Nsambisha lo diaaso tshɛ mongaka l’etombelo w’ɛlɔlɔ

ONDE wɛ mongaka suke dia nkamba la waaso wakoka mpomana la yɛ aha la wɛ nongamɛ l’ɛtshi ka nkɛtɛ k’etshumanelo kanyu? Anangɛso w’Akristo wa l’osomba wa Turku wele suke la dibongo dimɔtshi di’edjedja dia lo wodja wa Finlande wakakambe la diaaso dimɔtshi diakâkondjiyɛ etombelo w’ɛlɔlɔ.

Atete edja, anangɛso wa l’osomba wa Turku wakɛnyi di’olui ɔmɔtshi w’apami w’oma la Asiya wakakome l’osomba awɔ dia ndjoshidiya olimu w’osalelo wa masuwa wa woke wakasalemaka. L’ɔkɔngɔ diko, ɔnangɛso ɔmɔtshi akashola lɛnɛ akahange anto asɔ. Nde akeye nto dia la pindju tshɛ wakɔsaka mituka dia ntshɔ lo dibongo lɛnɛ akawakambaka olimu. Aha la ntshimbatshimba, nde akewoya anangɛso wa l’etshumanelo k’Angɛlɛ ka la Turku.

Dikumanyi dia l’etshumanelo kɛsɔ wakɔshi dia oyelo w’angɛndangɛnda asɔ l’osomba awɔ aki diaaso diakiwɔ konongamɛka dia mbasambisha losango la Diolelo ndo aha la ntshimbatshimba vɔ wakɔshi yɛdikɔ ya nkongɛ esambishelo ka lânde dikambo di’anto asɔ. Lushi la lomingu la lomingu lɔsɔ, apandjudi dikumi wakatshumana suke la dihole diemala mituka l’eshidi esambele wa pindju. L’etatelo, vɔ kɔmɛna ndoko ose olimu. Vɔ wakayambola ɔnɛ: ‘Onde tambokoma l’ɔkɔngɔ? Onde vɔ wambomɔ la Turku?’ Oma lâsɔ, vɔ wakɛnyi ose olimu ɔmɔtshi ɔlɔtshi ahɔndɔ w’olimu ayaye. Okina akoyele ndo efula wakatombe. Oshimu kele edja, ase olimu efula wakemala lo dihole sɔ. Apandjudi wakatatɛ mbasambisha ndo mbasha ekanda wa l’Angɛlɛ. Yɛdikɔ y’oko wonya a tango wakete la ntondo k’ase olimu tshɛ mbɔtɔ lo mituka ndo dui sɔ diakakimanyiya anangɛso dia vɔ nkondja etena ka nsawola l’efula ka l’atei awɔ. Etena kakonɛ mituka, ase olimu asɔ wakɔshi tobukubuku 126 ndo periodikɛ 329.

Etombelo w’amɛna ɛsɔ wakakeketsha anangɛso dia vɔ nyomokalola lomingu lakayele lo diembwelo di’omendji w’otshimbedi. Lushi lɔmɔtshi lakalɔka mvula l’eshidi esamalo l’etenyi, l’ɔkɔngɔ w’omendji w’otshimbedi nɔmbɔla losanganya l’otsha l’olimu w’esambishelo, apandjudi 24 wakatshu lɛnɛ emala mituka. Lo diaaso sɔ, vɔ wakatshu ndo la mikanda wa l’ɔtɛkɛta wa Tagalog nɛ dia wakashola di’efula k’anto asɔ wakaye oma lo wodja wa Philippines. La pindju kɛsɔ, etena kakonɛ mituka otsha lo dibongo, ase olimu asɔ wakɔshi abuku 7, tobukubuku 69 ndo periodikɛ 479. Ohokanyiya ɔngɛnɔngɛnɔ waki l’anangɛso l’akadiyɛso wakasha lonya l’esambishelo kɛsɔ!

La ntondo k’ase olimu asɔ nkalola lo wedja awɔ, anangɛso wakatembola efula ka l’atei awɔ l’ahole wakawahange ndo wakawalembetshiya dimɛna dimɛna losango la Diolelo. Ase olimu amɔtshi wakate dia vɔ wakasawola l’Ɛmɛnyi wa Jehowa la ntondo lo wedja ekina. Ase olimu asɔ wakɛnya lowando lawɔ lo welo wakadje anangɛso dia mbasambisha lo nshi yakiwɔ lo wodja wa Finlande.

Onde wɛ mongaka suke dia nkamba la waaso wakoka mpomana la yɛ aha la wɛ nongamɛ l’ɛtshi ka nkɛtɛ k’etshumanelo kanyu? Onde wɛ mbɔsaka yɛdikɔ ya nsambisha anto w’oma l’ahole wotshikitanyi? Naka ngasɔ, kete wɛ lawɔ kokaka ngɛnangɛna woho wakangɛnangɛna anangɛso wa l’osomba wa Turku.

[Kartɛ/Osato wa lo lɛkɛ 32]

(Dia mbeya awui tshɛ, enda l’okanda)

FINLANDE

HELSINKI

Turku

[Efundelo wɛnya kanga]

STX Europe