Tokeketshanake etena keso l’esambishelo
1 Sho tshɛ ngɛnangɛnaka mboka ‘dui diakeketsha diɔtɛkɛtami lo etena kakoka.’ (Tuk. 25:11) Etena kasambishaso la anto akina, ngande wakokaso ndjashikikɛ dia asawo aso mbakeketshaka?
2 Asawo wakeketsha: Ekɔ mɛtɛ dui diakeketsha dia sawolaka akambo wa lo nyuma etena keso l’olimu w’esambishelo! (Osam. 37:30) Sho kokaka tɛkɛta dikambo dia mbɔtwɛlɔ kaso kana mbuta awui amɔtshi wakeketsha wakahomana la so lo esambishelo atete edja. (Etsha 15:3) Onde takɛnyi dui dimɔtshi diakeketsha oma lo wadielo aso wa Bible w’onto ndamɛ, oma lo periodikɛ yeke ka tomba kana oma lo losanganya la l’etshumanelo? Sho mbeyaka tɛkɛta di’akambo amɔtshi wakatama lo sawo dia lo sɛkɛ diakashama atete edja lo Mbalasa ka Diolelo.
3 Sho mbeyaka kɔmɔ etena katodjɛ ompokami ɔmɔtshi wekamu wahatakoke mbekola. Ayonga dimɛna efula dia sho mbɔsa minitɛ ngana l’ɔkɔngɔ wa sho mimɔ oma la soko diakɔ dia sho sɛdingola sho la onto lakatombi la so woho wakokaso kandola okakatanu ɔsɔ, ondo lo sɛdingola dibuku Comment raisonner. Ndo naka takangɛnyingɛnyi dui dimɔtshi dia lo mbɔtwɛlɔ kakasadi onto lakatombi la so, kete sho kokaka mbokeketsha lo mbândola la otema ɔtɔi.
4 Tɔshi yɛdikɔ: Onde ekɔ anto amɔtshi wa lo olui aso wa wekelo wa dibuku wahatasambisha la so nshi nyɛ? Naka sho nɔmba onto ɔmɔtshi dia nde totshindɛ l’esambishelo, kete dui sɔ mbeyaka konya lo sho ‘keketshana.’ (Romo 1:12) Ambatshi mboka wa pondjo ndo wa tshanda ngɛnangɛnaka etena kewɔ l’anto akina wa sambisha lawɔ, djekoleko la pindju ka pɛɛ kana la dikɔlɔ dia yɔɔ, etena kele apandjudi efula hawoleke sambisha. Sho kokaka kimanyiya ambatshi mboka lo mbatshindɛka l’esambishelo. Onde ekɔ opandjudi ɔmɔtshi wele la ɛkɔmɔ wele yônge yande hawosha diaaso dia nde sambisha efula? Kongɛ di’onto la ngasɔ totshindɛ l’esambishelo, ondo dia tɔlɔmbɔla wekelo wa Bible ayonga dimɛna efula.—Tuk. 27:17.
5 Mbala tshɛ, mandola onto kânga lo akambo wa totshitshɛ keketshaka. Sho pombaka mbohɔka dui sɔ etena kasambishaso la anto akina, lam’ele sho kombolaka ‘keketshana.’—1 Tes. 5:11.