“Toke tshunda di’otondo di’anangɛso ngandji”
Ɛtɛkɛta wakasambiyama wa l’ɔtɛ a dui ɔnɛ wakafundama ambeta suke l’ɛnɔnyi nunu pende. (1 Pet. 2:17) Koko ɛlɔ mbamboleka mɛnama ohomba wa nkamba l’ɛtɛkɛta akɔ. Ko ngande wakokaso mboka nkumbo kaso k’onto l’ɔnango ka l’andja w’otondo kɛsɔ ngandji? Ndo l’andja ɔnɛ wahokana anto ngandji, akokaso nsala diaha ngandji kaso mbɔla? (Mat. 24:12) Enda kana wɛ kokaka nkadimola lo ambola wayela anɛ etena kendayɛ vidɛo Toute la communauté des frères.
1) Etena kakɔna kakatɔtɔ lo nkumbo k’onto l’ɔnango k’Akristo? 2) Naa elimu esato weso lo nkamba kaamɛ l’atei wa nkumbo kaso ka l’andja w’otondo k’onto l’ɔnango na? 3) Ngande wɛnya anangɛso l’akadiyɛso eshikikelo kawɔ ka nsambisha a) l’oswe wa shɛnga wa l’Alaska, b) l’abongo wa weke wa l’Erɔpɛ, ndo c) l’atei wa ngamba ya la Pérou? 4) Lande na kahatahombe pondjo mbɔsa di’esambishelo ekɔ oko olimu w’anyanya? 5) Sha bɛnyɛlɔ diɛnya woho wakakeketshana ndo wakakimanyiyana Ɛmɛnyi wa Jehowa lo tena dia wolo, ɛnyɛlɔ a) l’ɔkɔngɔ wa didimu dimɔtshi dia nkɛtɛ, b) l’ɔkɔngɔ wa ngembe kɛmɔtshi ka wolo ndo c) etena kalɔma ta dimɔtshi dia lam’asa ase wodja? 6) Lo toho takɔna ta shikaa takokaso sho tshɛ nkɛnɛmɔla ngandji l’atei wa nkumbo kaso k’Akristo na? (Jni. 13:35) 7) Ɛlɔlɔ akɔna wakondjaso lo nkamba kaamɛ lo wokelo wa Mbalasa yaso ya Diolelo? 8) Anangɛso wa l’Erɔpɛ wa l’ɛstɛ ndo wa la Russie woho akɔna wakawatetemala la monga la lonyuma la dimɛna etena kakashimbe lɛɛta olimu awɔ? 9) Naa welo wa laande wadja Ɛmɛnyi wa Jehowa dia mbɔtɔ lo nsanganya ya weke, ndo lande na? 10) Ko ngande wambokeketsha vidɛo nyɛ yɛdikɔ yayɛ a) ya ntɛmɔla Jehowa kaamɛ l’ananyɔ lo nsanganya y’Akristo, b) dia kimanyiyaka anto akina lo tena dia dihombo, ndo c) dia sambishaka la kɔlamelo wonya tshɛ ndo woho tshɛ wakokayɛ? 11) Ngande ndo etena kakɔna kakokayɛ nkamba la vidɛo nyɛ l’esambishelo?
Ɔkɔkɔ woleki woke wakatotshutshuya dia mbɔtɔ lo nkumbo kaso k’onto l’ɔnango k’Akristo ele ngandji kokaso Jehowa. Ɔnkɔnɛ, sho nangaka mbeka awui wendana la nde ndo mbetsha anto akina awui akɔ. Ndo anto wele Jehowa mbaokaka ngandji, sho lawɔ mbaokaka ngandji. Etena kaakimanyiyaso lo tena diewɔ lo dihombo, sho hatolongamɛ dia Nzambi tosha losaka. Koko, sho mbishaka Nzambi losaka nɛ dia sho mbɔsaka nkumbo kaso k’onto l’ɔnango oko woshasha w’oshinga wolo w’oma le nde. Oko wambosukana ekomelo k’andja ɔnɛ wahokana anto ngandji, nyɛsɔ totetemale mboka tshunda di’otondo di’anangɛso ngandji!