TSHAPITA 17
“Nyuyaudia lu mbetawo kanyu kuleki ekila”
“Nyuyaudia lu mbetawo kanyu kuleki ekila, . . . Nyuyalamaki lu ngandji ka [Nzambi].”—JUDE 20, 21.
1, 2. Olimu akɔna wa wokelo wendana la yɛ, ndo lande na kele olimu ɔsɔ wekɔ ohomba?
OHƆSA dia wɛ ekɔ lo mbika luudu. Wɛ ambotatɛka olimu wa wokelo ɔsɔ ndo ayotetemala la wɔ lo nshi yayaye. Kânga mbahomanayɛ la ekakatanu, vɔ wekɔ olimu wa dimɛna. Oyadi kakɔna tshɛ kayotomba, wɛ hatotshika mbika luudu lɔsɔ kana minya yimba lɔkɔ nɛ dia lɔsɛnɔ layɛ kana nshi yayɛ ya la ntondo nemanɛka l’olimu ɔsɔ. Lande na? Nɛ dia olimu wa wokelo ɔsɔ wekɔ tshondo yayɛ!
2 Ombeki Judɛ akatɛkɛta dikambo di’olimu wa wokelo wasalaso le so shoamɛ. Etena kakandakeketsha Akristo dia vɔ ‘tshikala lo ngandji ka Nzambi,’ nde akawaɛnya nto kɛnɛ kakawakoke sala dia kotsha dikambo sɔ lo mbuta ɔnɛ: “Nyuyaudia lu mbetawo kanyu kuleki ekila.”a (Jude 20, 21) Naa toho tɔmɔtshi takokayɛ ndjaodia ndo sala dia mbetawɔ kayɛ ndeka monga wolo dia wɛ tshikala lo ngandji ka Nzambi? Nyɛsɔ tɔsɛdingole toho tosato takokaso ndjaodia lo nyuma.
TOTETEMALE MBODIA MBETAWƆ KASO LO WADJANGO WOSEMBWE WAKI JEHOWA
3-5. a) Ngande wayanga Satana kokesa lo kɛnɛ kendana la wadjango waki Jehowa? b) Ngande wahombaso mbɔsa wadjango waki Nzambi, ndo shɛngiya yakɔna yahombawɔ monga layɔ le so? Sha ɛnyɛlɔ.
3 Ntondotondo, sho pombaka keketsha mbetawɔ kaso lo ɛlɛmbɛ waki Nzambi. Lo wekelo wa dibuku nɛ, wɛ akɛnyi wadjango amɔtshi wosembwe waki Jehowa wendana la lɔkɛwɔ. Ngande wawaɔsayɛ? Satana nangaka kokesa dia wɛ mbɔsa dia ɛlɛmbɛ, atɔndɔ ndo wadjango waki Jehowa wekɔ wolo ndo kodjaka lo mpika. Nde ekɔ lo tetemala kamba la yoho shɔ tatɛ lam’akandakondja etombelo w’ɛlɔlɔ l’ekambɔ k’Ɛdɛna. (Etatelu 3:1-6) Onde wɛ mbetawɔka ndjatadia lo djonga yande shɔ? Dui sɔ nemanɛka la woho wɔsayɛ akambo.
4 Tɔshi dia wɛ ekɔ lo takɛndakɛnda lo jardɛ mɔtshi yele l’alɛmbɔlɛmbɔ w’amɛna ko wɛ ambɛna lokombo la mbolo la ntondo kayɛ lakoshimba dia wɛ ntshɔ lo lɛkɛ lokina la jardɛ shɔ. Alɛmbɔlɛmbɔ wele lɔkɔ wekɔ amɛna efula. L’etatelo, wɛ mbeyaka mɛna dia wakadje lokombo lɔsɔ wodjadja. Koko, wonya wendayɛ l’etei, wɛ ambɛna tambwɛ ka ngala kadikita! L’etena kɛsɔ, wɛ ayɛna dia lokombo lɔsɔ lakadjama dia kokokɛ. Onde ekɔ ondjakanyi ɔmɔtshi wayanga dia kosalɛ kɔlɔ? Ɔtɛkɛta wa Nzambi tɔhɛmɔlaka ɔnɛ: “Nyuyali ki, nyendaki. Utunyi anyu uhimbanyi atokendakendaka uku tambwe kadikita kayanga walendi.”—1 Petero 5:8.
5 Satana ekɔ ondjakanyi wa kɔlɔ efula. Lam’ele Jehowa halange dia sho mundama oma le Satana, Nde akatodjɛ ɛlɛmbɛ dia tokokɛ oma lo “kesu” efula yaki kanga kɔlɔ ɔsɔ. (Efeso 6:11) Ɔnkɔnɛ, etena tshɛ kakanaso yimba l’ɛlɛmbɛ waki Nzambi, sho pombaka mɛna dia vɔ kɛnɛmɔlaka ngandji katoka Shɛso lele l’olongo. Naka sho mbaɛna lo yoho shɔ, kete ɛlɛmbɛ waki Nzambi wayonga kiɔkɔ y’ekokelo ndo y’ɔngɛnɔngɛnɔ le so. Ombeki Jakɔba akafunde ate: “[Onto] lenda elembe w’ololo wa ndjadjasela, ndu latetemala loko . . . ayotshokwama lu etsha andi.”—Jakoba 1:25.
6. Naa yoho yoleki dimɛna ya keketsha mbetawɔ kaso lo ɛlɛmbɛ la atɔndɔ waki Nzambi wosembwe? Sha ɛnyɛlɔ.
6 Nsɛna lo yoho yɔtɔnɛ la ɛlɛmbɛ waki Nzambi ekɔ yoho yoleki dimɛna ya keketsha mbetawɔ kaso le Ombidji w’ɛlɛmbɛ ndo lo lomba lele la ɛlɛmbɛ ande. Ɛnyɛlɔ, lo “elembe wa Kristu” mbele ndo didjango dia mbetsha anto akina ‘akambo tshɛ wakandadjanga.’ (Ngalatiya 6:2; Mateu 28:19, 20) Akristo kitanyiyaka nto didjango dia sanganaka kâmɛ dia tɛmɔlaka Nzambi ndo dia keketshanaka lam’asawɔ. (Heberu 10:24, 25) Ɛlɛmbɛ waki Nzambi ɛsɔ mendanaka ndo la dako diatotɛ dia sho nɔmbaka Jehowa mbala la mbala ndo mbodihwɛka otema. (Mateu 6:5-8; 1 Tesalonika 5:17) Naka sho nsɛna lo yoho yɔtɔnɛ la ɛlɛmbɛ ɛsɔ, kete tayoleka mɛna dia vɔ wekɔ mɛtɛ ɛlɔmbwɛlɔ koludi la ngandji. Mbakitanyiya toshaka ɔngɛnɔngɛnɔ ndo ɔlɔ wahatakoke kondja dihole dikina l’andja ɔnɛ wa kɔlɔ. Etena kakanayɛ yimba lo ɛlɔlɔ wakokayɛ kondja lo kitanyiya ɛlɛmbɛ waki Nzambi, shi mbetawɔ kayɛ keketshamaka?
7, 8. Ngande wakeketsha Ɔtɛkɛta wa Nzambi wanɛ woka wɔma dia vɔ hawotokoka tetemala kitanyiya ɛlɛmbɛ waki Nzambi l’edja katete ɛnɔnyi?
7 Koko, anto amɔtshi kandakandaka dia kana wayokoka tetemala kitanyiya ɛlɛmbɛ waki Nzambi l’edja katete ɛnɔnyi. Vɔ mbokaka wɔma ɔnɛ watokoyosekola ɔlɛmbɛ ɔmɔtshi. Naka wɛ kanyiyaka ngasɔ, kete ohɔka ɛtɛkɛta ɛnɛ: ‘Dimi lele Jehowa, Nzambi kayɛ, Ɔnɛ latoketshaka di’ɔlɔlɔ ayɛ ndo latokɔlɔmbɔlaka lo mboka kahombayɛ ntshɔ. Otondoyalaka wɛ akahokamɛ ɛlɛmbɛ ami, tshike ki kayɛ kotoyala oko ɔkɛdi w’ashi ndo sambo kayɛ k’ɔlɔlɔ oko asuku wa ndjale.’ (Isaya 48:17, 18) Onde wɛ ambokanaka yimba la ɛtɛkɛta ɛsɔ ndo ambɛnaka woho wewɔ ɛtɛkɛta wakeketsha?
8 Lo divɛsa nɛ, Jehowa ekɔ lo tohola dia sho kondjaka wahɔ lo mbokitanyiya. Naka sho sala dui sɔ, nde tolakaka ɛtshɔkɔ ehende. Wa ntondo, ki kaso kayonga oko ɔkɛdi w’ashi, mbuta ate ka dimɛna, k’efula ndo kahakomɛ. Ɔtshɔkɔ wa hende ele, sambo kaso k’ɔlɔlɔ kayoyala oko asuku wa ndjale. Naka wɛ memala l’omamu wa lushi lɔmɔtshi la woke, kete wɛ ayɛna dia aha la tâmu, lushi tetemalaka monga l’asuku. Sho mbeyaka dia lushi la woke layotetemala monga l’asuku pondjo pondjo. Jehowa mbutaka dia sambo kayɛ k’ɔlɔlɔ, mbuta ate lɔkɛwɔ layɛ la dimɛna kokaka mbɛdikama l’asuku asɔ. L’edja tshɛ kasalayɛ la wolo dia tshikala la kɔlamelo le nde, nde hakokalɛki pondjo! (Osambu 55:22) Shi alaka asɔ keketshaka mbetawɔ kayɛ le Jehowa ndo lo wadjango ande wosembwe?
“TUTETEMALI LU DITSHELU DI’ETSHUNDJU W’ANTU”
9, 10. a) Lande na kele tshunda ekɔ oyango w’ohomba efula wahomba Okristo ndjadjɛ? b) Ngande wele mɛna akambo lo yoho ya lo nyuma kimanyiyaka di’onto monga l’ɔngɛnɔngɛnɔ?
9 Dui dia hende diendana la olimu ayɛ wa wokelo mɛnamaka lo ɛtɛkɛta wakasambiyama ɛnɛ: “Tutetemali lu ditshelu di’etshundju w’antu.” (Hebrews 6:1) Tshunda ekɔ oyango w’ohomba efula wahomba Akristo ndjadjɛ. Otshikitanyi la eongelo ka kokele kahakoke anto monga la tɔ nshi nyɛ, anto kokaka tshunda. Ndo nto, Akristo wambotshunda mongaka l’ɔngɛnɔngɛnɔ w’efula lo kambɛ Jehowa. Lande na?
10 Okristo wambotshunda ekɔ onto lele la lonyuma la dimɛna. Nde mɛnaka akambo woho wawaɛna Jehowa. (Joani 4:23) Paulo akafunde ate: “Waku watuyelaka akambu wa dimba, watukanaka akambu wa dimba. Keli waku watuyelaka nyuma, watukanaka akambu wa nyuma.” (Romo 8:5) Onto latokanaka akambo wa demba honge l’ɔngɛnɔngɛnɔ w’efula nɛ dia nde kanaka paka dikambo di’akambo ande ato, hɛnyi akambo etale ndo mbikaka washo paka l’akambo wa l’emunyi. Onto lele la lonyuma la dimɛna ekɔ l’ɔngɛnɔngɛnɔ nɛ dia nde ndjashaka le Jehowa, ‘Nzambi k’ɔngɛnɔngɛnɔ.’ (1 Timote 1:11) Onto lele la lonyuma la dimɛna nomɔlomɔka dia ngɛnyangɛnya Jehowa ndo nde namaka ɔngɛnɔngɛnɔ ande kânga etena kende l’ekakatanu. Lande na? Nɛ dia le nde, ekakatanu mboshaka diaaso dia mɛnya ɔnɛ Satana ekɔ kanga kashi ndo dia nde nama olowanyi ande ndo ngɛnyangɛnya Shɛso lele l’olongo.—Tukedi 27:11; Jakoba 1:2, 3.
11, 12. a) Kakɔna kakate Paulo lo dikambo dia “akoka w’ekanelo ka yimba” w’Okristo, ndo naa kitshimudi ya tshɛkɛta ‘mbekiya’? b) Woho akɔna w’okambelo wele la demba diaso ohomba dia diɔ pama ndo tenyi dia diɔ kamba dimɛna?
11 Onto pombaka ndjaekiya dia nde monga la lonyuma la dimɛna ndo tshunda. Tɔsɛdingole divɛsa nɛ: “Mbo ya ndɛ ya wolo yekɔ dikambo di’anto wambotshunda, wanɛ wele, oma l’ekambelo, wekɔ l’akoka w’ekanelo ka yimba wambekiyama dia tshikitanya ɔlɔlɔ la kɔlɔ.” (Heberu 5:14, NW) Etena kakatɛkɛta Paulo dikambo dia ‘mbekiya’ akoka aso w’ekanelo ka yimba, nde akakambe la tshɛkɛta ya lo Grɛkɛ yakawakambaka la yɔ mbala efula lo ahole wa tɔkɛnyɔ wa la Ngirika wa lo ntambe ka ntondo. Yɔ mbeyaka kadimɔma ɔnɛ ‘ndjaekiya oko ɔkɛnyi wa tɔkɛnyɔ.’ Tokane yimba kakianɛ lo kɛnɛ kalɔmbama di’onto ndjaekiya ngasɔ.
12 Etena kotɔso, tenyi diaso dia demba hadiekiyama dia kamba dimɛna. Ɛnyɛlɔ, ɔna ashashi mongaka l’okakatanu dia mɛna woho wakamba tonya la tokolo tande. Diakɔ diele, nde mbetshetshaka tonya wetshetshetshetsha polo lo nde ndjakuna nkala, tshelo yawosha pâ efula. Koko, yema yema oma lo okambelo, tenyi diande dia demba ndjekiyamaka dia kamba dimɛna. Nde tatɛka sɛmɛ, mbakula, memala ndo kɛndakɛnda.b Ko kayotota dikambo di’ɔkɛnyi wa tɔkɛnyɔ? Etena kɛnaso ɔkɛnyi wa tɔkɛnyɔ afumbɔfumbɔ ndo akamba dimɛna l’anya ndo l’ekolo ande, aha la tâmu sho mambaka efula. Koko, kɛnɛ kasalande kɛsɔ haye oyaya, nde akɔshi wenya efula dia ndjaekiya. Bible mbutaka dia osutshesutshelo wa demba ɔsɔ wekɔ la “waho tshitshe” lo mbɛdika la okambelo wa l’akoka aso w’ekanelo ka yimba wa lo nyuma!—1 Timote 4:8.
13. Ngande wakokaso mbekiya akoka aso w’ekanelo ka yimba?
13 Lo dibuku nɛ, tambɔtɛkɛta awui efula wakoka kokimanyiya dia wɛ mbekiya akoka ayɛ w’ekanelo ka yimba, dui diayokokimanyiya dia wɛ tshikala la kɔlamelo le Jehowa oko onto lele la lonyuma la dimɛna. Sɛdingolaka atɔndɔ ndo ɛlɛmbɛ waki Nzambi l’ekimanyielo ka dɔmbɛlɔ etena kahombayɛ mbɔsa tɛdikɔ ta lo lɔsɛnɔ la lushi la lushi. Mbala tshɛ kalangayɛ mbɔsa yɛdikɔ mɔtshi, yambola ɔnɛ: ‘Ɛlɛmbɛ kana atɔndɔ akɔna wa lo Bible wendana la dikambo nɛ? Ngande wakokami kamba la wɔ? Kakɔna kahombami sala dia ngɛnyangɛnya Shɔmi lele l’olongo?’ (Tukedi 3:5, 6; Jakoba 1:5) Yɛdikɔ tshɛ yayoyɔsa lo ndjela akambo asɔ yayokokimanyiya dia wɛ nyomekiya akoka ayɛ w’ekanelo ka yimba. Wekiyelo wa ngasɔ ayokokimanyiya dia wɛ monga ndo tshikala mɛtɛ onto lele la lonyuma la dimɛna.
14. Dia sho pama lo nyuma, mbo ya ndɛ yakɔna yahombaso nanga, ndo ɔhɛmwɛlɔ akɔna wahombaso mbohɔka?
14 Kânga etena kakomaso anto wambotshunda, sho kokaka tetemala pama lo nyuma. Onto pombaka ndɛ dia nde pama. Diakɔ diakate Paulo ate: “Mbo ya ndɛ ya wolo yekɔ dikambo di’anto wambotshunda.” Dui di’ohomba diayokokimanyiya dia wɛ keketsha mbetawɔ kayɛ ele, tetemala ndɛ diangɔ dia ndɛ dia wolo dia lo nyuma. Etena kakambayɛ dimɛna la kɛnɛ kekayɛ, wɛ kɛnɛmɔlaka lomba ndo Bible mbutaka ɔnɛ: “[Lo]mba mbeli dikambu diuleki.” Ɔnkɔnɛ, sho pombaka mbeka dia nanga akambo wa mɛtɛ w’ohomba efula watetsha Shɛso. (Tukedi 4:5-7; 1 Petero 2:2) Ekɔ mɛtɛ di’onto lakondja ewo ndo waonga w’oma le Nzambi ndoko kânga l’ɔkɔkɔ wa ndjafuna ndo monga la lotamanya. Sho pombaka ndjasɛdingolaka mbala la mbala dia menda kana lotamanya kana wɔdu ɔmɔtshi wambotatɛ monɛma ndo pama l’etema aso. Paulo akafunde ate: “Nyuyaunganeli nyame, kana nyu la mbetawo; nyuyaediki nyame.”—2 Koreto 13:5.
15. Lande na kele ngandji kekɔ ohomba di’onto pama lo nyuma?
15 Kânga etena kashila luudu mbikama, olimu tetemalaka monga. Lɔ lekɔ l’ohomba wa nɔngɔswamaka ndo nunyamaka l’ɔtɛ w’etshikitanu ɛmɔtshi. Lâsɔ, kakɔna kele la so ohomba dia sho tshunda ndo tetemala nɔngɔsɔla lonyuma laso? Tekɔ ntondotondo l’ohomba wa ngandji. Sho pombaka tetemalaka pamia ngandji kokaso Jehowa ndo anangɛso l’akadiyɛso. Naka sho kema la ngandji, kete ewo tshɛ kele la so ndo kɛnɛ tshɛ kasalaso bu la nɛmɔ ndo ekɔ londjo l’anyanya mbadjaso. (1 Koreto 13:1-3) Oma lo ngandji, sho kokaka koma Akristo wambotshunda ndo tetemala pama lo nyuma.
TOSHIKIKƐ TIMBA TASO LO ELONGAMELO KATOSHA JEHOWA
16. Satana tshutshuyaka anto dia vɔ monga la tokanyi ta woho akɔna, ndo ekokelo kakɔna katosha Jehowa?
16 Nyɛsɔ tɔsɛdingole dui dikina diendana l’olimu ayɛ wa wokelo. Dia monga ombeki w’oshika waki Kristo, wɛ pombaka namaka ekanelo kayɛ ka yimba. Satana lele owandji w’andja ɔnɛ aya manyi lo tshutshuya anto dia vɔ monga la tokanyi ta kɔlɔ, diaha vɔ mɛna akambo la sso di’ɔlɔlɔ, diaha vɔ monga la wɛkamu ndo diaha vɔ monga l’elongamelo. (Efeso 2:2) Tokanyi ta ngasɔ tekɔ kɔlɔ efula le Okristo oko wele dikundji diambotatɛ ndana wâle lo luudu. Diɛsɛ ko, Jehowa toshaka ehomɔ kɛmɔtshi kakokɛ tokanyi taso, mbuta ate elongamelo.
17. Ngande wɛnya Ɔtɛkɛta wa Nzambi ohomba wele la elongamelo?
17 Bible shilaka dihomɔ dia ta dia lo nyuma diahombaso ndɔta dia ndɔshana la Satana ndo l’andja ande ɔnɛ. Ehomɔ kɛmɔtshi k’ohomba efula ka l’atei adiɔ ko lofulɛ, mbuta ate “elungamelu ka panda.” (1 Tesalonika 5:8) Lo nshi yakafundamaka Bible, ɔsɔlayi akeyaka dia nde hatokoka tshikala la lɔsɛnɔ lo ta naka nde halɔtshi lofulɛ. Lofulɛ lakasalemaka mbala efula la lowolo ndo l’ɔkɔdi wa ekoho ka nyama, lakakokɛka ɔtɛ oma l’akuwa w’otunyi ndo oma lo wâle ekina. Oko wakakokɛka lofulɛ ɔtɛ w’ɔsɔlayi, mbele ndo elongamelo kokɛka tokanyi ndo timba taso.
18, 19. Ɛnyɛlɔ kakɔna kakasha Yeso lo nama elongamelo, ndo ngande wakokaso mbôkoya?
18 Yeso ekɔ ɛnyɛlɔ koleki tshɛ k’onto laki la elongamelo. Tohɔ kɛnɛ kakandakikɛ l’otsho w’ekomelo wa lɔsɛnɔ lande lanɛ la nkɛtɛ. Ɔngɛnyi ande ɔmɔtshi w’oshika akofunge l’ɔtɛ w’akuta. Okina akawanguna dia nde haweye. Akina wakotshike ndo wakalawɔ. Ase wodja ande wakôtone ndo wakalɔmbɛ di’asɔlayi w’ase Rɔma mbɔhɛnyahɛnya ndo mbodiaka. Mɛnamaka dia hatotodja oshimu esɔ, naka sho mbuta di’ehemba wakahomana la Yeso wekɔ ehemba woleki tshɛ wakoka onto pomana la wɔ. Kakɔna kakôsukɛ? Heberu 12:2 kadimolaka ɔnɛ: “Ne dia ongenongeno wakakitshama la ntundu kandi. Ndi akonyola sonyi kawo, akatudjase lu lunya la pami la kiti ka diulelu ka [Nzambi].” Yeso kombohɛ kânga yema “ongenongeno wakakitshama la ntundu kandi.”
19 Ɔngɛnɔngɛnɔ akɔna wakakitshama la ntondo ka Yeso? Nde akeye dia oma l’ekikelo kande, nde ayokimanyiya dia lokombo la Jehowa l’ekila kidiama. Nde akahombe mɛnya lo yoho yoleki tshɛ dia Satana ekɔ kanga kashi. Ndoko elongamelo kekina kakakoke mbisha Yeso ɔngɛnɔngɛnɔ woleki wɔsɔ! Nde akeyaka nto dia Jehowa akahombe mbofuta efula l’ɔtɛ wa kɔlamelo yande, mbuta ate l’ɔkɔngɔ wa nshi ngana, nde akahombe ndjonga l’ɔngɛnɔngɛnɔ wa mɛnana la She. Ɔnkɔnɛ, kânga mbakandahomana l’ehemba woleki tshɛ wolo, Yeso akake washo ande l’elongamelo k’ɔngɛnɔngɛnɔ kɛsɔ. Sho pombaka sala ngasɔ. Sho lawɔ tayonga l’ɔngɛnɔngɛnɔ lo nshi yayaye. Jehowa mbishaka ɔmɔmɔ la l’atei aso diɛsɛ dia mbisha lonya l’okidiamelo wa lokombo lande la woke. Sho kokaka mɛnya dia Satana ekɔ kanga kashi lo mbeta lo wedi wa lowandji laki Jehowa oko wende Nkum’Olongo ndo tshikala lo ngandji ka Shɛso oyadi ehemba kana ekakatanu akɔna tshɛ wakoka tokomɛ.
20. Kakɔna kakoka tokimanyiya dia sho tetemala monga la tokanyi t’amɛna ndo la elongamelo?
20 Jehowa halange tsho dia futa ekambi ande wa kɔlamelo, koko nde ekɔ lo nomɔlomɔ dia sala dikambo sɔ. (Isaya 30:18; Malaki 3:10) Nde ngɛnangɛnaka dia mbisha ekambi ande kɛnɛ kalanga etema awɔ. (Osambu 37:4) Omalɔkɔ, tolame lo yimba elongamelo kele la ntondo kaso. Tatokesamake pondjo la tokanyi ta kɔlɔ ndo tambolana t’andja ɔnɛ w’omusu waki Satana. Naka tamboka dia yimba y’andja ɔnɛ yambotatɛ monɛma lo tokanyi kana l’etema aso, kete sho pombaka nɔmba Jehowa l’etete dia nde tosha “ki ka [Nzambi], kuleki yimba tshe.” Ki k’oma le Nzambi kɛsɔ kayolama etema ndo akoka aso w’ekanelo ka yimba.—Filipi 4:6, 7.
21, 22. a) Elongamelo kakɔna ka diambo kele la “ului a wuki”? b) Dui diakɔna diendana la elongamelo k’Akristo dialekayɛ nanga, ndo yɛdikɔ yakɔna yamboyɔsa?
21 Ande elongamelo ka diambo kahombaso kanaka yimba lɔkɔ lee! Naka wɛ ekɔ l’atei wa “ului a wuki,” w’anto “wa[y]uya uma lu pa ka wuki,” kete kana yimba lo lɔsɛnɔ la dimɛna layangayɛ monga la lɔ. (Enyelo 7:9, 14) Lam’ele Satana ndo ɛdiɛngɛ ande wayonyɛma, wɛ ayotshungwama lo yoho yahayakoke fɔnya kakianɛ. Akɔna l’atei aso akoka fɔnya woho wayonga lɔsɛnɔ aha la shɛngiya ya kɔlɔ yaki Satana? Ayonga mɛtɛ ɔngɛnɔngɛnɔ dia kamba l’ɛlɔmbwɛlɔ ka Yeso ndo anto 144000 wayolɛ kâmɛ la nde dia kadimola nkɛtɛ paradiso! Tekɔ mɛtɛ l’ɔngɛnɔngɛnɔ dia mbeya woho wayonyɛma hemɔ tshɛ, dikɔmɔ tshɛ ndo dia kanyiya woho wayotolongola wakiso wa ngandji wakavu wayolɔ ndo dia nsɛna woho wakalange Nzambi l’etatelo dia sho nsɛna! Oko wayototatetemalaka sukana la eongelo ka kokele, tayosukana l’okotshamelo wa daka diele lo Romo 8:21 diata dia “mboto lu ndjadjasela ka lutumbu la ana a [Nzambi].”
22 Jehowa nangaka kosha lotshungɔ loleki kânga woho wakanyiyayɛ. Okitanyiya mbayokokonya lo woho wa lotshungɔ la ngasɔ. Shi elongamelo kɛsɔ totshutshuyaka dia sho kitanyiyaka Jehowa lushi la lushi? Lo weho akɔ tshɛ, totetemale la ndjaodia lo mbetawɔ kaso koleki ekila dia sho tshikala pondjo pondjo lo ngandji ka Nzambi!
[Nɔtɛ ya l’ɛse ka dikatshi]
a Tshɛkɛta ya lo Grɛkɛ yokadimɔmi ɔnɛ “ndjaodia” nembetshiyaka nto mbika luudu kana ɛngɔ kɛmɔtshi.
b Ase siansɛ mbutaka dia sho ndjongaka yema yema la dikoka dia lânde diatokimanyiya dia sho mbeya woho wakamba tenyi diaso dia demba. Ɛnyɛlɔ, dikoka sɔ mbatokimanyiya dia sho mbida saka kânga sho ndiha washo. Womoto ɔmɔtshi lakashisha dikoka sɔ kokoka nto memala, kɛndakɛnda ndo kânga mbidjasɛ.
[Osato wa lo lɛkɛ 201]
Demba diaki ɔkɛnyi wa tɔkɛnyɔ mbekiyamaka oma lo ekambelo