Woho wakokayɛ monga la wɔladi kaanga mbalɔma ata
Gary, laaki ɔsɔlayi mbutaka ate: “La ntondo ka dimi mbeka Bible, dimi kombeyaka lande na kele awui wa ngala, waha la losembwe ndo lofunge l’andja ɔnɛ. Koko kakianɛ, laya la wɔladi wa lo yimba. Dimi mbeyaka dia Jehowa Nzambi ayetɛ andja ɔnɛ dihole di’ekokelo.”
Gary keema ndaamɛ. Enda woho wakakimanyiya Bible anto akina.
KƐNƐ KATA BIBLE: “Jehowa le, wɛ ekɔ ɔlɔlɔ ndo suke dia dimanyiya.”—Osambo 86:5.
EKIMANYIELO: “Divɛsa nɛ shikikɛkami dia Jehowa ekɔ la kɛtshi. Dimi mbeyaka dia nde ekɔ suke dia dimanyiyami lo kɛnɛ tshɛ kakamasale lo nshi yakete etena kakamalɔka ata.”—Wilmar, Colombie.
KƐNƐ KATA BIBLE: “Dimi layanga ntonga olongo w’oyoyo ndo nkɛtɛ k’oyoyo; Ndo akambo wa ntondo hawotohɔma nto, ndo hawotoya lo otema nto.”—Isaya 65:17.
EKIMANYIELO: “Lekɔ lo diɛnɛ la lonyangu ndo l’ɔkɔmwɛlɔ l’ɔtɛ wa kɛnɛ kakakomɛ etena kakimi ɔsɔlayi. Koko divɛsa nɛ mboholakami dia keema edja, Jehowa ayanga minya tokanyi ta kɔlɔ tele la mi ndo ayanga kimanyiyami dia mbohɛ awui wa kɔlɔ tshɛ wandjɛ lo yimba. Vɔ hawotonga nto lo yimba ndo l’otema ami. Ande dui dia diambo diayosalɛ Jehowa le!”—Zafirah, États-Unis.
KƐNƐ KATA BIBLE: “Lo nshi yande kayɔngɔna onto ɔlɔlɔ, ndo wɔladi wayofulanɛ polo ndo ngɔndɔ hayowalɛ nto.”—Osambo 72:7.
EKIMANYIELO: “Mbala efula, dimi kanyiyaka ɛtɛkɛta wa lo divɛsa nɛ. Keema edja, ata ndo etombelo wa kɔlɔ w’oma lɔkɔ hawotonga nto ndo hatotoyakiyanya nto dikambo dia wakiso wa ngandji.”—Oleksandra, Ukraine.
KƐNƐ KATA BIBLE: “Anto ayɛ wavɔ wayɔsɛna. . . . Nyemɔ ndo nyode ekoko w’ɔngɛnɔngɛnɔ, nyu wanɛ wodjashi lo ditshu!”—Isaya 26:19.
EKIMANYIELO: “Suke l’ase nkumbo kami tshɛ wakadiakema etena kakawalɔshaka waa Tutsi. Koko divɛsa nɛ shikikɛkami dia layowaɛna nto. Lekɔ lo kongɛ mboka ekoko awɔ w’ɔngɛnɔngɛnɔ etena kayowolɔ!”—Marie, Rwanda.
KƐNƐ KATA BIBLE: “Etena ka tshitshɛ keto kambotshikala, ko kanga kɔlɔ hatonga nto . . . Koko akanga wa memakana wayokita nkɛtɛ, ndo vɔ wayɔngɛnangɛnaka heyama la wɔladi w’efula.”—Osambo 37:10, 11.
EKIMANYIELO: “Kaanga kele ta diamboshila, awui waha la losembwe wekɔ lo salema ndo anto wa kɔlɔ wekekɔ. Avɛsa anɛ wakakeketsha lo yoho y’efula. Jehowa mɛnaka awui tshɛ ndo nde shihodiaka akambo wele la mi. Nde ndakaka dia keema edja, awui asɔ tshɛ wayoshila ndo wayohamɛ.”—Daler, Tadjikistan.
Anto wɔtɛkɛtami lo periodikɛ kɛnɛ, wekɔ l’atei wa miliyɔ y’Ɛmɛnyi wa Jehowa wakakimanyiyama oma lo Bible dia monga la wɔladi. Vɔ wakeke woho wa nɛndja lohetsho lendana l’awui wa lokoho la demba, wedja ndo waoho. (Ɛfɛsɔ 4:31, 32) Ɛmɛnyi wa Jehowa wekɔ la lomangemange l’awui wa pɔlitikɛ ndo vɔ tonaka ndjasha l’awui wa ngala.—Joani 18:36.
Ɛmɛnyi wa Jehowa tanaka nto osukɔ oma lo ngandji ka lo nkumbo kawɔ k’onto l’ɔnango ka l’andja w’otondo. (Joani 13:35) Ɛnyɛlɔ, Oleksandra, lɔtɛkɛtiso dikambo diande yema la ntondo, akalawɔ nde la kadiyɛnde otsha lo wodja okina l’ɔtɛ wa ta. Nde mbutaka ate: “Etena kakatakome lo wodja okina, aha la tshimbatshimba takɛnyi dia Ɛmɛnyi wa lɛkɔ waki suke dia tolongola. Osukɔ awɔ wakatokimanyiya dia ndjaɔtɔnganyiya la lɔsɛnɔ la lo wodja okina oko ase dawo.”
Tambokelɛ dia wɛ ndja lo nsanganya yaso lɛnɛ ekaso losango la wɔladi l’oma lo Bible ndo woho wa nkamba la lɔ. Ɔtɔ lo jw.org dia ntana dihole dimɔtshi diosukani la yɛ kana lɔmba Wekelo wa Bible w’ofele kaamɛ l’Ɛmɛnyi wa Jehowa lo dibuku diele l’ɔtɛ a dui ɔnɛ: Ngɛnangɛnaka la lɔsɛnɔ pondjo pondjo!