3 | Woho wakoka bɛnyɛlɔ dia lo Bible tokimanyiya

BIBLE MƐNYAKA DIA . . . Apami wa kɔlamelo ndo wamato wa kɔlamelo waki la ‘nsaki oko yaso.’—JAKƆBA 5:17.

Kɛnɛ kalembetshiya dui sɔ

Bible ndola tɔɔ l’ɛkɔndɔ wa mɛtɛ w’apami ndo wa wamato wakahomana l’awui efula wotshikitanyi washa paa. Naka sho mbadia awui wakahomana la wɔ, kete sho koka mɛna dia ɔmɔtshi l’atei awɔ aki la nsaki oko yaso.

Woho wakoka dui sɔ tokimanyiya

Sho tshɛ tekɔ l’ohomba w’anto akina nshihodia woho wayaokaso. Dui sɔ diekɔ mɛtɛ djekoleko etena kalɔshanaso la hemɔ ka lo yimba. Etena kadiaso Bible, sho mbekaka awui wendana l’anto akina wakafɔnyaka ndo wakayaokaka woho akɔ waamɛ wa yaokaso. Etombelo wonga la dui sɔ ele, sho shihodiaka di’anto akina wakadiɛnɛka l’awui wele oko wanɛ wadiɛnɛso la wɔ ndo vɔ kondjaokaka opoko etena kakawadiɛnɛka l’ekiyanu ndo l’awui watshindja wɔɔngɔ.

Bible kekɔ l’ɛkɔndɔ w’anto efula wakayaokaka dia wamboshisha elongamelo ndo hawoyeya kɛnɛ ka nsala. Onde wɛ atataka dui nɛ: ‘Handjokoka nsɛna nto’? Mɔsɛ akate woho akɔ waamɛ oko wakate Elidja nde la Davidɛ.—Walelo 11:14; 1 Nkumi ya dikanga 19:4; Osambo 55:4.
Bible totɛka awui wendana la womoto ɔmɔtshi lakawelɛka Hana laki la lɔkɔnyɔ l’efula l’ɔtɛ wakinde ekomba ndo woho wakɔtɛngaka mbala efula waladɛnde.—1 Samuɛlɛ 1:6, 10.
Bible totɛka awui wendana la pami kɛmɔtshi kakawelɛka Jɔbɔ kakahomana ondo l’awui wahomana la so. Kaanga mbakinde la mbetawɔ ka wolo le Jehowa, nde akasowe l’awui washa paa efula ndo akate mbala kɛmɔtshi ate: “Lambohetsha lɔsɛnɔ lami; dimi handjolanga ntetemala nsɛna.”—Jɔbɔ 7:16.

Etena kekaso woho wakatondoya anto asɔ wɔtɛkɛtami lo Bible wakalɔshana la tokanyi ta kɔlɔ, sho la wɔ koka ntana ekeketshelo kele la so ohomba ka ndɔshana la tokanyi ta kɔlɔ.

Woho wakimanyiya Bible Kevin

Shɛngiya yaki la hemɔ k’ɔkɔmwɛlɔ woleki tshɛ le mi

“Wakambishola la hemɔ k’ɔkɔmwɛlɔ woleki tshɛ etena kakimi suke la nkotsha ɛnɔnyi 50. Ekɔ ntena dimɔtshi diele dimi ndjaokaka dia dimi lekɔ l’akoka wa nkandola okakatanu tshɛ wele la mi lo lɔsɛnɔ. Koko ntena dikina, dimi toyaokaka diele oko ndooko ohomba nsɛna.”

Woho wakimanyiya Bible

“Onto ɔmɔtshi lɔtɛkɛtami lo Bible laki la woho w’okakatanu wafɔna la wami, ele ɔpɔstɔlɔ Petero. Nde akasale wandja wakokonya dia nde ndjaoka oko onto l’anyanya. Koko lo dihole dia nde ntetemala monga l’ekanelo ka yimba kɛsɔ, Petero akayange angɛnyi wakayakiyanyaka dikambo diande. Etena kakambetɛka lushi kɔlɔ, l’ɔtɛ wa hemɔ kami k’ɔkɔmwɛlɔ woleki tshɛ, wandja ami hita koka mbishami paa efula ndo konyakami dia dimi ndjaoka oko onto l’anyanya. L’ɛnyɛlɔ ka Petero, Iakeke woho wa monga suke suke l’angɛnyi ami walanga kimanyiyami diaha dimi mpekɔ.

“Onto okina lɔtɛkɛtami lo Bible laki kiɔkɔ y’esambelo k’efula le mi ele Nkumekanga Davidɛ. Nde aki l’ɔkɔmwɛlɔ mbala efula l’ɔtɛ w’awui wakahomana la nde ndo l’ɔtɛ wa munga y’edjedja yakandasale. Dimi la wɔ lekɔ oko nde, nɛ dia lo ntena dimɔtshi, dimi salaka kana mbutaka awui wayomonyangaka l’ɔkɔngɔ. Dimi mɛnaka dia ɛtɛkɛta wa Davidɛ wele lo Osambo 51 sambakami. Lo divɛsa 3, Davidɛ mbutaka ate: ‘Dimi mbeyaka dimɛna kɔlɔ yami, ndo pɛkato yami y’ekɔ wonya tshɛ la ntondo kami.’ Divɛsa sɔ mɛnyakami mɛtɛ woho wayaokami etena katenyanyami ntena dia wolo efula, oko wakokadiɔ monga okakatanu le mi dia dimi nkanyiya lo yoho ya dimɛna lo dikambo diami dimɛmɛ. Koko dimi la wɔ mendanaka l’ɛtɛkɛta wa Davidɛ wele lo divɛsa 10, wata ɔnɛ: ‘Nzambi le, otonge otema wa pudipudi l’etei kami ndo odje l’etei kami yimba y’oyoyo ndo yamboshikimala.’ Dimi la wɔ nɔmbaka Nzambi woho akɔ waamɛ dia nde kimanyiyami dia dimi ndjaoka lo yoho yotshikitanyi lo dikambo diami dimɛmɛ. L’ekomelo, divɛsa 17, mbishakami esambelo. Diɔ mbutaka ɔnɛ: ‘Otema wambatɛ ndo wambatshatshema, Nzambi le wɛ hatotona.’ Divɛsa sɔ shikikɛkami dia Nzambi mbokakami ngandji.

“Etena kalekami ndjasha lo bɛnyɛlɔ dia lo Bible ndo lo kɛnɛ kambisha Nzambi l’etena kɛnɛ, dimi keketshaka elongamelo kami ka lo nshi yayaye. Alaka wa lo Bible mongaka dui dia mɛtɛ le mi ndo dui sɔ kimanyiyakami mɛtɛ dia ntetemala.”