LƆSƐNƆ L’OKRISTO
Waa na wele angɛnyi ayɛ l’Ɛtɛrnɛtɛ?
Ɔngɛnyi nembetshiyamaka oko “onto lele ma ma l’onto okina oma lo ngandji kokanawɔ kana oma lo kɛnɛmɔ kashanawɔ.” Ɛnyɛlɔ, Jɔnatana nde la Davidɛ wakatatɛ monga la lɔngɛnyi la wolo l’ɔkɔngɔ wa Davidɛ ndjaka Ngɔliyatɛ. (1Sa 18:1) Onto l’onto aki la waonga w’amɛna wakangɛnangɛnaka okina. Ɔnkɔnɛ, lɔngɛnyi la wolo mpikama lo ewo k’oshika. Dia mbeya onto okina, dui sɔ nɔmbaka etena ndo mbidja welo. Koko, lo waa rɛzo sɔsio, anto koka nkoma angɛnyi aha l’okakatanu. Lam’ele anto wasawola la so l’Ɛtɛrnɛtɛ wekɔ l’akoka wa nkongɛ shikaa kɛnɛ kayowota ndo kolonganya lo yɛdikɔ mɔtshi woho wakoka anto akina mbaɔsa, bu wolo dia vɔ mbishɛ weho w’anto wewɔ mɛtɛ. Ɔnkɔnɛ, ekɔ ɔlɔlɔ ndjadjɛ elelo lo kɛnɛ kendana l’anto wɔtɔ la so angɛnyi l’Ɛtɛrnɛtɛ. Laasɔ, naka anto wahayeye mɛtɛ wokɔlɔmba dia wɛ mbɔtɔ la wɔ ɔngɛnyi, tokake wɔma wa ntona l’ɔtɛ w’ɔnɛ dui sɔ ayowanyangiya. Lo menda waale wakoka mbakomɛ, anto amɔtshi wakɔshi yɛdikɔ yaha kambaka la waa rɛzo sɔsio. Ko naka wɛ ambɔsɔna dia nkamba la rɛzo sɔsio, kakɔna kahombayɛ mbohɔka?
NYENDE VIDƐO YELE L’ƆTƐ A DUI ƆNƐ: ONGA LA YEWO LO RÉSEAUX SOCIAUX, NDO OMA LAASƆ NYOKADIMOLE LO AMBOLA WAYELA ANƐ:
Kakɔna kahombayɛ nkana yimba lɔkɔ la ntondo ka mbidja awui kana foto mɔtshi l’Ɛtɛrnɛtɛ?
Lande na kahombayɛ nsɔna angɛnyi ayɛ wa l’Ɛtɛrnɛtɛ la yambalo y’efula?
Lande na kahombayɛ ndjadjɛ elelo lo kɛnɛ kendana la lofulo la wenya letshayɛ lo rɛzo sɔsio?—Ɛf 5:15, 16