‘Tatohekɔke’

1, 2. Ngande wakeketshama wɛkamu aso lo menda kɛnɛ kasalema l’okongamelo waki Jehowa wa l’andja w’otondo?

EKƆ dui di’ɔngɛnɔngɛnɔ efula dia mbeya dia ndo sho mbele l’atei w’okongamelo wa woke efula wa l’andja w’otondo. Waɛnɛlɔ wɔkɔndwami lo Ezekiyele tshapita 1 ndo lo Danyele tshapita 7 wendana l’okongamelo akɔ, kɔndɔlaka lo yoho yahahanya asolo woho watasale Jehowa akambo dia sangwelo diande kotshama. Yeso ekɔ lo nɔmbɔla etenyi k’okongamelo wa Jehowa ka la nkɛtɛ dia lokumu l’ɔlɔlɔ sambishama dimɛna, dia nkotsha ehomba wa lo nyuma wa wanɛ wasambisha ndo dia nkimanyiya anto akina dia vɔ ntɛmɔla Jehowa. Ande woho wahombaso monga la wɛkamu le okongamelo wa Jehowa lee!​—Mat. 24:45.

² Ko onde tekɔ lo takɛndakɛnda kaamɛ l’okongamelo wa Jehowa? Onde ohetoheto aso l’olimu w’esambishelo wekɔ lo tafule kana wekɔ lo takitakita? Naka sho nkana yimba la ambola asɔ, kete tayɛna dia kana tambotatɛ mpekɔ kana taya bu l’ohetoheto wahombama. Kɛsɔ koka tokomɛ. Ɛnyɛlɔ, lo ntambe ka ntondo, ɔpɔstɔlɔ Pɔɔlɔ akakeketsha asekande Akristo dia vɔ ndjela ɛnyɛlɔ k’ohetoheto kakatotshikɛ Yeso. Pɔɔlɔ akate dia dui sɔ diakakoke mbakimanyiya ‘diaha vɔ mpekɔ ndo nkɔmɔ etema.’ (Hɛb. 12:3) Lo sawo dietshi, takasɛdingola olimu wa diambo wasala Jehowa lo tshimbo y’okongamelo ande nshi nyɛ, ndo takɛnyi dia ɛnyɛlɔ k’okongamelo wa Jehowa kokaka tokimanyiya dia sho monga l’ekikelo ndo ntetemala monga l’ohetoheto l’olimu waki Nzambi.

3. Ahombaso nsala diaha sho mpekɔ, ndo kakɔna kayotɔsɛdingola lo sawo nɛ?

³ Koko, ɔpɔstɔlɔ Pɔɔlɔ akatɛnyisha dia ekɔ akambo efula wahombaso nsala naka hatohekwe. Nde akate dia sho pombaka nsala “kɛnɛ kele ɔlɔlɔ.” (Ngal. 6:9) Dui sɔ tɔlɔmbaka dia sho mbidja welo. Nyɛsɔ tɔsɛdingole akambo atanu wakoka tokimanyiya dia sho ntetemala monga l’ohetoheto ndo ntetemala nkɛndakɛnda kaamɛ l’okongamelo wa Jehowa. Oma laasɔ, ko sho menda akambo akɔna wakokaso ndjalowanya sho kana nkumbo kaso.

TOSANGANAKE DIA KEKETSHANA NDO DIA NTƐMƆLA JEHOWA

4. Lande na kakokaso mbuta ɔnɛ sanganaka kaamɛ ekɔ etenyi k’ohomba efula l’ɔtɛmwɛlɔ wa mɛtɛ?

⁴ Dikambo dia ntondo ele, sanganaka kaamɛ okongaka nshi tshɛ dikambo di’ohomba efula le ekambi wa Jehowa. L’okongamelo wa Jehowa wa l’olongo, ditongami dia lo nyuma diakatshɔka dia temala la ntondo ka Jehowa lo tena diakashikikɛma. (1 Khum. 22:19; Jobo 1:6; 2:1; Dan. 7:10) Lo Isariyɛlɛ w’edjedja, wodja w’otondo wakasanganaka “dia vo mbuka la mbeka lama mbuka [Jehowa, Nzambi kawɔ], woma.” (Euh. 31:10-12) Ase Juda wa lo ntambe ka ntondo vɔ lawɔ, waki la mbekelo ka tshɔka mbala la mbala lo shinangɔnga dia tohokamɛka awui wakaadiemaka oma l’Afundelo. (Luka 4:16; Etsha 15:21) Awui asɔ tshɛ tɔtɔmiyaka ohomba wa sho sanganaka mbala la mbala kaamɛ l’ase etshumanelo k’Akristo ndo toholaka dia ɔsɔ ekɔ etenyi kɛmɔtshi ka woke k’ɔtɛmwɛlɔ aso. Oko weso Akristo wa mɛtɛ, “todjanake yimba dia tshutshuyana lo ngandji ndo lo akambo w’ɛlɔlɔ.” Ndo nto, “tokeketshanake lam’asaso ndo toleke nsala dikambo sɔ oko wɛnaso dia lushi lakɔ laya suke.”​—Hɛb. 10:24, 25.

5. Ngande wakokaso keketshana lam’asaso lo nsanganya y’Akriso?

⁵ Yoho mɔtshi y’ohomba efula yakeketshanaso lam’asaso ele lo mbishaka kɔmatɛrɛ etena keso lo nsanganya. Sho mbishaka kɔmatɛrɛ shɔ lo mbisha okadimwelo wele l’odingɔ wa dimbola diombwami, lo mɛnya woho wakokaso nkamba la divɛsa dimɔtshi dioshilami kana lo mbisha ɛnyɛlɔ ka mondo kɛnya woho wakokaso nkamba l’atɔndɔ wa lo Bible. (Osam. 22:22; 40:9) Lo mɛtɛ, aha la mbidja oshimu esɔ, oyadi edja ka ngande kambotosala l’okongamelo wa Jehowa, kɔmatɛrɛ y’oma k’ɛse otema yashama lo nsanganya oma le anangɛso l’akadiyɛso w’epalanga kana w’akɛnda tokeketshaka.

6. Ngande watokimanyiya nsanganya dia lonyuma laso ndeka mpɛtahɛtaka?

⁶ Ko naa ɛkɔkɔ ekina wakɔshi Nzambi kaso yɛdikɔ y’ohomba efula shɔ ya sho sanganaka kaamɛ mbala la mbala? Nsanganya yaso ya l’etshumanelo ndo ya weke tokimanyiyaka dia sho monga la dihonga dia ntɛkɛta aha la mboka wɔma ndo nshika tanga la ntondo k’ɛhɛnyɔhɛnyɔ kana ka wendjodi wele l’ɛtshi kaso ka nkɛtɛ. (Etsha 4:23, 31) Sho keketshamaka ndo mbetawɔ kaso tshikalaka nge l’ekimanyielo k’ɔkɛtshanyelo wasalema w’oma l’Afundelo. (Etsha 15:32; Rɔmɔ 1:11, 12) Wetshelo ndo ekeketshelo kakondjaso oma le onto la wonyande etena kasanganaso dia ntɛmɔla Nzambi tokimanyiyaka dia sho monga l’ɔngɛnɔngɛnɔ wa mɛtɛ ndo toshaka “ki uma lu nshi ya lutunu l’utunyi.” (Osam. 94:12, 13) Kɔmite ka wetshelo ka l’Olui-walɔmbɔla ekɔ lo nɔmbɔla ɔlɔngɔswɛlɔ wa dikongelo di’akambo wa lo nyuma tshɛ diasalema di’ekambi wa Jehowa wa l’andja w’otondo mbetshama. Ande lowando lahombaso monga la lɔ lo mbo ya ndɛ yatoshawɔ shɔ l’oyango wa sho kondjaka wetshelo lo nsanganya yasalema lomingu tshɛ ɔnɔnyi l’ɔnɔnyi lee!

7, 8. a) Naa oyango woleki woke watshɔso lo nsanganya y’Akristo? b) Ngande watokimanyiya nsanganya yaso lo nyuma?

⁷ Koko, ekɔ dikambo dimɔtshi diohomba efula diatshɔso tosala lo nsanganya yaso dioleki ndo wahɔ wakondjaso onto l’onto. Oyango woleki woke watshɔso lo nsanganya ele dia tɔtɛmɔla Jehowa. (Adia Osambu 95:6.) Ekɔ tshondo ya diɛsɛ di’efula le so dia sho tombolaka Nzambi kaso l’esambo wa lotombo. (Kɔl. 3:16) Sho tɛmɔlaka ndo tombolaka Jehowa nto lo mbɔtɔka nsanganya tshɛ ndo lo mbishaka kɔmatɛrɛ etena keso lo nsanganya yakɔ. (Ɛny. 4:11) Diakɔ diele, keema dui dia diambo di’Afundelo tokeketsha ‘diaha sho ntshika nsangana kaamɛ oko wele mbekelo k’anto amɔtshi.’​—Hɛb. 10:25.

⁸ Onde sho mbɔsaka nsanganya yaso y’Akristo oko ehomɔ katokimanyiya dia sho mbikikɛ polo ndo lam’ayolanya Jehowa dikongɛ di’akambo nɛ dia kɔlɔ? Naka ngasɔ mbediɔ, kete tayetsha nsanganya yaso l’atei wa “akambo woleki ohomba” ndo tayosala la wolo dia mbɔtɔka lo nsanganya tshɛ oyadi wesanu akɔna wele la so. (Flpɛ. 1:10) Naka aha dikambo dimɔtshi dia wolo efula mbambotokomɛ, kete hatohombe pondjo mbetsha nsanganya dia ntɛmɔla Jehowa kaamɛ l’anangɛso l’akadiyɛso.

TOSAMBISHAKE L’OHETOHETO TSHƐ

9. Lande na kataso ɔnɛ olimu w’esambishelo wekɔ ohomba efula?

⁹ Dikambo dia hende diatokimanyiya dia sho nkɛndakɛnda kaamɛ l’okongamelo wa Jehowa ele, ndjasha efula l’olimu w’esambishelo. Yeso mbakatatɛ nkamba olimu ɔsɔ etena kakinde la nkɛtɛ. (Mat. 28:19, 20) Oma k’etena kɛsɔ, okongamelo wa Jehowa w’otondo mbɔsaka olimu w’esambishelo ka Diolelo ndo olimu wa mbetɛ anto ambeki oko dikambo dioleki ohomba efula. Tolembetelo efula ta nshi nyɛ mɛnyaka di’andjelo wekɔ lo sukɛ olimu aso ndo wekɔ lo tɔlɔmbɔla dia sho ntana wanɛ tshɛ wele “suke dia mbetawɔ akambo wa mɛtɛ wakonya lo lɔsɛnɔ la pondjo.” (Etsha 13:48; Ɛny. 14:6, 7) Ndo oyango waamɛ wele la etenyi k’okongamelo wa Jehowa ka la nkɛtɛ ele, dia nkongɛ ndo sukɛ olimu w’esambishelo. Onde sho mbetɛka olimu w’esambishelo oko dikambo dioleki ohomba lo lɔsɛnɔ laso?

10. a) Sha ɛnyɛlɔ kɛnya woho wakokaso nama wangasanu aso l’akambo wa mɛtɛ. b) Ngande wakakokimanyiya olimu w’esambishelo diaha wɛ mpekɔ?

¹⁰ Monga l’ohetoheto l’olimu w’esambishelo tokimanyiyaka dia nama wangasanu aso l’akambo wa mɛtɛ. Tɔsɛdingole kɛnɛ kakate Mitchel, laki ekumanyi ndo ombatshi mboka l’edja k’ɛnɔnyi efula. Nde akate ate: “Dimi kombolaka nsambisha anto akina akambo wa mɛtɛ. Dimi kanaka yimba la numɛlɔ tshɛ ka Tshoto y’Etangelo kana Réveillez-vous ! katondjama ndo dimi mambaka efula lo menda lomba, ewo ndo woho wele numɛlɔ tshɛ la wɛdimo. Dimi nangaka ntomba l’esambishelo dia mboka kɛnɛ kayota anto etena kawashami periodikɛ yakɔ ndo woho wakokami nomialomiya nsaki yawɔ. Olimu ami w’esambishelo mbele dikambo dioleki ohomba dietshami lo dihole dia ntondo lo lɔsɛnɔ lami. Dimi salaka la wolo diaha ndoko ɛngɔ ɔtɔi mbeta la ntondo k’olimu w’esambishelo.” Woho akɔ waamɛ mbele, monga l’akambo efula wa nsala l’olimu w’ekila, ayotokimanyiya dia sho ntetemala ntshikala nge lo nshi y’ekomelo nyɛ.​—Adia 1 Kɔrɛtɔ 15:58.

TOKONDJA WAHƆ OMA L’EKANDA ASO

11. Lande na kahombaso mbadiaka ekanda aso tshɛ ndo kanaka yimba l’awui wadiaso?

¹¹ Dikambo dia sato diatokimanyiya dia sho nkɛndakɛnda kaamɛ l’okongamelo wa Jehowa ele, nkondja wahɔ oma lo mbo ya ndɛ ya lo nyuma yatosha Jehowa lo tshimbo y’ekanda aso. Ondo wɛ koka mbohɔ etena kɛmɔtshi kakiyɛ oma la mbadia okanda aso ɔmɔtshi ko wɛ mbuta ɔnɛ: ‘Kɛnɛ mɛtɛ mbakimi l’ohomba! Mama lɛɛ, wate kana dimi mbakawafundɛ dibuku nɛ!’ Ɔsɔ keema dui dia diambo nɛ dia lo tshimbo y’ekanda ɛsɔ, mbatetsha Jehowa ndo mbatɔlɔmbɔlande. Nde akate ate: “Dimi layuketshaka ndu layukenyaka mbuka ka we kendakenda, dimi layukulakaka, layukendaka.” (Osam. 32:8) Onde sho salaka la wolo dia mbadia ekanda aso tshɛ walongolaso ndo kanaka yimba l’awui wadiaso? Salaka ngasɔ ayotokimanyiya dia sho ntetemala mbikikɛ ndo monga l’ohetoheto l’olimu w’esambishelo lo nshi y’ekomelo yambolola l’ekakatanu nyɛ.​—Adia Osambu 1:1-3; 35:28; 119:97.

12. Kakɔna kayotokimanyiya dia sho mbɔsa mbo ya ndɛ ya lo nyuma la nɛmɔ di’efula?

¹² Naka sho nkana yimba lo olimu wakambema dia sho ndjokondja ekanda aso, kete tayowaɔsa la nɛmɔ di’efula. Ɛnyɛlɔ, tende elimu ɛmɔtshi wasalema. Eyangelo w’efula salemaka, oma laasɔ ko vɔ ndjofunda, ko minya dikɔmɔ tshɛ, mbidja esato ndo nkadimola ekanda akɔ l’ɛtɛkɛta ekina ko ntondja ɛmɔtshi ndo mbidja ekina l’Ɛtɛrnɛtɛ. Kɔmite k’ofundelo ka Olui-walɔmbɔla mbalɔmbɔla olimu ɔsɔ tshɛ. Oma laasɔ, ko filialɛ yatondja mikanda mbatondja ko tomɛ tshumanelo tshɛ diele lo bɛtshi diawɔ dia nkɛtɛ. Lande na kakambema olimu ɔsɔ tshɛ? L’oyango w’ekambi wa Jehowa ndeshama dimɛna lo nyuma. (Is. 65:13) Diakɔ diele, nyɛsɔ tokondjake wahɔ oma lo mbo ya ndɛ ya lo nyuma yalongolaso lo tshimbo y’okongamelo wa Jehowa.​—Osam. 119:27.

TOSUKE TƐDIKƆ TƆSA OKONGAMELO WA JEHOWA

13, 14. Waa na wasukɛ etenyi k’okongamelo wa Jehowa ka l’olongo, ndo ngande wakokaso sukɛ sho lawɔ etenyi k’okongamelo ka la nkɛtɛ?

¹³ Lo ɛnɛlɔ kakɛnyi ɔpɔstɔlɔ Joani, nde akɛnyi Yeso ahemi laadiko dia falasa ka wɛma katatshu dia tɔlɛndja wanɛ tshɛ watɔmbɔkwɛ Jehowa. (Ɛny. 19:11-15) Ande woho wakeketshama mbetawɔ kaso dia mbeya dia andjelo wa kɔlamelo wayonga l’ɔkɔngɔ waki Yeso ndo nde ayonga kaamɛ la Akristo w’akitami wakasɔnama oma la nkɛtɛ wayolongola difuto diawɔ l’olongo lee! (Ɛny. 2:26, 27) Ɛnyɛlɔ kawɔ toshaka wetshelo dia sho sukɛ tɛdikɔ tɔsama l’okongamelo wa Jehowa.

¹⁴ Woho akɔ waamɛ mbele, olui a woke w’ɛkɔkɔ sukɛka olimu wakamba Akristo w’akitami weke la nkɛtɛ ndo walɔmbɔla okongamelo ɛlɔ kɛnɛ. (Adia Zekariya 8:23.) Ngande wakokaso mɛnya dia sho sukɛka tɛdikɔ tɔsa Jehowa lo tshimbo y’okongamelo ande? Yoho mɔtshi yakokaso nsala dui sɔ ele lo nkitanyia wanɛ watɔlɔmbɔla. (Hɛb. 13:7, 17) Dilɛmiɛlɔ sɔ tatɛka l’etshumanelo kaso. Onde awui watɛkɛtaso lo dikambo dia dikumanyi keketshaka anto akina dia vɔ mbalɛmiya ndo mbɔsa olimu wakambawɔ la nɛmɔ? Onde sho keketshaka anaso dia vɔ nɛmiya dikumanyi ndo ndjela alako w’oma l’Afundelo wawashawɔ? Laadiko dia laasɔ, onde sho kɛtshanyaka lo nkumbo dia mbeya woho wakokaso nkamba l’ekondjelo kaso dia sukɛ okongamelo wa Jehowa la weshasha aso? (Tuk. 3:9; 1 Kɔr. 16:2; 2 Kɔr. 8:12) Onde sho mbɔsaka diɛsɛ diatoshawɔ dia mɔmba Mbalasa ka Diolelo ndo dia kikokɛka la nɛmɔ? Etena kɛna Jehowa dia sho sukɛka okongamelo ande lo yoho shɔ, nde toshaka nyuma kande k’ekila ndo kaamɛ mongaka l’etshumanelo. Diɛsɛ la nyuma kakɔ, mbatetemalaso nkondja wolo watokimanyiya diaha sho mpekɔ lo nshi y’ekomelo nyɛ.​—Is. 40:29-31.

TƆSƐNƐ LO YOHO YANGƐNYANGƐNYA NZAMBI

15. Lande na kahombaso ntetemala nsala la wolo dia nsɛna lo yoho yangɛnyangɛnya Jehowa?

¹⁵ Dikambo di’ekomelo ele, dia sho mbikikɛ ndo ntetemala nkɛndakɛnda kaamɛ l’okongamelo wa Jehowa, sho pombaka ntetemala mbɔtɔnganyiya nsɛnɔ yaso la losango latatɛmbɛ anto lo, “nshikikɛ kɛnɛ ketawɔma le Nkumadiɔndjɔ.” (Ɛf. 5:10, 11) L’ɔtɛ wa eongelo kaso kele kema kokele ndo welo wadja Satana kaamɛ l’andja ɔnɛ wa kɔlɔ, tekɔ lo ndɔ tshondo ya ta dia nsala kɛnɛ kele ɔlɔlɔ. Koko, anangɛso l’akadiyɛso efula wekɔ lo nsala la wolo lushi la lushi dia tokimanyiya dia sho nama diɔtɔnganelo diasaso la Jehowa. Welo wadjaso sho tshɛ ngɛnyangɛnyaka Jehowa efula. Laasɔ, tatohekɔke. Naka sho ntetemala nsɛna lo yoho yangɛnyangɛnya Jehowa, kete tayonga l’ɔngɛnɔngɛnɔ w’efula ndo tayoshikikɛ ɔnɛ tekɔ lo mbetawɔma mɛtɛ le Jehowa.​—1 Kɔr. 9:24-27.

16, 17. a) Ahombaso nsala naka tambosala pɛkato ka woke? b) Wetshelo akɔna wakokaso nkondja oma l’ɛnyɛlɔ ka Anne?

¹⁶ Ko laasɔ, kakɔna kahombaso nsala naka tambosala pɛkato ka woke? Aha la ntshimbatshimba, toyange ekimanyielo kahombama. Mbishɛ pɛkato ayonga dikambo dioleki tshɛ kɔlɔ. Tohɔ dia Davidɛ akate dia etena kakandashɛ pɛkato yakandasale, ‘demba diande diakatakitakitaka, nɛ dia akumu wakandakumaka yanyi tshɛ.’ (Osam. 32:3) Lo mɛtɛ, naka sho mpemba mbishɛ pɛkato yaso, kete tayoshisha ɔngɛnɔngɛnɔ aso ndo diɔtɔnganelo diasaso la Jehowa diayofukutana. Koko, Bible mbutaka ɔnɛ: “One latushulaka ndu latosekaka kolo yandi, ayukama ketshi.”​—Tuk. 28:13.

¹⁷ Tɔsɛdingole ɛnyɛlɔ ka Anne.a Etena kakinde suke la nkotsha ɛnɔnyi akumi ahende, Anne akakambe oko ombatshi mboka wa pondjo. Koko, nde akayotatɛ nsɛna lɔsɛnɔ la dungi pende. Dui sɔ diaki la shɛngiya ya mamba le nde. Nde mbutaka ate: “Lakashisha ɔngɛnɔngɛnɔ ndo nkum’otema kami kakatamɛndjaka onongo wonya tshɛ.” Kakɔna kakandasale? Ndamɛ mbutaka dia lushi lɔmɔtshi etena kakinde lo losanganya, wakalembetshiya Jakɔba 5:14, 15 dimɛna efula. Anne akashihodia dia nde pombaka kimanyiyama, ko nde akatshu le dikumanyi dia toyanga ekimanyielo kakɔ. Nde akayele alako wele lo avɛsa akɔ ko akatoshola pɛkato kande le dikumanyi. Komonga dui dia tshitshɛ, koko nde mbutaka dia nde aki la hemɔ ndo Jehowa akawosha okanga wakinde mɛtɛ l’ohomba. Nde akayotaka ate: “Mongaka tshondo y’okakatanu dia nnɔ okanga, koko vɔ kɔnɔyaka hemɔ. Lakakitanyiya alako watanema l’avɛsa akɔ ndo lakayoyaoka dimɛna.” Ambeta ɛnɔnyi ɛmɔtshi wele Anne ekɔ lo kambɛ Jehowa l’ohetoheto w’efula ndo la nkum’otema k’ɔlɔlɔ.

18. Naa yɛdikɔ yamboyɔsa?

¹⁸ Ande diɛsɛ diele la so dia nsɛna lo nshi y’ekomelo nyɛ ndo monga l’atei w’okongamelo wa Jehowa wa la nkɛtɛ lee! Ɔnkɔnɛ, nyɛsɔ toyashikikɛ diaha mpekɔ. Koko, tongake kaamɛ la nkumbo yaso dia mbɔtɔka lo nsanganya ya l’etshumanelo mbala la mbala, lo sambishaka l’ohetoheto tshɛ lo ɛtshi kaso ka nkɛtɛ ndo lo kondjaka wahɔ oma l’ekanda aso tshɛ. Ndo nto, nyɛsɔ tosukɛke wanɛ watɔlɔmbɔla ndo tɔsɛnake lo yoho yangɛnyangɛnya Jehowa. Naka sho nsala akambo asɔ, kete tayoyela ɛlɔmbwɛlɔ k’okongamelo wa Jehowa ndo hatotohekɔ dia nsala kɛnɛ kele ɔlɔlɔ.