Ua Sāmiuela
20 Pea naʻe ʻi ai ha tama fakatupu palopalema ko hono hingoá ko Sipa+ ko e foha ʻo Pikeli, ko ha tangata Penisimani. Naʻá ne ifi ʻa e meʻaifí+ peá ne pehē: “ʻOku ʻikai haʻamau kaunga kia Tēvita, pea ʻoku ʻikai hamau tofiʻa ʻi he foha ʻo Sesé.+ Taki taha foki ki hono ngaahi ʻotua,* ʻe ʻIsileli!”+ 2 Ko ia naʻe tuku ai ʻa e muimui ʻa e kau tangata kotoa ʻo ʻIsilelí kia Tēvitá ka nau muimui kia Sipa ko e foha ʻo Pikelí;+ ka ko e kau tangata ʻo Siutá naʻa nau pīkitai ki honau tuʻí, mei Sioatani ki Selusalema.+
3 ʻI he aʻu atu ʻa Tēvita ki hono falé* ʻi Selusalemá,+ naʻe ʻave ʻe he tuʻí ʻa e kau sinifu ʻe toko hongofulu naʻá ne tuku ke nau tokangaʻi ʻa e falé,+ peá ne tuku kinautolu ʻi ha fale naʻe leʻohi. Naʻá ne ʻoatu haʻanau meʻakai, ka naʻe ʻikai te ne mohe* mo kinautolu.+ Naʻe hanganaki leʻohi ai pē kinautolu ʻo aʻu ki he ʻaho ʻo ʻenau maté, ʻo nau nofo ʻo hangē ko ha kau uitoú, neongo naʻe kei moʻui honau husepānití.
4 Naʻe pehē ange leva ʻe he tuʻí kia ʻĀmasa:+ “Ui ʻa e kau tangata ʻo Siutá ke nau fakatahataha mai kiate au ʻi loto ʻi he ʻaho ʻe tolu, pea ke ke ʻi heni mo koe foki.” 5 Ko ia naʻe ʻalu ʻa ʻĀmasa ke ui ʻa Siuta ke nau fakatahataha mai, ka naʻá ne tōmui mai ʻi he taimi pau naʻe tuku ange kiate iá. 6 Pea naʻe pehē ʻe Tēvita kia ʻApisai:+ “Ko Sipa+ ko e foha ʻo Pikelí te ne fai kiate kitautolu ha kovi lahi ange ʻi he meʻa naʻe fai ʻe ʻApisalomé.+ ʻAve ʻa e kau sevāniti ʻo hoʻo ʻeikí pea tulimui atu kiate ia, koeʻuhí ke ʻoua naʻá ne ʻilo ʻa e ngaahi kolo fakakolotaú peá ne hao ai meiate kitautolu.” 7 Ko ia ko e kau tangata ʻa Sioapé,+ mo e kau Kēletí, mo e kau Pēlití,+ pea mo e kau tangata toʻá kotoa naʻa nau ʻalu atu ʻo muimui ʻiate ia; naʻa nau mavahe mei Selusalema ke tulimui kia Sipa ko e foha ʻo Pikelí. 8 ʻI heʻenau fakaofi atu ki he fuʻu maka ʻi Kipioné,+ naʻe haʻu ʻa ʻĀmasa+ ke fakafetaulaki kiate kinautolu. Pea ko Sioape naʻá ne tui hono teunga tau, pea naʻe ʻi ai haʻane heletā ʻi hono ʻaiʻangá ʻa ia naʻe haʻi ki hono kongalotó. ʻI heʻene manga atu ki muʻá, naʻe homo ʻa e heletaá.
9 Naʻe pehē ʻe Sioape kia ʻĀmasa: “ʻOkú ke sai pē, ʻe hoku tokoua?” Naʻe puke leva ʻe Sioape ʻaki hono nima toʻomataʻú ʻa e kava ʻo ʻĀmasá ʻo hangē ko haʻane ʻai ke ʻuma kiate iá. 10 Naʻe ʻikai tokanga ʻa ʻĀmasa ki he heletā naʻe ʻi he nima ʻo Sioapé, pea naʻe hokaʻi ʻaki ia ʻe Sioape ʻa hono keté,+ pea naʻe malingi mai hono toʻotoʻongá ki he kelekelé. Naʻe ʻikai fiemaʻu ke ne toe hokaʻi ia; naʻe ʻosi feʻunga pē ʻa e tahá ke ne mate ai. Pea ko Sioape leva mo hono tokoua ko ʻApisaí naʻá na tulimui kia Sipa ko e foha ʻo Pikelí.
11 Naʻe tuʻu ʻi hono tafaʻakí ha taha ʻi he kau talavou ʻa Sioapé pea naʻá ne pehē: “ʻIlonga ʻa ia ʻoku faʻahi mo Sioapé pea ʻilonga ʻa ia ʻoku kau kia Tēvitá, ke ne muimui ʻia Sioape!” 12 Lolotonga ení naʻe tokoto ʻa ʻĀmasa ʻi hono totó ʻi he loto halá. ʻI he sio ʻa e tangatá ki he tuʻu ʻa e kakaí kotoa, naʻá ne hiki ʻa ʻĀmasa mei he halá ki he ngoué. Pea naʻá ne lī atu ha kofu ʻo ʻufiʻufiʻi ʻaki ia, koeʻuhí naʻá ne sio ki he tuʻu ʻa e tokotaha kotoa ʻi heʻenau aʻu mai kiate iá. 13 ʻI he hili ʻene hiki ia mei he halá, naʻe muimui ʻa e kau tangatá kotoa ʻia Sioape ke tulimui kia Sipa+ ko e foha ʻo Pikelí.
14 Naʻe fou atu ʻa Sipa ʻi he ngaahi matakali kotoa ʻo ʻIsilelí ki ʻĒpeli ʻo Pete-māká.+ Naʻe fakatahataha ʻa e haʻa Pikelí pea nau tulimui atu foki mo kinautolu kiate ia.
15 Naʻe ʻalu atu ʻa Sioape mo ʻene kau tangatá ʻo nau* ʻākoloʻi ia ʻi ʻĒpeli ʻo Pete-māká pea nau fokotuʻu ha ngaahi fakatafunga kelekele ki he ʻā ʻo e koló, he naʻe tuʻu ʻa e koló ʻi loto ʻi ha fakatafunga kelekele hangē ha ʻaá. Pea ko e kau tangata kotoa naʻe ō mo Sioapé naʻa nau keli ʻa e ʻaá ke holoki ia. 16 Pea naʻe ui atu ha fefine poto mei he koló: “Fanongo mai, kau tangata, mou fanongo mai! Kātaki muʻa ʻo fakahā kia Sioape, ‘Haʻu angé pea tuku muʻa ke u lea atu kiate koe.’” 17 Ko ia naʻe fakaofiofi atu ʻa Sioape kiate ia, pea naʻe pehē atu ʻa e fefiné: “Ko Sioape koe?” Naʻá ne tali ange: “Ko au ia.” ʻI he meʻá ni naʻá ne pehē ange ai kiate ia: “Fanongo mai ki he lea ʻa hoʻo sevānití.” Naʻá ne pehē ange: “ʻOku ou fanongo atu.” 18 Naʻá ne hoko atu: “Naʻa nau faʻa pehē maʻu pē ʻi he kuohilí, ‘Tuku ke nau kumi ki ha tataki ʻi ʻĒpeli,’ pea ko e moʻoni ʻe fakaleleiʻi ai ʻenau palopalemá. 19 ʻOku ou fakafofongaʻi atu ʻa e faʻahinga fakamelino mo faitōnunga ʻo ʻIsilelí. ʻOkú ke kumi ke fakaʻauha ha kolo ʻa ia ʻoku hangē ko ha faʻē ʻi ʻIsilelí. Ko e hā ke ke tafiʻi atu* ai ʻa e tofiʻa ʻo Sihová?”+ 20 Naʻe tali ange ʻe Sioape: “Mole ke mamaʻo haʻaku fakakaukau ke tafiʻi atu ia pea ke fakaʻauha ia. 21 ʻOku ʻikai ʻaupito ko e meʻá ia. Ka ko ha tangata ko hono hingoá ko Sipa+ ko e foha ʻo Pikeli mei he feituʻu moʻungaʻia ʻo ʻIfalemí+ kuó ne angatuʻu* kia Tuʻi Tēvita. Kapau te mou tuku mai ʻa e tangata ʻe toko taha pē ko ení, te u mavahe leva mei he koló.” Naʻe pehē ange leva ʻe he fefiné kia Sioape: “Vakai! ʻE lī atu ʻa hono foʻi ʻulú ʻi he funga ʻaá kiate koe!”
22 Naʻe hū atu ʻi he taimi pē ko iá ʻa e fefine potó ni ki he kakaí kotoa, pea naʻa nau tuʻusi ʻa e ʻulu ʻo Sipa ko e foha ʻo Pikelí pea lī atu ia kia Sioape. Ko ia naʻá ne ifi ai ʻa e meʻaifí, pea naʻa nau mātuku atu mei he koló, ʻo ʻalu ʻa e tokotaha taki taha ki hono ʻapi;+ pea naʻe foki ʻa Sioape ki Selusalema ki he tuʻí.
23 Pea ko Sioape naʻá ne pule ki he kau tau kotoa ʻa ʻIsilelí;+ ko Penaia+ ko e foha ʻo Sihoiatá+ naʻe pule ia ki he kau Kēletí mo e kau Pēlití.+ 24 Ko ʻAtolami+ naʻá ne pule ki he faʻahinga naʻe kounaʻi ke nau ngāue ki he tuʻí; ko Sihosafate+ ko e foha ʻo ʻAhilutí ʻa e tokotaha hiki fakamatalá. 25 Ko Seva ʻa e sekelitalí; ko Sātoki+ mo ʻĀpaiata+ ʻa e ongo taulaʻeikí. 26 Pea ko ʻIla ko e hako ʻo Sailí naʻá ne hoko foki ko ha ʻeiki lahi* ʻa Tēvita.