FA O DIRA MAETO A GO BOELA
THUTO 7
O se Ka wa Ineela
Molaomotheo: “Ba ne ba tswelela ba ruta . . . ba sa kgaotse ba bolela dikgang tse di molemo.”—Dit. 5:42.
Se Paulo a Ileng a se Dira
1. Lebelela BIDIO, kgotsa bala Ditiro 19:8-10. Go tswa foo, ipotse dipotso tse di latelang:
Paulo o ile a tswelela jang a thusa batho ba ba kgatlhegang le fa bangwe ba ne ba mo ganetsa?
Paulo o ile a boela ga kae kwa bathong ba ba neng ba kgatlhega, e bile o ile a dira jalo ka lobaka lo lo kae?
Re Ithuta Eng mo go Paulo?
2. Re tshwanetse go ipha nako le go tsaya matsapa gore re kgone go dira maeto a go boela le go tshwara dithuto tsa Baebele.
Etsa Paulo
3. Etela motho ka nako e a e tlhophileng. Ipotse go re: ‘Nka boela kwa go ene leng? A ka rata gore ke tlotle le ene kae?’ Mo etele le fa a tlhophile nako e o sa tlwaelang go ya bodireding ka yone.
4. Mmotse gore o ka mo etela leng gape. Nako le nako fa o sena go tlotla le ene, mmotse gore o ka boa leng gape. Fa o mo tshepisitse gore o tla boa gape, dira jalo mme o tshware nako.
5. O se ka wa mo tlhoboga. O se ka wa tsaya gore motho ga a kgatlhege ka gonne o sa mo fitlhele kgotsa ka metlha o fitlhela go na le sengwe se a se dirang. (1 Bakor. 13:4, 7) Nna o mo etele, mme gone o leke go dirisa nako ya gago sentle.—1 Bakor. 9:26.