Lande na asui efula nganɛ?

ETOMBELO W’OMA LO ƐLƆMBWƐLƆ KA LA HIADI

Bible mbutaka ɔnɛ: “Lam’atulelaka untu a kolo, antu watukhumaka akhumu.”​—Tukedi 29:2.

Andja ɔnɛ wambɔlɔmbwama oma le ewandji wa hiadi ndo wambosoya ambolami awɔ woho w’anyanya. Koko kɛnɛ kele mɛtɛ ele, aha ewandji tshɛ mbalɔmbɔla lo yoho shɔ. Ondo amɔshi l’atei awɔ ndɛka lowandji la kanyi ya nkimanyiya ambolami awɔ. Koko kam’atatɛwɔ nɔmbɔla, welo awɔ tshɛ mbɔtɔka l’ashi dikambo atunyi awɔ mbadjɛka wekamu diaha vɔ nkotsha eyango awɔ. Kana vɔ mbeyaka nɔmbɔla la hiadi dia nkondja wahɔ awɔ hita ndo nsoya anto. Henry Kissinger laki sekeletɛlɛ l’États-Unis akate mbala kɛmɔtshi ate: “Lo ɔkɔndɔ w’ana w’anto, anto efula wakadje welo ko welo akɔ wakɔtɔ l’ashi ndo wakayadjɛ eyango koko vɔ kombakotsha.”

Bible mbutaka ɔnɛ: “Untu hakendakendaka lu mbuka uma lu wulu andi!” (Jeremiya 10:23) Anto wele keema kokele bu la lomba l’oshika ndo haweye ndjalɔmbɔla vɔamɛ. Ko naka vɔamɛ hawokoke ndjalɔmbɔla, kete hoke wodja w’otondo? Shi wɛ amboka lande na kele ewandji w’ana w’anto bu l’akoka wa nshidiya asui? Lo mɛtɛ, mbala efula ɛlɔmbwɛlɔ ka la hiadi mbakonya anto dia vɔ nsowa.

SHƐNGIYA YELE L’ƐTƐMWƐLƆ WA KASHI

Yeso akate ate: “Oma lo dikambo nɛ, anto tshɛ wayeya dia nyu nyekɔ ambeki ami naka nyayokana ngandji lam’asanyu.”—Joani 13:35.

Waa pastɛrɛ nɔmbaka anto awɔ dia vɔ mbokana ngandji ndo monga kaamɛ. Koko vɔ haweye woho wakokawɔ nkimanyiya anto awɔ dia vɔ monga la ngandji ka mɛtɛ kakoka mbakimanyiya dia vɔ ntshika kɔngɔna. Etombelo wambonga la dui sɔ ele, ase ɛtɛmwɛlɔ efula mbatɔnaka, kananɛka kɔlɔ ndo wekɔ l’ewanu waha pe. Otsha l’ekomelo ka dibuku diande diele l’ɔtɛ a dui ɔnɛ: Le christianisme et les religions du monde, ombewi wa teoloji welɛwɔ Hans Küng akafunde ate: “Ata wa wolo wakalɔma lam’asa ewandji wa pɔlitikɛ ndo wakaleke sukamɛ oma le anto ele wanɛ wakasukamɛ oma le ewandji w’ɛtɛmwɛlɔ.”

Laadiko dia laasɔ, waa pastɛrɛ sukɛka dieyanelo dia la ntondo ka diwala, loseka ndo dieyanelo dia lam’asa pami la pami kana womoto la womoto. Dui sɔ konyaka di’anto mbɔsa hemɔ, ntondja waemi, ntshɔ waemi waha la lolango, di’awala mpandjɔ ndo dia vɔ monga la asui waheyama mbuta.

EONGELO KELE KEEMA KOKELE NDO NSAKI YA KƆLƆ Y’ANTO

“Onto l’onto pembamaka etena ketawɔnde kotwama ndo kesama la nsaki kande hita. Ko nsaki kakɔ lam’atshɔtɔ diemi, tɔ mbotaka pɛkato.”​—Jakɔba 1:14, 15.

L’ɔtɛ weso keema kokele, sho tshɛ salaka munga ndo ndɔshanaka la “nsaki [yaso] y’alemba.” (Ɛfɛsɔ 2:3) Mongaka tshondo y’okakatanu le so dia nsala kɛnɛ kele ɔlɔlɔ naka tambokondja diaaso dia nkotsha nsaki ya kɔlɔ yele la so. Naka sho nsala kɛnɛ katotshutshuya nsaki yaso ya kɔlɔ, ekɔ oko tamboyaɛmbɛ danga la pɔmbɔ.

Yɔnɛ Phiroz Mehta akafunde ate: “Anto efula sowaka l’ɔtɛ wa nsɔngu kele la wɔ, wayashawɔ tshɛ l’oweso w’ɔngɛnɔngɛnɔ, wewɔ la lokaki kana wayayangɛwɔ lokumu.” Ndo “anto efula walɛmiyama” shishaka dilɛmiɛlɔ diawɔ l’ɔtɛ wewɔ emunga wa wanu, wanɔwɔ didjoyadjoya, wakɛnyawɔ tɔkɛnyɔ ta falanga, wayashawɔ lo dieyanelo dia mindo ndo awui asɔ konyaka di’ase nkumbo yawɔ, angɛnyi awɔ ndo anto akina nsowa. Lam’ele anto keema kokele, ɛtɛkɛta wa lo Bible wayela ɛnɛ wekɔ mɛtɛ: “Sho mbeyaka dia ditongami tshɛ diekɔ lo ntetemala nkuma akumu kaamɛ ndo diekɔ lo nsowa kaamɛ polo ndo kakianɛ.”—Rɔmɔ 8:22.

TƆSƐNGIYA T’OMA LE ƐDIƐNGƐ

Bible mɛnyaka dia Satana ekɔ “nzambi k’andja ɔnɛ” ndo tɔ mɛnyaka dia ɛdiɛngɛ mbosukɛka.​—2 Kɔrɛtɔ 4:4; Ɛnyɛlɔ 12:9.

L’ɛnyɛlɔ ka Satana, ɛdiɛngɛ vɔ lawɔ wekɔ lo mbidja welo dia nsɛngiya anto ndo mbanganyiya. Ɔpɔstɔlɔ Pɔɔlɔ aketawɔ dia ngasɔ mbediɔ etena kakandate ate: “Tekɔ lo ndɔ ta, aha la emunyi la dikila, koko la mandji, la ewandji ndo la emboledi wa lo andja wa wodjima ɔnɛ, la ɛdiɛngɛ wa l’ahole wa l’olongo.”​—Ɛfɛsɔ 6:12.

Kaanga mbangɛnangɛna ɛdiɛngɛ dia nsoya anto, oyango awɔ wa ntondo ele mbakonya dia vɔ mbɛkɔ Jehowa Nzambi Nkum’Olongo. (Osambu 83:18) Ɛdiɛngɛ kambaka l’awui wele oko diendja dia tɔɔtɔ, maji, dɔka ndo lolengɛ dia nkesa anto ndo mbalɔmbɔla. Diakɔ diahalange Jehowa dia sho ndjasha lo awui asɔ ndo diakokɛnde wanɛ tshɛ walɔshana la Satana l’ɛdiɛngɛ ande.​—Jakɔba 4:7.

TEKƆ LO NSƐNA LO “NSHI YEKOMELO”

Bible kakatatshi ambeta ɛnɔnyi nunu pende ɔnɛ: “Eye dia lo nshi y’ekomelo, tena dia paa dia wolo mbikikɛ diayoyala.”

Dia mɛnya akambo amɔtshi wetɛ nshi y’ekomelo tena dia paa dia wolo mbikikɛ, Bible mbutaka ɔnɛ: “Nɛ dia anto wayoyalanga, wayolanga falanga, wayonga akanga w’etako, akanga wa lotamanya, . . . hawotonga la ngandji ka lam’asa ase nkumbo, hawotolanga mbokana, wayonga amamanyishi, waha la ndjakimɛ, akanga w’ekonda, wele keema la ngandji k’akambo w’ɛlɔlɔ, afungi, akanga w’ɛtɛ wolo, akanga wa ndjadiya, anangi w’ɛngɛnɔngɛnɔ lo dihole dia monga anangi wa Nzambi.” Mbokɛmaka hwe dia ɔkɔkɔ wa woke wasowaso ele nɛ dia tekɔ lo nsɛna lo “nshi y’ekomelo.”​—2 Timɔte 3:1-4.

Shi ɛkɔkɔ wambotɔsɛdingola ɛnɛ wambotɛnya dia anto keema l’akoka wa nshidiya asui oyadi vɔ kongaka l’eyango w’amɛna? Ko laasɔ le na ahombaso nyanga ekimanyielo? Paka le Otungi wakiso mbahombaso nyanga ekimanyielo nɛ dia nde akatolake dia “ndanya akambo wa Diabolo” nde l’anto ande. (1 Joani 3:8) Sawo diayela diayɛnya kɛnɛ kayosala Nzambi dia nkomiya asui tshɛ.