Lokumu l’ɔlɔlɔ le anto tshɛ

Eolwelo ka Yeso kakakeketsha mbetawɔ ndo ohetoheto w’ambeki ande. Ɔpɔstɔlɔ Pɔɔlɔ akɛnya ohetoheto ande lo nkindjakindja Asie Mineure ndo Mediteraneya dia nkenga tshumanelo, nkeketsha Akristo dia vɔ nshika tanga la ntondo ka tɔsɛngiya ta kɔlɔ ndo ɛhɛnyɔhɛnyɔ wa wolo wakaakongɛka. Kaanga l’atei w’ekakatanu ɛsɔ, Lokristo la mɛtɛ lakatetemala mpama ndo anto efula wakakome Akristo.

L’ɔkɔngɔ diko, Pɔɔlɔ akayodjama lo lokanu. Koko, kaanga mbakinde lo lokanu nde akatofunda mikanda dia nkeketsha ndo ndaka etshumanelo k’Akristo. Nde akawahɛmɔla dia waale wa woke waki la ntondo kawɔ, mbuta ate apɔstazi. L’ekimanyielo ka nyuma k’ekila kaki Nzambi, Pɔɔlɔ akawaewola ate: “Ndjaondo ya ngala” yayɔtɔ l’atei awɔ ndo yayota “akambo wele bu mɛtɛ dia nkonya ambeki dia vɔ mbayela.”​—Etsha 20:29, 30.

Oya l’ekomelo ka ntambe ka ntondo mbakatatɛ apɔstazi akɔ. Lo kɛnɛ kendana l’etena kɛsɔ, Yeso lakolwama akasha ɔpɔstɔlɔ Joani ɛnɛlɔ k’akambo wakahombe ndjosalema lo nshi y’otsha la ntondo. Oko wakayodifundaka Joani, oyadi atunyi kana embetsha wa kashi, ndooko lakakoke nshimba Nzambi dia nde nkotsha sangwelo diande di’oma k’etatelo diendana la nkɛtɛ ndo l’anto. Diakɔ diele, “wedja tshɛ ndo waoho tshɛ ndo ɛtɛkɛta tshɛ” wayoka lokumu l’ɔlɔlɔ lendana la Diolelo diaki Nzambi. (Ɛnyɛlɔ 14:6) Paradiso kayonga nto la nkɛtɛ ndo onto tshɛ lasala lolango laki Nzambi koka ndjɔsɛna lɔkɔ.

Onde wɛ mbɔsaka awui asɔ oko “lokumu l’ɔlɔlɔ”? Naka ngasɔ mbediɔ, kete eka akambo efula wendana la lokumu l’ɔlɔlɔ laki Nzambi le anto lele lo Bible ndo woho wakokayɛ nkondja wahɔ oma lɔkɔ ntatɛ oma ko nshi nyɛ ndo lo nshi yayaye.

Wɛ koka mbadia Bible wɛmɛ lo adrɛsɛ aso w’Ɛtɛrnɛtɛ wa www.jw.org. Lo sitɛ kakɔ, wɛ koka nto mbadia tobukubuku tɔnɛ: La Bible — Quel est son message ? ndo Lokumu l’ɔlɔlɔ l’oma le Nzambi! ndo dibuku Bible etshatɔ mɛtɛ? Kaamɛ l’ekanda ekina wɛnya lande na kakokaso ndjaɛkɛ lo Bible ndo woho wakokaso nkamba l’alako w’oma lɔkɔ lo nkumbo kaso ndo lo lɔsɛnɔ l’onto ndaamɛ. Naka wɛ kombolaka mbeya awui akina wendana la Bible, kete ɛnana l’Ɔmɛnyi wa Jehowa ɔmɔtshi.

​—Awui ango tanemaka lo Etsha, Ɛfɛsɔ, Filipɛ, Kɔlɔsayi, Filɛmɔna, 1 Joani, Ɛnyɛlɔ.