“Hangɛnyangɛnya”
1 Ɔsɔ ekɔ okadimwelo washa anto wa lo ahole amɔtshi mbala efula etena kasambishaso. Kakɔna kayotokimanyiya diaha sho kɔmɔ otema etena kahomanaso la wendjodi l’ɛtshi kaso ka nkɛtɛ? Ngande wakokaso memula nsaki k’anto dia vɔ nonga lokumu l’ɔlɔlɔ?
2 Tatoshishake ɔngɛnɔngɛnɔ: Mbohɔ ɛkɔkɔ wakonya anto efula dia monga la wendjodi ayotokimanyiya diaha sho shisha ɔngɛnɔngɛnɔ aso. Anto wakalongola wetshelo wa ohilwelo kana wakodiama oma le anto wahetawɔ dia Nzambi ekɔ mbeyaka monga ko hawɔshi Bible la nɛmɔ. Akina mbeyaka kɔmɔ l’ɔtɛ wa lɔkɛwɔ la dungi pende lɛnawɔ le as’ɛtɛmwɛlɔ. Le anto amɔtshi, wendjodi awɔ mbeyaka kɛnɛmɔla ekiyanu wele lawɔ ndo woho wewɔ bu la elongamelo. (Ef. 2:12) Anto amɔtshi nto ‘hawodje yimba’ nɛ dia etema awɔ waya wetsho la edinganu wa lo lɔsɛnɔ.—Mat. 24:37-39.
3 Oyadi wendjodi wa ngande wele la anto amɔtshi, sho kokaka monga l’ɔngɛnɔngɛnɔ l’esambishelo lo mbeya dia welo wadjaso tombolaka Jehowa. (1 Pet. 4:11) Ndo nto, sambisha akambo wa mɛtɛ kânga le wanɛ wahângɛnangɛna, keketshaka mbetawɔ kaso hita. Nyɛsɔ tosale la wolo dia mbɔsa anto wa l’ɛtshi kaso ka nkɛtɛ woho wawaɔsa Jehowa. Nde akoke ase Niniva waki kombeya “ntshikitanya lunya lawo la pami kana lunya lawo la lomoso” kɛtshi. (Jona 4:11) Anto wa l’ɛtshi kaso ka nkɛtɛ wekɔ l’ohomba wa lokumu l’ɔlɔlɔ! Ɔnkɔnɛ, tatohekɔke, koko sho la dia nyanga toho ta nomialomia nsaki kawɔ dia vɔ nonga losango la lo Bible.
4 Tɛkɛta awui wayakiyanya anto wa l’ɛtshi kanyu ka nkɛtɛ: Lo mbɔtwɛlɔ kayɛ, ondo wɛ koka tɛkɛta dikambo dimɔtshi diayakiyanya anto wa l’ɛtshi kanyu ka nkɛtɛ ndo mimbola ompokami ayɛ dia nde mbisha kanyi yande. Hokamɛnde etena katɛkɛtande, oma lâsɔ ɛnyande losango l’esambelo lele lo Bible lo kɛnɛ kendana la dui diayakiyanyande. L’ɔkɔngɔ wa mpokoso kakasalema lo ngelo kawɔ, Ɔmɛnyi wa Jehowa ɔmɔtshi akɛnya woho wakandayakiyanyaka l’otema ɔtɔi lo soko tshɛ diakandasambisha. Nde akate ate: “Mbala kakɔ ɔtɔi, anto wakatatɛ sawola la mi. Dimi lakasawola dimɛna la anto efula lushi lɔsɔ nɛ dia lakayasha le wɔ.”
5 Okakatanu tshɛ wahomana la anto wayokandɔ lo Diolelo diaki Nzambi. Yanga dia mbishola okakatanu waleka kiyanya ompokami ayɛ. Nde mbeyaka mbetawɔ dia wɛ mbolembetshiya losango lasha elongamelo lele lo Bible. Naka nde hetawe wonya ongo, kete nde mbeyaka ndjetawɔ kohokamɛ ‘kânga mbala kekina.’—Etsha 17:32.