Ekomelo k’asui tshɛ kaya suke

Ohɔsa dia wɛ amboshila mbɔtɔ l’andja w’oyoyo lɛnɛ ele awui wa ngala, ata, hemɔ ndo mpokoso y’oma lo diangɔ diakatongama yamboshila. Ohɔsa dia wɛ emɔka lushi tshɛ aha la ndjakiyanya lo kɛnɛ kendana la kɔngɔdi, ɛhɛnyɔhɛnyɔ kana ekondjelo. Oko le yɛ, onde awui asɔ koka salema? Ekɔ mɛtɛ dia ndooko tshunda di’ana w’anto diakoka nsala akambo asɔ. Koko, Nzambi akalake dia minya asui tshɛ, mbidja ndo wanɛ wakatasɛdingodi lo sawo dietshi. Ɛsɔ tende alaka wa lo Bible wayela anɛ:

DIOLELO DIAKI NZAMBI MBAYOLƐ

“[Nzambi] leli l’ulungu ayutundja diulelu diahalanaki pundju. Dio hadiuyala l’okongo a wudja ukina. Dio diayulanya waulelu ako tshe, diayâshila ushiki, ku dio diame diayushikikala pundju.”—Danyele 2:44.

Diolelo diaki Nzambi diekɔ l’olongo ndo Nkumekanga kadiɔ Yeso kristo ayɔhɛna nkumi ya dikanga y’ana w’anto tshɛ dia lolango laki Nzambi salema la nkɛtɛ oko wasalemalɔ l’olongo. (Mateo 6:9, 10) Ndooko diolelo dikina diayɔhɛna Diolelo sɔ nɛ dia diɔ diekɔ “Diolelo dia pondjo dia Nkumɛso la Oshimbedi aso Yeso Kristo.” Anto wayonga lo wɔladi pondjo pondjo.—2 Petero 1:11.

NDOOKO ƆTƐMWƐLƆ WA KASHI WAYONGA NTO

“Satana ndamɛ kadimɔka oko ondjelo wa yanyi. Ɔnkɔnɛ, keema dui dia diambo naka ndo ekambi ande woyakonya oko ekambi w’akambo w’ɛlɔlɔ. Koko ekomelo kawɔ kayoyala lo ndjela etsha awɔ.”—2 Kɔrɛtɔ 11:14, 15.

Ɛtɛmwɛlɔ wa kashi tshɛ wayolanyema ndo wayonyɛma oma la nkɛtɛ. Ɛtɛmwɛlɔ tshɛ wakanɛ anto kɔlɔ ndo wadiakana wayonyɛma. Dui sɔ diayokimanyiya wanɛ walanga “Nzambi kasɛna ndo ka mɛtɛ” dia vɔ mbɔtɛmɔla lo “mbetawɔ ɔtɔi” ndo “lo nyuma ndo lo mɛtɛ.” Ande woho wayoyala wɔladi ndo kaamɛ lee!—1 Tɛsalɔnika 1:9; Ɛfɛsɔ 4:5; Joani 4:23.

ANTO WAYONGA KOKELE

“Nzambi ndamɛ ayoyala kaamɛ la wɔ. Nde ayokitola asɔyi tshɛ oma lo washo awɔ, ndo nyɔi hatoyala nto, delo hadiotoyala nto, kaanga ndjawi kaanga kandji hatoyala nto. Akambo wa ntondo wamboshila.”—Ɛnyɛlɔ 21:3, 4.

Jehowa Nzambi ayokotsha alaka asɔ lo tshimbo y’Ɔnande Yeso ɔnɛ lakakimɔ lɔsɛnɔ lande lo wahɔ w’anto. (Joani 3:16) Lo ɛlɔmbwɛlɔ kaki Yeso, anto tshɛ wayoyala kokele. Asui hawotonga nto nɛ dia “Nzambi ndamɛ ayoyala kaamɛ la wɔ” ndo “ayokitola asɔyi tshɛ lo washo awɔ.” Eongelo kele keema kokele ndo asui wadiɛnɛ anto la wɔ ɛlɔ kɛnɛ wayoshila nɛ dia “antu w’ololo wayukita kete, wayudjaseka loko pundju.”—Osambu 37:29.

ƐDIƐNGƐ HAWOTONGA NTO

“Nde [Yeso Kristo] akande dragɔ, oloyi w’edjedja akɔ wele Diabolo ndo Satana, ko akookeleka l’edja k’ɛnɔnyi kinunu. Nde akawokasha lo difuku diaha l’ekomelo ndo akoodihe lo difuku diakɔ la nsapi diaha nde minganyiya wedja nto.”—Ɛnyɛlɔ 20:2, 3.

Tɔsɛngiya tshɛ taki Satana nde l’ɛdiɛngɛ ande tayoshila etena kayondokelekama ndo kayondodjama lo “difuku diaha l’ekomelo,” mbuta ate vɔ hawotonga l’akoka wa nsala ndooko dikambo. L’etena kɛsɔ vɔ hawotonga nto la shɛngiya le anto. Ande ɔngɛnɔngɛnɔ wayonga la so dia nsɛna l’andja wahatonga nto la shɛngiya yaki Satana la ɛdiɛngɛ ande lee!

“NSHI Y’EKOMELO” YAYOKOMƐ

“Nshi y’ekomelo” yayokomɛ la kɛnɛ kelɛ Yeso ɔnɛ “mfɔnu ka woke.” Nde akate ate: “Oma laasɔ, mfɔnu ka woke kayoyala woho wahatayalaka oma ko etatelo k’andja polo ndo kakianɛ ndo woho wahayalaki nto pondjo.”—Mateo 24:21.

Mfɔnu ka woke kayonga dikambo dia laande nɛ dia ɔsɔ ayonga ekambokambo kahatasalemaka ndooko lushi ndo kahasalemaki nto. Nshi y’ekomelo shɔ yayokomɛ lo “ta dia lushi la woke la Nzambi Kanga-Wolo-Tshɛ” dieyama ɔnɛ “Aramangɛdɔna.”—Ɛnyɛlɔ 16:14, 16.

Anto wa l’ahole tshɛ walanga akambo wa losembwe wayoka l’ekomelo ka dikongɛ di’akambo dia kɔlɔ nɛ. Ɛsɔ tɔsɛdingole ɛtshɔkɔ ɛmɔtshi wayotoyokondja l’ɛlɔmbwɛlɔ ka Diolelo diaki Nzambi.

NZAMBI AYOSALA AWUI AKINA EFULA

“Olui a woke w’anto” wayɔtɔ l’andja w’oyoyo wayonga lo wɔladi: Ɔtɛkɛta wa Nzambi mbutaka ɔnɛ lemba l’anto laheyama mbadia, mbuta ate “olui a woke w’anto” wayoya “oma lo mfɔnu ka woke” wayokokamɛ dia mbɔtɔ l’andja w’oyoyo wa wɔladi. (Ɛnyɛlɔ 7:9, 10, 14; 2 Petero 3:13) Vɔ wayokondja panda kawɔ oma le Yeso Kristo lele “Ɔna Ɔkɔkɔ wa Nzambi ɔnɛ lanya pɛkato ya l’andja.”—Joani 1:29.

Tayokondja ɛlɔlɔ efula oma lo wetshelo wa Nzambi: L’andja w’oyoyo, “kete ayulula la ewu ka [Jehowa.]” (Isaya 11:9) Wetshelo wa Nzambi ɔsɔ wayendana ndo la woho wahombaso mbidjasɛ l’anto tshɛ ki aha la nanya ahole wayotodjasɛ. Nzambi ndakaka ate: “Dimi leli [Jehowa, Nzambi k]aye, latuketshaka dia we nduwana. Ndu latukolombolaka lu mbuka kahumbaye ntsho.”—Isaya 48:17.

Wakiso wa ngandji wakavu wayolɔ: Etena kakinde lanɛ la nkɛtɛ, Yeso akolola ɔngɛnyi ande Lazaro oma lo nyɔi. (Joani 11:1, 5, 38-44) Lo nsala dui sɔ, Yeso akɛnya dia lo Diolelo diaki Nzambi mbayondoyoleka mbolola anto.—Joani 5:28, 29.

Wɔladi ndo losembwe layongaka pondjo pondjo: Ɛɔnywɛlɔ k’ɛlɛmbɛ hatonga nto lo ɛlɔmbwɛlɔ kaki Kristo. Kakɔna katoshikikɛ dia ngasɔ mbayodionga? Ekɔ ngasɔ nɛ dia Yeso lele l’akoka wa nsɛdingola etema ayolombosha anto w’ɛlɔlɔ l’anto wa kɔlɔ. Wanɛ tshɛ watona dia ntshika ditshelo diawɔ dia kɔlɔ hawotɔtɔ lo andja w’oyoyo.—Osambu 37:9, 10; Isaya 11:3, 4; 65:20; Mateo 9:4.

Alaka wambotɔsɛdingola anɛ wekɔ alaka angana ato l’atei wa lokema l’alaka watolakiya Bible lo nshi yayaye. Etena kayotatɛ Diolelo diaki Nzambi mbolɛ la nkɛtɛ, “etshoko efula wa ki” wayoyala pondjo pondjo. (Osambu 37:11, 29) Kɛnɛ tshɛ kele lo kiɔkɔ ya paa ndo y’asui wele l’anto ɛlɔ kɛnɛ kayonyɛma. Tekɔ l’eshikikelo l’alaka asɔ nɛ dia Nzambi mbutaka ɔnɛ: “Enda! Dimi leetɛ diangɔ tshɛ eyoyo. . . . Ɛtɛkɛta ɛnɛ wekɔ wa kɔlamelo ndo mɛtɛ.”—Ɛnyɛlɔ 21:5.