Etena Kakɔna Kayoya ta Di’aramangɛdɔna?

“Dimi lakendi, lakenyi ului a wuki w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe . . . vo weli wanɛ wambuya uma lu [fɔnu] ka wuki.”—ENYELO 7:9, 14.

ETENA kasɛnaso kɛnɛ kayokoma lo kondoko lo Aramangɛdɔna. Lo ngande?

L’andja w’otondo, anto wakambɛ Jehowa ndo wasɛna lo yoho yɔtɔnɛ l’atɔndɔ wa lo Bible wokongaka. L’ekimanyielo kaki Nzambi, miliyɔ y’anto y’oma lo wedja tshɛ, waoho tshɛ ndo w’ɛtɛkɛta tshɛ wekɔ lo nkenga nkumbo k’onto l’ɔnango ka l’andja w’otondo kele kâmɛ ndo kokana ngandji. Nkumbo kɛsɔ kekɔ paka l’atei w’Ɛmɛnyi wa Jehowa.—Joani 13:35.

Kema edja nto, Satana ayanga nsanganya alembe ande dia ndɔsha anto wele la wɔladi asɔ ndo wɛnama dia vɔ bu l’onto lakoka mbakokɛ. (Ezekiele 38:8-12; Enyelo 16:13, 14, 16) Ngande wakokayɛ nshikikɛ dui sɔ? Bible mɛnyaka akambo amɔtshi wakoka tokimanyiya dia sho mbeya etena kayoya ta di’Aramangɛdɔna. Akambo efula l’atei awɔ wamboshila kotshama.

Akambo wele wɛ ekɔ lo mɛna ekotshamelo kawɔ

Ambeki waki Yeso wakawombola woho wayokoka anto mbeya etena kayonga “ekumelu k’etena kene.” (Mateu 24:3) Nde akâkadimola lo mbatɛ ɔnɛ: “Wudja ayolosha wudja ukina. Diulelu diayolosha diulelu dikina. Ndjala ka kasha la adidimu wa kete wayuyala lu dihuli la dihuli. Keli akambu aso tshe weli etatelu k’asui.” (Mateu 24:7, 8) Ɔpɔstɔlɔ Paulo akayɔtɛkɛta di’etena kakɔ kâmɛ oko “nshi y’ekumelu” lo mbuta ɔnɛ nshi shɔ yayonga “tena dia wulu.” (2 Timote 3:1) Onde wɛ hɛnyi dia prɔfɛsiya shɔ yekɔ lo kotshama ɛlɔ kɛnɛ?

Lande na kayonga etena kɛsɔ wolo? Ɔpɔstɔlɔ Joani toshaka ɔkɔkɔ ɔmɔtshi. Nde akate dia ‘etena ka tshitshɛ’ kambotshikala dia Satana nde l’ɛdiɛngɛ ande ndanyema. Diakɔ diele Satana ekɔ la “kele ka wuki” l’etena kɛnɛ. (Enyelo 12:7-12) Onde wɛ hɛnyi di’anto efula wa l’andja w’otondo wekɔ lo nsala akambo la nkɛlɛ ndo wekɔ lo ndjasha l’awui wa ngala?

Ndo nto, Yeso akate dia l’etena kɛnɛ ka wolo, olimu ɔmɔtshi w’ohomba efula wayokambema. Nde akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Ɛlɔ kɛnɛ, Ɛmɛnyi wa Jehowa wekɔ lo nsambisha lokumu l’ɔlɔlɔ la Diolelo diaki Nzambi lo wedja ndekana 235 ndo wekɔ lo nkadimola ekanda walembetshiya Bible l’ɛtɛkɛta ndekana 500. Periodikɛ hiende yalembetshiya Bible yatondjawɔ mbala la mbala ele, Tshoto y’Etangelo la Réveillez-vous ! ndo ndoko okanda wambokahanyema l’andja w’otondo ko mbɛdima la periodikɛ shɔ. Ndo nto, Ɛmɛnyi wa Jehowa wambokadimola Bible l’ɛtɛkɛta oko 100. Koko olimu ɔsɔ tshɛ wekɔ lo kambema oma le anto wayakimɔ la lolango ndo wekɔ lo nkɛndakɛnda la weshasha wa la lolango. Shi olimu w’esambishelo wa diambo ɔsɔ wekɔ ekotshamelo ka prɔfɛsiya kɛmɔtshi kaki Yeso?

Bible mɛnyaka akambo wayokonya dia Jehowa Nzambi ndɔ l’atunyi ande. Ɛsɔ tɔsɛdingole prɔfɛsiya shato yele wɛ ayɛna ekotshamelo kayɔ.

Akambo wayanga salema kem’edja

Prɔfɛsiya 1. Bible mbutaka dia wedja wayoda tokoko dia mɛnya ɔnɛ “ki la lutui tshitshi” lamboyala. Ondo vɔ wayɔfɔnya ɔnɛ wambokandola ekakatanu wele l’anto. Koko akambo wayoyelana la tokoko tɔsɔ honga ndoko dui dikina lâdiko dia ki.—1 Tesalonika 5:1-3.

Prɔfɛsiya 2. Oma lâsɔ, ewandji wa pɔlitikɛ wayokadimwɛ ɛtɛmwɛlɔ wa l’andja w’otondo. Lo Bible, ewandji ɛsɔ wekɔ didjidji dia nyama ka ngala; ndo ɛtɛmwɛlɔ wa kashi wa l’andja w’otondo wekɔ didjidji dia womoto lahemi lâdiko dia nyama kɛsɔ. (Enyelo 17:3, 15-18) Nyama ka didjidji kayosala kɛnɛ kayolanga Nzambi lo ndanya ɛtɛmwɛlɔ wakafunaka ɔnɛ vɔ mbele enyimpala ande.

Lo yoho ya didjidji, ɔpɔstɔlɔ Joani akalembetshiya dikambo sɔ lo mbuta ɔnɛ: “Seki dikumi yakayenyi, ndu nyama, yayuhetsha umuntu a luseka. Yo yayûhandjula, yayûtshika utakataka, yayole umunyi andi, yayûtshumba ushiki. Ne dia [Nzambi] akotshiya dikambu ne l’etema awo dia vo tsha uku lulangu landi.”—Enyelo 17:16, 17.

Prɔfɛsiya 3. L’ɔkɔngɔ wa ɛtɛmwɛlɔ wa kashi nɛndjama, la lokeso tshɛ, Satana ayotshutshuya wedja dia vɔ ndɔsha wanɛ watɛmɔla Jehowa Nzambi.—Enyelo 7:14; Mateu 24:21.

Ngande wendanayɛ l’akambo asɔ?

Naka wɛ heke Bible dimɛna, kete wɛ mbeyaka monga l’okakatanu dia mbetawɔ ɔnɛ akambo wele la diko ango wayokotshama. Koko tekɔ l’ɛkɔkɔ w’eshika watotshutshuya dia mbetawɔ ɔnɛ akambo tshɛ wɔkɔndwami wayokotshama ndo ɔnɛ vɔ wayanga kotshama kema edja. Prɔfɛsiya efula ya lo Bible yambokotshamaka toshikikɛka ɔnɛ akambo asɔ tshɛ wayokotshama.a

Lande na kahayatshungola etena ka mbeya bonde ketawɔ Ɛmɛnyi wa Jehowa ɔnɛ ‘ta dia lushi la woke la Nzambi Kanga-Wolo-Tshɛ’ diaya kem’embe ndo lande na kahayahombe lioka wɔma? Vɔ wayɔkɛtshanya layɛ kɛnɛ kakɔlɔmba Bible dia wɛ nsala dia monga l’atei w’anto wele Jehowa Nzambi ekɔ lo mbakokɛ. (Enyelo 16:14) Kɛnɛ kayoyeka ayotshikitanya woho wɔsayɛ nshi yayaye.

[Nɔte ka l’ɛse ka dikatshi]

[Efundelo wa l’etei w’odingɔ wa lo lɛkɛ 8]

Shi woho wakambema olimu w’Ɛmɛnyi wa Jehowa ekɔ ekotshamelo ka prɔfɛsiya ka lo Bible?