Sho tshɛ keketshanaka
1. Waaso akɔna wa lânde watosha wembwelo w’emendji weteta?
1 Ɔpɔstɔlɔ Paulo akafundɛ etshumanelo ka la Rɔma ate: “Dimi latukumbulaka nyena dia dimi nyusha ushasha omotshi wa nyuma dia nyu nshikikala. Ndu dia shu ndjukikitshana leku dimi la nyu lu mbetawo kasu.” (Romo 1:11, 12) Wembwelo w’emendji weteta wasalema nshi nyɛ toshaka waaso wa woho ɔsɔ wa sho keketshana.
2. Lande na kewoyama wembwelo w’omendji w’otshimbedi la ntondo?
2 Etshumanelo: Mbala tshɛ wembwelo w’omendji w’otshimbedi mbewoyamaka l’etshumanelo yɛdikɔ ya ngɔndɔ shato la ntondo. Dui sɔ toshaka diaaso dia sho takonge akambo la ntondo woho wa sho ndjoleka kondja wahɔ oma lo wembwelo ɔsɔ. (Ef. 5:15, 16) Naka wɛ kambaka olimu wa l’emunyi, kete ondo wɛ kokaka nɔmba vakashi dia sukɛ olimu w’esambishelo lomingu lɔsɔ. Apandjudi amɔ ndjalɔngɔsɔlaka dia kamba oko ambatshi mboka wa tshanda lo ngɔndɔ kembola omendji w’otshimbedi etshumanelo kawɔ. Naka wɛ ambôkongɛka dia mɛngɔla lomingu lɔsɔ, onde wɛ hakoke sala etshikitanu dia monga lawɔ?
3. Kakɔna kakokaso sala lo lomingu la lânde dia sho keketshama?
3 Oyango wa ntondo wa wembwelo w’omendji w’otshimbedi ele wa tokeketsha l’onto ndo l’onto ndo tolowanya l’olimu w’esambishelo. Onde wɛ kokaka nɔmba dia sambisha kâmɛ la nde kana la wadɛnde, naka nde ambotshuka? Omendji w’otshimbedi ngɛnangɛnaka sambisha la apandjudi weho la weho, mbidja ndo wanɛ wele bu la diewo di’efula kana wakombola monga la diewo di’efula l’esambishelo. Onto tshɛ koka kondja wetshelo oma lo woho wasalande mbɔtwɛlɔ l’olimu w’esambishelo ndo kamba la alako tshɛ wakokande tosha la ngandji. (1 Kor. 4:16, 17) Mbêlɛ dia nde ndjosanga laso lonya ayotosha diaaso dikina dia sho keketshana onto la wonyande. (Heb. 13:2) Lam’ele asawo ande mbɔtɔnɛka la ehomba w’etshumanelo, ekɔ ohomba sho mbôhokamɛka la yambalo tshɛ.
4. Ngande wakokaso keketsha omendji aso w’otshimbedi?
4 Omendji w’otshimbedi: Ɔpɔstɔlɔ Paulo kotshikitana la anango wa l’etshumanelo. Nde akahomana l’ekakatanu ndo l’ekiyanu, ndo nde aki l’ohomba ndo la lowando lo ekeketshelo kakandalongolaka. (2 Kor. 11:26-28) Etena kakoke ase etshumanelo ka la Rɔma dia Paulo laki lo lokanu l’etena kɛsɔ oyaye la Rɔma, anto amɔtshi wakande lɔkɛndɔ la kilɔmɛtɛlɛ 74 polo lo Kituka k’Apiyo dia tohomana la nde. “Lam’akawaenyi Paulu, ndi akuki [Nzambi] lusaka, akakikitala.” (Etsha 28:15) Sho lawɔ kokaka keketsha omendji aso w’otshimbedi. Towasha ‘nɛmɔ di’efula’ lo sukɛ l’osalosalo tshɛ lomingu la lânde. (1 Tim. 5:17) Tɛnya lowando la l’otema ɔtɔi lo welo wadjande dia wahɔ aso. Nde la wadɛnde wayɔngɛnangɛna etena kɛnawɔ mbetawɔ, ngandji ndo ekikelo kele laso.—2 Tes. 1:3, 4.
5. Lande na kele sho tshɛ tekɔ l’ohomba w’ekeketshelo nshi nyɛ?
5 Lo ‘tena nɛ dia pâ ndo dia wolo mbikikɛ,’ shi sho tshɛ tekɔ l’ohomba w’ekeketshelo? (2 Tim. 3:1) Tɔshi yɛdikɔ oma ko kakianɛ dia monga lawɔ ndo ndeka sambisha lo lomingu la lânde l’olimu la l’omendji w’otshimbedi. Oyadi emendji weteta kana apandjudi wa l’etshumanelo, sho tshɛ kokaka keketshana l’ɔngɛnɔngɛnɔ tshɛ. Lo yoho shɔ, ‘tayotetemala keketshana ndo mbodiana onto la wonyande.’—1 Tes. 5:11.