ANDJA WAMBOLOLA L’EKAKATANU

2 | Nkokɛ falanga ndo diangɔ diele la yɛ

OHOMBA WA DUI SƆ

Anto efula ndɔshaka tshondo ya ta lushi tshɛ dia nkondja kɛnɛ kewɔ mɛtɛ l’ohomba. Lonyangu ko, andja wambolola l’ekakatanu ɔnɛ koka mbetɛ dui sɔ okakatanu w’efula. Lande na?

Etena katomba ekakatanu l’ɛtshi kɛmɔtshi ka nkɛtɛ, diangɔ diele oko mbo ya ndɛ ndo luudu mongaka oshinga wolo efula.
Mpokoso koka nkonya anto dia nshisha elimu awɔ kana mbakonya dia nkamba elimu wa wolo wele la difuto dia tshitshɛ.
Mpokoso koka ndanya ekanda w’anto, mvudu yawɔ kana diangɔ diele la wɔ. Dui sɔ konyaka anto efula lo wola.

Kɛnɛ kahombayɛ mbeya

Naka wɛ nkamba la falanga yayɛ la lomba tshɛ, kete wɛ ayoleka ndjalɔngɔsɔla dimɛna dikambo dia mpokoso kakoka ntomba.
Ekokelo kasha falanga hatshikala mɛtɛ edja; ohɔ dia difuto diayɛ, ekondjelo kayɛ ndo diangɔ diele la yɛ koka nshila nɛmɔ.
Ekɔ diangɔ diele falanga hayokoke nsomba, ɛnyɛlɔ ɔngɛnɔngɛnɔ kana kaamɛ ka lo nkumbo.

Kɛnɛ kahombayɛ nsala oma ko kakianɛ

Bible mbutaka ɔnɛ: “Naka tekɔ la yangɔ ya ndɛ ndo dihɔndɔ dia ndɔta, tɔngɛnɛngɛnɛ la diangɔ sɔ.”—1 Timɔte 6:8.

Ngɛnangɛna la kɛnɛ kele la yɛ kɛdikɛdi ndjadjɛ elelo lo kɛnɛ kakombolayɛ ndo ngɛnangɛna naka tambokondja kɛnɛ kele laso ohomba dia lushi la lushi. Dui sɔ diekɔ ohomba djekoleko etena keyɛ bu la falanga efula.

Lo ntena dimɔtshi, dia ngɛnangɛna la kɛnɛ kele la yɛ, wɛ pombaka ntshikitanya yoho yayɛ ya lɔsɛnɔ. Naka wɛ kombolaka nshi tshɛ diangɔ dieyɛ bu l’akoka wa nsomba, kete wɛ ayoleka monga l’ekakatanu wendana la falanga.

WOHO WA NTONDOYA—Alako w’ohomba

Lo ntena di’ekakatanu, nkokɛ falanga yayɛ lo nsala awui w’ohomba anɛ:

KITSHAKITSHA ADEPASƐ

Ombaka yema ya dikuta

Toshishake falanga lo ɛngɔ tshɛ keyɛ bu l’ohomba. Yambola wate: ‘Onde lekɔ mɛtɛ l’ohomba wa mutuka? Onde hakoke nsala jardɛ yakokami monɛ diangɔ diakokami ndɛka lo dihole dia dimi sombaka losomba?’
La ntondo ka wɛ nsomba ɛngɔ kɛmɔtshi, yambola wate: ‘Onde lekɔ mɛtɛ l’ohomba atɔ? Onde lekɔ mɛtɛ la falanga ya kisomba?’
Lɔmba ekimanyielo oma le lɛɛta kana oma le atshunda akina naka wekɔ.

“Oko nkumbo takadjasɛ kaamɛ ndo takasɛdingola yoho yaso ya lɔsɛnɔ. Takanya yoho tshɛ yɔkɔkwɛlɔ wa demba yakoka toshishɛ falanga efula. Ndo nto, takakongɛ dia sombaka diangɔ dia ndɛ di’oshinga wɔdu.”—Gift.

OMBAKA YEMA YA DIKUTA

Kitshakitsha adepasɛ

Bible mbutaka ɔnɛ: “Asangwelo wa kanga etete konyaka mɛtɛ lo otondoyelo,koko wanɛ tshɛ wasala akambo la esasesase wayonga wola ndooko onyake.” (Tokedi 21:5) Naka wɛ mombaka yema ya falanga kete, wɛ ayoyashikikɛ dia adepasɛ wasalayɛ hatolekana kɛnɛ kakondjayɛ.

Ntondotondo, mfunda lofulo la falanga la fɔnyayɛ layoyokambaka la yɔ ngɔndɔ tshɛ.
Oma laasɔ, ngɔndɔ tshɛ nsala listɛ l’adepasɛ wekeyɛ oma la nsala ndo enda falanga ngana yakakambe la yɛ.
Ndo nto yashikikɛ dia wɛ ekɔ la falanga yokokayɛ nsomba diangɔ tshɛ dieyɛ l’ohomba. Naka wɛ ambɛna dia wɛ bu la falanga efula, nya diangɔ dieyɛ mɛtɛ bu l’ohomba.

“Ngɔndɔ tshɛ, sho salaka listɛ la falanga yakondjaso ndo adepasɛ wasalaso. Dimi la wadɛmi mombaka yema ya dikuta lo dikambo di’awui wa wanyandja ndo lo dikambo dia diangɔ diakombolaso nsomba lo nshi yayaye. Etena kasalaso dui sɔ, sho kitshakitshaka ekiyanu nɛ dia sho mbeyaka la ntondo woho wayotokamba la falanga yakondjaso.”—Carlos.

EWƆ ABASA / OMBAKA FALANGA

Ewɔ abasa / Ombaka falanga

Sala ekongelo ka dimɛna ka nkitshakitsha abasa. Naka kokaka, tɔsɔmbake falanga. Lo dihole dia nsala ngasɔ, nsala la wolo dia momba falanga yayɛ dia nsomba kɛnɛ keyɛ l’ohomba.
Lamaka yema ya falanga ngɔndɔ tshɛ dia kokimanyiya dikambo dia adepasɛ wa lo nshi yayaye weyɛ halongamɛ.

KAMBAKA EFULA / NKOKƐ OLIMU AYƐ

Bible mbutaka ɔnɛ: “Olimu tshɛ wa wolo wekɔ la wahɔ.” —Tokedi 14:23.

Kambaka olimu efula / Nkokɛ olimu ayɛ

Tetemala monga l’ekanelo ka dimɛna lo dikambo di’olimu ayɛ. Oyadi kaanga olimu wakambayɛ bu olimu wakombolayɛ, vɔ wayotetemalaka kokondjɛ yema ya falanga.
Onga onto lakamba olimu efula ndo onga onto lakokawɔ mbɛkɛ otema. Dui sɔ diayokokimanyiya dia wɛ ntetemala nama olimu ayɛ ndo naka wɛ amboshisha olimu akɔ, ayonga dui dia wɔdu dia wɛ ntana okina.

“Dimi kambaka olimu tshɛ wɛnama, oyadi kaanga halange olimu akɔ kana olimu akɔ bu la difuto di’efula oko walongamɛmi. Lokeyaka dia dimi kambaka olimu dimɛna, oko onto layakambɛ ndamɛ.”—Dmitriy.

Kɛnɛ kakokayɛ nsala naka wɛ ekɔ lo nyanga olimu . . .

Ntakola nna ntondo. Nsawola l’ewandji wa lo kɔpanyi wele l’elimu wakokayɛ nkamba, oyadi kaanga vɔ hawosha di’ewoyelo. Tɛ angɛnyi ndo ase nkumbo dia wɛ ekɔ lo tayange olimu.
Yaekesanyiya l’awui tshɛ. Ekɔ yema wolo dia wɛ ntana olimu wele la kɛnɛ tshɛ kakombolayɛ.