Kɛnɛ kele mɛtɛ lo dikambo di’Aramangɛdɔna
“Yo yaki nyuma ya edienge . . . yatutshokaka le khumi ya di[k]anga ya kete tshe . . . , wakâsanganya lo dihuli dietawo l’oteketa w’asi Heberu vati: Aramangedona.” —ENYELO 16:14, 16.
ARAMANGƐDƆNA kadimɔmaka tena dimɔtshi ɔnɛ “Haramangɛdɔna,” mbuta ate lokombo la dihole dimɔtshi. Koko mɛnamaka dia dihole sɔ hadiotanema ndoko lɛkɛ lɔmɔtshi la nkɛtɛ.
Ko kakɔna kalembetshiya mɛtɛ tshɛkɛta “Aramangedona”? Lande na kakambemayɔ mbala efula dia nembetshiya ta?
Wakâsanganya lo dihole dietawɔ vate Aramangɛdɔna
Tshɛkɛta ya lo Hɛbɛru yokadimɔmi ɔnɛ Har–Magedon nembetshiyaka “okongo wa Mengido.” Kânga mbele ndoko okongo wa ngasɔ watanema l’andja ɔnɛ, dihole dielamɛ ɔnɛ Mengido diekɔ. Ɔsɔ ekɔ dihole diakatanemaka lo asanga w’etadimbo ehende w’ohomba efula wa lo nɔrdɛ ka wodja w’Isariyɛlɛ w’edjedja. Lam’ele ata efula wakalɔmaka suke l’okongo ɔsɔ, anto wakayotatɛ nkamba la lokombo Mengido dia nembetshiya ta.a
Koko, tshɛkɛta Mengido yokambemi lanɛ halembetshiya woho w’ata wakalɔmaka lɛkɔ, koko yɔ nembetshiyaka lande na kakalɔmaka ata lɛkɔ. Tohɔ dia Mengido aki etenyi kɛmɔtshi ka Nkɛtɛ ya daka yakasha Nzambi ase Isariyɛlɛ. (Etumbelu 33:1; Jashua 12:7, 21) Nde akadje dɔkɔlɔkɔ l’anto asɔ dia nde ayowashimbɛ oma le andɔshi awɔ, ndo nde akasale dui sɔ. (Euhwelo k’Elembe 6:18, 19) Ɛnyɛlɔ, la Mengido mbakashimbɛ Jehowa ase Isariyɛlɛ lo yoho ya dihindo oma le asɔlayi w’ase Kanana wakayalɔmbwamaka oma le nkumekanga Jabina nde la Sisɛra owandji ande w’alembe.—Embadi 4:14-16.
Ɔnkɔnɛ, tshɛkɛta “Haramangɛdɔna,” kana “Aramangedona” ekɔ la kitshimudi ya didjidji. Yɔ nembetshiyaka ta diayɔlɔshana weolo ehende.
Prɔfɛsiya ka lo Enyelo mɛnyaka dia kema edja Satana nde l’ɛdiɛngɛ ande wayotshutshuya emboledi dia nsanganya alembe awɔ, l’oyango wa vɔ nshimba ekambi waki Nzambi diaha vɔ nkamba olimu awɔ. Ta sɔ diayodiaka miliyɔ y’anto nɛ dia Nzambi ayɔlwɛlɛ ekambi ande.—Enyelo 19:11-18.
Bible mɛnyaka ɔnɛ Nzambi ekɔ kanga “ketshi, lahuki kele esadi, luludi too la ngandji ka mamba,” ko lande na kayondɔlɔsha ta diayodiaka anto efula sɔ? (Nehemiya 9:17) Dia sho nshihodia lande na kayosala Nzambi ngasɔ, sho pombaka nkondja ekadimwelo lo ambola asato wayela anɛ: 1) Ayotatɛ la ta diakɔ? 2) Lande na kayɔlɔsha Nzambi ta diakɔ? 3) Etombelo akɔna wayonga la ta diakɔ?
1. AYOTATƐ LA TA DIAKƆ?
Woho wayɔlɔsha Nzambi ta di’Aramangɛdɔna hɛnya dia nde mbayotshiya la ta diakɔ. Koko nde ayoshimbɛ anto w’ɛlɔlɔ oma le wanɛ wayolanga mbashila oshiki. Wanɛ wayotatɛ la ta sɔ ele “khumi ya dikanga ya kete tshe,” mbuta ate emboledi wa wedja. Lande na kayowɔlɔsha ta sɔ? Nɛ dia oko wende kanga lokeso, Satana ayokamba la wɔ ndo l’elui w’asɔlayi dia ndɔsha wanɛ watɛmɔla Jehowa Nzambi.—Enyelo 16:13, 14; 19:17, 18.
Lam’ele anto mbɔsaka lotshungɔ lele la wɔ la ntɛkɛta ndo la monga lo ɔtɛmwɛlɔ ɔmɔtshi la nɛmɔ lo wedja ɛmɔtshi ɛlɔ kɛnɛ, anto efula hawetawɔ kanyi y’ɔnɛ emboledi wayɔlɔsha ekambi waki Nzambi kana wayoshimba ɔtɛmwɛlɔ awɔ. Koko, dui dia ngasɔ diakasalema lo ntambe 20 ndo diekɔ lo salema nshi nyɛ.b Kânga mbediɔ ngasɔ, ekɔ etshikitanu ehende wa weke lam’asa ata wakalɔmaka lo nshi y’edjedja la ta di’Aramangɛdɔna. Ntondotondo, ta sɔ diayɔlɔma l’andja w’otondo. Dui dia hende ele, kɛnɛ kayosala Jehowa Nzambi lo ta sɔ kayoleka kɛnɛ tshɛ kakandasale l’ata wakalɔma lo nshi y’edjedja. (Jeremiya 25:32, 33) Bible mbelɛka ta sɔ ɔnɛ: ‘Ta dia lushi la woke la Nzambi Kanga-Wolo-Tshɛ.’
2. LANDE NA KAYƆLƆSHA NZAMBI TA DIAKƆ?
Jehowa nɔmbaka wanɛ wɔtɛmɔla dia vɔ monga anto wadja wɔladi ndo nanga atunyi awɔ. (Mika 4:1-3; Mateu 5:43, 44; 26:52) Ɔnkɔnɛ, vɔ hawotɛmba dihomɔ dia ta etena kayɔlɔma ta sɔ dia vɔ ndjakokɛ. Naka Nzambi heke lonya dia shimbɛ ekambi ande, kete vɔ wayoshila oshiki. Ndo nto, naka Jehowa Nzambi mbetawɔ dia dui sɔ salema, kete lokombo lande layoshama sɔnyi. Naka Jehowa mbetawɔ di’atunyi ande nshila ekambi ande oshiki, kete ayɛnama diele oko nde hawaoke ngandji, bu la losembwe kana bu la wolo. Kɛnɛ kele mɛtɛ ele, dui sɔ hasalemaki pondjo.—Osambu 37:28, 29.
Lam’ele Nzambi hakombola dia kânga onto ɔtɔi ndjolanyema, nde ekɔ lo tɔhɛmɔla lo tɛnya kɛnɛ kayangande nsala. (2 Petero 3:9) Lo tshimbo ya Bible, nde toholaka akambo wakandasale lo nshi y’edjedja etena kakalɔshamaka ekambi ande. (2 Khumi ya Dikanga 19:35) Ndo nto, Bible mɛnyaka ɔnɛ lo nshi yayaye, Satana nde l’anto ande wayɔlɔsha ekambi waki Nzambi, koko Jehowa ayonyomekɛ lonya ndo ayolanya atunyi ande. Lo mɛtɛ, aya edja efula kele Ɔtɛkɛta waki Nzambi wakate dia Jehowa ayolanya atshi wa kɔlɔ. (Tukedi 2:21, 22; 2 Tesalonika 1:6-9) L’etena kɛsɔ, atunyi tshɛ wayeya ɔnɛ vɔ wekɔ lo ndɔsha Nzambi Kanga-Wolo-Tshɛ.—Ezekiele 38:21-23.
3. ETOMBELO AKƆNA WAYONGA LA TA DIAKƆ?
Etena kayɔlɔma ta di’Aramangɛdɔna, miliyɔ y’anto wayotshikala la lɔsɛnɔ ndo dui sɔ diayonga etatelo k’etena ka wɔladi lanɛ la nkɛtɛ.—Enyelo 21:3, 4.
Dibuku di’Enyelo mɛnyaka dia “ului a wuki w’antu” wayohandɔ lo ta sɔ. (Enyelo 7:9, 14) L’ɛlɔmbwɛlɔ ka Nzambi, anto asɔ wayosha lonya dia nɔngɔsɔla nkɛtɛ woho wa tɔ nkoma Paradiso kakakongɛ Jehowa oma k’etatelo.
Onde wɛ mbeyaka etena kayoya ta diayowɔlɔsha ekambi waki Nzambi?
[Nɔte ya l’ɛse ka dikatshi]
a Woho wakambawɔ l’okongo ɔsɔ ɔnɛ ta heyama dimɛna le anto efula. Ɛnyɛlɔ, osomba welɛwɔ Hiroshima wa lo wodja wa Japon wakalanyema la bɔmbɛ atɔmikɛ mbeyamaka nshi nyɛ oko dihole diakalɔma ta dia wolo efula.
b Lomanu la nyemba y’ase Juda lo ta dia hende di’andja w’otondo ekɔ ɛnyɛlɔ kɛmɔtshi kɛnya di’emboledi wekɔ lo mpemba dia nshila ɛtɛmwɛlɔ ndo weho w’anto tshɛ oshiki. Lo ta diakalɔma lo Union soviétique, ndo ase ɛtɛmwɛlɔ wa lo U.R.S.S. wakahɛnyahɛnyama. Enda sawo diele l’ɔtɛ a dui ɔnɛ: “Anto wele la wɔladi wekɔ lo mamɛ lokombo lawɔ la dimɛna” diakatondjama lo Tshoto y’Etangelo ya Ngɔndɔ ka tanu 1, 2011 oma le Ɛmɛnyi wa Jehowa lo Falase.
[Osato wa lo lɛkɛ 6]
Lo nshi y’edjedja, Jehowa akashimbɛ ekambi ande lo ndjaka atunyi awɔ
[Osato wa lo lɛkɛ 7]
Jehowa ayoshimbɛ ekambi ande nto lo ta dia Aramangɛdɔna