Onde andjelo koka monga la shɛngiya lo lɔsɛnɔ layɛ?

Lushi la lomingu lɔmɔtshi l’ɔkɔngɔ a midi, Kenneth nde la Filomena, wadjasɛ lo Curaçao, wakatshu dia tenda atshukanyi amɔtshi wakekaka la wɔ Bible.

Kenneth mbutaka ate: “Etena kakatakome, luudu lakadihama ndo mutuka komonga laawɔ. Koko ɛngɔ kɛmɔtshi kakantshutshuya dia dimi mbelɛ wadi lo telefɔnɛ.”

Womoto aketawɔ lo telefɔnɛ ndo akate dia omɛnde akatshwe l’olimu. Koko, kam’akandashihodia dia Kenneth nde la Filomena mbaki laawɔ, nde akaye oya la soko ndo akawatɛ dia vɔ mbɔtɔ.

Vɔ wakashihodia mbala kakɔ ɔtɔi dia womoto akɔ akalelaki. Etena kakatatɛ Kenneth wekelo wa Bible lo tatshiya la dɔmbɛlɔ, womoto akɔ akatatɛ ndela nto. Ɔnkɔnɛ, Kenneth nde la Filomena wakawombola la lotutsha tshɛ kɛnɛ kakatombe.

Womoto akɔ akaalembetshiya dia nde akakongee dia ndjadiaka paka l’ɔkɔngɔ akɔ a midi ndo nde akafundɛki omɛnde mukanda lo woho wakandalangi ndjadiaka etena kakele Kenneth lo telefɔnɛ. Nde akawatɛ dia nde ekɔ lo ndjakiyanya l’ɔkɔmwɛlɔ, ɔnkɔnɛ vɔ wakakahana la nde tokanyi tɔmɔtshi t’ekeketshelo t’oma lo Bible. Ekeketshelo kɛsɔ kakashimbɛ lɔsɛnɔ.

Kenneth mbutaka ate: “Sho takakaloya Jehowa losaka lo woho wakandetawɔ dia sho nkimanyiya womoto ɔsɔ lakatshimbe wɔɔngɔ ndo djekoleko woho wakandatotshutshuya ondo oma lo tshimbo y’ondjelo ɔmɔtshi kana nyuma kande k’ekila dia mbelɛ lo telefɔnɛ!”a

Onde Kenneth la Filomena waki la shadiya dia mbuta dia Nzambi mbakekɛ lonya, oyadi lo nkamba la ondjelo ɔmɔtshi, nyuma Kande k’ekila kana wolo wakamba la nde olimu? Kana onde wonya wakelɛ Kenneth lo telefɔnɛ aki tsho ahoma?

Hatokoke monga l’eshikikelo. Koko kɛnɛ keyaso ele Nzambi kambaka la andjelo ande dia nkimanyiya anto lo nyuma. Ɛnyɛlɔ, Bible mbutaka dia Nzambi akakambe la ondjelo ɔmɔtshi dia nɔmbɔla Filipɛ laki osambisha w’Okristo dia nkimanyiya ɔnɛnɛ ɔmɔtshi w’ose Etiyɔpiya wakatayangaka ɛlɔmbwɛlɔ ka lo nyuma.​—Etsha 8:26-31.

Ɛtɛmwɛlɔ efula tondjaka wetshelo wa monga la mbetawɔ le ditongami dia lo nyuma diele la wolo woleki w’anto, vɔ mbɔsaka dia amɔtshi l’atei wa ditongami sɔ wekɔ akimanyedi lo nsala lolango laki Nzambi kana wekɔ alami w’onto l’onto. Anto efula mbetawɔka aha tsho ɔnɛ andjelo wekɔ koko ndo ɔnɛ ditongami dia lo nyuma sɔ mongaka la shɛngiya le wɔ lo yoho mɔtshi ya dimɛna. Koko anto akina efula hawetawɔ kaanga yema ɔnɛ andjelo wekɔ.

Onde andjelo wekɔ mɛtɛ? Naka ngasɔ, oma lende oyewɔ? Kakɔna kele mɛtɛ lo dikambo dia andjelo? Onde vɔ koka monga la shɛngiya lo lɔsɛnɔ layɛ? Ɛsɔ tɔsɛdingole kɛnɛ kele mɛtɛ.