Onde wɛ âkohɔ?
Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:
• Lande na kakahombe Mɛsiya mvɔ?
Nyɔi ka Yeso kakɛnya dia onto lele kokele kokaka nama omamemelo ande le Nzambi kânga la ntondo k’ehemba woleki wolo. Ndo nto, nde akafute kibawo ka pɛkato yakahowɔ tokanula ta Adama ko akâdihwɛ mboka k’otsha lo lɔsɛnɔ la pondjo.—12/15, lɛkɛ 22-23.
• Kakɔna kakoka nkimanyiya onto dia nde nɔka wanu la wɛdimo?
Dɔmbɛlɔ ndo wekelo wa Bible kokaka mbokimanyiya. Ndo nto, ekɔ ohomba nde monga la ndjakimɛ, nkitanyiya yɛdikɔ yakandɔshi ndo nsɔna angɛnyi w’ɛlɔlɔ. Onto lɔsa yɛdikɔ ya nɔka wanu pombaka ndjadjɛ elelo wa shikaa ndo mbeka dia mbuta ɔnɛ hanɔ.—1/1, lɛkɛ 7-9, lo Falase.
• Awui akɔna wahomba mbɔtɔ l’asawo wasawola ambutshi l’anawɔ?
Lâdiko dia sawolaka la wɔ, ambutshi pombaka mbokaka anawɔ ambola ndo mpokamɛka ekadimwelo awɔ la solo dia lotutsha. Ambutshi efula wakɔshi yɛdikɔ ya sawolaka l’anawɔ wonya w’olelo.—1/15, lɛkɛ 18-19.
• Lam’ele Jehowa ekɔ kokele, lande na katondonyangaka?
Mbala mɔtshi, Nzambi tshikitanyaka dionga diande otsha le anto. Ɛnyɛlɔ, olekanyi mbala ɔtɔi, ase Isariyɛlɛ w’edjedja wakoke Jehowa ɔkɔngɔ ndo wakatatɛ ntɛmɔla nzambi nkina. Omalɔkɔ, Jehowa akayotshikaka dia mbakokɛ. Koko, etena kakayatshumoya ase Isariyɛlɛ oma lo munga yawɔ ndo kakawalɔmbɛ Nzambi dia nde mbâkimanyiya, nde akatshikitanya yɛdikɔ yakandawaɔsɛ kana ‘akanyange.’ (Emb. 2:18)—2/1, lɛkɛ 21, lo Falase.
• Akambo akɔna wakoka nkonya di’onto batizama mbala ka hende?
Dui sɔ kokaka salema naka onto labatizama aki la yoho ya lɔsɛnɔ kana akasalaka dikambo dimɔtshi lo woshɛshɛ diakandakoke mbitshanyema oma l’etshumanelo otondonga nde aki amboshila batizama.—2/15, lɛkɛ 22.
• Naa tɛkɛ nɛndɛ tosato tasha anto amɔtshi wele l’awui w’akadikadi?
Anto amɔtshi mbɔsaka dia ekɔ dimɛna mbiva l’ɔtɛ wewɔ ase wola. Akina mbɔsaka ɔnɛ mbiva ekɔ dimɛna lo mbuta ɔnɛ: “Onto tshɛ mbivaka.” Anto amɔtshi wakatɔngɔna diangɔ dia nɛmɔ ndo wakadiɔshi mbutaka ɔnɛ: “Ntɔngɔna kema mbiva.” Bible hetawɔ tɛkɛ nɛndɛ tɔsɔ tshɛ.—3/1, lɛkɛ 12-14, lo Falase.
• Lo wɛɛla waki Yeso w’eponga la kangaka, kakɔna kalembetshiya wonelo wa woho w’ɔlɔlɔ?
Yeso Ɔna onto akakambe ekambɔ etena kakandakambaka olimu ande lanɛ la nkɛtɛ. Ntatɛ lo Pɛntɛkɔsta ka lo 33 T.D., woho w’ɔlɔlɔ wakonɛma etena kakakitama Akristo nyuma dia vɔ monga ana wa Nzambi, mbuta ate ana wa Diolelo.—3/15, lɛkɛ 20.
• Ngande wadjama eponga wa didjidji wa lo wɛɛla waki Yeso l’odiko wa Jehowa? (Mat. 13:30)
Prɔfɛsiya kɛnɛ kekɔ lo kotshama l’etena k’otale ka lo nshi y’ekomelo ya dikongɛ di’akambo nɛ. Ana wa Diolelo w’akitami, mbuta ate eponga wa didjidji wekɔ lo mbidjama l’odiko wa Jehowa etena kɔtshiyamawɔ l’etshumanelo k’Akristo kana etena kalongolawɔ difuto diawɔ dia l’olongo.—3/15, lɛkɛ 22..
• Anto akɔna wakashikikɛ abuku wahomba monga lo Afundelo w’Akristo wa lo Grɛkɛ?
Aha losanganya l’ase ɛtɛmwɛlɔ kana owandji ɔmɔtshi w’ɔtɛmwɛlɔ, koko Akristo wa mɛtɛ mbakashikikɛ efundelo wakasambiyama mɛtɛ l’ɛlɔmbwɛlɔ ka nyuma k’ekila kaki Nzambi. Dui sɔ mbɔtɔnɛka la woho wele woshasha ɔmɔtshi wa lo dihindo wa nyuma wakalongola Akristo wa l’etshumanelo ka lo ntambe ka ntondo aki ‘oshihodielo w’ɛtɛkɛta wakasambiyama.’ (1 Kor. 12:4, 10)—4/1, lɛkɛ 28.