Tosalake ɔlɔlɔ ndo tokahanake la anto akina
1 Dɔrɔka ‘akatshaka akambo efula w’ɛlɔlɔ ndo akakimɔka weshasha wa kɛtshi.’ (Etsha 9:36, 39) Anto wakaweyaka mbidja ndo Jehowa Nzambi wakôlangaka efula l’ɔtɛ wa yimba yande ya lokaho. Heberu 13:16 mbutaka ɔnɛ: “Tanyuhelaki ntshanela ololo la [“kahana la anto akina,” NW], ne dia [Nzambi] atongenangenaka l’elambu wa wuhu oso.” Ngande wakokaso sala ɔlɔlɔ ndo kahana la anto akina ɛlɔ kɛnɛ?
2 Yoho mɔtshi yakokaso salɛ akina ɔlɔlɔ ele lo kahana la wɔ ‘diangɔ diaso di’oshinga wolo.’ (Tuk. 3:9) Weshasha wakimɔso dikambo di’olimu wakambema l’andja w’otondo kimanyiyaka dia mbikisha Mbalasa ya Diolelo la ya Nsanganya ya Weke, ndo dia mbikisha mvudu ya Bɛtɛlɛ lo andja w’otondo. Lokaho laso ambokimanyiya miliyɔ y’anto dia vɔ kondja wahɔ oma lo wetshelo wa teokrasi ndo oma lo lɔngɛnyi la lo nyuma lakeketsha.
3 Tosambe anto: Etena katomba mpokoso, ekambi wa Jehowa wekɔ suke dia salɛ asekawɔ ambetawudi ndo wanɛ wele kema la wɔ mbetawɔ ɔtɔi ɔlɔlɔ. (Ngal. 6:10) L’ɔkɔngɔ w’olanelo wa izinɛ ɔmɔtshi wa la France, atshukanyi wakadjasɛka suke la izinɛ ɔsɔ wakate vate: “Anangɛso wa Akristo wakaye esadi eto dia ndjotokimanyiya dia minya mindo tshɛ ya lo luudu laso ndo ya lo mvudu y’asukanyi aso. Asukanyi aso wakambe efula woho wakaye anto efula dia ndjotokimanyiya.” Kadiyɛso kekina akakotsha ate: “Dikumanyi wakaye dia ndjotokimanyiya. Vɔ wakaye dia ndjotokeketsha. Kɛsɔ mɛtɛ mbakiso latɔ ohomba oleki ekimanyielo ka lo emunyi.”
4 Kânga mbele ekɔ weho efula wakokaso salɛ asukanyi aso ɔlɔlɔ, yoho yoleki dimɛna yakokaso mbakimanyiya ele lo kahana la wɔ ewo ka diambo k’akambo wa mɛtɛ, kendana ndo la “elungamelu ka lumu la pundju” lakalake Jehowa ndamɛ. (Tito 1:1, 2) Losango la lo Bible mbishaka wanɛ walela l’ɔtɛ wa akambo wa l’andja ndo l’ɔtɛ wa eongelo kawɔ ka pɛkato esambelo ka mɛtɛ. (Mat. 5:4) Nyɛsɔ tosale ɔlɔlɔ ndo tokahanake la akina etena keso la akoka wa sala dikambo sɔ.—Tuk. 3:27.