmbɛlɔ, l’okiyanu ndo l’ɔkɔmwɛlɔ. Mbala kayaye kayembola omendji w’otshimbedi la wadɛnde etshumanelo kanyu, akokayɛ nsala dia mbakimanyiya dia vɔ monga la dihonga, l’oyango wa nyu “ndjokeketshana”?​—Rɔmɔ 1:11, 12.

• Sukɛ nsanganya y’otsha l’esambishelo. Omendji w’otshimbedi keketshamaka etena kayahondja apandjudi awui amɔtshi l’oyango wa vɔ nkondja wahɔ tshɛ lo tshɛ lo lomingu la laande lɔsɔ. (1Tɛ 1:2, 3; 2:20) Wɛ koka monga ombatshi mboka wa tshanda lo ngɔndɔ kɛsɔ. Onde wɛ koka nsambisha kaamɛ la nde kana la wadɛnde kana ntshɔ la ɔmɔtshi la l’atei awɔ dia teka l’ombeki ayɛ ɔmɔtshi Bible? Vɔ ngɛnangɛnaka nsambisha l’apandjudi wotshikitanyi, mbidja ndo wanɛ weke eyoyo kana wele bu la diewo di’efula dia nsambisha.

• Wɛ kokaka mbalongola lakayɛ. Onde wɛ koka mbasha dihole dia ndala kana yangɔ ya ndɛ? Dui sɔ mɛnyaka omendji w’otshimbedi la wadɛnde dia wɛ mbowaokaka ngandji. Vɔ hawolongamɛ dia wɛ mbasalɛ awui wa kawotake.​—Luka 10:38-42.

• Hokamɛ ndo nkamba la ɛlɔmbwɛlɔ ndo alako ande. La ngandji tshɛ omendji w’otshimbedi tokimanyiyaka dia mbeya woho wakokaso ndowanya olimu wakambɛso Jehowa. Lo tena dimɔtshi, nde kokaka tosha alako wa wolo. (1Kɔ 5:1-5) Nde mongaka l’ɔngɛnɔngɛnɔ etena kakitanyiyaso ndo kayakitshakitshaso l’ɛse k’ɛlɔmbwɛlɔ kande.​—Hɛb 13:17.

• Onga la lowando. Tɛ omendji w’otshimbedi la wadɛnde woho wokondjishayɛ wahɔ oma lo welo wakawadje. Wɛ koka mbatɛ dui sɔ okoko l’okoko kana mbafundɛ mukanda.​—Kɔl 3:15.