Ua Kalonikali
6 ʻI he taimi ko iá naʻe pehē ʻe Solomone: “Naʻe folofola ʻa Sihova te ne nofo ʻi he poʻuli matolu.+ 2 Ko eni kuó u langa ha fale fisifisimuʻa moʻou, ko ha feituʻu tuʻumaʻu moʻou ke ke ʻafio ai ʻo taʻengata.”+
3 Naʻe tafoki hake leva ʻa e tuʻí ʻo ne kamata faitāpuekina ʻa e kotoa ʻo e fakatahaʻanga ʻo ʻIsilelí lolotonga ia naʻe tuʻu pē ʻa e kotoa ʻo e fakatahaʻanga ʻo ʻIsilelí.+ 4 Naʻá ne pehē: “ʻOfa ke fakahīkihikiʻi ʻa Sihova ko e ʻOtua ʻo ʻIsilelí, ʻa e tokotaha naʻe mei hono fofongá tonu ʻa ʻene talaʻofa ki heʻeku tamai ko Tēvitá pea ʻaki ʻa hono ongo nimá tonu kuó ne fakahoko ia, ʻi heʻene pehē, 5 ‘Mei he ʻaho naʻá ku ʻomi ai ʻa hoku kakaí mei he fonua ko ʻIsipité, kuo ʻikai te u fili ha kolo mei he ngaahi matakali kotoa ʻo ʻIsilelí ke langa ai ha fale ke ʻi ai maʻu pē ʻa hoku hingoá,+ pea kuo ʻikai te u fili ha tangata ke ne hoko ko e taki ki hoku kakai ko ʻIsilelí. 6 Ka kuó u fili ʻa Selusalema+ maʻa hoku hingoá ke ʻi ai maʻu pē, pea kuó u fili ʻa Tēvita ke pule ki hoku kakai ko ʻIsilelí.’+ 7 Pea ko e holi ia ʻa e loto ʻo ʻeku tamai ko Tēvitá ke langa ha fale maʻá e huafa ʻo Sihova ko e ʻOtua ʻo ʻIsilelí.+ 8 Ka naʻe folofola ʻa Sihova ki heʻeku tamai ko Tēvitá, ‘Ko e holi ia ʻo ho lotó ke langa ha fale maʻa hoku hingoá, pea ko ha holi lelei eni naʻe ʻi ho lotó. 9 Kae kehe, ʻe ʻikai te ke langa ʻa e falé, ka ko ho foha tonu ʻa ia ʻe fanauʻi kiate koé ʻa e tokotaha te ne langa ʻa e fale maʻa hoku hingoá.’+ 10 Kuo fakahoko ʻe Sihova ʻa e talaʻofa naʻá ne faí, he kuó u fetongi ʻa ʻeku tamai ko Tēvitá pea ʻoku ou nofo ʻi he taloni ʻo ʻIsilelí,+ ʻo hangē tofu pē ko e talaʻofa ʻa Sihová.+ Kuó u langa foki ʻa e fale maʻá e huafa ʻo Sihova ko e ʻOtua ʻo ʻIsilelí, 11 pea kuó u fokotuʻu ai ʻa e ʻAʻake ʻoku ʻi ai ʻa e fuakava+ naʻe fai ʻe Sihova mo e kakai ʻo ʻIsilelí.”
12 Pea naʻá ne tuʻu ʻi he ʻao ʻo e ʻōlita ʻo Sihová ʻi muʻa ʻi he kotoa ʻo e fakatahaʻanga ʻo ʻIsilelí, peá ne fola nima hake.+ 13 (He naʻe ngaohi ʻe Solomone ha tuʻuʻanga kopa pea fokotuʻu ia ʻi loto he lotoʻaá.+ Naʻe kiupite* ʻe nima hono lōloá, kiupite ʻe nima hono fālahí, pea kiupite ʻe tolu hono māʻolungá; peá ne tuʻu ai.) Pea naʻá ne tūʻulutui ʻi muʻa ʻi he kotoa ʻo e fakatahaʻanga ʻo ʻIsilelí peá ne fola nima hake ki he langí,+ 14 peá ne pehē: “ʻE Sihova ko e ʻOtua ʻo ʻIsilelí, ʻoku ʻikai ha ʻOtua ʻe hangē ko koé ʻi he langí pe ʻi he māmaní, ʻi hoʻo fai ki hoʻo fuakavá pea fakahaaʻi ʻa e ʻofa mateaki ki hoʻo kau sevānití ʻa ia ʻoku nau ʻaʻeva ʻi ho ʻaó ʻaki ʻa e kotoa ʻo honau lotó.+ 15 Kuó ke fakahoko ʻa e talaʻofa naʻá ke fai ki hoʻo sevāniti ko Tēvita ko ʻeku tamaí.+ Naʻe haʻu tonu mei ho fofongá ʻa hoʻo talaʻofá, pea kuó ke fakahoko ia he ʻahó ni ʻaki ho nimá tonu.+ 16 Pea ko eni, ʻe Sihova ko e ʻOtua ʻo ʻIsilelí, ke ke fakahoko ʻa e talaʻofa naʻá ke fai ki hoʻo sevāniti ko Tēvita ko ʻeku tamaí ʻi hoʻo pehē: ‘ʻI hoku ʻaó, ʻe ʻikai ʻaupito ke taʻehoko hake ha tangata ʻi ho hakó ki he taloni ʻo ʻIsilelí, ʻo kapau pē ʻe tokanga ʻa ho ngaahi fohá ki honau ʻalungá ʻi heʻenau ʻaʻeva ʻi heʻeku laó,+ ʻo hangē pē ko hoʻo ʻaʻeva ʻi hoku ʻaó.’+ 17 Pea ko eni, ʻe Sihova ko e ʻOtua ʻo ʻIsilelí, tuku muʻa ke hoko moʻoni ʻa e talaʻofa naʻá ke fai ki hoʻo sevāniti ko Tēvitá.
18 “Ka ʻe ʻafio moʻoni koā ʻa e ʻOtuá mo e faʻahinga ʻo e tangatá ʻi he māmaní?+ Vakai! Ko e ngaahi langí, ʻio, ʻa e langi ʻo e ngaahi langí, ʻe ʻikai lava ke ke hao ai;+ pea huanoa hake ai ʻa e kiʻi falé ni kuó u langá!+ 19 Pea tokanga muʻa ki he lotu ʻa hoʻo sevānití pea ki heʻene kole ki ha hōifuá, ʻe Sihova ko hoku ʻOtua, peá ke fanongo muʻa ki he kole tokoni pea ki he lotu ʻoku fai ʻe hoʻo sevānití ʻi ho ʻaó. 20 ʻOfa ke ke hāngaifofonga mai ki he falé ni ʻi he pō mo e ʻaho, ki he feituʻu ʻa ia naʻá ke pehē te ke ʻai ki ai ho hingoá,+ ke fanongo ki he lotu ʻoku fai ʻe hoʻo sevānití mo hanga ki he feituʻú ni. 21 Peá ke fanongo ki he kole tokoni ʻa hoʻo sevānití pea ki he kole ʻa ho kakai ko ʻIsilelí ʻi heʻenau lotu mo hanga ki he feituʻú ni,+ pea ʻofa ke ke fanongo mei ho ʻafioʻangá, mei he langí;+ ʻio, ʻofa ke ke fanongo mai ʻo fakamolemoleʻi.+
22 “Kapau ʻe faiangahala ha tangata ki ha taha kehe pea ʻai ai ia ke ne fai ha fuakava* pea pau ai ke ne ʻi he malumalu ʻo e tautea ʻo e fuakavá,* pea lolotonga ʻene ʻi he malumalu ʻo e fuakavá* ʻokú ne haʻu ki he ʻao ʻo ho ʻōlitá ʻi he falé ni,+ 23 ʻofa ke ke fanongo leva mei he langí peá ke fai mai ha meʻa ʻo ke fakamāuʻi hoʻo kau sevānití ʻaki hono totongi ki he tokotaha fulikivanú pea fakafoki ʻa e meʻa naʻá ne faí ki hono tumuʻaki ʻoʻoná,+ pea ʻaki hono fakahaaʻi ʻoku tonuhia* ʻa e tokotaha māʻoniʻoní pea totongi kiate ia ʻo fakatatau ki heʻene māʻoniʻoni ʻaʻaná.+
24 “Pea kapau ʻe ikunaʻi ʻa ho kakai ko ʻIsilelí ʻe ha fili koeʻuhí ko ʻenau hanganaki faiangahala kiate koé,+ pea nau foki kiate koe ʻo fakahīkihikiʻi ho huafá+ mo lotu+ ʻi ho ʻaó ʻo kōlenga ki hoʻo hōifuá ʻi he falé ni,+ 25 pea ʻofa ke ke fanongo mei he langí+ pea fakamolemoleʻi ʻa e angahala ʻa ho kakai ko ʻIsilelí pea fakafoki kinautolu ki he fonua naʻá ke foaki kiate kinautolu pea mo ʻenau fanga kuí.+
26 “ʻI ha tāpuni ʻa e langí pea ʻikai ha ʻuha+ koeʻuhí ko ʻenau hanganaki faiangahala kiate koé,+ pea nau lotu mo hanga ki he feituʻú ni ʻo nau fakahīkihikiʻi ho huafá pea nau tafoki mei heʻenau angahalá koeʻuhí ko hoʻo fakatōkilaloʻi* kinautolú,+ 27 ʻofa ke ke fanongo leva mei he langí pea fakamolemoleʻi ʻa e angahala ʻa hoʻo kau sevānití, ʻa ho kakai ko ʻIsilelí, he te ke akoʻi kiate kinautolu ʻa e hala lelei ʻa ia ʻoku totonu ke nau ʻaʻeva aí;+ peá ke ʻomi ha ʻuha+ ki ho fonua ʻa ia naʻá ke foaki ko ha tofiʻa ʻo ho kakaí.
28 “Kapau ʻe hoko ha honge ʻi he fonuá,+ pe ko ha mahaki fakaʻauha,+ ko ha mahunu, mahakiʻia ʻa e ʻakaú,+ ko ha pupunga heʻe, pe ko ha fanga heʻe maumau+ pe kapau ʻe ʻākoloʻi kinautolu ʻe honau ngaahi filí ʻi ha taha ʻo e ngaahi kolo ʻi he fonuá*+ pe kapau ʻe hoko ha faʻahinga mala pe mahaki kehe,+ 29 ʻilonga ha lotu,+ pea ʻilonga ha kole ki ha hōifua+ ʻe fai nai ʻe ha tangata pe ko e kotoa ʻo ho kakai ko ʻIsilelí (he ʻoku ʻiloʻi ʻe he tokotaha taki taha ʻa ʻene faingataʻaʻia mo ʻene mamahi)+ ʻi heʻenau fola nima atu mo hanga ki he falé ni,+ 30 pea ʻofa ke ke fanongo mei he langí, ko ho ʻafioʻangá,+ pea ʻofa ke ke fakamolemoleʻi;+ peá ke totongi ki he tokotaha taki taha ʻo fakatatau ki heʻene ngaahi foungá kotoa, he ʻokú ke ʻafioʻi ʻa hono lotó (ko koe toko taha pē ʻokú ke ʻafioʻi moʻoni ʻa e loto ʻo e tangatá),+ 31 koeʻuhí ke nau manavahē kiate koe ʻaki ʻenau ʻaʻeva ʻi hoʻo ngaahi foungá ʻi he ngaahi ʻaho kotoa ʻo ʻenau moʻui ʻi he fonua naʻá ke foaki ki heʻemau fanga kuí.
32 “Pehē foki ki he muli ʻa ia ʻoku ʻikai kau ki ho kakai ko ʻIsilelí pea ʻokú ne haʻu mei ha fonua mamaʻo koeʻuhí ko ho huafa lahí*+ mo ho nima mālohí pea mo ho nima kuo mafao atú, pea ʻokú ne haʻu ʻo lotu atu mo hanga ki he falé ni,+ 33 pea ʻofa ke ke fanongo mai mei he langí, ko ho ʻafioʻangá, peá ke fai ʻa e meʻa kotoa ʻoku kole atu ʻe he mulí, koeʻuhí ke ʻilo ʻe he ngaahi kakai kotoa ʻo e māmaní ho huafá+ pea nau manavahē kiate koe, ʻo hangē ko ho kakai ko ʻIsilelí, pea nau ʻilo ko ho huafá ʻoku ʻi he fale ko eni kuó u langá.
34 “Kapau ʻe ʻalu atu ho kakaí ke faitau mo honau ngaahi filí ʻi he hala te ke fekau atu ai kinautolú,+ pea nau lotu+ kiate koe ʻo nau hanga ki he kolo ko eni kuó ke filí pea ki he fale kuó u langa maʻa ho huafá,+ 35 peá ke fanongo mei he langí ki heʻenau lotu mo ʻenau kole ki ha hōifuá ʻo ke faifakamaau maʻanautolu.+
36 “Kapau te nau faiangahala kiate koe (he ʻoku ʻikai ha tangata ʻe taʻeʻiai haʻane angahala),+ pea hoko mai ʻa hoʻo houhau kakahá kiate kinautolu ʻo ke liʻaki atu kinautolu ki ha fili, pea taki pōpula kinautolu ʻe honau kau fakapōpulá ki ha fonua, ʻo mamaʻo pe ofi,+ 37 pea foki mai ʻenau fakakaukau leleí ʻi he fonua naʻe taki pōpula kinautolu ki aí, pea nau foki kiate koe ʻo nau kōlenga kiate koe ki ha hōifua ʻi he fonua ʻoku nau nofo pōpula aí, ʻo pehē, ‘Kuo mau faiangahala mo faikovi; kuo mau fai ha tōʻonga fulikivanu,’+ 38 pea nau foki kiate koe ʻaki ʻa e kotoa ʻo honau lotó+ mo e kotoa ʻo ʻenau moʻuí ʻi he fonua ʻoku nau nofo pōpula aí+ ʻa ia naʻe taki pōpula kinautolu ki aí, pea nau lotu ʻo nau hanga ki honau fonua naʻá ke foaki ki heʻenau fanga kuí pea ki he kolo naʻá ke filí+ pea ki he fale kuó u langa maʻa ho huafá, 39 pea ke ke fanongo mai mei he langí, ko ho ʻafioʻangá, ki heʻenau lotu mo ʻenau kole ki ha hōifuá, ʻo ke faifakamaau maʻanautolu+ peá ke fakamolemoleʻi ho kakai kuo nau faiangahala kiate koé.
40 “Ko eni, ʻe hoku ʻOtua, ʻofa ke ke hāngaifofonga mai peá ke fakaongo mai muʻa ki he lotu ʻoku fai atu ʻi he* feituʻú ni.+ 41 Pea ko eni ke ke hāʻele atu, ʻe Sihova ko e ʻOtua, ki ho feituʻu mālōlōʻangá,+ ʻa koe mo e ʻAʻake ʻoku hā ai ho mālohí. Tuku ke fakateungaʻaki ʻa hoʻo kau taulaʻeikí ʻa e fakamoʻuí, ʻe Sihova ko e ʻOtuá, pea tuku ke fiefia ʻa hoʻo faʻahinga mateakí ʻi hoʻo leleí.+ 42 ʻE Sihova ko e ʻOtua, ʻoua naʻá ke siʻaki* hoʻo tokotaha paní.+ ʻOfa ke ke manatua ʻa hoʻo ʻofa mateaki kia Tēvita ko hoʻo sevānití.”+