ʻEKISOTO

1 Ko e ngaahi hingoa leva eni ʻo e ngaahi foha ʻo ʻIsileli naʻe omi ki ʻIsipite fakataha mo Sēkopé, ʻa e tangata taki taha ʻa ia naʻe haʻu mo hono fāmilí:+ 2 Ko Lūpeni, Simione, Līvai mo Siuta;+ 3 ʻĪsaka, Sepuloni mo Penisimani; 4 Tani mo Nafitalai; Kata mo ʻĀseli.+ 5 Pea ko e faʻahinga kotoa naʻe fanauʻi kia Sēkopé* ko e toko 70, ka ko Siosifá naʻe ʻosi ʻi ʻIsipite ia.+ 6 Faifai atu pē, naʻe mate ʻa Siosifa,+ pea pehē ki he kotoa ʻo hono fanga tokouá pea mo e kotoa ʻo e toʻutangata ko iá. 7 Pea naʻe hoko ʻo fanafanau ʻa e kau ʻIsilelí* pea kamata ke nau tupu ʻo tokolahi ʻaupito, pea naʻa nau tokolahi fakautuutu ai pē mo mālohi ange ʻi ha tuʻunga anga-kehe, ko ia naʻe hoko ai ʻo fonu ʻa e fonuá ʻiate kinautolu.+

8 ʻI he faai atu ʻa e taimí, naʻe hoko hake ʻi ʻIsipite ha tuʻi foʻou, ko e tokotaha naʻe ʻikai te ne ʻiloʻi ʻa Siosifa. 9 Ko ia naʻá ne pehē ki hono kakaí: “Vakai! Ko e kakai ʻIsilelí ʻoku nau tokolahi ange mo mālohi ange ʻiate kitautolu.+ 10 Tau fakafeangai ʻi he olopoto kiate kinautolu. Kapau ʻe ʻikai, ʻe hokohoko atu ʻenau tupu ʻo tokolahí, pea kapau ʻe hoko ha tau, te nau kau mo hotau ngaahi filí ʻo tauʻi kitautolu pea nau mavahe mei he fonuá.”

11 Ko ia naʻa nau fakanofo kiate kinautolu ha kau pule ʻo e ngāue fakapōpula*+ ke lōmekina kinautolu ʻaki ʻa e ngāue mamafa, pea naʻa nau langa ha ongo kolo tukuʻanga koloa moʻo Felo, ʻa ia, ko Pitomi mo Lamesisi.+ 12 Ka ko e lahi ange ʻenau lōmekina kinautolú, ko e lahi ange ia ʻenau tupu ʻo tokolahí pea ko e lahi ange ia ʻenau hanganaki mafola atú, ko ia naʻa nau mate ilifia mo fakaliliʻa ʻi he kau ʻIsilelí.+ 13 Ko ia ai, naʻe fakangāueʻi pōpula ʻi he anga-kakaha ʻe he kau ʻIsipité ʻa e kau ʻIsilelí.+ 14 Naʻa nau fakamamahiʻi ʻenau moʻuí ʻaki ʻa e ngāue mamafa, ʻi heʻenau ngaohi ʻa e sima ʻumeá mo e pilikí pea mo e ngāue fakapōpula kehekehe ʻi he vaó. ʻIo, naʻa nau ʻai kinautolu ke nau ongosia ʻi he ngaahi tuʻunga fefeka ʻi he ngāue fakapōpula kehekehe.+

15 Ki mui ai, naʻe lea ʻa e tuʻi ʻo ʻIsipité ki he ongo māʻuli Hepelū ko hona hingoá ko Sīfila mo Pua, 16 pea naʻá ne tala ange kiate kinaua: “ʻI hoʻomo tokoni ki he kau fefine Hepeluú ke nau fāʻelé peá mo sio ai kiate kinautolu ʻoku nau teu fāʻelé,+ kuo pau ke mo tāmateʻi ʻa e tamá kapau ko ha tamasiʻi; ka ʻo kapau ko ha taʻahine, kuo pau ke ne moʻui.” 17 Kae kehe, ko e ongo māʻulí naʻá na manavahē ki he ʻOtua moʻoní, pea naʻe ʻikai te na fai ʻa e meʻa naʻe tala ange kiate kinaua ʻe he tuʻi ʻo ʻIsipité. ʻI hono kehé, naʻá na tuku pē ke moʻui ʻa e fānau tangatá.+ 18 ʻI he faai atu ʻa e taimí, naʻe ui ʻe he tuʻi ʻo ʻIsipité ʻa e ongo māʻulí ʻo ne pehē kiate kinaua: “Ko e hā kuó mo tuku ai pē ke moʻui ʻa e fānau tangatá?” 19 Naʻe pehē ange ʻe he ongo māʻulí kia Felo: “Ko e kau fefine Hepeluú ʻoku ʻikai ke nau hangē ko e kau fefine ʻIsipité. ʻOku nau longomoʻui pea kuo nau ʻuluaki fāʻele kinautolu ki muʻa ke aʻu atu ʻa e māʻulí kiate kinautolú.”

20 Ko ia naʻe failelei ʻa e ʻOtuá ki he ongo māʻulí, pea naʻe tupu ai pē ʻa e kakaí pea nau hoko ʻo mālohi ʻaupito. 21 Pea koeʻuhi ko e manavahē ʻa e ongo māʻulí ki he ʻOtua moʻoní, naʻá ne ʻoange kiate kinaua ʻa e fānau ki mui ai. 22 Naʻe toki tuʻutuʻuni leva ʻe Felo ki hono kakaí kotoa: “Te mou lī ʻa e fānau tangata toki fāʻeleʻi kotoa pē ʻa e kau Hepeluú ki he Vaitafe Nailá, ka ke mou tuku pē ke moʻui ʻa e fānau fefine kotoa pē.”+

2 ʻI he taimi nai ko iá, naʻe mali ai ha tangata ʻe taha ʻo e fale ʻo Līvaí mo ha ʻofefine ʻo Līvai.+ 2 Pea naʻe hoko ʻa e fefiné ʻo feitama peá ne fāʻeleʻi ha tama tangata. ʻI heʻene sio ki heʻene fakaʻofoʻofá, naʻá ne tauhi fakafufū ia ʻi he māhina ʻe tolu.+ 3 ʻI he ʻikai ke ne kei malava ke fufū iá,+ naʻá ne toʻo ha kato* pepailo ʻo valiʻaki ia ʻa e meʻa hangē ha valitaá pea faʻo ʻi ai ʻa e tamá ʻo tuku ʻi he loto kaho ʻi he veʻe Vaitafe Nailá. 4 Ka naʻe tuʻu ʻa hono tuofefiné+ mei he mamaʻó ʻo sio pe ko e hā ʻa e meʻa ʻe hoko kiate iá.

5 ʻI he ʻalu hifo ʻa e ʻofefine ʻo Feló ke kaukau ʻi he Vaitafe Nailá, naʻe lue ʻa hono kau fefine tauhí ʻi he tafaʻaki ʻo e Vaitafe Nailá. Pea naʻá ne fakatokangaʻi atu ʻa e kató ʻi he loto kahó. Naʻá ne fekauʻi leva ʻa ʻene kaunangá ke ʻalu ʻo ʻomai ia.+ 6 ʻI heʻene fakaava hake iá, naʻá ne sio ai ki he tamá, pea naʻe tangi ʻa e tamasiʻí. Naʻá ne ongoʻi manavaʻofa kiate ia, ka naʻá ne pehē: “Ko e taha eni ʻo e fānau ʻa e kau Hepeluú.” 7 Naʻe pehē ange leva ʻe hono tuofefiné ki he ʻofefine ʻo Feló: “Te u ʻalu ʻo ui mai ha fefine tauhi mei he kau Hepeluú ke ne tauhi ʻa e tamá maʻau?” 8 Naʻe pehē ange ʻe he ʻofefine ʻo Feló kiate ia: “ʻAlu!” Naʻe ʻalu leva ʻa e taʻahiné ʻo ui mai ʻa e faʻē ʻa e tamá.+ 9 Naʻe pehē ange leva ʻe he ʻofefine ʻo Feló kiate ia: “Ke ke ʻalu mo e kiʻi tamá ni ʻo tauhi ia maʻaku, pea te u ʻoatu ha totongi kiate koe.” Ko ia naʻe ʻave ʻe he fefiné ʻa e tamá ʻo tauhi ia. 10 ʻI he tupu hake ʻa e tamá ʻo fuʻu lahí, naʻá ne ʻave ia ki he ʻofefine ʻo Feló, pea naʻá ne hoko ko haʻane tama.+ Naʻá ne fakahingoa ia ko Mōsese* peá ne pehē: “Koeʻuhí he kuó u ʻohake ia mei he vaí.”+

11 Pea ʻi he ngaahi ʻaho ko iá, hili ʻa e hoko ʻa Mōsese ko ha tokotaha lahí,* naʻá ne ʻalu atu ki hono fanga tokouá ke sio ki he ngaahi kavenga naʻa nau fuá,+ pea naʻá ne fakatokangaʻi atu ai ha tokotaha ʻIsipite ʻokú ne tā ha Hepelū, ko e taha ʻo hono fanga tokouá. 12 Ko ia naʻá ne fakasio ki hē mo ē, pea ʻi he ʻikai te ne sio ki ha tahá, naʻá ne tāmateʻi leva ʻa e ʻIsipité pea fufū ia ʻi he ʻoneʻoné.+

13 Ka naʻá ne ʻalu atu ʻi he ʻaho hono hokó, pea naʻe ʻi ai ʻa e ongo tangata Hepelū naʻá na fuhu. Ko ia naʻá ne pehē ange ki he tokotaha naʻe halá: “Ko e hā ʻokú ke taaʻi ai ho takangá?”+ 14 Naʻá ne pehē ange leva: “Ko hai naʻá ne fakanofo koe ko ha pilinisi mo ha fakamaau kiate kimautolu? ʻOkú ke palani koā ke tāmateʻi au ʻo hangē tofu pē ko hoʻo tāmateʻi ʻa e ʻIsipité?”+ Naʻe ilifia he taimi ko ení ʻa Mōsese ʻo ne pehē: “Tā kuo ʻiloʻi moʻoni ʻa e meʻá ni!”

15 Pea naʻe fanongo ʻa Felo ʻo fekauʻaki mo ia, pea naʻá ne feinga ke tāmateʻi ʻa Mōsese; ka naʻe hola ʻa Mōsese meia Felo ʻo ne ʻalu ʻo nofo ʻi he fonua ko Mitianí,+ pea naʻá ne tangutu hifo ʻi ha veʻe vaitupu. 16 Pea ko e taulaʻeiki ʻo Mitianí+ naʻe ʻi ai hono ngaahi ʻofefine ʻe toko fitu, pea naʻe haʻu ʻa kinautolú ni ke ʻutu vai pea ke fakafonu ʻa e ngaahi ʻaiʻanga inú ke fakainu ʻa e tākanga ʻa ʻenau tamaí. 17 Kae hangē ko ia naʻe faʻa hokó, naʻe haʻu ʻa e kau tauhi-sipí ʻo tuli kinautolu. ʻI he meʻá ni naʻe tuʻu hake ʻa Mōsese ʻo ne tokoni ki he* kau fefiné pea fakainu ʻenau tākangá. 18 ʻI heʻenau aʻu ki ʻapi kia Liueli*+ ko ʻenau tamaí, naʻá ne kalanga: “ʻOku anga-fēfē hoʻomou foki vave pehē mai ki ʻapi he ʻaho ní?” 19 Naʻa nau tali ange: “Naʻe fakahaofi kimautolu ʻe ha ʻIsipite+ mei he kau tauhi-sipí, pea aʻu ʻo ne ʻutu mai ʻa e vai maʻamautolu pea fakainu ʻa e tākangá.” 20 Naʻá ne pehē ange ki hono ngaahi ʻofefiné: “Ka ko fē ia? Ko e hā naʻa mou tuku ai pē ʻa e tangatá ʻi aí? Ui mai ia, koeʻuhí ke ne kai mo kitautolu.” 21 ʻI he hili iá, naʻe loto ʻa Mōsese ke nofo mo e tangatá, pea naʻá ne ʻoange ʻa Sīpola+ ko hono ʻofefiné kia Mōsese ke na mali. 22 Ki mui ai naʻá ne fanauʻi ha tama tangata, pea naʻe fakahingoa ia ʻe Mōsese ko Kēsomi,*+ he naʻá ne pehē, “Kuó u nofo ko ha muli ʻi ha fonua muli.”+

23 ʻI he hili ha taimi fuoloa,* naʻe mate ʻa e tuʻi ʻo ʻIsipité,+ ka naʻe hokohoko atu ʻa e toʻe ʻa e kau ʻIsilelí koeʻuhi ko e nofo pōpulá pea naʻa nau tangi ʻi he lāunga, pea ko ʻenau tangi ki ha tokoni koeʻuhi ko e nofo pōpulá naʻe hanganaki ʻalu hake ki he ʻOtua moʻoní.+ 24 Naʻe faifai pē ʻo fanongo ʻa e ʻOtuá ki heʻenau toʻé,+ pea naʻe manatuʻi ʻe he ʻOtuá ʻa ʻene fuakava mo ʻĒpalahame, ʻAisake, pea mo Sēkopé.+ 25 Ko ia naʻe vakai hifo ʻa e ʻOtuá ki he kau ʻIsilelí; pea naʻe tokanga ʻa e ʻOtuá kiate kinautolu.

3 Naʻe hoko ʻa Mōsese ko ha tauhi ʻo e tākanga ʻa Setelō+ ko e tamai ʻa hono malí, ko e taulaʻeiki ʻo Mitianí. ʻI he lolotonga ʻene taki ʻa e tākangá ki he tafaʻaki fakahihifo ʻo e toafá, naʻe faai atu pē ʻo ne aʻu ki he moʻunga ʻo e ʻOtua moʻoní, ki Hōlepi.+ 2 Naʻe hā leva kiate ia ʻa e ʻāngelo ʻa Sihová ko ha afi naʻe ulo ʻi he lotolotonga ʻo ha fuʻu ʻakau talatala.+ ʻI heʻene hanganaki vakai atu ki aí, naʻá ne sio naʻe ulo ʻa e fuʻu ʻakau talatalá, ka neongo ia naʻe ʻikai ke ʻosiʻosi ai ʻa e fuʻu ʻakau talatalá ia. 3 Ko ia naʻe pehē ai ʻe Mōsese: “Te u ʻalu ke vakaiʻi ʻa e meʻa anga-kehe ko eni ʻoku ʻasí ke sio pe ko e hā ʻoku ʻikai ke vela ai ʻa e fuʻu ʻakau talatalá.” 4 ʻI he ʻafioʻi ʻe Sihova naʻá ne ʻalu ke fakasió, naʻe ui kiate ia ʻa e ʻOtuá mei he fuʻu ʻakau talatalá ʻo ne pehē: “ʻE Mōsese! ʻE Mōsese!” Pea naʻá ne pehē ange ki  ai: “Ko au eni.” 5 Naʻá ne folofola ange leva: “ʻOua te ke haʻu ke toe ofi angé. Toʻo ho senitoló mei ho vaʻé, koeʻuhi ko e potu ʻa ia ʻokú ke tuʻu aí ko e kelekele toputapu ia.”

6 Naʻá ne hoko atu ʻo pehē: “Ko e ʻOtua au ʻo hoʻo tamaí, ko e ʻOtua ʻo ʻĒpalahame,+ ko e ʻOtua ʻo ʻAisake,+ pea ko e ʻOtua ʻo Sēkope.”+ Naʻe fufū leva ʻe Mōsese ʻa hono matá, koeʻuhi naʻá ne ilifia ke sio ki he ʻOtua moʻoní. 7 Naʻe hoko atu ʻa Sihova: “Kuó u mātā moʻoni ʻa e faingataʻaʻia ʻa hoku kakai ʻa ia ʻoku nau ʻi ʻIsipité, pea kuó u fanongo ki heʻenau tangi koeʻuhi ko e faʻahinga ʻoku nau fakamālohiʻi kinautolu ke ngāué; ʻoku ou ʻafioʻi lelei ʻa e ngaahi mamahi ʻoku nau fuesiá.+ 8 Te u ʻalu hifo* ke fakahaofi kinautolu mei he nima ʻo e kau ʻIsipité+ pea ke ʻomai kinautolu mei he fonua ko iá ki ha fonua ʻoku lelei mo ʻataʻatā, ko ha fonua ʻoku mahutafea ʻi he huʻakau mo e hone,+ ʻa e feituʻu ʻo e kau Kēnaní, kau Hetí, kau ʻĀmolí, kau Pēlisí, kau Heví, mo e kau Siepusí.+ 9 Pea vakai, ko e tangi ʻa e kakai ʻo ʻIsilelí kuo aʻu hake kiate au, pea kuó u mātā foki ʻa e founga kakaha ʻa ia ʻoku lōmekina ai kinautolu ʻe he kau ʻIsipité.+ 10 Ko eni, haʻu, te u fekauʻi atu koe kia Felo, pea te ke ʻomai ʻa hoku kakaí ʻa e kau ʻIsilelí mei ʻIsipite.”+

11 Kae kehe, naʻe pehē ʻe Mōsese ki he ʻOtua moʻoní: “Ko hai au ke u ʻalu kia Felo ʻo ʻomai ʻa e kau ʻIsilelí mei ʻIsipité?” 12 Naʻá ne folofola ange leva: “Te u fakamoʻoniʻi ʻoku ou ʻiate koe,+ pea ko e fakaʻilonga eni kiate koe ko au ia naʻá ku fekauʻi atu koé: ʻI he hili hoʻo ʻomai ʻa e kakaí mei ʻIsipité, ko e kakai ko kimoutolú te mou tauhi* ki he ʻOtua moʻoní ʻi he moʻungá ni.”+

13 Ka naʻe pehē ange ʻe Mōsese ki he ʻOtua moʻoní: “Pehē pē ʻoku ou ʻalu atu eni ki he kau ʻIsilelí peá u pehē kiate kinautolu, ‘Ko e ʻOtua ʻo hoʻomou ngaahi kuí kuó ne fekauʻi mai au kiate kimoutolu,’ pea nau pehē mai kiate au, ‘Ko hai ʻa hono huafá?’+ Ko e hā te u leaʻaki kiate kinautolú?” 14 Ko ia naʻe folofola ange ʻa e ʻOtuá kia Mōsese: “Te U Hoko ko e Meʻa ʻOku Ou Fili* ke Hoko ki Aí.”*+ Pea naʻá ne tānaki atu: “Ko e meʻa eni te ke leaʻaki ki he kau ʻIsilelí, ‘Ko Te U Hoko kuó ne fekauʻi mai au kiate kimoutolú.’”+ 15 Naʻe toe folofola leva ʻa e ʻOtuá kia Mōsese:

“Ko e meʻa eni te ke leaʻaki ki he kau ʻIsilelí, ‘Ko Sihova ko e ʻOtua ʻo hoʻomou ngaahi kuí, ko e ʻOtua ʻo ʻĒpalahame,+ ko e ʻOtua ʻo ʻAisake,+ pea ko e ʻOtua ʻo Sēkopé,+ kuó ne fekauʻi mai au kiate kimoutolú.’ Ko hoku huafá eni ʻo taʻengata,+ pea ko eni ʻe manatua ʻaki au mei he toʻutangata ki he toʻutangata. 16 Ko eni ʻalu ʻo fakatahatahaʻi mai ʻa e kau mātuʻa ʻo ʻIsilelí pea pehē kiate kinautolu, ‘Ko Sihova ʻa e ʻOtua ʻo hoʻomou ngaahi kuí kuó ne hā mai kiate au, ko e ʻOtua ʻo ʻĒpalahame, ʻAisake, mo Sēkope, pea naʻá ne folofola: “Kuó u fakatokangaʻi moʻoni kimoutolu+ pea mo e meʻa ʻoku fai kiate kimoutolu ʻi ʻIsipité. 17 Ko ia ʻoku ou pehē, te u ʻave kimoutolu mei he faingataʻaʻia+ ʻi he nima ʻo e kau ʻIsipité ki he fonua ʻo e kau Kēnaní, kau Hetí, kau ʻĀmolí,+ kau Pēlisí, kau Heví, mo e kau Siepusí,+ ki ha fonua ʻoku mahutafea ʻi he huʻakau mo e hone.”’+

18 “Te nau fanongo moʻoni ki ho leʻó,+ pea te ke ʻalu, ʻa koe mo e kau mātuʻa ʻo ʻIsilelí, ki he tuʻi ʻo ʻIsipité, pea ko kimoutolu kau tangata ke mou pehē kiate ia: ‘Ko Sihova ko e ʻOtua ʻo e kau Hepeluú+ kuó ne fetuʻutaki mo kimautolu. Ko ia, tuku muʻa ke mau fai ha fononga ʻaho ʻe tolu ki he toafá koeʻuhi ke mau fai ai ha feilaulau kia Sihova ko homau ʻOtuá.’+ 19 Ka ko au tonu ʻoku ou ʻafioʻi lelei ko e tuʻi ʻo ʻIsipité ʻe ʻikai te ne fakangofua kimoutolu ke mou ō kae ʻoua kuo kounaʻi ia ʻe ha nima mālohi.+ 20 Ko ia kuo pau ke mafao atu ʻa hoku nimá ʻo taaʻi ʻa ʻIsipite ʻaki ʻeku ngaahi ngāue fakaofo kotoa te u fai aí, pea ʻi he hili iá te ne fekauʻi kimoutolu ke mou ō.+ 21 Pea te u ʻai ʻa e kakaí ni ke ʻofeina ʻe he kau ʻIsipité, pea ʻi hoʻomou ʻalú, ʻe ʻikai ʻaupito te mou ʻalu mola pē.+ 22 Ko e fefine taki taha kuo pau ke ne kole ki hono kaungāʻapí pea ki he fefine ʻoku nofo ʻi hono falé ha ngaahi meʻa siliva mo ha ngaahi meʻa koula pea pehē ki he vala, pea te mou ʻai ia ki homou ngaahi fohá mo homou ngaahi ʻofefiné; pea te mou ʻave ʻa e koloa veté* mei he kau ʻIsipité.”+

4 Kae kehe, naʻe tali ange ʻe Mōsese: “Kae fēfē kapau heʻikai te nau tui mai kiate au pea ʻikai te nau fanongo ki hoku leʻó,+ he te nau pehē mai, ‘Naʻe ʻikai ke hā atu ʻa Sihova ia kiate koe.’” 2 Naʻe folofola ange leva ʻa Sihova kiate ia: “Ko e hā ena ʻoku ʻi ho nimá?” Naʻá ne tali ange: “Ko ha tokotoko.” 3 Naʻá ne folofola ange: “Lī ia ki he kelekelé.” Ko ia naʻá ne lī ia ki he kelekelé, pea naʻe hoko ia ko ha ngata;+ pea naʻe hola ʻa Mōsese mei ai. 4 Naʻe folofola ange leva ʻa Sihova kia Mōsese: “Mafao atu ho nimá ʻo puke ia ʻi hono hikú.” Ko ia naʻá ne mafao atu ʻo ne puke ia, pea naʻe hoko ia ko ha tokotoko ʻi hono nimá. 5 Naʻe folofola leva ʻa e ʻOtuá: “ʻOku hoko ení koeʻuhí ke nau tui ko Sihova ko e ʻOtua ʻo ʻenau fanga kuí, ʻa e ʻOtua ʻo ʻĒpalahame, ʻa e ʻOtua ʻo ʻAisake, pea ko e ʻOtua ʻo Sēkopé,+ kuó ne hā atu kiate koe.”+

6 Naʻe toe folofola ange ʻa Sihova kiate ia: “ʻAi muʻa ho nimá ki he pelu ʻolunga ʻo ho kofú.” Ko ia naʻá ne ʻai hono nimá ki he pelu ʻo hono kofú. ʻI heʻene toʻo ia ki tuʻá, tā naʻe taaʻi ʻaki ʻa e kiliá hono nimá ʻo hangē ha sinoú!+ 7 Pea naʻá ne folofola ange: “Fakafoki ho nimá ki he pelu ʻolunga ʻo ho kofú.” Ko ia naʻá ne fakafoki hono nimá ki hono kofú. ʻI heʻene toʻo ia ki tuʻa mei he kofú, naʻe toe foki ia ʻo tatau mo e toenga ʻo hono kakanó! 8 Naʻá ne folofola ange: “Kapau ʻe ʻikai te nau tui kiate koe pe tokanga ki he ʻuluaki fakaʻilongá, te nau toki tokanga moʻoni leva ki he fakaʻilonga hono hokó.+ 9 Kae kehe, neongo kapau ʻe ʻikai te nau tui ki he ongo fakaʻilonga ko ení pea fakafisi ke fanongo ki ho leʻó, te ke toʻo ha vai mei he Vaitafe Nailá ʻo ke lilingi ia ki he kelekele mōmoá, pea ko e vai te ke toʻo mei he Vaitafe Nailá ʻe hoko ia ko e toto ʻi he kelekele mōmoá.”+

10 Naʻe pehē ange leva ʻe Mōsese kia Sihova: “Fakamolemole muʻa ʻe Sihova, ka kuo teʻeki ai ʻaupito ke u hoko ko ha tokotaha pōtoʻi lea, ʻo ʻikai ʻi he kuohilí pe talu mei he taimi naʻá ke folofola mai ai ki hoʻo sevānití, he ʻoku ou lea tōʻohi* mo ʻelelo tōʻohi.”+ 11 Naʻe folofola ange ʻa Sihova kiate ia: “Ko hai naʻá ne ngaohi ha ngutu maʻá e tangatá, pe ko hai ʻokú ne ʻai kinautolu ke nau noá, tulí, ʻaá, pe kuí? ʻIkai ko au ia, ʻa au Sihova? 12 Ko ia ke ke ʻalu he taimí ni, pea te u ʻiate koe ʻi hoʻo leá* pea te u akoʻi kiate koe ʻa e meʻa te ke leaʻakí.”+ 13 Ka naʻá ne pehē: “Fakamolemole muʻa ʻe Sihova, kātaki ka ke fekau atu ha taha pē ʻokú ke loto ke fekauʻi atú.” 14 Pea naʻe kakaha ʻa e houhau ʻa Sihová kia Mōsese, ʻo ne folofola: “Fēfē ho tokouá, ʻa ʻĒlone+ ko e Līvaí? ʻOku ou ʻiloʻi ʻoku lava ke ne lea lelei ʻaupito. Pea ko eni ʻokú ne haʻu ki heni ke fakafetaulaki kiate koe. ʻI heʻene sio kiate koé, ʻe fiefia hono lotó.+ 15 Ko ia kuo pau ke ke lea kiate ia pea ʻai ʻa e ngaahi leá ni ki hono ngutú,+ pea te u ʻiate koe pea mo ia ʻi hoʻo leá,+ pea te u akoʻi ki he ongo tangata ko kimouá ʻa e meʻa ke faí. 16 Te ne lea maʻau ki he kakaí, pea te ne hoko ko hoʻo tangata-lea, pea te ke hoko ko ha ʻOtua kiate ia.*+ 17 Pea te ke toʻo ʻa e tokotoko ko ení ʻi ho nimá pea fakahoko ʻaki ia ʻa e ngaahi fakaʻilongá.”+

18 Ko ia naʻe foki ʻa Mōsese kia Setelō ko e tamai ʻa hono malí+ ʻo ne pehē kiate ia: “Kātaki muʻa ʻoku ou loto ke u ʻalu, ʻo u foki ki hoku fanga tokoua ʻoku ʻi ʻIsipité ke sio pe ʻoku nau kei moʻui.” Naʻe pehē ʻe Setelō kia Mōsese: “ʻAlu ʻi he fiemālie.” 19 ʻI he hili iá, naʻe folofola ʻa Sihova kia Mōsese ʻi Mitiani: “ʻAlu, foki ki ʻIsipite, koeʻuhí ko e kau tangata kotoa pē naʻa nau feinga ke tāmateʻi koé kuo nau mate.”+

20 Naʻe ʻave leva ʻe Mōsese ʻa hono uaifí mo hono ongo fohá ʻo ne fakaheka kinautolu ki ha ʻasi, peá ne foki ki he fonua ko ʻIsipité. ʻIkai ngata aí, naʻe toʻo ʻe Mōsese ʻa e tokotoko ʻo e ʻOtua moʻoní ʻi hono nimá. 21 Naʻe folofola ange leva ʻa Sihova kia Mōsese: “Hili hoʻo foki ki ʻIsipité, tokanga ke ke fakahoko ʻi he ʻao ʻo Feló ʻa e ngaahi mana kotoa pē kuó u fakaivia koe ke ke faí.+ Ka te u tuku ke ne hoko ʻo loto-fefeka,+ pea ʻe ʻikai te ne tuku atu ʻa e kakaí ke nau ʻalu.+ 22 Kuo pau ke ke lea kia Felo, ‘Ko e meʻa eni ʻoku folofolaʻaki ʻe Sihová: “Ko ʻIsileli ʻa hoku fohá, ʻa hoku ʻuluaki fohá.+ 23 ʻOku ou folofola kiate koe, Tuku mai ʻa hoku fohá ke ʻalu koeʻuhí ke ne tauhi kiate au. Ka ʻo kapau te ke fakafisi ke tuku mai ia ke ʻalu, te u tāmateʻi ho fohá, ʻa ho ʻuluaki fohá.”’”+

24 Pea lolotonga ʻa e ʻi he hala ʻi he fale tali fonongá, naʻe fakafetaulaki ai ʻa Sihova+ kiate ia pea naʻá ne feinga ke tāmateʻi ia.+ 25 Faifai pē naʻe toʻo ʻe Sīpola+ ha maka* ʻo ne kamu hono fohá pea ʻai ʻa e muʻa kili ʻo hono fakatangatá ke pā ki hono vaʻé ʻo ne pehē: “Koeʻuhí ko ha tangata mali koe ʻo e toto kiate au.” 26 Ko ia naʻá Ne tuku ange ia ke ne ʻalu. ʻI he taimi ko iá naʻe pehē ʻe he fefiné, “ko ha tangata mali ʻo e toto,” koeʻuhí ko e kamú.

27 Naʻe folofola leva ʻa Sihova kia ʻĒlone: “ʻAlu ki he toafá ke fakafetaulaki kia Mōsese.”+ Ko ia naʻá ne ʻalu atu ʻo ne fetaulaki mo ia ʻi he moʻunga ʻo e ʻOtua moʻoní+ ʻo ne fakafeʻiloaki kiate ia ʻaki ha ʻuma. 28 Pea naʻe tala ange ʻe Mōsese kia ʻĒlone ʻa e ngaahi folofola kotoa ʻa Sihová, ʻa ia naʻá ne fekauʻi mai iá,+ pea mo e ngaahi fakaʻilonga kotoa pē naʻá Ne tuʻutuʻuni kiate ia ke ne faí.+ 29 ʻI he hili iá, naʻe ʻalu atu ʻa Mōsese mo ʻĒlone ʻo na fakatahatahaʻi ʻa e kau mātuʻa kotoa pē ʻo e kau ʻIsilelí.+ 30 Naʻe tala ange ʻe ʻĒlone kiate kinautolu ʻa e ngaahi folofola kotoa naʻe folofolaʻaki ʻe Sihova kia Mōsesé, pea naʻá ne fakahoko ʻa e ngaahi fakaʻilongá+ ʻi he ʻao ʻo e kakaí. 31 ʻI he meʻá ni naʻe tui ai ʻa e kakaí.+ ʻI heʻenau fanongo kuo fai ʻe Sihova ha tokanga ki he kau ʻIsilelí+ pea kuó ne mamata ki heʻenau faingataʻaʻiá,+ naʻa nau punou hifo ʻo nau fakatōmapeʻe.

5 ʻI he hili iá, naʻe ʻalu atu ʻa Mōsese mo ʻĒlone ʻo na pehē kia Felo: “Ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí, ‘Tuku mai ʻa hoku kakaí ke nau ʻalu koeʻuhi ke nau fai ha kātoanga kiate au ʻi he toafá.’” 2 Ka naʻe pehē ange ʻe Felo: “Ko hai ʻa Sihova+ ke u talangofua ai ki hono leʻó ʻo tuku atu ʻa ʻIsileli ke nau ʻalu?+ ʻOku ʻikai ʻaupito haʻaku momoʻi ʻilo ʻa Sihova, pea ko e taha, ʻe ʻikai te u tuku atu ʻe au ʻa ʻIsileli ke nau ʻalu.”+ 3 Ka naʻá na pehē: “Ko e ʻOtua ʻo e kau Hepeluú kuó ne fetuʻutaki mo kimautolu. Kātaki muʻa, ʻoku mau loto ke fai ha fononga ʻaho ʻe tolu ki he toafá ʻo fai ha feilaulau kia Sihova ko homau ʻOtuá;+ he ka ʻikai, te ne taaʻi kimautolu ʻaki ʻa e mahaki pe ʻaki ʻa e heletā.” 4 Naʻe tali ange ʻe he tuʻi ʻo ʻIsipité kiate kinaua: “ʻE Mōsese mo ʻĒlone, ko e hā hono ʻuhinga ʻokú mo ʻave ai ʻa e kakaí mei heʻenau ngāué? Foki ki hoʻomou ngāué!”*+ 5 Pea naʻe hoko atu ʻa Felo: “Sio atu ki he tokolahi ʻo e kakai ʻo e fonuá, pea te mo ʻai kinautolu ke nau mālōlō mei heʻenau ngāué.”

6 ʻI he ʻaho tatau pē ko iá, naʻe tuʻutuʻuni ai ʻa Felo ki he kau pule ngāué mo ʻenau kau taki ngāué: 7 “Kuo pau ke ʻoua te mou kei ʻoange ʻa e kauʻi uite ki he kakaí ke nau ngaohi ʻaki ʻa e pilikí.+ Tuku ke nau ō ʻo tānaki ha kauʻi uite maʻanautolu. 8 Ka kuo pau ke mou kei hilifaki pē kiate kinautolu ʻa e lahi pau ʻo e ngaahi foʻi pilikí ʻo hangē ko ia naʻa nau ngaohi ʻi he kuohilí. ʻOua ʻe fakasiʻisiʻi ia kiate kinautolu, he ʻoku nau fakafiefiemālie.* Ko e ʻuhinga ia ʻoku nau kalanga ai, ‘ʻOku mau loto ke mau ō, ʻoku mau loto ke fai ha feilaulau ki homau ʻOtuá!’ 9 ʻAi ke nau ngāue mālohi ange, pea fakafemoʻuekinaʻi ai pē kinautolu koeʻuhi ke ʻoua te nau tokanga ki he ngaahi loí.”

10 Ko ia naʻe ʻalu atu ʻa e kau pule ngāué+ mo ʻenau kau taki ngāué ʻo pehē ki he kakaí: “Ko e meʻa eni kuo folofolaʻaki ʻe Feló, ‘Heʻikai te u toe ʻoatu kiate kimoutolu ha kauʻi uite. 11 Mou ō ʻo ʻomai haʻamou kauʻi uite maʻamoutolu ʻi ha feituʻu pē ʻe lava ke mou maʻu ai, ka ʻe ʻikai ʻaupito ke fakasiʻisiʻi ʻa hoʻomou ngāué.’” 12 Pea naʻe movete ʻa e kakaí ʻi he fonua kotoa ko ʻIsipité ke tānaki mai ʻa e tukeʻi uité ke ngāueʻaki ko ʻenau kauʻi uité ia. 13 Pea naʻe hanganaki uki kinautolu ʻe he kau pule ngāué: “Kuo pau ke mou taki taha ʻai ke ʻosi hoʻomou ngāué ʻi he ʻaho kotoa pē, ʻo hangē pē ko e taimi naʻe tokonaki atu ai ʻa e kauʻi uité.” 14 Pehē foki, naʻe haha+ ʻa e kau taki ngāue ʻo e kau ʻIsilelí, ʻa ia kuo fakanofo kiate kinautolu ʻe he kau pule ngāue ʻa Feló. Naʻe ʻeke ange ʻe he kau pule ngāué: “Ko e hā naʻe ʻikai ke aʻu ai ki he lahi pau ʻo e ngaahi foʻi piliki ʻa ia naʻa mou faʻa ngaohí? Naʻe hoko fakatouʻosi ia ʻaneafi pea mo e ʻahó ni.”

15 Ko ia naʻe ʻalu atu ʻa e kau taki ngāue ʻo e kau ʻIsilelí ʻo lāunga kia Felo: “Ko e hā ʻokú ke fai peheni ai ki hoʻo kau sevānití? 16 ʻOku ʻikai ke ʻomai ha kauʻi uite ki hoʻo kau sevānití, neongo ia ʻoku nau pehē mai kiate kimautolu, ‘Ngaohi piliki!’ ʻOku haha ʻa hoʻo kau sevānití, ka ko e foʻui ia ʻo ho kakai ʻoʻoú.” 17 Ka naʻá ne pehē ange: “ʻOku mou fakafiefiemālie,* ʻoku mou fakafiefiemālie!*+ Ko e ʻuhinga ia ʻoku mou pehē ai, ‘ʻOku mau loto ke mau ō, ʻoku mau loto ke fai ha feilaulau kia Sihová.’+ 18 Ko ia mou ō leva, foki ki he ngāué! ʻE ʻikai ʻoatu ha kauʻi uite kiate kimoutolu, ka kuo pau ke mou kei ngaohi pē ʻa e lahi pau ʻo hoʻomou ngaahi foʻi pilikí.”

19 Naʻe vakai leva ʻa e kau taki ngāue ʻo e kau ʻIsilelí naʻa nau faingataʻaʻia lahi koeʻuhi ko e tuʻutuʻuni: “Kuo pau ke ʻoua ʻaupito te mou fakasiʻisiʻi ʻa e lahi pau ʻo hoʻomou ngaahi foʻi piliki ʻi he ʻaho ʻe tahá.” 20 ʻI he hili iá, naʻa nau fakafetaulaki kia Mōsese mo ʻĒlone, ʻa ia naʻá na tuʻu ai ke fetaulaki mo kinautolu ʻi heʻenau haʻu meia Feló. 21 Naʻa nau pehē ange leva kiate kinaua: “ʻOfa ke vakai hifo ʻa Sihova kiate kimoua peá ne fakamaau, koeʻuhí kuó mo ʻai ʻa Felo mo ʻene kau sevānití ke nau fehiʻanekinaʻi kimautolu,* pea kuó mo ʻai ki honau nimá ha heletā ke tāmateʻi ʻaki kimautolu.”+ 22 Naʻe hanga hake leva ʻa Mōsese kia Sihova ʻo ne pehē: “ʻE Sihova, ko e hā kuó ke fakamamahiʻi ai ʻa e kakaí ni? Ko e hā kuó ke fekauʻi ai aú? 23 Mei he taimi naʻá ku ʻalu atu ai ki he ʻao ʻo Feló ke lea ʻi ho huafá,+ kuó ne fakafeangai ʻo toe kovi ange ai ki he kakaí ni,+ pea kuo ʻikai moʻoni ke ke fakahaofi ho kakaí.”+

6 Ko ia naʻe folofola ʻa Sihova kia Mōsese: “Ko eni te ke sio ki he meʻa te u fai kia Feló.+ Ko ha nima mālohi te ne fakamālohiʻi ia ke ne tuku atu kinautolu ke nau ʻalu, pea ko ha nima mālohi te ne fakamālohiʻi ia ke ne kapusi kinautolu mei hono fonuá.”+

2 Naʻe folofola leva ʻa e ʻOtuá kia Mōsese: “Ko Sihova au. 3 Pea naʻá ku faʻa hā kia ʻĒpalahame, ʻAisake, mo Sēkope ʻi he tuʻunga ko e ʻOtua Māfimafi-Aoniú,+ ka ʻi he fekauʻaki mo hoku huafa ko Sihová+ naʻe ʻikai te u ʻai ke nau ʻiloʻi au.+ 4 Naʻá ku fokotuʻu foki ʻeku fuakava mo kinautolu ke foaki kiate kinautolu ʻa e fonua ko Kēnaní, ʻa e fonua ʻa ia naʻa nau nofo ai ko e kau mulí.+ 5 Ko eni kuó u fanongo tonu ki he toʻe ʻa e kakai ʻo ʻIsilelí, ʻa ia ʻoku fakapōpulaʻi ʻe he kau ʻIsipité, pea ʻoku ou manatuʻi ʻeku fuakavá.+

6 “Ko ia ai, lea ki he kau ʻIsilelí: ‘Ko Sihova au, pea te u ʻomi kimoutolu mei he ngaahi kavenga ʻa e kau ʻIsipité pea fakahaofi kimoutolu mei heʻenau fakapōpulá,+ pea te u toe fakafoki mai kimoutolu ʻaki ha nima kuo mafao atu* pea ʻaki ha ngaahi tautea lahi.+ 7 Pea te u toʻo mai kimoutolu ke mou hoko ko hoku kakai, pea te u hoko ko homou ʻOtua,+ pea te mou ʻiloʻi moʻoni ko au Sihova ko homou ʻOtuá ʻa ia ʻokú ne ʻomi kimoutolu mei he ngaahi kavenga ʻa ʻIsipité. 8 Pea te u ʻomi kimoutolu ki he fonua ʻa ia naʻá ku fai ai ha fakapapau ʻaki ha fuakava* ke foaki kia ʻĒpalahame, ʻAisake, mo Sēkopé; pea te u foaki ia kiate kimoutolu ko ha meʻa ke mou maʻu.+ Ko Sihova au.’”+

9 Ki mui ai, naʻe ʻoange ʻe Mōsese ʻa e pōpoakí ni ki he kau ʻIsilelí, ka naʻe ʻikai te nau fanongo kia Mōsese koeʻuhí ko ʻenau loto-siʻí pea koeʻuhi ko e ngāue fakapōpula kakahá.+

10 Naʻe folofola ange leva ʻa Sihova kia Mōsese, ʻo pehē: 11 “ʻAlu ʻo tala kia Felo, ko e tuʻi ʻo ʻIsipité, ke ne tuku ʻa e kau ʻIsilelí ke nau ʻalu atu mei hono fonuá.” 12 Kae kehe, naʻe tali ange ʻe Mōsese kia Sihova: “Vakai! Kuo ʻikai ke fanongo mai ʻa e kau ʻIsilelí kiate au;+ ʻe anga-fēfē ha teitei fanongo mai ʻa Felo kiate au, he ʻoku ou vale ʻi he leá?”*+ 13 Ka naʻe toe tala ʻe Sihova kia Mōsese mo ʻĒlone ʻa e ngaahi tuʻutuʻuni ke ʻoange ki he kau ʻIsilelí pea kia Felo, ko e tuʻi ʻo ʻIsipité, koeʻuhi ke ʻomi ʻa e kau ʻIsilelí mei he fonua ko ʻIsipité.

14 Ko e ngaahi ʻulumotuʻa eni ʻo e fale ʻo ʻenau ngaahi tamaí: Ko e ngaahi foha ʻo Lūpení, ʻa e ʻuluaki foha ʻo ʻIsilelí,+ ko Hēnoke, Palu, Hesiloni, pea mo Kalimi.+ Ko e ngaahi fāmili eni ʻo Lūpení.

15 Ko e ngaahi foha ʻo Simioné ko Semueli, Siamini, ʻŌhati, Siakini, Sohā, pea mo Saulo, ko e tama ʻa ha fefine Kēnani.+ Ko e ngaahi fāmili eni ʻo Simioné.

16 Ko e ngaahi hingoa eni ʻo e ngaahi foha ʻo Līvaí,+ ʻo fakatatau ki honau laine hohoko fakafāmilí: Ko Kēsoni, Kōhate, pea mo Mēlali.+ Ko e lōloa ʻo e moʻui ʻa Līvaí ko e taʻu ʻe 137.

17 Ko e ongo foha ʻo Kēsoní ko Lipini pea mo Simi, ʻo fakatatau ki hona ngaahi fāmilí.+

18 Ko e ngaahi foha ʻo Kōhaté ko ʻAmilami, ʻIsaʻā, Hepeloni, pea mo ʻOsieli.+ Ko e lōloa ʻo e moʻui ʻa Kōhaté ko e taʻu ʻe 133.

19 Ko e ongo foha ʻo Mēlalí ko Mahali pea mo Musi.

Ko e ngaahi fāmili eni ʻo e kau Līvaí, ʻo fakatatau ki honau laine hohoko fakafāmilí.+

20 Pea naʻe ʻave ʻe ʻAmilami ʻa Siokāpesi, ko e tuofefine ʻo ʻene tamaí, ke hoko ko hono uaifi.+ Naʻá ne fanauʻi kiate ia ʻa ʻĒlone pea mo Mōsese.+ Ko e lōloa ʻo e moʻui ʻa ʻAmilamí ko e taʻu ʻe 137.

21 Ko e ngaahi foha ʻo ʻIsaʻaá ko Kola,+ Nēfeki, pea mo Sikeli.

22 Ko e ngaahi foha ʻo ʻOsielí ko Misaeli, ʻElisafani,+ pea mo Sitili.

23 Pea naʻe ʻave ʻe ʻĒlone ʻa ʻElisepa, ko e ʻofefine ʻo ʻAminatape, ko e tuofefine ʻo Naʻasoní,+ ke hoko ko hono uaifi. Naʻá ne fanauʻi kiate ia ʻa Nātapi, ʻĀpiu, ʻEliesa, pea mo ʻĪtama.+

24 Ko e ngaahi foha ʻo Kolá ko ʻAsili, ʻElikena, pea mo ʻApiesafe.+ Ko e ngaahi fāmili eni ʻo e haʻa Kolá.+

25 Ko ʻEliesa,+ ʻa e foha ʻo ʻĒloné, naʻá ne ʻave ʻa e taha ʻo e ngaahi ʻofefine ʻo Putielí ke hoko ko hono uaifi. Naʻá ne fanauʻi kiate ia ʻa Fineasi.+

Ko e ngaahi ʻulumotuʻa eni ʻo e ngaahi fale ʻo e ngaahi tamai ʻa e kau Līvaí, ʻo fakatatau ki honau ngaahi fāmilí.+

26 Ko ʻĒlone mo Mōsese eni ʻa ia naʻe folofola ki ai ʻa Sihova: “ʻOmi fakakulupu*+ ʻa e kakai ʻo ʻIsilelí mei he fonua ko ʻIsipité.” 27 Ko kinaua ia naʻá na lea kia Felo, ko e tuʻi ʻo ʻIsipité, ke ʻomi ʻa e kakai ʻo ʻIsilelí mei ʻIsipité. Ko Mōsese mo ʻĒlone+ ia ko ení.

28 ʻI he ʻaho ko iá ʻi he taimi naʻe folofola ai ʻa Sihova kia Mōsese ʻi he fonua ko ʻIsipité, 29 naʻe pehē ʻe Sihova kia Mōsese: “Ko Sihova au. Lea kia Felo ko e tuʻi ʻo ʻIsipité ʻaki ʻa e meʻa kotoa pē ʻoku ou folofolaʻaki kiate koé.” 30 Naʻe pehē leva ʻe Mōsese ʻi he ʻao ʻo Sihová: “Vakai! ʻOku ou vale ʻi he leá,* ko ia ʻe anga-fēfē ha teitei fanongo mai ʻa Felo kiate au?”+

7 Naʻe folofola leva ʻa Sihova kia Mōsese: “Vakai, kuó u ʻai koe ke ke hangē ko e ʻOtuá* kia Felo, pea ko ʻĒlone ko ho tokouá tonu te ne hoko ko ha palōfita kiate koe.+ 2 Te ke leaʻaki ʻa e meʻa kotoa pē te u tuʻutuʻuni kiate koé, pea ko ʻĒlone ko ho tokouá ʻe lea ia kia Felo, pea te ne tuku ʻa e kau ʻIsilelí ke nau ʻalu atu mei hono fonuá. 3 Ka ko au, te u tuku ke hoko ʻa Felo ʻo loto-fefeka,+ pea te u fakalahi ʻeku ngaahi fakaʻilongá mo ʻeku ngaahi maná ʻi he fonua ko ʻIsipité.+ 4 Ka ʻe ʻikai fanongo ʻa Felo kiate kimoua, pea te u hilifaki hoku nimá ki ʻIsipite pea ʻomi ʻa hoku fuʻu kakaí,* ʻa hoku kakaí, ʻa e kau ʻIsilelí, mei he fonua ko ʻIsipité ʻaki ha ngaahi tautea lahi.+ 5 Pea ʻe ʻiloʻi moʻoni ʻe he kau ʻIsipité ko Sihova au+ ʻi he taimi te u mafao atu ai hoku nimá ki ʻIsipite ʻo ʻomi ʻa e kau ʻIsilelí mei honau lotolotongá.” 6 Naʻe fai ʻe Mōsese mo ʻĒlone ʻa e meʻa naʻe tuʻutuʻuni ʻe Sihova kiate kinauá; naʻá na fai ʻa e meʻa tofu pē ko iá. 7 Naʻe taʻu 80 ʻa Mōsese pea taʻu 83 ʻa ʻĒlone ʻi he taimi naʻá na lea ai kia Feló.+

8 Pea naʻe folofola ange ʻa Sihova kia Mōsese mo ʻĒlone: 9 “Kapau ʻe pehē atu ʻe Felo kiate kimoua, ‘Fai ha mana,’ peá ke tala kia ʻĒlone, ‘Toʻo ho tokotokó pea lī ia ki lalo ʻi he ʻao ʻo Feló.’ ʻE hoko ia ko ha fuʻu ngata lahi.”+ 10 Ko ia naʻe ʻalu atu ʻa Mōsese mo ʻĒlone kia Felo ʻo na fai ʻa e meʻa tofu pē ko ia naʻe tuʻutuʻuni ʻe Sihová. Naʻe lī ʻe ʻĒlone ʻa hono tokotokó ki lalo ʻi he ʻao ʻo Felo mo ʻene kau sevānití, pea naʻe hoko ia ko ha fuʻu ngata lahi. 11 Kae kehe, naʻe ui mai ʻe Felo ʻa e kau tangata potó mo e kau faifakalouʻakaú, pea naʻe fai foki ʻe he kau taulaʻeiki faimana ʻo ʻIsipité+ ʻa e meʻa tatau ʻaki ʻenau faimaná.*+ 12 Naʻa nau taki taha lī ki lalo hono tokotoko, pea naʻe hoko ia ko e fanga ngata lalahi; ka naʻe folofua ʻe he tokotoko ʻo ʻĒloné honau ngaahi tokotokó. 13 Neongo ia, naʻe hoko ʻa Felo ʻo loto-fefeka,+ pea naʻe ʻikai te ne fanongo kiate kinaua, ʻo hangē pē ko ia naʻe folofolaʻaki ʻe Sihová.

14 Pea naʻe folofola ʻa Sihova kia Mōsese: “ʻOku ongongataʻa ʻa e loto ʻo Feló.+ Kuó ne fakafisi ke tuku atu ʻa e kakaí ke nau ʻalu. 15 ʻAlu kia Felo ʻi he pongipongi haké. Vakai! ʻOkú ne ʻalu atu ki he vaí! Pea te ke tuʻu ke fakafetaulaki kiate ia ʻi he ngutuʻi Vaitafe Nailá; peá ke toʻo ʻi ho nimá ʻa e tokotoko naʻe liliu ko ha ngatá.+ 16 Pea kuo pau ke ke pehē kiate ia, ‘Kuo fekau mai au ʻe Sihova ko e ʻOtua ʻo e kau Hepeluú kiate koe,+ peá ne folofola mai: “Tuku mai ʻa hoku kakaí koeʻuhí ke nau ʻalu ʻo tauhi kiate au ʻi he toafá,” ka kuo ʻikai te ke talangofua ki ai ʻo aʻu mai ki he taimí ni. 17 Ko e meʻa eni ʻoku folofolaʻaki ʻe Sihová: “Ko e meʻa eni te ke ʻilo ai ko Sihova aú.+ Ko eni te u taaʻi ʻa e vai ʻoku ʻi he Vaitafe Nailá ʻaki ʻa e tokotoko ʻoku ʻi hoku nimá, pea ʻe liliu ia ko e toto. 18 Pea ko e fanga ika ʻoku ʻi he Vaitafe Nailá te nau mate, pea ʻe nanamu ʻa e Vaitafe Nailá, pea ko e kau ʻIsipité ʻe ʻikai lava ke nau inu mei he vai ʻi he Vaitafe Nailá.”’”

19 Naʻe folofola leva ʻa Sihova kia Mōsese: “Lea kia ʻĒlone, ‘Toʻo ho tokotokó pea mafao atu ho nimá ki he ngaahi vai ʻo ʻIsipité,+ ki hono ngaahi vaitafé, ki hono ngaahi mangaʻivaí,* ki hono ngaahi anó,+ pea ki he kotoa ʻo ʻene ngaahi tauhiʻanga vaí, koeʻuhí ke nau hoko ko e toto.’ ʻE ʻi ai ʻa e toto ʻi he kotoa ʻo e fonua ko ʻIsipité, ʻo aʻu ki he ngaahi ʻaiʻanga meʻa ʻakaú mo e ngaahi ʻaiʻanga meʻa maká.” 20 Naʻe fai leva ʻe Mōsese mo ʻĒlone ʻa e meʻa tofu pē ko ia naʻe tuʻutuʻuni ʻe Sihová. Naʻá ne hiki hake ʻa e tokotokó ʻo taaʻi ʻa e vai naʻe ʻi he Vaitafe Nailá ʻi he ʻao ʻo Felo mo ʻene kau sevānití, pea ko e kotoa ʻo e vai naʻe ʻi he vaitafé naʻe liliu ia ko e toto.+ 21 Pea naʻe mate ʻa e fanga ika naʻe ʻi he vaitafé,+ pea naʻe kamata ke nanamu ʻa e vaitafé, pea naʻe ʻikai lava ʻa e kau ʻIsipité ke inu ʻa e vai mei he Vaitafe Nailá,+ pea naʻe ʻi ai ʻa e toto ʻi he fonua kotoa ko ʻIsipité.

22 Ka neongo ia, naʻe fai ʻe he kau taulaʻeiki faimana ʻo ʻIsipité ʻa e meʻa tatau ʻaki ʻenau ngaahi mana fakaliloliló,+ ko ia naʻe hokohoko atu ai ʻa e loto-fefeka ʻa Feló, pea naʻe ʻikai te ne fanongo kiate kinaua, ʻo hangē tofu pē ko ia naʻe folofolaʻaki ʻe Sihová.+ 23 Naʻe foki leva ʻa Felo ki hono falé, pea naʻe ʻikai foki tokanga hono lotó ki he meʻá ni. 24 Ko ia naʻe keli takai holo ʻa e kau ʻIsipité kotoa ʻi he Vaitafe Nailá ki ha vai ke nau inu, koeʻuhí naʻe ʻikai lava ke nau inu ha vai mei he Vaitafe Nailá. 25 Pea naʻe ʻosi atu ʻa e ʻaho kakato ʻe fitu mei hono taaʻi ʻe Sihova ʻa e Vaitafe Nailá.

8 Naʻe folofola leva ʻa Sihova kia Mōsese: “ʻAlu atu kia Felo peá ke pehē kiate ia, ‘Ko e meʻa eni ʻoku folofolaʻaki ʻe Sihová: “Tuku mai ʻa hoku kakaí ke nau ʻalu koeʻuhi ke nau tauhi kiate au.+ 2 Kapau te ke hanganaki fakafisi ke tuku mai kinautolu ke nau ʻalu, te u taaʻi ho feituʻú kotoa ʻaki ha fanga poto.+ 3 Pea ko e Vaitafe Nailá ʻe ngaʻuta ʻi he fanga potó, pea te nau ʻalu hake ʻo hū ki ho falé, ki ho loki mohé, ki ho mohengá, ki he ngaahi fale ʻo hoʻo kau sevānití pea ki ho kakaí, ki hoʻo ngaahi ʻōvaní, pea ki hoʻo ngaahi natuʻanga maá.*+ 4 ʻE ʻalu hake ʻa e fanga potó kiate koe, ki ho kakaí, pea ki he kotoa ʻo hoʻo kau sevānití.”’”

5 Ki mui ai, naʻe folofola ʻa Sihova kia Mōsese: “Lea kia ʻĒlone, ‘Mafao atu ho nimá mo ho tokotokó ki he ngaahi vaitafé, ko e ngaahi mangaʻivai ʻo e Vaitafe Nailá, mo e ngaahi anó, pea ʻai ke ʻalu hake ʻa e fanga potó ki he fonua ko ʻIsipité.’” 6 Ko ia naʻe mafao atu ʻe ʻĒlone ʻa hono nimá ki he ngaahi vai ʻo ʻIsipité, pea naʻe kamata ke ʻalu hake ʻa e fanga potó ʻo nau kāpui ʻa e fonua ko ʻIsipité. 7 Kae kehe, naʻe fai ʻe he kau taulaʻeiki faimaná ʻa e meʻa tatau ʻaki ʻenau ngaahi mana fakaliloliló, pea naʻa nau ʻai foki ke ʻalu hake ʻa e fanga potó ki he fonua ko ʻIsipité.+ 8 Naʻe ui mai leva ʻe Felo ʻa Mōsese mo ʻĒlone ʻo ne pehē: “Kōlenga kia Sihova ke ne toʻo ʻa e fanga potó meiate au mo hoku kakaí,+ he ʻoku ou loto ke tuku atu ʻa e kakaí ke nau ʻalu koeʻuhi ke nau fai ha feilaulau kia Sihova.” 9 Naʻe pehē ange leva ʻe Mōsese kia Felo: “ʻOku ou tuku atu kiate koe ʻa e lāngilangi ke ke tala mai kiate au ʻa e taimi ke u kōlenga ai ke toʻo ʻa e fanga potó meiate koe, mei hoʻo kau sevānití, mei ho kakaí, pea mei ho ngaahi falé. Ko e Vaitafe Nailá pē te nau toe aí.” 10 ʻI he meʻá ni naʻá ne pehē: “ʻApongipongi.” Ko ia naʻá ne pehē ange: “ʻE hoko ia ʻo fakatatau ki hoʻo leá koeʻuhi ke ke ʻiloʻi ai ʻoku ʻikai ha toe taha kehe ʻe hangē ko Sihova ko homau ʻOtuá.+ 11 Ko e fanga potó te nau mavahe meiate koe, mei ho ngaahi falé, mei hoʻo kau sevānití, pea mei ho kakaí. Ko e Vaitafe Nailá+ pē te nau toe aí.”

12 Ko ia naʻe ʻalu atu ʻa Mōsese mo ʻĒlone meia Felo, pea naʻe kōlenga ʻa Mōsese kia Sihova ʻo fekauʻaki mo e fanga poto naʻá Ne ʻomai kia Feló.+ 13 Naʻe fai leva ʻe Sihova ʻo hangē ko ia naʻe kole ki ai ʻa Mōsesé, pea naʻe kamata ke mate ʻa e fanga potó ʻi he ngaahi falé, ko e ngaahi lotoʻaá, pea mo e ngaahi loto ʻataʻataá. 14 Naʻa nau fokotuʻutaha kinautolu ʻi he ngaahi fokotuʻunga naʻe ʻikai kei faʻa lava ke lau, pea naʻe kamata ke nanamu ʻa e fonuá. 15 ʻI he sio ʻa Felo kuo fakafiemālié, naʻá ne fakafefeka ʻa hono lotó+ peá ne fakafisi ke fanongo kiate kinaua, ʻo hangē pē ko ia naʻe folofolaʻaki ʻe Sihová.

16 Pea naʻe folofola ʻa Sihova kia Mōsese: “Lea kia ʻĒlone, ‘Mafao atu ho tokotokó ʻo taaʻi ʻa e efu ʻo e fonuá, pea kuo pau ke hoko ia ko e fanga namu* ʻi he fonua kotoa ko ʻIsipité.’” 17 Pea naʻá na fai ʻa e meʻá ni. Naʻe mafao atu ʻe ʻĒlone ʻa hono nimá mo hono tokotokó ʻo taaʻi ʻa e efu ʻo e fonuá, pea naʻe haʻu ʻa e fanga namú ki he tangatá mo e manú. Ko e efu kotoa ʻo e fonuá naʻe hoko ia ko e fanga namu ʻi he fonua kotoa ko ʻIsipité.+ 18 Ko e kau taulaʻeiki faimaná naʻa nau feinga ke fai ʻa e meʻa tatau ʻo ʻai ke ʻi ai ha fanga namu ʻaki ʻenau ngaahi mana fakaliloliló,+ ka naʻe ʻikai te nau lava. Pea naʻe haʻu ʻa e fanga namú ki he tangatá mo e manú. 19 Ko ia naʻe pehē ʻe he kau taulaʻeiki faimaná kia Felo: “Ko e louhiʻinima ia ʻo e ʻOtuá!”+ Ka naʻe hokohoko atu ʻa e loto-fefeka ʻa Feló, pea naʻe ʻikai te ne fanongo kiate kinaua, ʻo hangē pē ko ia naʻe folofolaʻaki ʻe Sihová.

20 Naʻe folofola leva ʻa Sihova kia Mōsese: “Tuʻu pongipongia hake pea ʻalu atu ʻo tuʻu ʻi he ʻao ʻo Feló. Vakai! ʻOkú ne ʻalu atu ki he vaí! Pea kuo pau ke ke pehē kiate ia, ‘Ko e meʻa eni kuo folofolaʻaki ʻe Sihová: “Tuku mai ʻa hoku kakaí ke nau ʻalu koeʻuhi ke nau tauhi kiate au. 21 Ka ʻo kapau heʻikai te ke tuku mai ʻa hoku kakaí ke nau ʻalu, te u tuku atu kiate koe, ki hoʻo kau sevānití, pea ki ho kakaí pea ki ho ngaahi falé ʻa e lango;* pea ko e ngaahi fale ʻo ʻIsipité ʻe fonu ʻi he fanga langó, pea ʻe aʻu ʻo nau ʻufiʻufi ʻa e kelekele ʻoku nau* tuʻu aí. 22 ʻI he ʻaho ko iá te u fakamavaheʻi moʻoni ʻa e fonua ko Kōsení, ʻa ia ʻoku nofo ai ʻa hoku kakaí. ʻE ʻikai ke ʻi ai ha fanga lango ai,+ pea ʻi he meʻá ni te ke ʻiloʻi ai ko au, ʻa Sihova, ʻoku ou ʻi heni ʻi he fonuá.+ 23 Pea te u ʻai ke ʻi ai ha faikehekehe ʻi he vahaʻa ʻo hoku kakaí mo ho kakaí. Ko ʻapongipongi ʻe hoko ai ʻa e fakaʻilongá ni.”’”

24 Pea naʻe fai ia ʻe Sihova, pea naʻe kamata ke fakatūʻuta ha ngaahi fuʻu pupunga lango ʻi he fale ʻo Feló mo e ngaahi fale ʻo ʻene kau sevānití pea mo e fonua kotoa ko ʻIsipité.+ Naʻe maumauʻi ʻa e fonuá ʻe he fanga langó.+ 25 Naʻe faifai pē ʻo ui ʻe Felo ʻa Mōsese mo ʻĒlone peá ne pehē ange: “Mou ō, fai ha feilaulau ki homou ʻOtuá ʻi he fonuá.” 26 Ka naʻe pehē ʻe Mōsese: “ʻOku ʻikai totonu ke fai pehē, koeʻuhi ko e meʻa te mau feilaulauʻaki kia Sihova ko homau ʻOtuá ʻe fakalielia ia ki he kau ʻIsipité.+ Kapau te mau fai ha feilaulau ʻa ia ʻoku fakalielia ki he kau ʻIsipité ʻi honau ʻaó tonu, ʻikai te nau tolomakaʻi kimautolu? 27 Te mau fai ha fononga ʻaho ʻe tolu ki he toafá, pea te mau fai ai ha feilaulau kia Sihova ko homau ʻOtuá, ʻo hangē pē ko ia kuó ne folofolaʻaki kiate kimautolú.”+

28 Pea naʻe pehē ange ʻe Felo: “Te u tuku atu kimoutolu ke mou ʻalu ke fai ha feilaulau kia Sihova ko homou ʻOtuá ʻi he toafá. Ko e meʻá pē, kuo pau ke ʻoua te mou ō ʻo fuʻu mamaʻo atu. Mo fai ha kōlenga maʻaku.”+ 29 Naʻe pehē leva ʻe Mōsese: “Ko ʻeni ʻoku ou ʻalu atu meiate koe, pea te u kōlenga kia Sihova, pea ʻe mavahe ʻa e fanga langó meia Felo, mei heʻene kau sevānití, pea mei hono kakaí ʻapongipongi. Ka kuo pau ke tuku ʻe Felo ʻene kākaaʻi* kimautolu ʻaki ʻene fakafisi ke tuku mai ʻa e kakaí ke nau ʻalu ʻo fai ha feilaulau kia Sihová.”+ 30 Naʻe ʻalu atu leva ʻa Mōsese meia Felo peá ne kōlenga kia Sihova.+ 31 Ko ia naʻe fai ʻe Sihova ʻo fakatatau ki he lea ʻa Mōsesé, pea naʻe mavahe ʻa e fanga langó meia Felo, mei heʻene kau sevānití, pea mei hono kakaí. Naʻe ʻikai toe ha lango ʻe taha ai. 32 Kae kehe, naʻe toe fakafefeka ʻe Felo ʻa hono lotó pea naʻe ʻikai te ne tuku mai ʻa e kakaí ke nau ʻalu.

9 Ko ia naʻe folofola ʻa Sihova kia Mōsese: “ʻAlu atu kia Felo peá ke pehē kiate ia, ‘Ko e meʻa eni kuo folofolaʻaki ʻe Sihova ko e ʻOtua ʻo e kau Hepeluú: “Tuku mai ʻa hoku kakaí ke nau ʻalu koeʻuhi ke nau tauhi kiate au.+ 2 Ka ʻo kapau te ke fakafisi ke tuku kinautolu ke nau ʻalu peá ke kei puke ai pē kinautolu, 3 vakai, ʻe hoko mai ʻa e nima ʻo Sihová+ ki hoʻo fanga monumanu ʻi he vaó. ʻE tō ha mahaki fakaʻauha+ ki he fanga hōsí, ki he fanga ʻasí, ki he fanga kāmelí, ki he fanga pulú, pea ki he fanga sipí. 4 Pea ʻe ʻai moʻoni ʻe Sihova ke ʻi ai ha faikehekehe ʻi he vahaʻa ʻo e fanga monumanu ʻa ʻIsilelí pea mo e fanga monumanu ʻa ʻIsipité, pea ʻe ʻikai mate+ ha momoʻi meʻa ʻa e kau ʻIsilelí.”’” 5 ʻIkai ko ia pē, naʻe fokotuʻu ʻe Sihova ha taimi pau, ʻo ne pehē: “Ko ʻapongipongi ʻe fai ai ʻe Sihova ʻa e meʻá ni ʻi he fonuá.”

6 Pea naʻe fai ʻe Sihova ʻa e meʻá ni ʻi he ʻaho pē hono hokó, pea naʻe kamata ke mate+ ʻa e faʻahinga monumanu kotoa pē ʻa ʻIsipité, ka naʻe ʻikai ke mate ha taha ʻo e fanga monumanu ʻa ʻIsilelí. 7 ʻI hono fai ʻe Felo ha fakaʻeké, vakai, naʻe ʻikai ʻaupito ke mate ha taha ʻo e fanga monumanu ʻa ʻIsilelí. Ka neongo ia, naʻe hokohoko atu pē ʻa e ongongataʻa ʻa e loto ʻo Feló, pea naʻe ʻikai te ne tuku ʻa e kakaí ke nau ʻalu.+

8 Naʻe folofola leva ʻa Sihova kia Mōsese mo ʻĒlone: “Toʻo ha ngaahi falukunga efuefu ʻi homo ongo nimá mei ha fōnise, pea kuo pau ke laku hake ia ʻe Mōsese ki he ʻeá ʻi he ʻao ʻo Feló. 9 Pea ʻe hoko ia ko ha efuefu momo iiki ʻi he fonua kotoa ko ʻIsipité, pea ʻe hoko ia ko e ngaahi hangatāmaki fakapela ʻi he tangata mo e manu ʻi he fonua kotoa ko ʻIsipité.”

10 Ko ia naʻá na toʻo ha efuefu mei ha fōnise peá na tuʻu ʻi he ʻao ʻo Feló, pea naʻe tupeʻi atu ia ʻe Mōsese ki he ʻeá, pea naʻe hoko ia ko e ngaahi hangatāmaki fakapela ʻo laku mai ia ʻi he tangata mo e manu. 11 Naʻe ʻikai malava ʻa e kau taulaʻeiki faimaná ke tuʻu ʻi he ʻao ʻo Mōsesé, he naʻe tupu ʻi he kau taulaʻeiki faimaná pea ʻi he kotoa ʻo e kau ʻIsipité+ ʻa e ngaahi hangatāmaki. 12 Ka naʻe tuku ʻe Sihova ke hoko ʻa Felo ʻo loto-fefeka, pea naʻe ʻikai te ne fanongo kiate kinaua, ʻo hangē pē ko ia naʻe folofolaʻaki ʻe Sihova kia Mōsesé.+

13 Naʻe folofola leva ʻa Sihova kia Mōsese: “Tuʻu pongipongia hake peá ke ʻalu atu ʻo tuʻu ʻi he ʻao ʻo Feló, ʻo ke pehē kiate ia, ‘Ko e meʻa eni kuo folofolaʻaki ʻe Sihova ko e ʻOtua ʻo e kau Hepeluú: “Tuku mai ʻa hoku kakaí ke nau ʻalu koeʻuhi ke nau tauhi kiate au. 14 He ko eni ʻoku ou fakahanga atu ʻeku ngaahi taá kotoa kiate koe, ki hoʻo kau sevānití, pea ki ho kakaí, koeʻuhi ke ke ʻiloʻi ʻoku ʻikai ha taha ʻe hangē ko aú ʻi he māmaní kotoa.+ 15 He ʻi he taimi ní ne mei lava ke u mafao atu hoku nimá ʻo taaʻi koe mo ho kakaí ʻaki ha mala fakatupu ʻauha, pea naʻe mei tafiʻi atu* koe mei he māmaní. 16 Ka ko eni ʻa e ʻuhinga tofu pē kuó u kei tuku ai koe ke ke moʻuí: Ke fakahaaʻi kiate koe ʻa hoku mālohí pea ke talaki ʻa hoku huafá ʻi he kotoa ʻo e māmaní.+ 17 ʻOkú ke kei fakamafutofuta pē ki hoku kakaí ʻi he ʻikai te ke tuku mai kinautolu ke nau ʻalú? 18 Ko eni te u ʻai ke tō hifo ha fuʻu ʻuha-ʻaisi* ʻapongipongi ʻi he taimi nai ko ení, ʻa ia kuo teʻeki ai ʻaupito ke hoko ia ʻi ʻIsipite mei he ʻaho naʻe tanupou aí ʻo aʻu mai ki he taimí ni. 19 Ko ia ai, ke ke fekau atu ke ʻomi ki he malú ʻa e kotoa ʻo hoʻo fanga monumanú pea mo hoʻo meʻa kotoa ʻoku ʻi he vaó. Ko e tangata mo e manu kotoa pē ʻe maʻu ʻi he vaó pea ʻikai fakahū ki falé te ne mate ʻi he taimi ʻe tō mai ai ʻa e ʻuha-ʻaisí kiate kinautolú.”’”

20 Ko ha taha pē ʻi he lotolotonga ʻo e kau sevāniti ʻa Feló naʻe manavahē ki he folofola ʻa Sihová naʻá ne fakahū fakavave ʻene kau sevāniti ʻaʻaná mo ʻene fanga monumanú ki he ngaahi falé, 21 kae ʻilonga ʻa ia naʻe ʻikai tokanga ki he folofola ʻa Sihová naʻá ne tuku pē ʻene kau sevānití mo ʻene fanga monumanú ʻi he vaó.

22 Naʻe folofola ange leva ʻa Sihova kia Mōsese: “Mafao atu ho nimá ki he langí, koeʻuhí ke tō hifo ha ʻuha-ʻaisi ki he fonua kotoa ko ʻIsipité,+ ki he tangata mo e manu mo e ʻakau kotoa pē ʻo e vaó ʻi he fonua ko ʻIsipité.”+ 23 Ko ia naʻe mafao atu ʻe Mōsese ʻa hono tokotokó ki he langí, pea naʻe tuku mai ʻe Sihova ʻa e mana mo e ʻuha-ʻaisi, pea naʻe ʻalu hifo ʻa e afi* ki he fonuá, pea naʻe hanganaki ʻai ʻe Sihova ke tō hifo ʻa e ʻuha-ʻaisí ki he fonua ko ʻIsipité. 24 Naʻe ʻi ai ʻa e ʻuha-ʻaisi, pea naʻe ʻi ai mo e afi naʻe tapa ʻi he lotolotonga ʻo e ʻuha-ʻaisí. Naʻe fuʻu lahi ʻaupito; naʻe teʻeki ai ʻaupito ha meʻa peheni ʻi he fonuá talu mei he hoko ʻa ʻIsipite ko ha puleʻangá.+ 25 Naʻe taaʻi ʻe he ʻuha-ʻaisí ʻa e meʻa kotoa pē ʻi he vaó ʻi he kotoa ʻo e fonua ko ʻIsipité, mei he tangata ki he manu, pea naʻá ne maumauʻi ʻa e mohuku kotoa pē pea fesi ʻa e ʻuluʻakau kotoa pē ʻo e vaó.+ 26 Ko e fonua pē ko Kōsení, ʻa ia naʻe ʻi ai ʻa e kau ʻIsilelí, naʻe ʻikai ʻi ai ha ʻuha-ʻaisí.+

27 Ko ia naʻe fekau atu ʻe Felo ke haʻu ʻa Mōsese mo ʻĒlone peá ne pehē kiate kinaua: “Ko eni kuó u faiangahala. ʻOku māʻoniʻoni ʻa Sihova, pea ko au mo hoku kakaí ʻoku mau hala. 28 Kōlenga kia Sihova ke ngata ā ʻa e maná mo e ʻuha-ʻaisí. Pea te u toki loto-lelei leva ke tuku atu kimoutolu ke mou ʻalu, pea ʻe ʻikai te mou kei nofo.” 29 Ko ia naʻe pehē ʻe Mōsese kiate ia: “ʻI heʻeku hū pē ki tuʻa mei he koló, te u fola nima hake ʻi he ʻao ʻo Sihová. ʻE tuʻu ʻa e maná pea ʻe ʻikai ke kei hoko atu ʻa e ʻuha-ʻaisí, koeʻuhí ke ke ʻilo ʻoku ʻa Sihova+ ʻa e fonuá. 30 Ka kiate koe mo hoʻo kau sevānití, ʻoku ou ʻosi ʻiloʻi naʻa mo e taimi ko iá, ʻe ʻikai te mou manavahē kia Sihova ko e ʻOtuá.”

31 Ko eni kuo maumauʻi ʻa e falakesí mo e paʻalé, koeʻuhí naʻe fua ʻa e paʻalé pea naʻe matala ʻa e falakesí. 32 Ka naʻe ʻikai maumauʻi ʻa e uité,* koeʻuhí naʻe teʻeki ai hoko hono faʻahitaʻú. 33 Naʻe ʻalu atu leva ʻa Mōsese ki tuʻa mei he koló meia Felo ʻo ne fola nima hake ʻi he ʻao ʻo Sihová, pea naʻe tuʻu ʻa e maná mo e ʻuha-ʻaisí pea naʻe ʻikai toe tō hifo ʻa e ʻuhá ki he fonuá.+ 34 ʻI he sio ʻa Felo ki he tuʻu ʻa e ʻuhá, ko e ʻuha-ʻaisí, mo e maná, naʻá ne toe faiangahala ʻo ne fakafefeka hono lotó,+ ʻa ia tonu pea pehē foki ki heʻene kau sevānití. 35 Pea naʻe hokohoko atu ʻa e loto-fefeka ʻa Feló, pea naʻe ʻikai te ne tuku atu ʻa e kau ʻIsilelí ke nau ʻalu, ʻo hangē pē ko e meʻa naʻe fakahaaʻi ʻe Sihova fakafou ʻia Mōsesé.+

10 Naʻe folofola leva ʻa Sihova kia Mōsese: “ʻAlu kia Felo, he kuó u tuku ke ongongataʻa hono lotó+ pea mo e loto ʻo ʻene kau sevānití, koeʻuhí ke u fakahaaʻi ai ʻa e ngaahi fakaʻilonga ko eni ʻaʻakú ʻi hono ʻaó tonu,+ 2 pea koeʻuhí ke ke tala ki ho ngaahi fohá mo ho fanga makapuna tangatá ʻa e kakaha ʻo ʻeku fakafeangai ki ʻIsipité pea mo e ngaahi fakaʻilonga naʻá ku fakahoko ʻi honau lotolotongá;+ pea te mou ʻiloʻi moʻoni ko Sihova au.”

3 Ko ia naʻe ʻalu atu ʻa Mōsese mo ʻĒlone kia Felo ʻo na pehē kiate ia: “Ko e meʻa eni kuo folofolaʻaki ʻe Sihova ko e ʻOtua ʻo e kau Hepeluú, ‘Ko e hā hono fuoloa ʻa hoʻo fakafisi ke fakamoʻulaloa mai kiate aú?+ Tuku mai ʻa hoku kakaí ke nau ʻalu koeʻuhi ke nau tauhi kiate au. 4 He kapau te ke fakafisi ai pē ke tuku mai ʻa hoku kakaí ke nau ʻalu, ko eni te u ʻomi ha fanga heʻe ki ho fonuá ʻapongipongi. 5 Pea te nau ʻufiʻufi ʻa e funga fonuá, pea ʻe ʻikai lava ke mou sio ki he kelekelé. Te nau kai ʻo ʻosi ʻa e meʻa naʻe hao ʻi he ʻuha-ʻaisí ʻa ia naʻe toe maʻamoutolú, pea te nau kai ʻa e kotoa homou ʻuluʻakau ʻa ia ʻoku tupu ʻi he vaó.+ 6 Te nau fakafonu ho ngaahi falé, ko e ngaahi fale ʻo hoʻo kau sevānití kotoa, pea mo e ngaahi fale ʻo ʻIsipité kotoa ʻo aʻu ki he tuʻunga naʻe teʻeki ʻaupito ke mamata ai ʻa hoʻo ngaahi tamaí mo hoʻo fanga kuí mei he taimi ʻo ʻenau ʻi he fonuá ni ʻo aʻu mai ki he ʻahó ni.’”+ ʻI he meʻa ko iá naʻá ne tafoki ʻo ne ʻalu atu meia Felo.

7 Naʻe pehē ange leva ʻe he kau sevāniti ʻa Feló kiate ia: “Ko e hā hono fuoloa ʻa e hokohoko atu ʻa e tangatá ni ko ha fakamanamana* kiate kitautolú? Tuku atu ʻa e kakaí ke nau ʻalu koeʻuhi ke nau tauhi kia Sihova ko honau ʻOtuá. ʻOku teʻeki ai koā ke ke ʻilo kuo ʻauha ʻa ʻIsipite?” 8 Ko ia naʻe toe fakafoki mai ʻa Mōsese mo ʻĒlone kia Felo, peá ne pehē kiate kinaua: “Mou ʻalu, tauhi kia Sihova ko homou ʻOtuá. Ka ko hai pē ʻe ʻalú?” 9 Naʻe pehē leva ʻe Mōsese: “Te mau ʻalu mo ʻemau fānau tupú, ko ʻemau kau taʻumotuʻá, mo homau ngaahi fohá, homau ngaahi ʻofefiné, ʻemau fanga sipí, pea mo ʻemau fanga pulú,+ koeʻuhí te mau fai ha kātoanga kia Sihova.”+ 10 Naʻá ne pehē ange kiate kinaua: “Ka faifai ange peá u tuku atu kimoutolu mo hoʻomou fānaú ke mou ʻalu, tā ʻoku kau moʻoni ʻa Sihova mo kimoutolu!+ ʻOku hā mahino ko hoʻomou taumuʻá ke fai ha meʻa ʻoku kovi. 11 ʻIkai! Ko hoʻomou kakai tangatá pē ʻe ʻalu ʻo tauhi kia Sihová, he ko e meʻa ia naʻa mou kolé.” ʻI he meʻa ko iá naʻe kapusi kinaua mei he ʻao ʻo Feló.

12 Naʻe folofola leva ʻa Sihova kia Mōsese: “Mafao atu ho nimá ki he fonua ko ʻIsipité ki he fanga heʻé, koeʻuhí ke nau ʻalu hake ki he fonua ko ʻIsipité ʻo kai ke ʻosi ʻa e ʻakau kotoa pē ʻo e fonuá, ʻa e meʻa kotoa pē naʻe toe mei he ʻuha-ʻaisí.” 13 ʻI he taimi pē ko iá, naʻe mafao atu ʻe Mōsese hono tokotokó ki he fonua ko ʻIsipité, pea naʻe ʻai ʻe Sihova ha matangi hahake ke angi ki he fonuá ʻi he ʻaho kotoa ko iá mo e poó kotoa. Naʻe pongipongi hake, pea naʻe ʻomi ʻe he matangi hahaké ʻa e fanga heʻé. 14 Pea naʻe ʻalu hake ʻa e fanga heʻé ki he fonua kotoa ko ʻIsipité pea nau nofo ʻi he feituʻu kātoa ʻo ʻIsipité.+ Naʻe fakamamahi ʻaupito;+ naʻe ʻikai ʻaupito ke ʻi ai ha fuʻu fanga heʻe lahi pehē ki muʻa ai, pea ʻe ʻikai ʻaupito ke toe ʻi ai ha fuʻu fanga heʻe tokolahi pehē. 15 Naʻa nau ʻufiʻufi ʻa e funga fonuá kotoa, pea naʻe fakaʻaʻau ke fakapoʻuli ʻa e fonuá ko e meʻa ʻiate kinautolu; naʻa nau keina ʻa e mohuku kotoa ʻo e fonuá mo e fua kotoa ʻo e ʻuluʻakau naʻe toe mei he ʻuha-ʻaisí; naʻe ʻikai toe ha meʻa lau mata ʻe taha ʻi he ʻuluʻakaú pe ʻi he mohuku ʻo e vaó ʻi he fonua kotoa ko ʻIsipité.

16 Ko ia naʻe ui fakavave mai ʻe Felo ʻa Mōsese mo ʻĒlone ʻo ne pehē: “Kuó u faiangahala kia Sihova ko homou ʻOtuá pea kiate kimoutolu. 17 Ko ia kātaki ʻo fakamolemoleʻi tā-tuʻo-taha ange muʻa ʻeku angahalá, pea kōlenga kia Sihova ko homou ʻOtuá ke ne toʻo atu ʻa e mala fakatupu maté ni meiate au.” 18 Ko ia naʻá ne* ʻalu atu meia Felo ʻo ne kōlenga kia Sihova.+ 19 Naʻe ʻai leva ʻe Sihova ke maliu ʻa e matangí, pea naʻe hoko ia ko ha matangi mālohi ʻaupito mei he hihifó, pea naʻá ne ʻave ʻa e fanga heʻé ʻo ne lī kinautolu ki he Tahi Kulokulá. Naʻe ʻikai ha heʻe ʻe taha ne toe ʻi he feituʻu kotoa ʻo ʻIsipité. 20 Kae kehe, naʻe tuku ʻe Sihova ke hoko ʻa Felo ʻo loto-fefeka,+ pea naʻe ʻikai te ne tuku mai ʻa e kau ʻIsilelí ke nau ʻalu.

21 Naʻe folofola ange leva ʻa Sihova kia Mōsese: “Mafao atu ho nimá ki he langí koeʻuhí ke hoko ha fakapoʻuli ʻi he fonua ko ʻIsipité, ko ha fuʻu fakapoʻulituʻu.” 22 Naʻe mafao atu leva ʻe Mōsese hono nimá ki he langí, pea naʻe ʻi ai ha fuʻu fakapoʻuli matolu ʻi he fonua kotoa ko ʻIsipité ʻo feʻunga mo e ʻaho ʻe tolu.+ 23 Naʻe ʻikai te nau femātaaki, pea naʻe ʻikai ha taha ʻo kinautolu ʻe mavahe mei he feituʻu naʻa nau ʻi aí ʻo feʻunga mo e ʻaho ʻe tolu; ka ko e kau ʻIsilelí kotoa naʻe maama ʻa honau ngaahi nofoʻangá.+ 24 Naʻe ui leva ʻe Felo ʻa Mōsese ʻo ne pehē: “Mou ʻalu ʻo tauhi ʻa Sihova.+ Ko hoʻomou fanga sipí pē mo hoʻomou fanga pulú ʻe toe hení. Naʻa mo hoʻomou fānaú ʻe lava ke nau ʻalu mo kimoutolu.” 25 Ka naʻe pehē ʻe Mōsese: “Kuo pau foki ke ke tuku mai kiate kimautolu ʻemau fanga monumanú ki ha* ngaahi feilaulau mo ha ngaahi feilaulau tutu, pea te mau foaki ia kia Sihova ko homau ʻOtuá.+ 26 ʻE ʻalu foki mo kimautolu ʻemau fanga monumanú. ʻE ʻikai ha manu* ʻe tuku ke toe, koeʻuhí he te mau ngāueʻaki ha niʻihi ai ʻi he lotu kia Sihova ko homau ʻOtuá, pea ʻoku ʻikai te mau ʻilo pe ko e hā ʻa e meʻa te mau foaki ʻi he lotu kia Sihová kae ʻoua ke mau aʻu ki ai.” 27 Ko ia naʻe tuku ʻe Sihova ke hoko ʻa Felo ʻo loto-fefeka, pea naʻe ʻikai te ne loto ke tuku kinautolu ke nau ʻalu.+ 28 Naʻe pehē ʻe Felo kiate ia: “Pulia meiate au! Fakapapauʻi ke ʻoua naʻá ke toe feinga ke sio ki hoku matá, he ʻi he ʻaho te ke sio ai ki hoku matá, te ke mate.” 29 ʻI he meʻá ni naʻe pehē ange ʻe Mōsese: “Hangē tofu pē ko hoʻo leá, ʻe ʻikai te u toe feinga ke sio ki ho matá.”

11 Naʻe folofola leva ʻa Sihova kia Mōsese: “ʻOku toe pē ha mala ʻe taha ke u ʻomai kia Felo pea mo ʻIsipite. ʻI he hili iá, te ne tuku kimoutolu ke mou ʻalu mei heni.+ ʻI he taimi te ne tuku ai kimoutolu ke mou ʻalú, te ne kapusi moʻoni kimoutolu mei heni.+ 2 Tala leva ki he kakaí ke kole ʻe he kau tangata mo e kau fefine kotoa pē ki honau kaungāʻapí ha ngaahi meʻa siliva pea mo ha ngaahi meʻa koula.”+ 3 Pea naʻe ʻai ʻe Sihova ke ʻofeina ʻa e kakaí ʻi he ʻao ʻo e kau ʻIsipité. ʻIkai ngata aí, ko Mōsese tonu naʻe hoko ʻo hakeakiʻi lahi ʻi he fonua ko ʻIsipité ʻi he lotolotonga ʻo e kau sevāniti ʻa Feló pea ʻi he lotolotonga ʻo e kakaí.

4 Naʻe pehē leva ʻe Mōsese: “Ko e meʻa eni kuo folofolaʻaki ʻe Sihová, ‘ʻI he tuʻapoó nai te u ʻalu atu ai ʻi he lotolotonga ʻo ʻIsipité,+ 5 pea ko e ʻuluaki foha kotoa pē ʻi he fonua ko ʻIsipité te nau mate,+ mei he ʻuluaki foha ʻo Felo ʻa ia ʻoku ʻafio ʻi hono taloní ki he ʻuluaki foha ʻo e kaunanga ʻoku ngāue ʻi he maka momosi-nimá, mo e ʻuluaki ʻuhiki tangata kotoa pē ʻo e fanga monumanú.+ 6 ʻI he kotoa ʻo e fonua ko ʻIsipité, ʻe ʻi ai ha fuʻu fākafoa ʻa ia kuo ʻikai ʻaupito ke hoko ki muʻa pea ʻe ʻikai ʻaupito ke toe hoko.+ 7 Ka naʻa mo ha kulī ʻe ʻikai ke kālou* ki he kau ʻIsilelí, ki he kakai tangatá pe ki heʻenau fanga monumanú, koeʻuhi ke mou ʻilo ai ʻoku lava ke ʻai ʻe Sihova ha faikehekehe ʻi he vahaʻa ʻo e kau ʻIsipité pea mo e kau ʻIsilelí.’+ 8 Pea ko e kotoa ʻo hoʻo kau sevānití te nau haʻu moʻoni kiate au ʻo nau fakatōmapeʻe ʻa kinautolu tonu kiate au, ʻo pehē, ‘ʻAlu, ʻa koe mo e kotoa ʻo e kakai ʻoku muimui ʻiate koé.’+ Pea ʻi he hili iá te u ʻalu atu.” ʻI he meʻa ko iá naʻá ne ʻalu atu meia Felo ʻi he kakaha ʻo ʻene houhaú.

9 Naʻe folofola leva ʻa Sihova kia Mōsese: “ʻE ʻikai ke fanongo atu ʻa Felo kiate kimoua,+ koeʻuhí ke hoko ʻo fakalahi ai ʻa ʻeku ngaahi maná ʻi he fonua ko ʻIsipité.”+ 10 Naʻe fakahoko ʻe Mōsese mo ʻĒlone ʻa e ngaahi mana kotoa ko ení ʻi he ʻao ʻo Feló,+ ka naʻe tuku ʻe Sihova ke hoko ʻa Felo ʻo loto-fefeka, ko ia naʻe ʻikai te ne tuku atu ai ʻa e kau ʻIsilelí ke nau ʻalu mei hono fonuá.+

12 Naʻe folofola leva ʻa Sihova kia Mōsese mo ʻĒlone ʻi he fonua ko ʻIsipité: 2 “Ko e māhina ko ení ʻe hoko ia ko e kamataʻanga ʻo e ngaahi māhiná kiate kimoutolu. ʻE hoko ia ko e ʻuluaki ʻo e ngaahi māhina ʻo e taʻú kiate kimoutolu.+ 3 Lea ki he fuʻu fakataha fakakātoa ʻo ʻIsilelí, ʻo pehē, ‘ʻI he ʻaho hono hongofulu ʻo e māhina ko ení, ʻoku totonu ke nau toʻo taki taha ai maʻanautolu ha sipi+ maʻá e fale ʻo ʻenau tamaí, ko ha sipi ʻe taha ki he fale. 4 Ka ʻo kapau ko e fāmilí ʻoku fuʻu tokosiʻi ia ki he sipí, ko kinautolu mo honau* kaungāʻapi ofi tahá ʻoku totonu ke nau vahevahe ia ʻiate kinautolu ʻi honau falé ʻo fakatatau ki he tokolahi ʻo e kakaí. ʻI hono fai ha fakafuofuá, fakapapauʻi pe ko e hā ʻa e lahi ʻo e sipi ʻe kai ʻe he tokotaha taki taha. 5 Ko hoʻomou sipí ʻoku totonu ko ha sipi tangata taʻemele+ ʻoku taʻu taha. ʻE lava ke mou fili mei he fanga kiʻi sipi tangatá pe mei he fanga kosi tangatá. 6 Kuo pau ke mou tokangaʻi ia ʻo aʻu ki he ʻaho hono 14 ʻo e māhina ko ení,+ pea ko e fakatahaʻanga fakakātoa ʻo e fuʻu fakataha ʻo ʻIsilelí kuo pau ke nau tāmateʻi ia ʻi he mamalu ʻa e poʻulí.*+ 7 Kuo pau ke nau toʻo ha konga ʻo e totó ʻo afuhi ia ʻi he ongo kaumatapaá mo e tafaʻaki ki ʻolunga ʻo e matapā ʻo e ngaahi fale ʻa ia te nau kai ai iá.+

8 “‘Kuo pau ke nau kai ʻa e kakanó ʻi he pō ko ení.+ ʻOku totonu ke nau tunu ia ʻi he afí pea kai ia fakataha mo e mā taʻelēvani+ pea mo e lauʻiʻakau ifo kona.+ 9 ʻOua naʻa kai hano konga ʻoku ʻota pe haka ʻi he vaí, kae tunu ia ʻi he afí, ʻa hono ʻulú fakataha mo hono kauvaʻé mo hono ngaahi toʻotoʻongá. 10 Kuo pau ke ʻoua naʻa mou fakatoe hano konga ʻo aʻu ki he pongipongí, ka ko hano konga pē naʻe toe ʻo aʻu ki he pongipongí ʻoku totonu ke mou tutu ia ʻaki ʻa e afi.+ 11 Pea ʻoku totonu ke peheni ʻa e anga hoʻomou kai iá, kuo ʻosi nonoʻo homou letá,* mo ʻai homou senitoló ʻi homou vaʻé, pea mo homou tokotokó ʻi homou nimá; pea ʻoku totonu ke mou kai fakavave ia. Ko e Pāsova* ia ʻa Sihova. 12 He te u hāʻele atu ʻi he fonua ko ʻIsipité ʻi he pō ko ení ʻo taaʻi ʻa e ʻuluaki foha kotoa pē ʻi he fonua ko ʻIsipité, mei he tangata ki he manu;+ pea te u fakahoko ʻa e fakamaau ki he kotoa ʻo e ngaahi ʻotua ʻo ʻIsipité.+ Ko Sihova au. 13 Ko e totó ʻe hoko ia ko homou fakaʻilonga ʻi he ngaahi fale ʻoku mou ʻi aí; pea te u sio ki he totó ʻo u fakalaka ʻiate kimoutolu, pea ʻe ʻikai hoko kiate kimoutolu ʻa e malá ke fakaʻauha kimoutolu ʻi he taimi te u taaʻi ai ʻa e fonua ko ʻIsipité.+

14 “‘Ko e ʻaho ko ení ʻe hoko ia ko ha fakamanatu kiate kimoutolu, pea kuo pau ke mou tauhi ia ko ha kātoanga kia Sihova ʻi he kotoa homou ngaahi toʻutangatá. ʻOku totonu ke mou tauhi ia ko ha tuʻutuʻuni taʻengata. 15 Ko e ʻaho ʻe fitu te mou kai mā taʻelēvani ai.+ ʻIo, ʻi he ʻuluaki ʻahó, te mou toʻo ai ʻa e takaonga ʻoku fakalēvaní mei homou ngaahi falé, koeʻuhí ʻilonga ha taha te ne kai ha meʻa ʻoku lēvani mei he ʻuluaki ʻahó ki hono fitú, ko e tokotaha ko iá kuo pau ke tuʻusi ia mei ʻIsileli.* 16 ʻI he ʻuluaki ʻahó te mou fai ai ha fakataha-lahi toputapu, pea ʻi he ʻaho hono fitú, ke toe fai ai ha fakataha-lahi toputapu. ʻE ʻikai ke fai ha ngāue ʻi he ongo ʻaho ko ení.+ Ngata pē ʻi he meʻa ʻoku fiemaʻu ki he tokotaha kotoa ke ne kaí, ko ia pē ʻe lava ke teuteu maʻamoutolú.

17 “‘Kuo pau ke mou tauhi ʻa e Kātoanga ʻo e Mā Taʻelēvaní,+ he ʻi he ʻaho tofu pē ko ení, te u ʻomi ai homou fuʻu tokolahi* mei he fonua ko ʻIsipité. Pea kuo pau ke mou tauhi ʻa e ʻaho ko ení ʻi he kotoa ʻo homou ngaahi toʻutangatá ko ha tuʻutuʻuni taʻengata. 18 ʻI he ʻuluaki māhiná, ʻi he ʻaho hono 14 ʻo e māhiná, ʻi he efiafí te mou kai mā taʻelēvani ai ʻo aʻu ki he ʻaho hono 21 ʻo e māhiná, ʻi he efiafí.+ 19 ʻE ʻikai maʻu ha takaonga ʻoku fakalēvani ʻi homou ngaahi falé ʻi he ʻaho ʻe fitu, koeʻuhí ʻilonga ha taha te ne kai ʻa e meʻa ʻoku lēvaní, pe ko ha muli ia pe tupuʻi fonua,+ ko e tokotaha ko iá kuo pau ke tuʻusi ia mei he fuʻu fakataha ʻo ʻIsilelí.*+ 20 ʻOku ʻikai totonu ke mou kai ha meʻa pē ʻoku lēvani. ʻI homou ngaahi ʻapí kotoa, te mou kai mā taʻelēvani ai.’”

21 Naʻe ui leva ʻe Mōsese ʻa e kotoa ʻo e kau mātuʻa ʻo ʻIsilelí+ ʻo ne pehē kiate kinautolu: “Mou ʻalu ʻo fili ha fanga kiʻi monumanu,* maʻa homou ngaahi fāmilí taki taha, pea tāmateʻi ʻa e fanga monumanu ʻo e feilaulau Pāsová. 22 Kuo pau leva ke mou unu ha haʻinga ʻīsope ʻi he toto ʻa ia ʻoku ʻi ha pēsoni pea afuhi ʻa e konga ki ʻolunga ʻo e matapaá pea mo e ongo kaumatapaá ʻaki ʻa e totó; pea ʻoku ʻikai totonu ke hū ki tuʻa ha taha ʻo kimoutolu ʻi he hūʻanga ʻo hono falé ʻo aʻu ki he pongipongí. 23 Pea ʻi he taimi ʻe hāʻele atu ai ʻa Sihova ke taaʻi ʻa e kau ʻIsipité peá ne sio ki he totó ʻi he konga ki ʻolunga ʻo e matapaá pea ʻi he ongo kaumatapaá, ʻe fakalaka moʻoni atu ʻa Sihova ʻi he hūʻangá, pea ʻe ʻikai te ne tuku ʻa e mala ʻo e maté* ke hū ki homou ngaahi falé.+

24 “Kuo pau ke mou tauhi ʻa e meʻá ni ko ha tuʻutuʻuni taʻengata ia kiate kimoutolu pea ki homou ngaahi fohá.+ 25 Pea ʻi he taimi te mou hū ai ki he fonua ʻe ʻoatu ʻe Sihova kiate kimoutolú ʻo hangē pē ko ia kuó ne fakahāʻí, kuo pau ke mou tauhi ʻa e meʻá ni.+ 26 Pea ʻi he taimi ʻe ʻeke atu ai ʻe homou ngaahi fohá kiate kimoutolu, ‘Ko e hā ʻa e ʻuhinga ʻo e meʻá ni kiate kimoutolú?’+ 27 Kuo pau ke mou pehē, ‘Ko e feilaulau ia ʻo e Pāsova kia Sihova, ʻa ia naʻá ne fakalaka atu ʻi he ngaahi fale ʻo e kau ʻIsilelí ʻi ʻIsipite ʻi he taimi naʻá ne taaʻi ai ʻa e kau ʻIsipité, ka ne fakahaofi homau ngaahi falé.’”

Naʻe punou hifo leva ʻa e kakaí ʻo nau fakatōmapeʻe. 28 Ko ia naʻe ʻalu atu ʻa e kau ʻIsilelí ʻo nau fai ʻo hangē tofu pē ko e tuʻutuʻuni ʻa Sihova kia Mōsese mo ʻĒloné.+ Naʻa nau fai ʻa e meʻa tofu pē ko iá.

29 ʻI he tuʻapoó leva, naʻe taaʻi ai ʻe Sihova ʻa e ʻuluaki foha kotoa pē ʻi he fonua ko ʻIsipité,+ mei he ʻuluaki foha ʻo Felo ʻa ia naʻe ʻafio ʻi hono taloní ki he ʻuluaki foha ʻo e pōpula naʻe ʻi he pilīsoné,* pea mo e ʻuluaki ʻuhiki tangata kotoa pē ʻo e fanga manú.+ 30 Naʻe tuʻu hake ʻa Felo ʻi he pō ko iá fakataha mo ʻene kau sevānití kotoa pea mo e kau ʻIsipite kehé kotoa, pea naʻe ʻi ai ha fuʻu fākafoa ʻi he lotolotonga ʻo e kau ʻIsipité, koeʻuhí naʻe ʻikai ha fale ʻe taʻemate ai ha taha.+ 31 Naʻá ne ui ʻi he taimi pē ko iá ʻa Mōsese mo ʻĒlone+ ʻi he kei poʻulí ʻo ne pehē: “Tuʻu, ʻalu atu mei he lotolotonga ʻo hoku kakaí, ʻa kimoua fakatouʻosi mo e kau ʻIsileli kehé. Mou ʻalu ʻo tauhi kia Sihova, ʻo hangē pē ko ia kuó mo leaʻakí.+ 32 ʻAve foki hoʻomou fanga sipí mo hoʻomou fanga pulú pea mou ʻalu, ʻo hangē pē ko ia kuó mo leaʻakí.+ Ka kuo pau foki ke mou tāpuakiʻi au.”

33 Pea naʻe kamata ke uki ʻe he kau ʻIsipité ʻa e kakaí ke nau mavahe fakavave atu+ mei he fonuá, “koeʻuhí,” ʻi he hangē ko ʻenau leá, “kuo tau mate hono kotoa!”+ 34 Ko ia naʻe ʻave ʻe he kakaí ʻenau takaonga mahoaʻá ki muʻa ke fakalēvaní, fakataha mo ʻenau ngaahi natuʻanga maá* kuo takaiʻi ʻi honau valá ʻo hili ʻi honau umá. 35 Naʻe fai ʻe he kau ʻIsilelí ʻa e meʻa naʻe tala ange ʻe Mōsese kiate kinautolú pea naʻa nau kole ki he kau ʻIsipité ha ngaahi meʻa siliva mo ha ngaahi meʻa koula pea pehē ki he vala.+ 36 Naʻe ʻai ʻe Sihova ke ʻofeina ʻa e kakaí ʻi he ʻao ʻo e kau ʻIsipité, ko ia naʻa nau ʻoange kiate kinautolu ʻa e meʻa naʻa nau kolé, pea naʻa nau ʻave ʻa e koloa ʻa e kau ʻIsipité.+

37 Naʻe mavahe leva ʻa e kau ʻIsilelí mei Lamesisi+ ki Sūkote,+ ko e kau tangata ʻalu lalo nai ʻe toko 600,000, tuku kehe ʻa e fānaú.+ 38 Pea naʻe ʻalu foki mo kinautolu ha fuʻu tokolahi kehe,*+ pea pehē ki he fanga sipi mo e fanga pulu, ko ha fuʻu fanga monumanu tokolahi. 39 Naʻe kamata ke nau taʻo ʻa e takaonga naʻa nau ʻomi mei ʻIsipité ko e ngaahi foʻi mā taʻelēvani fuopotopoto. Naʻe ʻikai ʻai ki ai ha lēvaní, koeʻuhí naʻe mātuʻaki fakafokifā pē hono kapusi kinautolu mei ʻIsipité ʻo ʻikai ai ke nau teuteu ha faʻahinga tokonaki pē maʻanautolu.+

40 Ko e nofo ʻa e kau ʻIsilelí, ʻa ia naʻa nau nofo ʻi ʻIsipité,+ ko e taʻu ʻe 430.+ 41 ʻI he ngataʻanga ʻo e taʻu ʻe 430, ʻi he ʻaho tofu pē ko ení, naʻe ʻalu atu ai ʻa e kotoa ʻo e fuʻu kakai* ʻa Sihová mei he fonua ko ʻIsipité. 42 Ko ha pō ia ʻa ia te nau fakamanatu ai ʻa hono ʻomi kinautolu ʻe Sihova mei he fonua ko ʻIsipité. Ko e pō ko ení ʻe tauhi ia kia Sihova ʻe he kakai kotoa ʻo ʻIsilelí ʻi he kotoa ʻo honau ngaahi toʻutangatá.+

43 Naʻe folofola leva ʻa Sihova kia Mōsese mo ʻĒlone, “Ko e tuʻutuʻuni eni ʻo e Pāsová: ʻE ʻikai ke kai ia ʻe ha muli.+ 44 Ka ʻo kapau ʻoku ʻi ai ha tamaioʻeiki ʻa ha taha naʻe fakatau mai ʻaki ha paʻanga, ʻoku totonu ke ke kamu ia.+ Ko e toki taimi pē ia ʻe lava ke ne kau ai ʻi hono kai iá. 45 Ko ha tokotaha nofo hili mai mo ha tokotaha ngāue totongi ʻe ʻikai lava ke na kai ia. 46 ʻE kai ia ʻi he fale ʻe taha. Kuo pau ke ʻoua naʻa mou toʻo ha meʻa mei he kakanoʻi-manú ʻo ʻave ki tuʻa mei he falé, pea kuo pau ke ʻoua naʻa mou fesiʻi hano hui.+ 47 Ko e fuʻu fakataha kotoa ʻo ʻIsilelí te nau fakamanatu ia. 48 Kapau ʻoku nofo ha muli mo kimoutolu pea ʻokú ne loto ke fakamanatu ʻa e Pāsová kia Sihova, ko e tangata kotoa pē ʻoku ʻaʻaná kuo pau ke kamu ia. Hili iá, te ne ʻunuʻunu mai leva ke fakamanatu ia, pea te ne hoko ʻo hangē ha taha naʻe tupu ʻi he fonuá. Ka ʻe ʻikai lava ke kai ia ʻe ha tangata taʻekamu.+ 49 Ko e lao pē taha ʻe ngāueʻaki ki he taha naʻe tupu ʻi he fonuá pea ki he muli ʻa ia ʻoku nofo ʻi homou lotolotongá.”+

50 Ko ia naʻe fai ʻe he kau ʻIsilelí kotoa ʻa e meʻa tofu pē naʻe tuʻutuʻuni ʻe Sihova kia Mōsese mo ʻĒloné. Naʻa nau fai ʻa e meʻa tofu pē ko iá. 51 ʻI he ʻaho tofu pē ko ení, naʻe ʻomi ai ʻe Sihova ʻa e kau ʻIsilelí fakataha mo ʻenau fuʻu kakaí* mei he fonua ko ʻIsipité.

13 Naʻe toe folofola ʻa Sihova kia Mōsese ʻo pehē: 2 “Fakamāʻoniʻoniʻi* maʻaku ʻa e ʻuluaki tama tangata kotoa pē* ʻi he lotolotonga ʻo e kau ʻIsilelí. Ko e ʻuluaki tama tangata ʻe fanauʻí, fakatouʻosi ʻa e tangata mo e ʻuluaki ʻuhiki tangata ʻo e manú, ʻoku ʻaʻaku ia.”+

3 Naʻe pehē ange leva ʻe Mōsese ki he kakaí: “Manatu ki he ʻaho ko eni ʻa ia naʻa mou ʻalu atu ai mei ʻIsipité,+ mei he fale fakapōpulá, koeʻuhí naʻe ʻomi kimoutolu ʻe Sihova mei heni+ ʻaki ha nima mālohi. Ko ia ai, ʻoua naʻa kai ha meʻa ʻoku lēvani. 4 Ko e ʻaho eni hoʻomou ʻalu atú, ʻi he māhina ko ʻĀpipí.*+ 5 ʻI hono ʻomi koe ʻe Sihova ki he fonua ʻo e kau Kēnaní, ko e kau Hetí, ko e kau ʻĀmolí, ko e kau Heví, pea mo e kau Siepusí,+ ʻa ia naʻá ne fuakavaʻaki ki hoʻo fanga kuí ke ʻoatu kiate koé,+ ko ha fonua ʻoku mahutafea ʻi he huʻakau mo e hone,+ kuo pau leva ke ke tauhi ʻa e fakamanatú ni ʻi he māhina ko ení. 6 Ko e ʻaho ʻe fitu te ke kai mā taʻelēvani ai,+ pea ʻi he ʻaho hono fitú, ʻe fai ai ha kātoanga kia Sihova. 7 Ko e mā taʻelēvaní ʻe kai ia ʻi he ʻaho ʻe fitú;+ pea ʻe ʻikai ʻilo ʻiate koe ha meʻa ʻoku lēvani,+ pea ʻe ʻikai ʻilo ʻiate koe ha takaonga ʻoku fakalēvani ʻi he kotoa ʻo ho feituʻú.* 8 Pea kuo pau ke ke tala ki ho fohá ʻi he ʻaho ko iá, ‘ʻOku ou fai ení koeʻuhí ko e meʻa naʻe fai ʻe Sihova maʻaku ʻi he taimi naʻá ku haʻu ai mei ʻIsipité.’+ 9 Pea ʻe hoko eni kiate koe ko ha fakaʻilonga ʻi ho nimá pea mo ha fakamanatu ʻi ho laʻé,*+ koeʻuhí ke hoko ʻa e lao ʻa Sihová ʻo ʻi ho ngutú, he naʻe ʻomi koe ʻe Sihova ʻaki ha nima mālohi mei ʻIsipite. 10 Kuo pau ke ke tauhi ʻa e tuʻutuʻuni ko ení ʻi hono taimi kuo kotofá ʻi he taʻu ki he taʻu.+

11 “ʻI he taimi ʻe ʻomi ai koe ʻe Sihova ki he fonua ʻo e kau Kēnaní, ʻa ia kuó ne fuakava kiate koe pea ki hoʻo fanga kuí+ ke foaki kiate koé, 12 kuo pau ke ke fakatapui maʻa Sihova ʻa e ʻuluaki tama tangata kotoa pē,* pea pehē ki he ʻuluaki ʻuhiki tangata kotoa pē ʻo e fanga monumanu ʻokú ke maʻú. Ko e fanga monumanu tangatá ʻoku ʻa Sihova ia.+ 13 Ko e ʻuluaki ʻuhikiʻi ʻasi tangata kotoa pē te ke huhuʻi ia ʻaki ha sipi, pea kapau ʻe ʻikai te ke huhuʻi ia, kuo pau leva ke ke fesiʻi ʻa hono kiá. Pea ko e ʻuluaki tama tangata kotoa pē ʻi ho ngaahi fohá te ke huhuʻi ia.+

14 “Ka faifai ange pea ʻeke ʻe ho fohá kiate koe ʻamui, ‘Ko e hā ʻa e ʻuhinga ʻo e meʻá ni?’ Pea te ke pehē leva kiate ia, ‘Naʻe ʻomi kimautolu ʻe Sihova mei ʻIsipite ʻaki ha nima mālohi, mei he fale fakapōpulá.+ 15 ʻI he taimi naʻe fakafisi anga-fefeka ai ʻa Felo ke tuku kimautolu ke mau ʻalú,+ naʻe tāmateʻi ai ʻe Sihova ʻa e ʻuluaki foha kotoa pē ʻi he fonua ko ʻIsipité, mei he ʻuluaki foha ʻo e tangatá ki he ʻuluaki ʻuhiki tangata ʻo e manú.+ Ko e ʻuhinga ia ʻoku ou feilaulauʻi ai kia Sihova ʻa e ʻuluaki monumanu tangata kotoa pē,* pea ʻoku ou huhuʻi ʻa e ʻuluaki tama kotoa pē ʻi hoku ngaahi fohá.’ 16 Kuo pau ke hoko ʻa e meʻá ni ko ha fakaʻilonga ia ʻi ho nimá pea mo ha meʻa-haʻi ʻi ho laʻé,*+ he naʻe ʻomi kimautolu ʻe Sihova ʻaki ha nima mālohi mei ʻIsipite.”

17 Pea ʻi he taimi naʻe tuku atu ai ʻe Felo ʻa e kakaí ke nau ʻalú, naʻe ʻikai ke taki kinautolu ʻe he ʻOtuá ʻi he hala ʻo e fonua ʻo e kau Filisitiá, neongo naʻe ofi ia. He naʻe folofola ʻa e ʻOtuá: “ʻE liliu nai ʻa e fakakaukau ʻa e kakaí ʻi he taimi te nau fehangahangai ai mo e taú pea te nau foki ki ʻIsipite.” 18 Ko ia naʻe ʻai ʻe he ʻOtuá ʻa e kakaí ke nau takai ʻi he hala ʻo e toafa ʻo e Tahi Kulokulá.+ Ka naʻe ʻalu atu ʻa e kau ʻIsilelí mei he fonua ko ʻIsipité ʻi ha founga maau, ʻo hangē ha ngaahi kongakaú. 19 Naʻe ʻave foki ʻe Mōsese ʻa e ngaahi hui ʻo Siosifá, koeʻuhí naʻe ʻai ʻe Siosifa ʻa e kau ʻIsilelí ke nau mātuʻaki fai ange ha fakapapau: “ʻE pau moʻoni ke fakahanga mai ʻe he ʻOtuá ʻene tokangá kiate kimoutolu, pea kuo pau ke mou ʻave mei heni ʻa hoku ngaahi huí fakataha mo kimoutolu.”+ 20 Naʻa nau mavahe mei Sūkote ʻo nau ʻapitanga ʻi ʻĒtami, ʻi he ngataʻanga ʻo e toafá.

21 Pea naʻe hāʻele muʻomuʻa ʻa Sihova ʻiate kinautolu ʻi he ʻahó ʻi ha pou ʻao ke taki kinautolu ʻi he halá,+ pea ʻi he poʻulí ʻi ha pou afi ke ʻoange kiate kinautolu ha maama, koeʻuhí ke nau lava ʻo fononga ʻi he ʻahó pea ʻi he poʻulí.+ 22 Ko e pou ʻaó naʻe ʻikai ke hiki ia mei he ʻao ʻo e kakaí lolotonga ʻa e ʻahó, pea naʻe ʻikai hiki ʻa e pou afí ʻi he poʻulí.+

14 Naʻe folofola leva ʻa Sihova kia Mōsese: 2 “Tala ki he kau ʻIsilelí ke nau tafoki ʻo ʻapitanga ʻi muʻa ʻi Piheloti, ʻi he vahaʻa ʻo Mikitoli mo e tahí, ʻo hanga ki Pēali-sefoni.+ Ke mou ʻapitanga ʻi he veʻe tahí ʻo hanga ki ai. 3 ʻE pehē leva ʻe Felo fekauʻaki mo e kau ʻIsilelí, ‘ʻOku nau hē holo ʻi he puputuʻu ʻi he fonuá. Kuo nau fihia ʻi he toafá.’ 4 Te u tuku ʻa Felo ke hoko ʻo loto-fefeka,+ pea te ne tulimui ʻiate kinautolu, pea te u fakalāngilangiʻi au fakafou ʻia Felo mo ʻene kau taú kotoa;+ pea ʻe ʻiloʻi moʻoni ʻe he kau ʻIsipité ko Sihova au.”+ Ko ia ko e meʻa ia naʻa nau faí.

5 Ki mui ai, naʻe fakahaaʻi ki he tuʻi ʻo ʻIsipité ʻo pehē kuo hola ʻa e kakaí. ʻI he taimi pē ko iá, naʻe liliu ʻa e loto ʻo Felo mo ʻene kau sevānití ʻo fekauʻaki mo e kakaí,+ pea naʻa nau pehē: “Ko e hā naʻa tau fai ai eni ʻo tuku ange ʻa ʻIsileli mei he ngāue ko e kau pōpula kiate kitautolú?” 6 Ko ia naʻá ne ʻai ke maau ʻa ʻene ngaahi saliote taú, pea naʻá ne ʻave hono kakaí ʻo ne ʻalu fakataha mo ia.+ 7 Naʻá ne ʻave ʻa e ngaahi saliote kuo filifili ʻe 600 pea mo e ngaahi saliote kehe kotoa ʻo ʻIsipité, fakataha mo e kau tangata tau ʻi he saliote kotoa pē. 8 Ko ia naʻe tuku ʻe Sihova ke hoko ʻa Felo ko e tuʻi ʻo ʻIsipité ʻo loto-fefeka, pea naʻá ne tulimui ʻi he kau ʻIsilelí, lolotonga iá naʻe ʻalu atu ʻa e kau ʻIsilelí fakataha mo e loto-maʻu.*+ 9 Naʻe tulimui ʻa e kau ʻIsipité ʻiate kinautolu,+ pea ko e ngaahi saliote kotoa ʻa Feló mo ʻene kau tangata heka hōsí mo ʻene kau taú naʻa nau maʻu atu kinautolu lolotonga ʻenau ʻapitanga ʻi he veʻe tahí, ofi ki Piheloti, ʻo hanga ki Pēali-sefoni.

10 ʻI he ofi atu ʻa Feló, naʻe hanga hake ʻa e kau ʻIsilelí ʻo vakai ki he tulimui atu ʻiate kinautolu ʻa e kau ʻIsipité. Naʻe hoko ʻo ilifia ʻa e kau ʻIsilelí pea kamata ke nau tangi kia Sihova.+ 11 Naʻa nau pehē kia Mōsese: “ʻOku hala koā ha ngaahi tanuʻanga ia ʻi ʻIsipite kuó ke ʻomi ai kimautolu ki heni ke mau mate ʻi he toafá?+ Ko e hā kuó ke fai kiate kimautolú ʻi hono taki mai kimautolu mei ʻIsipité? 12 ʻIkai ko e meʻa tofu pē eni naʻa mau tala atu kiate koe ʻi ʻIsipite heʻemau pehē, ‘Tukunoaʻi kimautolu, koeʻuhi ke mau tauhi ki he kau ʻIsipité’? He ʻoku lelei ange kiate kimautolu ke tauhi ki he kau ʻIsipité ʻi haʻamau mate ʻi he toafá.”+ 13 Naʻe pehē ange leva ʻe Mōsese ki he kakaí: “ʻOua ʻe ilifia.+ Tuʻu maʻu ʻo mamata ki he fakamoʻui ʻa Sihová ʻa ia te ne fai maʻamoutolu he ʻaho ní.+ He ko e kau ʻIsipite ʻa ia ʻoku mou sio ki ai he ʻaho ní, ʻe ʻikai ʻaupito faifai ange pea mou toe sio ki ai.+ 14 Ko Sihova tonu ʻe faitau maʻamoutolu,+ pea te mou hanganaki fakalongo pē.”

15 Naʻe folofola leva ʻa Sihova kia Mōsese: “Ko e hā ʻokú ke tangi mai ai kiate aú? Tala ki he kau ʻIsilelí ke veteki ʻa e ʻapitangá pea nau ʻalu. 16 Ka ko koe, hiki hake ho tokotokó pea mafao atu ho nimá ki he tahí ʻo fakamavaeua ia, koeʻuhi ke ʻalu atu ʻa e kau ʻIsilelí ʻi he loto tahí ʻi he kelekele mōmoá. 17 Ka ko au, ʻoku ou tuku ke hoko ʻa e kau ʻIsipité ʻo loto-fefeka, koeʻuhi ke nau tulimui ʻiate kinautolu; ko ia te u fakalāngilangiʻi ai au fakafou ʻia Felo mo ʻene kau taú kotoa, ko ʻene ngaahi saliote taú, pea mo ʻene kau tangata heka hōsí.+ 18 Pea ʻe ʻiloʻi moʻoni ʻe he kau ʻIsipité ko Sihova au ʻi he taimi te u fakalāngilangiʻi ai au fakafou ʻia Felo, ko ʻene ngaahi saliote taú, mo ʻene kau tangata heka hōsí.”+

19 Ko e ʻāngelo leva ʻa e ʻOtua moʻoní+ ʻa ia naʻe ʻalu muʻomuʻa ʻi he kau ʻIsilelí naʻá ne mavahe ʻo ʻalu ki mui ʻiate kinautolu, pea ko e pou ʻao naʻe ʻi muʻa ʻiate kinautolú naʻe hiki ia ki mui ʻo tuʻu mei honau tuʻá.+ 20 Ko ia naʻe haʻu ia ki he vahaʻa ʻo e kau ʻIsipité pea mo ʻIsilelí.+ ʻI he tafaʻaki ʻe tahá, naʻe hoko ia ko ha ʻao fakapoʻuli. ʻI he tafaʻaki ʻe tahá, naʻá ne fakamaama ʻa e poʻulí.+ Ko ia ko e kau ʻIsipité naʻe ʻikai te nau haʻu ʻo ofi ki ʻIsileli ʻi he poó kotoa.

21 Naʻe mafao atu leva ʻe Mōsese hono nimá ki he tahí;+ pea naʻe fakafoki ʻe Sihova ʻa e tahí ʻaki ha matangi hahake mālohi ʻi he poó kotoa, ʻo ʻai ai ʻa e kilisitahí ke hoko ko ha kelekele mōmoa,+ pea naʻe mavaeua ʻa e ngaahi vaí.+ 22 Ko ia naʻe ʻalu atu ʻa e kau ʻIsilelí ʻi he loto tahí ʻi he kelekele mōmoá,+ lolotonga ia naʻe tuʻu fakakauʻā ʻa e ngaahi vaí ʻi honau tafaʻaki toʻomataʻú pea ʻi honau toʻohemá.+ 23 Naʻe tulimui ʻa e kau ʻIsipité ʻiate kinautolu, pea ko e fanga hoosi kotoa ʻa Feló, ko ʻene ngaahi saliote taú, mo ʻene kau tangata heka hōsí naʻe kamata ke nau tulimui atu ʻiate kinautolu ki he loto tahí.+ 24 Lolotonga ʻa e uasi pongipongí,* naʻe vakai atu ʻa Sihova ki he kau ʻIsipité mei he loto pou afí mo e ʻaó,+ pea naʻá ne ʻai ke puputuʻu ʻa e kau ʻIsipité. 25 Naʻá ne hanganaki toʻo ʻa e ngaahi vaʻe ʻo ʻenau ngaahi salioté, ko ia naʻe faingataʻa ai ʻenau ʻai ia ke ʻalú, pea naʻe pehē ʻe he kau ʻIsipité: “Tau hola mei he kau ʻIsilelí, koeʻuhi ʻoku faitau ʻa Sihova maʻanautolu ʻo fakafepakiʻi ʻa e kau ʻIsipité.”+

26 Naʻe folofola leva ʻa Sihova kia Mōsese: “Mafao atu ho nimá ki he tahí koeʻuhi ke lava ʻo foki mai ʻa e ngaahi vaí ki he kau ʻIsipité, ko ʻenau ngaahi saliote taú, mo ʻenau kau tangata heka hōsí.” 27 Naʻe mafao atu ʻe Mōsese he taimi pē ko iá ʻa hono nimá ki he tahí, pea ʻi he pongipongi haké, naʻe foki mai ʻa e tahí ki hono tuʻunga anga-mahení. ʻI he hola mei ai ʻa e kau ʻIsipité, naʻe tupeʻi ʻe Sihova ʻa e kau ʻIsipité ki he loto tahí.+ 28 Naʻe ʻufiʻufi ʻe he ngaahi vai naʻe foki maí ʻa e ngaahi saliote taú mo e kau tangata heka hōsí mo e kau tau kotoa ʻa Felo ʻa ia naʻa nau tulimui atu ʻiate kinautolu ki he loto tahí.+ Naʻe ʻikai tuku ke hao ha taha ʻi honau lotolotongá.+

29 Ka naʻe lue ʻa e kau ʻIsilelí ʻi he kelekele mōmoá ʻi he loto kilisitahí,+ pea naʻe tuʻu fakakauʻā ʻa e ngaahi vaí ʻi honau tafaʻaki toʻomataʻú pea ʻi honau toʻohemá.+ 30 Ko ia naʻe fakahaofi ai ʻe Sihova ʻa ʻIsileli ʻi he ʻaho ko iá mei he nima ʻo e kau ʻIsipité,+ pea naʻe mamata ʻa ʻIsileli ki he mate ʻa e kau ʻIsipité ʻi he matātahí. 31 Naʻe toe mamata ʻa ʻIsileli ki he fuʻu ivi* mālohi naʻe fakahāhā ʻe Sihova ki he kau ʻIsipité, pea naʻe kamata ke manavahē ʻa e kakaí kia Sihova pea naʻa nau tui kia Sihova pea kia Mōsese ko ʻene sevānití.+

15 ʻI he taimi ko iá naʻe hivaʻi ai ʻe Mōsese mo e kau ʻIsilelí ʻa e hivá ni kia Sihova:+

“Tuku ke u hiva kia Sihova, he kuo hoko ʻo hakeakiʻi lahi ia.+

Ko e hōsí mo ia ʻoku heka aí kuó ne fakapuna ki he tahí.+

 2 Ko hoku mālohingá mo hoku iví ʻa Iā,* he kuó ne hoko ko hoku fakamoʻuiʻanga.+

Ko eni ʻa hoku ʻOtuá, pea te u fakahīkihikiʻi ia;+ ko e ʻOtua ʻo ʻeku tamaí,+ pea te u hakeakiʻi ia.+

 3 Ko Sihová ko ha pāteʻi tau mālohi ia.+ Ko Sihova ʻa hono huafá.+

 5 Ko e aake mai ʻa e ngaahi vaí naʻá ne ʻufiʻufi kinautolú na; naʻa nau ngoto hifo ki he lolotó ʻo hangē ha maká.+

 9 Naʻe pehē ʻe he filí: ‘Te u tulimui! Te u maʻu atu!

Te u vahe ʻa e koloa veté kae ʻoua ke u fiemālie!

Te u unuhi ʻa ʻeku heletaá! ʻE fakavaivaiʻi kinautolu ʻe hoku nimá!’+

11 Ko hai ʻi he ngaahi ʻotuá ʻoku hangē ko koé, ʻe Sihova?+

Ko hai ʻoku hangē ko koé, ʻo fakahaaʻi hoʻo kaukaua ʻi he māʻoniʻoní?+

Ko e Tokotaha ke manavahēʻia ʻaki ha ngaahi hiva ʻo e fakahīkihiki, ko e Tokotaha ʻoku fai meʻa fakaofo lahi.+

12 Naʻá ke mafao atu ho nima toʻomataʻú, pea ko e kelekelé naʻá ne folo kinautolu.+

Ko e kakai ʻo Kēnaní te nau loto-siʻi+ kotoa pē.

16 ʻE tō kiate kinautolu ʻa e manavahē mo e ilifia.+

18 Ko Sihová te ne pule ko e tuʻi ʻo taʻengata pea taʻengata.+

20 Ko Meliame leva ko e palōfita fefiné, ʻa e tuofefine ʻo ʻĒloné, naʻá ne toʻo ha nafa ʻi hono nimá, pea naʻe muimui kiate ia ʻa e kau fefine kotoa pē fakataha mo ha ngaahi nafa pea fai mo ha ngaahi meʻe. 21 Naʻe hiva ʻa Meliame ʻi he tali ki he kau tangatá:

“Hiva kia Sihova, he kuo hoko ʻo hakeakiʻi lahi ia.+

Ko e hōsí mo ia ʻoku heka aí kuó ne fakapuna ki he tahí.”+

22 Ki mui ai, naʻe taki atu ʻe Mōsese ʻa ʻIsileli mei he Tahi Kulokulá, pea naʻa nau ʻalu ki he toafa ʻo Sulá ʻo nau laka atu ʻo feʻunga mo e ʻaho ʻe tolu ʻi he toafá, ka naʻe ʻikai te nau maʻu ha vai. 23 Naʻa nau aʻu ki Mala,*+ ka naʻe ʻikai lava ke nau inu ʻa e vai mei Malá koeʻuhí he naʻe ifo kona ia. Ko e ʻuhinga ia naʻá ne ui ai ia ko Malá. 24 Ko ia naʻe kamata ke lāunga ʻa e kakaí kia Mōsese,+ ʻo pehē: “Ko e hā ʻa e meʻa te mau inú?” 25 Naʻá ne tangi kia Sihova,+ pea naʻe tataki ia ʻe Sihova ki ha kiʻi fuʻu ʻakau. ʻI he taimi naʻá ne lī ai ia ki he vaí, naʻe hoko ʻa e vaí ʻo melie.

Naʻá Ne fokotuʻu ʻi ai maʻanautolu ha tuʻutuʻuni mo ha makatuʻunga ki he fakamāú, pea naʻá Ne siviʻi+ kinautolu ʻi ai. 26 Naʻá ne pehē: “Kapau te ke mātuʻaki fanongo ki he leʻo ʻo Sihova ko ho ʻOtuá pea fai ʻa e meʻa ʻoku totonu ʻi heʻene vakaí pea tokanga ki heʻene ngaahi fekaú mo tauhi ʻene ngaahi tuʻutuʻuní kotoa,+ ʻe ʻikai te u ʻomi kiate koe ha taha ʻo e ngaahi mahaki naʻá ku ʻomi ki he kau ʻIsipité,+ he ko au Sihova, ʻoku ou fakamoʻui koé.”+

27 ʻI he hili iá, naʻa nau aʻu ki ʻĒlimi, ʻa ia naʻe ʻi ai ʻa e ngaahi matavai ʻe 12 mo e ʻulu paame ʻe 70. Ko ia naʻa nau ʻapitanga ʻi ai ʻi he veʻe vaí.

16 ʻI he hili ʻenau mavahe mei ʻĒlimí, naʻe faifai pē ʻo aʻu ʻa e fuʻu fakataha fakakātoa ʻo e kau ʻIsilelí ki he toafa Siní,+ ʻa ia ʻoku ʻi he vahaʻa ʻo ʻĒlimi mo Sainaí, ʻi he ʻaho hono 15 ʻo e māhina hono ua hili ʻenau mavahe mei he fonua ko ʻIsipité.

2 Pea naʻe kamata ke lāunga ʻa e fuʻu fakataha fakakātoa ʻo e kau ʻIsilelí kia Mōsese mo ʻĒlone ʻi he toafá.+ 3 Naʻe toutou pehē ʻe he kau ʻIsilelí kiate kinaua: “Kapau pē ā naʻa mau mate kimautolu ʻi he nima ʻo Sihová ʻi he fonua ko ʻIsipité lolotonga ʻemau tangutu ʻo kai mei he ngaahi kulo kakanoʻi-manú,+ lolotonga ʻemau kai mā ʻo mākoná. Pea kuó mo ʻomi kimautolu ki he toafá ni ke ʻai ʻa e fakatahaʻangá ni kotoa ke nau mate ʻi he hongé.”+

4 Naʻe folofola leva ʻa Sihova kia Mōsese: “Ko eni te u fakaʻuha hifo ha mā maʻamoutolu mei he langí,+ pea ʻoku totonu ke ʻalu atu ʻa e kakaí ʻo taki taha tānaki hano ʻinasi ki he ʻaho taki taha,+ koeʻuhí ke u siviʻi ai kinautolu ke sio angé pe te nau ʻaʻeva ʻi heʻeku laó pe ʻikai.+ 5 Ka ʻi he ʻaho hono onó+ ʻi heʻenau ngaohi ʻa e meʻa kuo nau tānakí, ʻe liunga ua ia ʻi he lahi ʻo e meʻa ʻoku nau tufi ʻi he ngaahi ʻaho taki taha ko eé.”+

6 Ko ia naʻe pehē ʻe Mōsese mo ʻĒlone ki he kotoa ʻo e kau ʻIsilelí: “ʻI he efiafí te mou ʻiloʻi moʻoni ai ko Sihova ia naʻá ne ʻomi kimoutolu mei he fonua ko ʻIsipité.+ 7 ʻI he pongipongí te mou sio ai ki he lāngilangi ʻo Sihová, he kuó ne fanongo ki hoʻomou ngaahi lāunga kia Sihová. Ko hai kimaua ke mou lāunga mai ai kiate kimauá?” 8 Naʻe hoko atu ʻa Mōsese: “ʻI he taimi ʻe ʻoatu ai ʻe Sihova kiate kimoutolu ʻa e kakanoʻi-manu ke mou kai ʻi he efiafí pea mo e mā ʻi he pongipongí ke mou mākoná, te mou sio ai kuo fanongo mai ʻa Sihova ki hoʻomou ngaahi lāunga ʻa ia ʻoku mou lāunga ʻaki kiate iá. Ka ko hai kimaua? Ko hoʻomou ngaahi lāungá ʻoku ʻikai ko e fai mai ia kiate kimaua, ka kia Sihova.”+

9 Naʻe pehē leva ʻe Mōsese kia ʻĒlone: “Tala ki he fuʻu fakataha fakakātoa ʻo e kau ʻIsilelí, ‘Mou haʻu ke ofi mai ki he ʻao ʻo Sihová, he kuó ne fanongo ki hoʻomou ngaahi lāungá.’”+ 10 ʻI he hili pē ko ia ʻa e lea ʻa ʻĒlone ki he fuʻu fakataha fakakātoa ʻo e kau ʻIsilelí, naʻa nau hanga atu ki he toafá, pea vakai, naʻe hā mai ʻi he ʻaó ʻa e lāngilangi ʻo Sihová.+

11 Naʻe toe folofola ʻa Sihova kia Mōsese ʻo pehē: 12 “Kuó u fanongo ki he ngaahi lāunga ʻa e kau ʻIsilelí.+ Tala kiate kinautolu, ‘ʻI he mamalu ʻa e poʻulí* te mou kai kakanoʻi-manu ai, pea ʻi he pongipongí te mou mākona ʻi he maá,+ pea te mou ʻiloʻi moʻoni ai ko au Sihova ko homou ʻOtuá.’”+

13 Ko ia ʻi he efiafi ko iá naʻe haʻu ai ha fanga kueili* ʻo nau ʻufiʻufi ʻa e ʻapitangá,+ pea ʻi he pongipongí naʻe ʻi ai ha hahau takatakai ʻi he kotoa ʻo e ʻapitangá. 14 ʻI he taimi naʻe pulia atu ai ʻa e hahaú, naʻe ʻi ai ha fanga kiʻi meʻa valevale manifi ʻi he fukahi toafá,+ ʻo valevale hangē ha fanga kiʻi ʻaisi ʻi he funga kelekelé. 15 ʻI he sio ki ai ʻa e kau ʻIsilelí, naʻe kamata ke nau fepehēʻaki, “Ko e hā nai ia?” He naʻe ʻikai te nau ʻilo pe ko e hā ia. Naʻe pehē ange ʻe Mōsese kiate kinautolu: “Ko e mā ia kuo foaki ʻe Sihova maʻamoutolu ko ha meʻakai.+ 16 Ko e meʻa eni kuo tuʻutuʻuni ʻe Sihová, ‘Ko e tokotaha taki taha ʻoku totonu ke ne tānaki ia ʻo fakatatau ki he lahi ʻo e meʻa ʻe malava ke ne kaí. Te mou ʻave ha fua oma*+ maʻá e tokotaha taki taha ʻo fakatatau ki he tokolahi ʻo e kakai ʻoku ʻi he tēniti ʻo e tokotaha taki taha ʻo kimoutolú.’” 17 Naʻe kamata ke fai pehē ʻa e kau ʻIsilelí; naʻa nau tānaki ia, ko e niʻihi naʻe lahi ʻenau tānakí pea ko e niʻihi naʻe siʻi ʻenau tānakí. 18 ʻI heʻenau fua ia ʻaki ʻa e fua omá, ko e tokotaha naʻe lahi ʻene tānakí naʻe ʻikai ke hulu pea ko e tokotaha naʻe siʻi ʻene tānakí naʻe ʻikai ke nounou.+ Naʻa nau taki taha tānaki ia ʻo fakatatau ki he meʻa naʻe malava ke nau kaí.

19 Naʻe pehē ange leva ʻe Mōsese kiate kinautolu: “ʻOku ʻikai totonu ke fakatoe ʻe ha taha ha meʻa mei ai ʻo aʻu ki he pongipongí.”+ 20 Ka naʻe ʻikai te nau fanongo kia Mōsese. ʻI he taimi naʻe fakatoe ai ʻe ha kau tangata ha meʻa mei ai ʻo aʻu ki he pongipongí, naʻe tupu ai ʻa e ʻuangá pea nanamu, pea naʻe hoko ʻo ʻita ʻa Mōsese ʻiate kinautolu. 21 Naʻa nau tufi ia ʻi he pongipongi ki he pongipongi, ʻa e tokotaha taki taha ʻo fakatatau ki he meʻa naʻe malava ke ne kaí. ʻI he vela mai ʻa e laʻaá, naʻe vaia ai ia.

22 ʻI he ʻaho hono onó, naʻa nau tufi ʻo liunga ua ʻa e maá,+ ko e fua oma ʻe ua maʻá e tokotaha taki taha. Ko ia naʻe haʻu ʻa e ngaahi ʻeiki kotoa ʻo e fuʻu fakatahá ʻo fakahā ia kia Mōsese. 23 ʻI he meʻa ko iá naʻá ne pehē kiate kinautolu: “Ko e meʻa ia kuo folofolaʻaki ʻe Sihová. Ko ʻapongipongi ʻe fai ai ha mālōlō fakaʻaufuli,* ko ha Sāpate* tapu ia kia Sihova.+ Taʻo ʻa e meʻa ʻoku fiemaʻu ke mou taʻó, pea haka ʻa e meʻa ʻoku fiemaʻu ke mou haká;+ pea tuku leva ha meʻa pē ʻe toe ʻo tauhi ia ki he pongipongí.” 24 Ko ia naʻa nau tuku ia ki he pongipongí, ʻo hangē tofu pē ko e tuʻutuʻuni ʻa Mōsesé, pea naʻe ʻikai ke nanamu ia pe ʻi ai ha ʻuanga ʻi ai. 25 Naʻe pehē ange leva ʻe Mōsese: “Mou kai ia he ʻahó ni, koeʻuhí he ko e ʻaho ní ko ha Sāpate ia kia Sihova. ʻI he ʻaho ní ʻe ʻikai te mou maʻu ia ʻi he kelekelé. 26 Te mou tufi ia ʻi he ʻaho ʻe ono, ka ʻi he ʻaho hono fitú, ʻa e Sāpaté,+ ʻe ʻikai ʻi ai ha meʻa.” 27 Kae kehe, naʻe ʻalu atu ha niʻihi ʻo e kakaí ke tufi ia ʻi he ʻaho hono fitú, ka naʻe ʻikai te nau maʻu ha meʻa.

28 Ko ia naʻe folofola ʻa Sihova kia Mōsese: “Ko e hā hono fuoloa hoʻomou fakafisi ke tauhi ʻeku ngaahi tuʻutuʻuní mo ʻeku ngaahi laó?+ 29 Fakatokangaʻi ange ʻa e moʻoniʻi meʻa ko ia ʻo hono ʻoatu ʻe Sihova maʻamoutolu ʻa e Sāpaté.+ Ko e ʻuhinga ia kuó ne ʻoatu ai kiate kimoutolu ʻa e mā ki he ʻaho ʻe ua ʻi he ʻaho hono onó. Kuo pau ke nofo ʻa e tokotaha kotoa pē ʻi he feituʻu ʻokú ne ʻi aí; ʻe ʻikai mavahe ha taha mei hono feituʻú ʻi he ʻaho hono fitú.” 30 Ko ia naʻe tauhi ʻe he kakaí ʻa e Sāpaté* ʻi he ʻaho hono fitú.+

31 Naʻe ui ʻe he fale ʻo ʻIsilelí ʻa e mā ko iá ko e “mana.”* Naʻe hinehina ia ʻo hangē ko e tengaʻi kolienitaá, pea ko hono ifó naʻe hangē ia ha mā lafalafa fakataha mo e honé.+ 32 Naʻe pehē ange leva ʻe Mōsese: “Ko e meʻa eni kuo tuʻutuʻuni ʻe Sihová, ‘Fakafonu ha fua oma ʻo ia ko ha meʻa ke tauhi ʻi he kotoa homou ngaahi toʻutangatá,+ koeʻuhí ke nau sio ai ki he mā naʻá ku ʻoatu kiate kimoutolu ke mou kai ʻi he toafá ʻi he taimi naʻá ku ʻomi ai kimoutolu mei he fonua ko ʻIsipité.’” 33 Ko ia naʻe pehē ʻe Mōsese kia ʻĒlone: “Toʻo ha siā pea faʻo ki ai ha fua oma ʻo e maná ʻo tuku ia ʻi he ʻao ʻo Sihová ko ha meʻa ke tauhi ʻi he kotoa ʻo homou ngaahi toʻutangatá.”+ 34 Hangē tofu pē ko e meʻa naʻe tuʻutuʻuni ʻe Sihova kia Mōsesé, naʻe tuku ia ʻe ʻĒlone ʻi he ʻao ʻo e Fakamoʻoní*+ koeʻuhí ke lava ai ʻo fakatolonga ia. 35 Naʻe kai ʻe he kau ʻIsilelí ʻa e maná ʻo feʻunga mo e taʻu ʻe 40,+ ʻo aʻu ki heʻenau hoko ki ha fonua naʻe nofoʻi.+ Naʻa nau kai ʻa e maná ʻo aʻu ki heʻenau hoko ki he kauʻā ʻo e fonua ko Kēnaní.+ 36 Pea ko ha oma ko ha vahe hongofulu ia ʻo ha fua efa.*

17 Ko e fuʻu fakataha fakakātoa ʻo e kau ʻIsilelí naʻa nau mavahe mei he toafa Siní+ ʻo ʻalu mei he feituʻu ki he feituʻu ʻo fakatatau ki he tuʻutuʻuni ʻa Sihová,+ pea naʻa nau ʻapitanga ʻi Lefitimi.+ Ka naʻe ʻikai ha vai ki he kakaí ke nau inu.

2 Ko ia naʻe kamata ke fakakē ʻa e kakaí kia Mōsese+ ʻo nau pehē: “ʻOmai kiate kimautolu ha vai ke mau inu.” Ka naʻe pehē ʻe Mōsese kiate kinautolu: “Ko e hā ʻoku mou fakakē mai ai kiate aú? Ko e hā ʻoku mou hanganaki ʻahiʻahiʻi ai ʻa Sihová?”+ 3 Ka naʻe fieinua ʻaupito ai ʻa e kakaí, pea naʻa nau hanganaki lāunga kia Mōsese+ ʻo pehē: “Ko e hā kuó ke ʻomi ai kimautolu mei ʻIsipite ke tāmateʻi kimautolu mo homau ngaahi fohá mo ʻemau fanga monumanú ʻi he fieinuá?” 4 Naʻe faifai pē pea tangi ʻa Mōsese kia Sihova: “Ko e hā te u fai ki he kakaí ni? ʻOku toetoe siʻi pē pea nau tolomakaʻi au!”

5 Naʻe folofola leva ʻa Sihova kia Mōsese: “ʻAlu muʻomuʻa atu ʻi he kakaí, pea ʻalu mo koe ha niʻihi ʻo e kau mātuʻa ʻo ʻIsilelí pea mo ho tokotoko ʻa ia naʻá ke taaʻi ʻaki ʻa e Vaitafe Nailá.+ Toʻo ia ʻi ho nimá peá ke ʻalu atu. 6 Vakai, te u tuʻu ai ʻi ho ʻaó ʻi he maka ʻi Hōlepí. Kuo pau ke ke taaʻi ʻa e maká, pea ʻe haʻu mei ai ʻa e vai, pea ʻe inu ia ʻe he kakaí.”+ Naʻe fai pehē ʻa Mōsese ʻi he ʻao ʻo e kau mātuʻa ʻo ʻIsilelí. 7 Ko ia naʻá ne ui ʻa e feituʻú ko Masa*+ mo Mēlipa*+ koeʻuhi ko e fakakē ʻa e kau ʻIsilelí pea koeʻuhi ko ʻenau ʻahiʻahiʻi ʻa Sihova+ ʻi heʻenau pehē: “ʻOku ʻi hotau lotolotongá koā ʻa Sihova pe ʻikai?”

8 Pea naʻe haʻu ʻa e kau ʻAmalekí+ ʻo faitau mo ʻIsileli ʻi Lefitimi.+ 9 ʻI he meʻá ni naʻe pehē ʻe Mōsese kia Siosiua:+ “Fili ha kau tangata maʻatautolu pea ʻalu atu ʻo faitau mo e kau ʻAmalekí. Ko ʻapongipongi te u tuʻu ai ʻi ʻolunga ʻi he foʻi māʻolungá, fakataha mo e tokotoko ʻo e ʻOtua moʻoní ʻi hoku nimá.” 10 Naʻe fai leva ʻe Siosiua ʻa e meʻa tofu pē naʻe tala ange ʻe Mōsese kiate iá,+ pea naʻá ne faitau mo e kau ʻAmalekí. Pea naʻe ʻalu hake ʻa Mōsese, ʻĒlone pea mo Hua+ ki ʻolunga ki he foʻi māʻolungá.

11 Lolotonga ʻa e kei hiki ki ʻolunga ʻe Mōsese ʻa hono ongo nimá, naʻe ikuna ʻa e kau ʻIsilelí, ka ʻi heʻene tuku pē ki lalo ʻa hono ongo nimá, naʻe ikuna ʻa e kau ʻAmalekí. 12 ʻI he mamafa ʻa e ongo nima ʻo Mōsesé, naʻá na toʻo ha fuʻu maka ʻo tuku ʻi lalo ʻiate ia, pea naʻá ne tangutu ai. Naʻe puke leva ʻe ʻĒlone mo Hua ʻa hono ongo nimá, ko e tokotaha ʻi he tafaʻaki taki taha, ko ia naʻe tuʻu maʻu ai pē ʻa hono ongo nimá ʻo aʻu ki he tō ʻa e laʻaá. 13 Ko ia naʻe ikunaʻi ʻe Siosiua ʻa ʻAmaleki mo hono kakaí ʻaki ʻa e heletaá.+

14 Naʻe folofola leva ʻa Sihova kia Mōsese: “Tohi eni ko ha fakamanatu ʻi he tohí pea toe leaʻaki ia kia Siosiua, ‘Te u tafiʻi fakaʻaufuli ʻa e manatu ki ʻAmalekí mei he lalo langí.’”+ 15 Naʻe fokotuʻu leva ʻe Mōsese ha ʻōlita pea ui ia ko Sihova-nisi,* 16 ʻo ne pehē: “Koeʻuhi ko hono nimá ʻoku fakafepaki ki he taloni ʻo Iaá,+ ʻe faitau ʻa Sihova mo ʻAmaleki mei he toʻutangata ki he toʻutangata.”+

18 Pea ko Setelō ko e taulaʻeiki ʻo Mitianí, ʻa e tamai ʻa e mali ʻo Mōsesé,+ naʻá ne fanongo fekauʻaki mo e meʻa kotoa naʻe fai ʻe he ʻOtuá maʻa Mōsese pea maʻa ʻIsileli ko hono kakaí, ʻa e anga ʻo hono ʻomi ʻe Sihova ʻa ʻIsileli mei ʻIsipité.+ 2 Ko Setelō, ʻa e tamai ʻa e mali ʻo Mōsesé, naʻá ne ʻave ʻa Sīpola, ko e uaifi ʻo Mōsesé, ʻi he taimi naʻe fakafoki ange ai kiate ia, 3 fakataha mo ʻene ongo tamá.+ Ko e tama ʻe taha naʻe fakahingoa ko Kēsomi,*+ koeʻuhí he naʻe pehē ʻe Mōsese, “Kuó u nofo ko ha muli ʻi ha fonua muli,” 4 pea ko e taha naʻe fakahingoa ia ko ʻEliese,* koeʻuhi he naʻá ne pehē, “Ko e ʻOtua ʻo ʻeku tamaí ʻa hoku tokoní, ʻa ia naʻá ne fakahaofi au mei he heletā ʻa Feló.”+

5 Ko ia ko Setelō, ʻa e tamai ʻa e mali ʻo Mōsesé, fakataha mo e ongo foha ʻo Mōsesé mo hono uaifí, naʻa nau ʻalu atu kiate ia ki he toafá ʻa ia naʻá ne ʻapitanga ai ʻi he moʻunga ʻo e ʻOtua moʻoní.+ 6 Naʻá ne ʻoatu leva ha fekau kia Mōsese: “Ko au Setelō, ko e tamai ʻo ho malí,+ ʻoku ou haʻu kiate koe fakataha mo ho uaifí pea mo ʻene ongo tamá.” 7 Naʻe ʻalu atu ʻi he taimi pē ko iá ʻa Mōsese ke fakafetaulaki ki he tamai ʻa hono malí, pea naʻá ne punou ʻo ʻuma kiate ia. Naʻá na taki taha feʻekeʻaki pe ʻokú na fēfē, pea naʻa nau hū leva ki he tēnití.

8 Naʻe fakamatalaʻi ʻe Mōsese ki he tamai ʻa hono malí ʻa e meʻa kotoa naʻe fai ʻe Sihova kia Felo mo ʻIsipite koeʻuhi ko ʻIsilelí,+ ko e ngaahi faingataʻa kotoa naʻe hoko kiate kinautolu ʻi he fonongá,+ pea mo e anga hono fakahaofi kinautolu ʻe Sihová. 9 Naʻe fiefia ʻa Setelō ʻi he lelei kotoa kuo fai ʻe Sihova maʻa ʻIsileli ʻi hono fakahaofi kinautolu mei ʻIsipité.* 10 Naʻe pehē ange leva ʻe Setelō: “Ke fakahīkihikiʻi ʻa Sihova, ʻa ia naʻá ne fakahaofi kimoutolu mei ʻIsipite pea meia Feló, pea naʻá ne fakahaofi ʻa e kakaí mei he malumalu ʻo e pule ʻa ʻIsipité. 11 Ko eni ʻoku ou ʻilo ʻoku lahi ange ʻa Sihova ʻi he ngaahi ʻotua kehé kotoa,+ koeʻuhi ko e meʻa naʻá ne fai ki he faʻahinga ko ia naʻa nau fakamafutofuta ki hono kakaí.” 12 Ko Setelō leva, ʻa e tamai ʻa e mali ʻo Mōsesé, naʻá ne ʻomi ha feilaulau tutu mo e ngaahi feilaulau ke fai ki he ʻOtuá, pea ko ʻĒlone mo e kau mātuʻa kotoa ʻo ʻIsilelí naʻa nau haʻu ke kai mo e tamai ʻa e mali ʻo Mōsesé ʻi he ʻao ʻo e ʻOtua moʻoní.

13 ʻI he ʻaho hono hokó, naʻe tangutu hifo ai ʻa Mōsese ʻo hangē ko ia kuó ne faʻa faí ke faifakamaau maʻá e kakaí, pea naʻe tuʻu ai pē ʻa e kakaí ʻi he ʻao ʻo Mōsesé mei he pongipongí ʻo aʻu ki he efiafí. 14 ʻI he sio ʻa e tamai ʻa e mali ʻo Mōsesé ki he meʻa kotoa naʻá ne fai maʻá e kakaí, naʻá ne pehē ange: “Ko e hā ʻa e meʻa ko eni ʻokú ke fai maʻá e kakaí? Ko e hā ʻokú ke tangutu toko taha ai heni pea tuʻu ʻa e kakaí kotoa ʻi ho ʻaó mei he pongipongí ʻo aʻu ki he efiafí?” 15 Naʻe pehē ange ʻe Mōsese ki he tamai ʻa hono malí: “Koeʻuhí ʻoku hanganaki haʻu ʻa e kakaí kiate au ke kumi ki ha tataki mei he ʻOtuá. 16 ʻI he hoko ha meʻá, ʻoku ʻomi ia kiate au pea kuo pau ke u fakamaau ʻi he vahaʻa ʻo e tokotaha ʻe tahá mo e tokotaha ʻe tahá, pea ʻoku ou ʻai ke ʻiloʻi ʻa e ngaahi tuʻutuʻuni ʻa e ʻOtua moʻoní pea mo ʻene ngaahi laó.”+

17 Naʻe pehē ange ʻe he tamai ʻa e mali ʻo Mōsesé kiate ia: “Ko e meʻa ʻokú ke faí ʻoku ʻikai ke lelei. 18 Ko e moʻoni te ke ongosia, ʻa koe fakatouʻosi mo e kakai ko eni ʻoku nau ʻiate koé, koeʻuhí ko ha kavenga eni ia ʻoku fuʻu lahi kiate koe pea heʻikai lava ke ke fua ia ʻiate koe pē. 19 Ko eni fanongo mai kiate au. Te u fai atu ha faleʻi kiate koe, pea ʻe ʻiate koe ʻa e ʻOtuá.+ Ke ke hoko ko ha fakafofonga maʻá e kakaí ʻi he ʻao ʻo e ʻOtua moʻoní,+ pea kuo pau ke ke ʻomi ʻa e ngaahi meʻá ki he ʻOtua moʻoní.+ 20 ʻOku totonu ke ke fakatokanga kiate kinautolu ʻo fekauʻaki mo e ngaahi tuʻutuʻuní pea mo e ngaahi laó+ pea ʻai ke nau ʻiloʻi ʻa e hala ʻoku totonu ke nau fou aí pea mo e ngāue ʻoku totonu ke nau faí. 21 Ka ʻoku totonu ke ke fili mei he kakaí ʻa e kau tangata lavameʻa+ ʻoku nau manavahē-ʻOtua, ko e kau tangata falalaʻanga ʻoku nau fehiʻa ki hono maʻu ʻa e tupu taʻetotonú,+ pea fakanofo ʻa e faʻahingá ni kiate kinautolu ko e ngaahi ʻeiki ki he ngaahi toko afe, ko e ngaahi ʻeiki ki he ngaahi toko teau, ko e ngaahi ʻeiki ki he ngaahi toko nimangofulu, mo e ngaahi ʻeiki ki he ngaahi toko hongofulu.+ 22 ʻOku totonu ke nau fakamāuʻi ʻa e kakaí ʻi he hoko ha ngaahi meʻá,* pea te nau ʻomi kiate koe ʻa e meʻa kotoa pē ʻoku faingataʻá,+ ka ko e meʻa iiki kotoa pē te nau fai ʻe kinautolu ʻa e tuʻutuʻuní. ʻAi ke faingofua ange kiate koe ʻaki hono tuku ke nau fua fakataha mo koe ʻa e kavengá.+ 23 Kapau te ke fai ʻa e meʻá ni, pea ʻoku fekauʻi koe ʻe he ʻOtuá, te ke malava ai ke matuʻuaki ʻa e faingataʻá, pea ʻe foki ʻa e tokotaha kotoa ki ʻapi kuo fiemālie.”

24 Naʻe fanongo leva ʻa Mōsese ki he tamai ʻa hono malí peá ne fai ʻa e meʻa kotoa naʻá ne leaʻakí. 25 Naʻe fili ʻe Mōsese ʻa e kau tangata lavameʻa mei ʻIsileli kotoa ʻo fakanofo kinautolu ko e ngaahi ʻulu ki he kakaí, ko e ngaahi ʻeiki ki he ngaahi toko afe, ko e ngaahi ʻeiki ki he ngaahi toko teau, ko e ngaahi ʻeiki ki he ngaahi toko nimangofulu, mo e ngaahi ʻeiki ki he ngaahi toko hongofulu. 26 Ko ia naʻa nau fakamāuʻi ʻa e kakaí ʻi he taimi naʻe hoko ai ha ngaahi meʻá. Ko ha meʻa pē naʻe faingataʻa naʻa nau ʻave ia kia Mōsese,+ ka ko e meʻa iiki kotoa pē naʻa nau fakamāuʻi ia. 27 ʻI he hili iá, naʻe tuku atu ʻe Mōsese ʻa e tamai ʻa hono malí,+ pea naʻá ne fāifononga atu ʻo ne ʻalu ki hono fonuá.

19 ʻI he māhina hono tolú hili ʻa e ʻalu atu ʻa e kau ʻIsilelí mei he fonua ko ʻIsipité, ʻi he ʻaho tatau pē, naʻa nau aʻu ai ki he toafa Sainaí. 2 Naʻa nau mavahe mei Lefitimi+ ʻo nau aʻu ki he toafa Sainaí pea nau ʻapitanga ai ʻi he toafá. Naʻe ʻapitanga ai ʻa ʻIsileli ʻi muʻa ʻi he moʻungá.+

3 Naʻe ʻalu hake leva ʻa Mōsese ki he ʻOtua moʻoní, pea naʻe ui mai ʻa Sihova kiate ia mei he moʻungá,+ ʻo ne folofola: “Ko e meʻa eni te ke leaʻaki ki he fale ʻo Sēkopé pea tala ki he kau ʻIsilelí, 4 ‘Kuo mou mātā tonu ʻa e meʻa naʻá ku fai ki he kau ʻIsipité,+ koeʻuhí ke fua kimoutolu ʻi he kapakau ʻo e ʻīkalé pea ʻomi kimoutolu kiate au.+ 5 Ko eni, kapau te mou mātuʻaki talangofua ki hoku leʻó pea tauhi ʻeku fuakavá, te mou hoko moʻoni ko ʻeku koloa makehe* ʻi he ngaahi kakai kotoa pē,+ he ʻoku ʻaʻaku ʻa māmani kātoa.+ 6 Te mou hoko kiate au ko ha puleʻanga ʻo e kau taulaʻeiki mo ha kakai māʻoniʻoni.’+ Ko e ngaahi lea eni te ke leaʻaki ki he kau ʻIsilelí.”

7 Ko ia naʻe ʻalu ʻa Mōsese ʻo ne ui ʻa e kau mātuʻa ʻo e kakaí peá ne fakahā kiate kinautolu ʻa e ngaahi lea kotoa ko eni naʻe tuʻutuʻuni ʻe Sihova kiate iá.+ 8 ʻI he hili iá, naʻe tali loto-taha atu ʻa e kakaí kotoa: “Ko e meʻa kotoa kuo folofolaʻaki ʻe Sihová ʻoku mau loto-lelei ke fai ia.”+ Naʻe ʻave leva ʻe Mōsese ʻa e tali ʻa e kakaí kia Sihova. 9 Pea naʻe folofola ʻa Sihova kia Mōsese: “Vakai, te u ʻalu atu kiate koe ʻi ha ʻao fakapoʻuli, koeʻuhí ke fanongo ʻa e kakaí ʻi he taimi te u lea ai kiate koé pea koeʻuhí ke nau tui maʻu pē kiate koe foki.” Naʻe fakahaaʻi leva ʻe Mōsese ʻa e ngaahi lea ʻa e kakaí kia Sihova.

10 Naʻe folofola ange leva ʻa Sihova kia Mōsese: “ʻAlu ki he kakaí pea fakamāʻoniʻoniʻi kinautolu he ʻahó ni mo ʻapongipongi, pea kuo pau ke nau fō honau valá. 11 Pea kuo pau ke nau mateuteu ki he ʻaho hono tolú, koeʻuhí ʻi he ʻaho hono tolú ʻe hāʻele hifo ai ʻa Sihova ki he Moʻunga Sainaí ʻi he ʻao ʻo e kakaí kotoa. 12 Kuo pau ke ke fokotuʻu ha ngaahi fakangatangata takatakai ai ki he kakaí pea tala kiate kinautolu, ‘Tokanga ke ʻoua naʻa ʻalu hake ki he moʻungá pe tuʻu ai. ʻIlonga ha taha ʻe lave ki he moʻungá kuo pau moʻoni ke tāmateʻi ia. 13 ʻE ʻikai ala ha nima kiate ia, ka ʻe tolomakaʻi pe fanaʻi ia.* Pe ko ha manu pe tangata, ʻe ʻikai te ne moʻui.’+ Ka ʻi he ongo mai ʻa e meʻaifí*+ ʻe malava leva ai ke nau ʻalu atu ki he moʻungá.”

14 Naʻe ʻalu hifo leva ʻa Mōsese mei he moʻungá ki he kakaí, pea naʻe kamata ke ne fakamāʻoniʻoniʻi ʻa e kakaí, pea naʻa nau fō honau valá.+ 15 Naʻá ne pehē ki he kakaí: “Mou teuteu ki he ʻaho hono tolú. Fakaʻehiʻehi mei he fehokotaki fakasinó.”*

16 ʻI he pongipongi ʻo e ʻaho hono tolú, naʻe ʻi ai ha mana mo ha ʻuhila, pea naʻe ʻi ai ha fuʻu ʻao matolu+ ʻi he moʻungá pea mo ha ongo leʻo-lahi ʻaupito ʻo ha meʻaifi, pea ko e kakai kotoa ʻi he ʻapitangá naʻe kamata ke nau tetetete.+ 17 Pea naʻe ʻomi ʻe Mōsese ʻa e kakaí mei he ʻapitangá ke nau fetaulaki mo e ʻOtua moʻoní, pea naʻa nau tuʻu ʻi he veʻe moʻungá. 18 Naʻe kohutuʻu ʻa e Moʻunga Sainaí kotoa, koeʻuhí naʻe hāʻele hifo ʻa Sihova ki ai ʻi he afi;+ pea naʻe ʻalu hake ʻa e kohú ʻo hangē ko e kohu ʻo ha fōnisé, pea naʻe ngalulu lahi+ ʻa e moʻungá kotoa. 19 ʻI he fakaʻaʻau ke leʻo-lahi mo toe leʻo-lahi ange ʻa e meʻaifí, naʻe lea ʻa Mōsese, pea naʻe tali mai ia ʻe he leʻo ʻo e ʻOtua moʻoní.

20 Ko ia naʻe hāʻele hifo ʻa Sihova ki Moʻunga Sainai ki he tumutumu ʻo e moʻungá. Naʻe ui hake leva ʻe Sihova ʻa Mōsese ki he tumutumu ʻo e moʻungá, pea naʻe ʻalu hake ʻa Mōsese.+ 21 Naʻe folofola ange leva ʻa Sihova kia Mōsese: “ʻAlu hifo ʻo fakatokanga ki he kakaí ke ʻoua te nau feinga mālohi mai ke sio kia Sihova, telia naʻa ʻauha honau tokolahi. 22 Pea tuku ʻa e kau taulaʻeiki ʻoku nau haʻu ʻo ofi maʻu pē kia Sihová ke nau fakamāʻoniʻoniʻi kinautolu, koeʻuhí ke ʻoua naʻa taaʻi* kinautolu ʻe Sihova.”+ 23 Naʻe pehē ange leva ʻe Mōsese kia Sihova: “ʻOku ʻikai lava ke haʻu ʻa e kakaí ki Moʻunga Sainai koeʻuhí he kuó ke ʻosi fakatokanga mai kiate kimautolu, ʻo pehē, ‘Fokotuʻu ha ngaahi fakangatangata takatakai ʻi he moʻungá, pea ʻai ia ke toputapu.’”+ 24 Kae kehe, naʻe folofola ʻa Sihova kiate ia: “ʻAlu, ʻalu hifo, peá ke toe foki hake, ʻa koe fakataha mo ʻĒlone, kae ʻoua ʻe tuku ʻa e kau taulaʻeikí mo e kakaí ke nau feinga mālohi ke ʻalu hake kia Sihova, koeʻuhí ke ʻoua naʻá ne taaʻi kinautolu.”+ 25 Ko ia naʻe ʻalu hifo ʻa Mōsese ki he kakaí ʻo ne tala ia kiate kinautolu.

20 Naʻe folofolaʻaki leva ʻe he ʻOtuá ʻa e ngaahi lea kotoa ko ení:+

2 “Ko au Sihova ko ho ʻOtuá, ʻa ia naʻá ku ʻomi koe mei he fonua ko ʻIsipité, mei he fale fakapōpulá.+ 3 Kuo pau ke ʻoua naʻa ʻi ai hao toe ngaahi ʻotua kehe, tuku kehe pē au.*+

4 “Kuo pau ke ʻoua naʻá ke ngaohi maʻau ha ʻīmisi kuo tongi pe ko ha fakatātā ʻo fakatatau ki ha meʻa pē ʻoku ʻi he langí ʻi ʻolunga pe ʻi he māmaní ʻi lalo pe ʻi he ngaahi vaí ʻi lolofonua.+ 5 Kuo pau ke ʻoua naʻá ke punou hifo kiate kinautolu pe hoko ʻo fakataueleʻi ke tauhi kiate kinautolu,+ he ko au Sihova ko ho ʻOtuá, ko ha ʻOtua ʻokú ne fiemaʻu ʻa e anga-līʻoa maʻataʻatā,+ ʻoku ou ʻomai ʻa e tautea ki he faihala ʻa e ngaahi tamaí ʻo hilifaki ki he ngaahi fohá, ki he toʻutangata hono tolú pea ki he toʻutangata hono fā ʻo e faʻahinga ʻoku fehiʻa kiate aú, 6 kae fakahāhā ʻa e ʻofa mateaki ki he afeʻi toʻutangata ʻo e faʻahinga ʻoku ʻofa kiate au mo tauhi ʻeku ngaahi fekaú.+

7 “Kuo pau ke ʻoua naʻá ke ngāuehalaʻaki ʻa e huafa ʻo Sihova ko ho ʻOtuá,+ he ko Sihová ʻe ʻikai te ne tuku taʻetautea ʻa e tokotaha ʻokú ne ngāuehalaʻaki ʻa Hono huafá.+

8 “Manatuʻi ʻa e ʻaho Sāpaté ke tauhi ia ke toputapu.+ 9 Ko hoʻo fakaongosiá mo hoʻo ngāué kotoa ke fai ia ʻi he ʻaho ʻe ono,+ 10 ka ko e ʻaho hono fitú ko ha Sāpate ia kia Sihova ko ho ʻOtuá. Kuo pau ke ʻoua naʻá ke fai ai ha ngāue, ʻa koe pe ko ho fohá pe ko ho ʻofefiné pe ko hoʻo tamaioʻeikí pe ko hoʻo kaunangá pe ko hoʻo manu lalatá pe ko hoʻo muli ʻa ia ʻoku ʻi ho ngaahi nofoʻangá.*+ 11 He ko e ʻaho ʻe ono naʻe ngaohi ai ʻe Sihova ʻa e langí mo e māmaní, ko e tahí, mo e meʻa kotoa ʻoku ʻi aí, pea naʻe kamata ke ne mālōlō ʻi he ʻaho hono fitú.+ Ko e ʻuhinga ia naʻe tāpuakiʻi ai ʻe Sihova ʻa e ʻaho Sāpaté pea ʻai ia ke toputapú.

12 “Fakaʻapaʻapa ki hoʻo tamaí mo hoʻo faʻeé,+ koeʻuhí ke ke moʻui fuoloa ʻi he fonua ʻoku foaki kiate koe ʻe Sihova ko ho ʻOtuá.+

13 “Kuo pau ke ʻoua naʻá ke fakapō.+

14 “Kuo pau ke ʻoua naʻá ke tono.+

15 “Kuo pau ke ʻoua naʻá ke kaihaʻa.+

16 “Kuo pau ke ʻoua naʻá ke fakamoʻoni loi ʻi he taimi ʻokú ke fai ai ha fakamoʻoni ki ha taha kehe.+

17 “Kuo pau ke ʻoua naʻá ke holi ki he fale ʻo ha taha kehe. Kuo pau ke ʻoua naʻá ke fakaʻamua ʻa e uaifi ʻo ha taha kehe+ pe ko ʻene tamaioʻeikí pe ko ʻene kaunangá pe ko ʻene pulú pe ko ʻene ʻasí pe ko ha meʻa pē ʻa e tokotaha kehé.”+

18 Pea ko e kakaí kotoa naʻa nau mātā tonu ʻa e maná mo e ʻuhilá, ko e leʻo ʻo e meʻaifí, mo e kohu ʻa e moʻungá; pea ko e sio ki he meʻá ni naʻá ne ʻai ai kinautolu ke nau tetetete pea nau tuʻu ʻo mamaʻo atu.+ 19 Ko ia naʻa nau pehē kia Mōsese: “Ke ke lea kiate kimautolu, pea te mau fanongo, kae ʻoua ʻe tuku ke folofola mai ʻa e ʻOtuá kiate kimautolu, he ʻoku mau manavahē naʻa mau mate.”+ 20 Ko ia naʻe pehē ʻe Mōsese ki he kakaí: “ʻOua ʻe ilifia, he ko e ʻOtua moʻoní kuó ne hāʻele mai ke sivi kimoutolu,+ koeʻuhí ke hokohoko atu hoʻomou manavahē kiate iá ke ʻoua ai te mou faiangahala.”+ 21 Ko ia naʻe hanganaki tuʻu ʻa e kakaí ʻo mamaʻo atu, ka naʻe ʻalu atu ʻa Mōsese ʻo ofi ki he konga ʻao fakapoʻulí ʻa ia naʻe ʻi ai ʻa e ʻOtua moʻoní.+

22 Naʻe folofola leva ʻa Sihova kia Mōsese: “Ko e meʻa eni te ke leaʻaki ki he kau ʻIsilelí, ‘Kuo mou mātā tonu naʻá ku lea hifo kiate kimoutolu mei he langí.+ 23 Kuo pau ke ʻoua naʻa mou ngaohi ha ngaahi ʻotua siliva ʻo fakauouaʻi ʻaki au, pea kuo pau ke ʻoua naʻa mou ngaohi ha ngaahi ʻotua koula maʻamoutolu.+ 24 Te ke ngaohi maʻaku ha ʻōlita kelekele, pea te ke feilaulauʻi ai hoʻo ngaahi feilaulau tutú, ko hoʻo ngaahi feilaulau feʻinasiʻakí,* ko hoʻo fanga sipí, mo hoʻo fanga pulú. ʻI he feituʻu kotoa pē ʻa ia ʻoku ou ʻai ke manatua ai ʻa hoku huafá+ te u hāʻele atu ai kiate koe pea te u tāpuakiʻi koe. 25 Kapau te ke ngaohi ha ʻōlita maka maʻaku, kuo pau ke ʻoua te ke faʻu ia ʻo ngāueʻaki ʻa e ngaahi maka kuo tongi ʻaki ha ngaahi meʻangāue.*+ He kapau te ke ngāueʻaki ki ai hoʻo tutuʻú, te ke taʻefakaʻapaʻapaʻi ai ia. 26 Pea kuo pau ke ʻoua naʻá ke kaka ʻi ha tuʻunga ki hoku ʻōlitá, ke ʻoua naʻa hā ai ho kupu ʻoku fakapulipuliʻí.’*

21 “Ko e ngaahi tuʻutuʻuni fakaefakamaau eni ke ke fakahoko kiate kinautolú:+

2 “Kapau te ke fakatau mai ha tamaioʻeiki Hepelū,+ te ne ngāue ko ha tamaioʻeiki ʻi he taʻu ʻe ono, ka ʻi he taʻu hono fitú, ʻe fakatauʻatāinaʻi ai ia ʻo ʻikai te ne totongi ha meʻa.+ 3 Kapau naʻá ne haʻu toko taha, te ne ʻalu atu toko taha. Kapau naʻá ne haʻu mo ha uaifi, kuo pau ke ʻalu leva ʻa hono uaifí mo ia. 4 Kapau ʻoku ʻoange ʻe hono pulé hano uaifi pea ʻokú ne fanauʻi kiate ia ha ngaahi foha pe ngaahi ʻofefine, ko e uaifí mo ʻene fānaú te nau hoko ko e meʻa ʻa e pule ʻo e uaifí, pea ʻe ʻalu atu toko taha pē ʻa e tangatá.+ 5 Ka ʻo kapau ʻe vilitaki ʻa e pōpulá ʻo pehē, ‘ʻOku ou ʻofa ʻi hoku pulé, ʻi hoku uaifí, mo hoku ngaahi fohá; ʻoku ʻikai te u loto ke fakatauʻatāinaʻi au,’+ 6 kuo pau ke ʻomai ia ʻe hono pulé ki he ʻao ʻo e ʻOtua moʻoní. Te ne ʻomai leva ia ki he matapaá pe ko e kaumatapaá, pea ʻe tui ʻe hono pulé ʻa hono telingá ʻaki ha meʻa-fakaava, pea te ne hoko ko ʻene tamaioʻeiki ʻi he kotoa ʻo ʻene moʻuí.

7 “Kapau ʻe fakatau atu ʻe ha tangata ʻa hono ʻofefiné ke hoko ko ha kaunanga, ʻe ʻikai te ne ʻalu atu tauʻatāina ʻi he founga tatau mo ia ʻoku hoko ki ha tamaioʻeikí. 8 Kapau ʻoku ʻikai leleiʻia ai ʻa hono pulé pea ʻoku ʻikai te ne vaheʻi ia ke hoko ko haʻane sinifu kae ʻai ke fakatau ia ʻe ha tokotaha kehe,* ʻe ʻikai te ne maʻu ʻa e totonu ke fakatau atu ia ki he kau mulí, he kuó ne lavakiʻi ia. 9 Kapau ʻokú ne fili ia maʻa hono fohá, te ne ʻoange kiate ia ʻa e ngaahi totonu ʻa ha ʻofefine. 10 Kapau ʻe mali ʻa e fohá* mo ha uaifi ʻe taha, ko e meʻakai, ko e vala, mo e totonu fakaemali+ ʻa e ʻuluaki uaifí ʻe ʻikai ke fakasiʻisiʻi ia. 11 Kapau ʻe ʻikai ʻoange ʻe he fohá* ʻa e meʻa ʻe tolu ko ení ki he kaunangá, ʻoku ʻatā leva ia ke ne ʻalu ʻo ʻikai te ne totongi ha paʻanga.

12 “Ko ha taha pē ʻokú ne taaʻi ha tangata ʻo ne mate ai kuo pau ke tāmateʻi ia.+ 13 Ka ʻo kapau ʻokú ne fai ia ʻi he fāinoa pea ʻoku tuku ia ʻe he ʻOtua moʻoní ke hoko, te u vaheʻi atu kiate koe ha feituʻu ʻa ia ʻe lava ke ne hola ki ai.+ 14 Kapau ʻoku hoko ha tangata ʻo ʻita lahi ʻi ha tokotaha peá ne tāmateʻi ʻosi fakakaukauʻi ia,+ kuo pau ke mate ʻa e tangatá neongo ʻa e pau ke ke ʻave ia mei hoku ʻōlitá.+ 15 Ko e tokotaha ʻokú ne taaʻi ʻa ʻene tamaí pe ko ʻene faʻeé kuo pau ke tāmateʻi ia.+

16 “Kapau ʻe puke fakamālohi ʻe ha taha ha tangata+ pea fakatau atu ia pe ʻoku maʻu atu ʻokú ne puke ia,+ kuo pau ke tāmateʻi ia.+

17 “Ko ha taha pē ʻokú ne talatukiʻi ʻa ʻene* tamaí pe ko ʻene faʻeé kuo pau ke tāmateʻi ia.+

18 “Ko e meʻa eni ʻoku totonu ke hokó kapau ʻoku kē ha ongo tangata pea ʻoku taaʻi ʻe he toko taha ʻa e tangata ʻe tahá ʻaki ha maka pe te ne tukiʻi* pea ʻoku ʻikai te ne mate ka ʻokú ne toka mohenga: 19 Kapau ʻoku malava ke ne tuʻu hake ʻo ne ʻalu takai holo ʻi tuʻa ʻo tokoniʻi ia ʻe hano tokotoko, ko e tokotaha leva naʻá ne taaʻi iá kuo pau ke ne ʻatā mei he tauteá. Te ne fai pē ha totongi huhuʻi ki he taimi naʻe mole ai mei he tangata laveá ʻa ʻene ngāué kae ʻoua kuó ne sai ʻaupito.

20 “Kapau ʻe taaʻi ʻe ha tangata ʻa ʻene tamaioʻeikí pe ko ʻene kaunangá ʻaki ha vaʻakau pea mate ʻa e tokotaha ko iá ʻi hono nimá, kuo pau ke fai ha sāuni maʻá e tokotaha ko iá.+ 21 Kae kehe, kapau ʻokú ne moʻui atu ʻi ha ʻaho ʻe taha pe ua, ʻe ʻikai ke fai ha sāuni maʻana, koeʻuhí ko ha tokotaha ia naʻe fakatauʻaki ʻa e paʻanga ʻa e tokotaha ʻoku ʻaʻana iá.

22 “Kapau ʻe fuhu ha ongo tangata peá na fakalaveaʻi ha fefine feitama ʻo ne fāʻele taʻehoko ai*+ ka ʻoku ʻikai hoko ai ha mate,* kuo pau ke totongi ʻe he tokotaha fakalaveá ʻa e ngaahi maumau ʻe hilifaki kiate ia ʻe he husepāniti ʻo e fefiné; pea kuo pau ke ne totongi ia ʻo fakatatau ki he tuʻutuʻuni ʻa e kau fakamāú.+ 23 Ka ʻo kapau ʻe hoko ai ha mate, kuo pau leva ke ke ʻoatu ʻa e moʻui ki he moʻui,+ 24 mata ki he mata, nifo ki he nifo, nima ki he nima, vaʻe ki he vaʻe,+ 25 tutu ki he tutu, kafo ki he kafo, mo e tā ki he tā.

26 “Kapau ʻe taaʻi ʻe ha tangata ʻa e mata ʻo ʻene tamaioʻeikí pe ko e mata ʻo ʻene kaunangá ʻo ne kui ai, te ne fakatauʻatāinaʻi ʻa e pōpula ko iá ko e totongi huhuʻi ki hono matá.+ 27 Pea kapau ʻokú ne tukiʻi ʻo tō ʻa e foʻi nifo ʻo ʻene tamaioʻeikí pe ko ʻene kaunangá, te ne fakatauʻatāinaʻi ʻa e pōpula ko iá ko e totongi huhuʻi ki hono foʻi nifó.

28 “Kapau ʻe tuiʻi ʻe ha pulu ha tangata pe ko ha fefine pea mate ʻa e tokotaha ko iá, kuo pau ke tolomakaʻi ʻa e pulú ke mate+ pea ʻe ʻikai ke kai ʻa hono kakanó; ka ko e tokotaha ʻoku ʻaʻana ʻa e pulú ʻe ʻatā ia mei he tauteá. 29 Ka ʻo kapau naʻe tōʻongaʻaki ʻe ha pulu ʻa hono tui ʻo e kakaí pea naʻe fai ha fakatokanga ki he tokotaha ʻoku ʻaʻaná ka naʻe ʻikai te ne tuku ke leʻohi ia peá ne tāmateʻi ha tangata pe ko ha fefine, ʻe tolomakaʻi ʻa e pulú pea ʻe toe tāmateʻi foki mo e tokotaha ʻoku ʻaʻaná. 30 Kapau ʻoku hilifaki kiate ia ha totongi huhuʻi,* kuo pau ke ne ʻoatu ʻa e meʻa kotoa ʻe hilifaki nai kiate iá ko e totongi huhuʻi ki heʻene moʻuí. 31 Tatau ai pē pe naʻá ne tuiʻi ha foha pe ko ha ʻofefine, ʻoku fiemaʻu ke fai ki he tokotaha ʻoku ʻaʻana ʻa e pulú ʻo fakatatau ki he tuʻutuʻuni fakaefakamaau ko ení. 32 Kapau naʻe tuiʻi ʻe he pulú ha tamaioʻeiki pe ko ha kaunanga, te ne totongi ʻa e mahuʻinga ko e sikeli* ʻe 30 ki he pule ʻo e tokotaha ko iá, pea ʻe tolomakaʻi ʻa e pulú ke mate.

33 “Kapau ʻe tangaki pe keli ʻe ha tangata ha luo pea ʻikai ke ʻufiʻufi ia pea tō ai ha pulu pe ko ha ʻasi, 34 ko e tokotaha ʻoku ʻaʻana ʻa e luó te ne fai ha totongi huhuʻi.+ Te ne totongi ʻa e mahuʻingá ki he tokotaha ʻoku ʻaʻaná, pea te ne maʻu ʻa e monumanu kuo maté. 35 Kapau ʻe fakalaveaʻi ʻe ha pulu ʻa ha tangata ha pulu ʻa ha taha pea mate ia, kuo pau leva ke na fakatau atu ʻa e pulu moʻuí ʻo vahevahe ʻa e totongi naʻe maʻu mei aí; te na toe vahevahe foki mo e monumanu kuo maté. 36 Pe kapau naʻe ʻilolahia naʻe tōʻongaʻaki ʻe ha pulu ʻa hono tui ʻo e kakaí ka ko e tokotaha ʻoku ʻaʻaná naʻe ʻikai te ne tuku ke leʻohi ia, kuo pau ke ne fai ha totongi huhuʻi ko e pulu ki he pulu, pea te ne maʻu ʻa e pulu kuo maté.

22 “Kapau ʻe kaihaʻasi ʻe ha tangata ha pulu pe ko ha sipi peá ne tāmateʻi pe fakatau atu ia, te ne totongi huhuʻi ia ʻaki ʻa e pulu ʻe nima ki he pulú pea ko e sipi ʻe fā ki he sipí.+

2 (“Kapau ʻe maʻu ha tokotaha kaihaʻa+ ʻokú ne hae ha fale pea ʻoku taaʻi ia ʻo ne mate, ʻoku ʻikai ʻi ai ha halaia ʻi he totó ʻi he fekauʻaki mo ʻene maté. 3 Ka ʻo kapau ʻoku hoko ia ʻi he hili ʻa e hopo ʻa e laʻaá, ʻoku ʻi ai ha halaia ʻi he totó ʻi he fekauʻaki mo ʻene maté.)

“Kuo pau ke fai ʻe he tokotaha kaihaʻá ha totongi huhuʻi. Kapau ʻoku ʻikai haʻane meʻa, kuo pau leva ke fakatau atu ia koeʻuhi ko e ngaahi meʻa naʻá ne kaihaʻasí. 4 Kapau ko e meʻa naʻá ne kaihaʻasí ʻoku maʻu atu ia kiate ia ʻoku kei moʻui, pe ko ha pulu pe ko ha ʻasi pe ko ha sipi, te ne fai ha totongi huhuʻi ʻo liunga ua.

5 “Kapau ʻe tuku atu ʻe ha taha ʻene fanga manú ke nau kaikai ʻi ha ngoue pe ko ha ngoue kālepi pea tuku pē kinautolu ke nau kaikai ʻi he ngoue ʻa ha taha kehe, te ne fai ha totongi huhuʻi ʻaki ʻa e lelei taha ʻo ʻene ngoue ʻaʻaná pe ʻaki ʻa e lelei taha ʻo ʻene ngoue kālepi ʻaʻaná.

6 “Kapau ʻe tupu ha afi ʻo mafola atu ki he ngaahi ʻakau talatalá peá ne keina ʻa e ngaahi haʻinga uité pe uite ʻoku teʻeki tuʻusí pe ko ha ngoue, ko e tokotaha naʻá ne fakatupunga ʻa e velá kuo pau ke ne fai ha totongi huhuʻi ki he meʻa naʻe velá.

7 “Kapau ʻe ʻoange ʻe ha tangata ki ha tangata ʻe taha ha paʻanga pe ko ha ngaahi meʻa ke ne tauhi pea kaihaʻasi ʻa e ngaahi meʻá ni mei he fale ʻo e tangata ʻe tahá, kapau ʻe maʻu ʻa e tokotaha kaihaʻá, kuo pau ke ne fai ha totongi huhuʻi ʻo liunga ua.+ 8 Kapau ʻe ʻikai maʻu ʻa e tokotaha kaihaʻá, ko e tokotaha ʻoku ʻoʻona ʻa e falé kuo pau ke ʻomi ia ki he ʻao ʻo e ʻOtua moʻoní+ koeʻuhi ke fakapapauʻi pe naʻá ne ala ki he ngaahi koloa ʻa e tangata ʻe tahá. 9 ʻI he ngaahi tuʻunga kotoa pē ʻo hono maʻu taʻefakalao ʻo ha ngaahi koloa, ʻi he fekauʻaki mo ha pulu, ko ha ʻasi, ko ha sipi, ko ha kofu, pe ko ha meʻa pē naʻe mole ʻa ia naʻe pehē ʻe he tokotaha ʻe tahá, ‘Ko e meʻa ʻeni ia ʻaʻaku!’ Ko e ongo meʻá fakatouʻosi te na ʻomi ʻa e meʻa naʻe hokó ki he ʻao ʻo e ʻOtua moʻoní.+ Ko e tokotaha ʻa ia ʻe fakahaaʻi ʻe he ʻOtuá ʻoku halaiá te ne fai ha totongi huhuʻi ʻo liunga ua ki he tangata ʻe tahá.+

10 “Kapau ʻe ʻoange ʻe ha tangata ki ha tangata ʻe taha ha ʻasi pe ko ha pulu pe ko ha sipi pe ko ha faʻahinga manu lalata pē ke ne tauhi pea mate ia pe kafo pe ʻave ʻo ʻikai ke sio ki ai ha taha, 11 ʻoku totonu ke fai ha fuakava ʻi hona vahaʻá ʻi he ʻao ʻo Sihová, ʻo pehē naʻe ʻikai te ne ala ki he ngaahi koloa ʻa e tangata ʻe tahá; pea kuo pau ke tali ia ʻe he tokotaha ʻoku ʻaʻaná. Ko e tangata ʻe tahá ʻe ʻikai te ne fai ha totongi huhuʻi.+ 12 Ka ʻo kapau kuo kaihaʻasi ʻa e monumanú meiate ia, te ne fai ha totongi huhuʻi ki he tokotaha ʻoku ʻaʻaná. 13 Kapau naʻe hae ia ʻe ha manu kaivao, te ne ʻomi ia ko ha fakamoʻoni. Heʻikai te ne fai ha totongi huhuʻi ki ha meʻa kuo hae ʻe ha manu kaivao.

14 “Ka ʻo kapau ʻoku kole ʻe ha taha mei ha tangata ʻe taha ha manu ke ne ngāueʻaki, pea hoko ia ʻo kafo pe mate lolotonga ʻoku ʻikai ʻi ai ʻa e tokotaha ʻoku ʻaʻaná, ko e tangata naʻá ne kole iá kuo pau ke ne fai ha totongi huhuʻi. 15 Kapau ʻoku ʻi he tokotaha ʻoku ʻaʻaná ia, heʻikai te ne fai ha totongi huhuʻi. Kapau naʻe fai ha totongi ki ai, ko e paʻanga naʻe totongiʻakí ko e totongi huhuʻí ia.

16 “Pea kapau ʻoku fakataueleʻi ʻe ha tangata ha taʻahine kei nofo anga-maʻa ʻa ia ʻoku ʻikai ke fakamaʻu peá ne mohe* mo ia, kuo pau ke ne totongi ʻa e totongi ʻo e taʻahine malí ka ne hoko ko hono uaifi.+ 17 Kapau ʻoku fakafisi fakaʻaufuli ʻa ʻene tamaí ke ʻoatu ʻa e taʻahiné kiate ia, te ne totongi ʻa e paʻangá ʻi he mahuʻinga ʻo e totongi ʻo e taʻahine malí.

18 “Kuo pau ke ʻoua naʻá ke fakaʻatā ke moʻui ha fefine faimana.+

19 “Ko ha taha pē ʻoku mohe mo ha manu kuo pau moʻoni ke tāmateʻi ia.+

20 “ʻIlonga ʻa ia ʻe faifeilaulau ki ha toe ngaahi ʻotua pē kae ʻikai kia Sihova toko taha pē ʻe tāmateʻi ia.+

21 “Kuo pau ke ʻoua naʻá ke ngaohikoviʻi ha muli pe fakaaoao kiate ia,+ he naʻa mou hoko ko ha kau muli ʻi he fonua ko ʻIsipité.+

22 “Kuo pau ke ʻoua naʻa mou fakamamahiʻi ha uitou pē, pe ko ha kiʻi tama ʻoku tamai-mate.*+ 23 Kapau ʻe faifai ange peá ke fakamamahiʻi ia ʻo ne tangi ai kiate au, ko e moʻoni te u fanongo ki heʻene tangí;+ 24 pea ʻe kakaha ʻa ʻeku houhaú, pea te u tāmateʻi kimoutolu ʻaki ʻa e heletaá, pea ko homou ngaahi uaifí te nau hoko ko e kau uitou, pea ko hoʻomou fānaú te nau hoko ʻo tamai-mate.

25 “Kapau te ke tali ha nō paʻanga ʻa ha taha pē ʻoku masiva* ʻi hoku kakai, ha taha ʻoku nofo mo koe, kuo pau ke ʻoua naʻá ke fai ʻo hangē ko e kau tali nō kehé. Kuo pau ke ʻoua naʻa mou hilifaki kiate ia ha totongi tupu.+

26 “Kapau ʻokú ke puke ʻa e kofu ʻo ha tangata ʻe taha ko ha maluʻi ki ha nō,*+ te ke fakafoki ia kiate ia ʻi he tō pē ʻa e laʻaá. 27 He ko hono kafú pē ia, ko hono vala ke ʻufiʻufiʻaki hono sinó;* te ne tokoto hifo ʻaki ʻa e hā ke mohé?+ ʻI heʻene tangi kiate aú, te u fanongo moʻoni ki ai, he ʻoku ou manavaʻofa.*+

28 “Kuo pau ke ʻoua naʻá ke fai ha talatuki* ki he ʻOtuá+ pe fai ha talatuki ki ha ʻeiki* ʻi he lotolotonga ho kakaí.+

29 “Kuo pau ke ʻoua naʻá ke toumoua ke fai ha ngaahi foaki mei hoʻo fua kuo hulú pea mei he fonu mahuohua ʻo hoʻo ngaahi tataʻoʻangá.*+ Ko e ʻuluaki tama ʻi ho ngaahi fohá te ke foaki ia kiate au.+ 30 Ko e meʻa eni te ke fai ki hoʻo pulú mo hoʻo sipí:+ ʻI he hili hono fāʻeleʻí ʻe hokohoko atu ʻene ʻi heʻene faʻeé ʻi he ʻaho ʻe fitu. ʻI he ʻaho hono valú, te ke foaki ia kiate au.+

31 “ʻOku totonu ke mou fakamoʻoniʻi kimoutolu ko e kakai māʻoniʻoni kiate au,+ pea kuo pau ke ʻoua naʻa mou kai ʻa e kakano ʻo ha meʻa ʻi he vaó kuo hae ʻe ha manu kaivao.+ ʻOku totonu ke mou laku ia ki he fanga kulií.

23 “Kuo pau ke ʻoua naʻá ke fakamafola* ha ongoongo ʻa ia ʻoku ʻikai ke moʻoni.+ ʻOua ʻe kau fakataha mo ha tokotaha fulikivanu ʻaki ʻa e hoko ko ha tokotaha fakamoʻoni fakalotokovi.+ 2 Kuo pau ke ʻoua naʻá ke muimui ki he tokolahí ke fai ha kovi, pea kuo pau ke ʻoua naʻá ke pikoʻi ʻa e fakamaau totonú ʻaki hono fai ha fakamoʻoni ke kau ai mo e tokolahí.* 3 Kuo pau ke ke fakahāhā ʻa e taʻefilifilimānako ʻi he fakakikihi ʻa ha tokotaha masiva.+

4 “Kapau te ke ʻilo ʻa e pulu ʻa ho filí pe ko ʻene ʻasí ʻoku hē, kuo pau ke ke fakafoki ia kiate ia.+ 5 Kapau te ke sio ki he ʻasi ʻa ha taha ʻoku fehiʻa ʻiate koe kuó ne tō ʻo taʻomia ʻi heʻene utá, kuo pau ke ʻoua naʻá ke tukunoaʻi ia peá ke mavahe. Kuo pau ke ke tokoni kiate ia ke fakavetevete ʻa e manú.+

6 “ʻE ʻikai te ke pikoʻi ʻa hono fakamaau ʻo e tokotaha masiva ʻi ho lotolotongá ʻi hono fakamāuʻí.+

7 “ʻOua ʻe ʻi ai hao kaunga ki ha tukuakiʻi* loi, pea ʻoua naʻa tāmateʻi ʻa e tonuhiá mo e māʻoniʻoní, koeʻuhí ʻe ʻikai te u fakahaaʻi ʻoku māʻoniʻoni* ʻa e tokotaha fulikivanú.+

8 “Kuo pau ke ʻoua naʻá ke tali ha totongi fufū, he ko e totongi fufuú ʻoku fakakuihi ai ʻa e kau tangata ʻiloʻiló pea ʻe lava ke ne mioʻi ʻa e ngaahi lea ʻa e kau tangata māʻoniʻoní.+

9 “Kuo pau ke ʻoua naʻá ke fakaaoao ki ha muli. ʻOku mou ʻiloʻi ʻa e anga ʻo e ongoʻi ʻa ha muli, koeʻuhí naʻa mou hoko ko e kau nofo muli ʻi he fonua ko ʻIsipité.+

10 “Te ke tūtuuʻi ʻa e tenga ʻi ho kelekelé pea tānaki hono fuá ʻi he taʻu ʻe ono.+ 11 Ka ʻi he taʻu hono fitú ʻoku totonu ke ke tuku taʻengoueʻi ia mo fakavaoa ia, pea ko e masiva ʻi he lotolotonga ho kakaí te nau kai mei ai, pea ko e meʻa te nau fakatoé, ʻe kai ia ʻe he fanga manu kaivaó. Ko e meʻa ia ʻoku totonu ke ke fai ki hoʻo ngoue kālepí mo hoʻo ngoue ʻōlivé.

12 “Ko e ʻaho ʻe ono te ke fai ai hoʻo ngāué; ka ʻi he ʻaho hono fitú ʻe tuku ai ʻa hoʻo ngāué, koeʻuhí ke mālōlō hoʻo pulú mo hoʻo ʻasí pea ke fakaivifoʻou ai ʻa e tama ʻa hoʻo kaunangá pea mo e mulí.+

13 “Kuo pau ke mou tokanga ke fai ʻa e meʻa kotoa pē kuó u folofolaʻaki kiate kimoutolú,+ pea kuo pau ke ʻoua naʻa mou leaʻaki ʻa e hingoa ʻo e ngaahi ʻotua kehé; ʻoku ʻikai totonu ke ongona kinautolu mei ho loungutú.*+

14 “Tuʻo tolu ʻi he taʻu te ke fai ai ha kātoanga kiate au.+ 15 Te ke tauhi ʻa e Kātoanga ʻo e Mā Taʻelēvaní.+ Te ke kai mā taʻelēvani ʻi he ʻaho ʻe fitu, ʻo hangē tofu pē ko ʻeku tuʻutuʻuni kiate koé, ʻi he taimi kuo kotofa ki aí ʻi he māhina ko ʻĀpipí,*+ he ʻi he taimi ko iá naʻá ke haʻu ai mei ʻIsipite. ʻE ʻikai ha taha ʻe hā mola pē ʻi hoku ʻaó.+ 16 Pehē foki, te ke tauhi ʻa e Kātoanga ʻo e Utu-Taʻu* ʻo e ʻuluaki fua kuo motuʻa ʻo hoʻo ngāué, ʻa e meʻa kuó ke tūtuuʻi ʻi he ngoué;+ pea mo e Kātoanga ʻo e Tānakí* ʻi he ngataʻanga ʻo e taʻú, ʻi he taimi te ke tānaki mai ai mei he ngoué ʻa e ngaahi ola ʻo hoʻo ngāué.+ 17 Tuʻo tolu ʻi he taʻu ʻe hā ai ʻa hoʻo kakai tangatá kotoa ʻi he ʻao ʻo e ʻEiki moʻoní, ʻa Sihova.+

18 “Kuo pau ke ʻoua naʻá ke foaki ʻa e toto ʻo e feilaulau kiate aú fakataha mo ha meʻa pē kuo fakalēvani. Pea ko e ngaahi feilaulau ʻo e ngako ʻoku foaki atu ʻi heʻeku ngaahi kātoangá ʻe ʻikai ke tuku ia ʻi he pō ko iá ʻo aʻu ki he pongipongí.

19 “Te ke ʻomai ʻa e lelei taha ʻo e ʻuluaki fua kuo motuʻa ʻi ho kelekelé ki he fale ʻo Sihova ko ho ʻOtuá.+

“Kuo pau ke ʻoua naʻá ke haka ha kiʻi kosi ʻi he huʻahuhu ʻo ʻene faʻeé.+

20 “ʻOku ou fekauʻi atu ha ʻāngelo ke muʻomuʻa ʻiate koe+ ke leʻohi koe ʻi he halá pea ke ʻomi koe ki he feituʻu kuó u teuteú.+ 21 Tokanga kiate ia pea talangofua ki hono leʻó. ʻOua ʻe angatuʻu kiate ia, koeʻuhi ʻe ʻikai te ne fakamolemoleʻi hoʻomou ngaahi laka halá,+ he ʻoku ʻiate ia ʻa hoku huafá. 22 Kae kehe, kapau te ke mātuʻaki talangofua ki hono leʻó pea fai ʻa e meʻa kotoa ʻoku ou folofolaʻakí, te u fakahāhā ʻa e fakafili ki ho ngaahi filí pea faitau mo kinautolu ʻoku fakafetau kiate koé. 23 He ko ʻeku ʻāngeló ʻe ʻalu muʻomuʻa ʻiate koe pea te ne ʻomi koe ki he kau ʻĀmolí, ko e kau Hetí, ko e kau Pēlisí, ko e kau Kēnaní, ko e kau Heví, mo e kau Siepusí, pea te u fakaʻauhamālie kinautolu.+ 24 Kuo pau ke ʻoua naʻá ke punou ki honau ngaahi ʻotuá pe hoko ʻo fakalotoʻi ke tauhi kiate kinautolu, pea kuo pau ke ʻoua naʻá ke faʻifaʻitaki ki heʻenau ngaahi tōʻongá.+ ʻI hono kehé, kuo pau ke ke holoki kinautolu mo haveki ʻenau ngaahi pou maka toputapú.+ 25 Kuo pau ke mou tauhi ʻa Sihova ko homou ʻOtuá,+ pea te ne tāpuakiʻi hoʻo maá mo hoʻo vaí.+ Te u toʻo ʻa e mahamahakí mei ho lotolotongá.+ 26 Ko e kakai fefine ʻi ho fonuá ʻe ʻikai te nau tamatō pe paʻa,+ pea te u ʻai ke kakato ʻa e lōloa ʻo hoʻo moʻuí.*

27 “Te u tuku atu ʻa hoku manavahēʻiá ke muʻomuʻa ʻiate koe,+ pea te u fakapuputuʻu ʻa e kakai kotoa te ke fetaulaki mo iá, pea te u ʻai ʻa e kotoa ho ngaahi filí ke nau hola meiate koe ʻi he ʻulungia.*+ 28 Te u tuku atu ʻa e ongoʻi ʻo e loto-foʻi* ke muʻomuʻa ʻiate koe,+ pea te ne kapusi ʻa e kau Heví, ko e kau Kēnaní, mo e kau Hetí mei ho ʻaó.+ 29 ʻE ʻikai te u kapusi kinautolu mei ho ʻaó ʻi he taʻu pē ʻe taha, koeʻuhí ke ʻoua naʻa hoko ʻa e fonuá ʻo maomaonganoa pea tupu ai ʻo tokolahi ʻa e fanga manu kaivaó kiate koe.+ 30 Te u kapusi kinautolu mei ho ʻaó ʻo fakakongokonga, kae ʻoua kuó ke hoko ʻo tokolahi peá ke maʻu ʻa e fonuá.+

31 “Te u fokotuʻu ho ngatangataʻangá mei he Tahi Kulokulá ki he tahi ʻo e kau Filisitiá pea mei he toafá ki he Vaitafé;*+ he te u foaki ʻa e kakai ʻo e fonuá ki homou nimá, pea te ke kapusi kinautolu mei ho ʻaó.+ 32 Kuo pau ke ʻoua naʻá ke fai ha fuakava mo kinautolu, pe ko honau ngaahi ʻotuá.+ 33 ʻOku ʻikai totonu ke nau nofo ʻi ho fonuá, koeʻuhi ke ʻoua naʻa nau ʻai koe ke ke faiangahala kiate au. Kapau te ke tauhi honau ngaahi ʻotuá, ʻe hoko moʻoni ia ko ha tauhele kiate koe.”+

24 Naʻá ne folofola leva kia Mōsese: “ʻAlu hake kia Sihova, ʻa koe mo ʻĒlone, Nātapi mo ʻĀpiu,+ pea mo e toko 70 ʻo e kau mātuʻa ʻo ʻIsilelí, pea mou punou hifo mei he mamaʻó. 2 Ko Mōsese te ne fakaofiofi kia Sihova ʻiate ia pē; ka heʻikai totonu ke fakaofiofi mai ʻa e niʻihi kehé, pea heʻikai totonu ke ʻalu hake ʻa e kakaí fakataha mo ia.”+

3 Naʻe haʻu leva ʻa Mōsese ʻo ne fakamatala ki he kakaí ʻa e ngaahi folofola kotoa pē ʻa Sihová pea mo e ngaahi tuʻutuʻuni fakaefakamāú kotoa,+ pea naʻe tali leʻo-taha ʻa e kakaí kotoa: “Ko e kotoa ʻo e ngaahi foʻi folofola ʻa Sihova kuó ne folofolaʻakí ʻoku mau loto-lelei ke fai.”+ 4 Ko ia naʻe hiki ʻe Mōsese ʻa e ngaahi foʻi folofola kotoa pē ʻa Sihová.+ Naʻá ne tuʻu pongipongia hake leva ʻo ne fokotuʻu ʻi he veʻe moʻungá ha ʻōlita mo ha ngaahi pou ʻe 12 ʻo fehoanaki mo e ngaahi matakali ʻe 12 ʻo ʻIsilelí. 5 ʻI he hili iá, naʻá ne fekauʻi atu ha kau talavou ʻIsileli pea naʻa nau foaki ha ngaahi feilaulau tutu mo feilaulauʻi ha fanga pulu tangata kia Sihova ko ha ngaahi feilaulau feʻinasiʻaki.+ 6 Naʻe toʻo leva ʻe Mōsese ʻa e vaeua ʻo e totó ʻo ne ʻai ia ki ha ngaahi poulu, pea ko e vaeua ʻo e totó naʻá ne afuhi ia ʻi he funga ʻōlitá. 7 Naʻá ne toʻo leva ʻa e tohi ʻo e fuakavá* ʻo ne lau leʻo-lahi ia ki he kakaí.+ Pea naʻa nau pehē ange: “Ko e meʻa kotoa kuo folofolaʻaki ʻe Sihová ʻoku mau loto-lelei ke fai, pea te mau talangofua ki ai.”+ 8 Ko ia naʻe toʻo ʻe Mōsese ʻa e totó ʻo ne afuhi ia ʻi he kakaí+ peá ne pehē: “Ko e toto eni ʻo e fuakava kuo fai ʻe Sihova mo kimoutolu ʻi he fehoanaki mo e ngaahi folofola kotoa ko ení.”+

9 Ko Mōsese mo ʻĒlone, Nātapi mo ʻĀpiu, pea mo e toko 70 ʻo e kau mātuʻa ʻo ʻIsilelí naʻa nau ʻalu hake, 10 pea naʻa nau mamata ki he ʻOtua ʻo ʻIsilelí.+ ʻI hono lalo vaʻé naʻe ʻi ai ha meʻa naʻe hā ngalingali ko ha ʻaluʻanga sāfaia pea naʻe maʻa ia ʻo hangē tofu pē ko e langí.+ 11 Naʻe ʻikai te ne fai ha meʻa ki he kau tangata tuʻu-ki-muʻa ʻo ʻIsilelí,+ pea naʻa nau mamata ʻi ha vīsone ki he ʻOtua moʻoní pea naʻa nau kai mo inu.

12 Naʻe folofola ange leva ʻa Sihova kia Mōsese: “ʻAlu hake kiate au ʻi he moʻungá peá ke nofo ai. Te u ʻoatu kiate koe ʻa e ongo lauʻimaka ʻoku ʻi ai ʻa e lao mo e fekau ʻa ia te u hiki ai ko honau fakahinohino.”+ 13 Ko ia naʻe tuʻu hake ʻa Mōsese mo hono tauhi ko Siosiuá+ pea naʻe ʻalu hake ʻa Mōsese ki he moʻunga ʻo e ʻOtua moʻoní.+ 14 Ka naʻá ne pehē ki he kau mātuʻá: “Tatali heni kiate kimaua kae ʻoua ke ma foki mai kiate kimoutolu.+ ʻOku ʻiate kimoutolu ʻa ʻĒlone mo Hua.+ ʻIlonga ha taha ʻoku ʻi ai haʻane meʻa ke fakamāuʻi ke ne ʻalu kiate kinaua.”+ 15 Naʻe ʻalu hake leva ʻa Mōsese ki he moʻungá lolotonga ia naʻe ʻufiʻufi ʻa e moʻungá ʻe he ʻaó.+

16 Naʻe nofo ai pē ʻi he Moʻunga Sainaí+ ʻa e lāngilangi ʻo Sihová,+ pea naʻe ʻufiʻufi ia ʻe he ʻaó ʻi he ʻaho ʻe ono. ʻI he ʻaho hono fitú naʻá ne ui mai ai kia Mōsese mei he loto ʻaó. 17 Ki he kau ʻIsileli ko ia naʻe mamatá, ko e hā mai ʻo e lāngilangi ʻo Sihová naʻe hangē ia ha afi fakaʻauha ʻi he tumutumu ʻo e moʻungá. 18 Naʻe hū atu leva ʻa Mōsese ki he loto ʻaó ʻo ne ʻalu hake ki he moʻungá.+ Pea naʻe nofo ʻa Mōsese ʻi he moʻungá ʻi he ʻaho ʻe 40 mo e pō ʻe 40.+

25 Naʻe folofola leva ʻa Sihova kia Mōsese: 2 “Tala ki he kakai ʻIsilelí ke nau vaheʻi ha meʻaʻofa maʻaku; te mou tānaki ʻa e meʻaʻofa kiate aú+ mei he tokotaha kotoa pē ʻa ia ʻoku ueʻi ia ʻe hono lotó. 3 Ko e meʻaʻofa eni te mou tali meiate kinautolú: Ko e koula,+ siliva,+ kopa,+ 4 filo pulū, filo fulufuluʻisipi vāleti, filo kula ʻahoʻaho, līneni lelei, fulufuluʻikosi, 5 kiliʻisipi tangata kuo fakalanu kulokula, kiliʻisila, papa sitimi,+ 6 lolo ki he ngaahi māmá,+ paʻame* ki he lolo paní*+ pea ki he ʻinisēnisi namu-kakalá,+ 7 mo e ngaahi maka ʻōnike mo e ngaahi maka kehe ke fokotuʻu ʻi he ʻēfotí*+ pea mo e sifa-fatafatá.+ 8 Te nau ngaohi maʻaku ha feituʻu toputapu, pea te u ʻafio* ʻi honau lotolotongá.+ 9 Te mou ngaohi ia, ʻa e tāpanekalé mo hono ngaahi naunaú kotoa, ʻo muimui pau pē ʻi he sīpinga ʻoku ou fakahaaʻi atu kiate koé.+

10 “Te nau ngaohi ha ʻaʻake* mei he papa sitimí, ko e kiupite* ʻe ua mo e konga hono lōloá pea kiupite ʻe taha mo e konga hono fālahí pea kiupite ʻe taha mo e konga hono māʻolungá.+ 11 Te ke kofuʻaki leva ia ʻa e koula haohaoa.+ Te ke kofu ia ʻi loto mo tuʻa, pea te ke fakatapa* koula takatakai kotoa ia.+ 12 Pea te ke haka ha kavei fuopotopoto koula ʻe fā ki ai pea fakamaʻu ia ʻi ʻolunga hake ʻi hono vaʻe ʻe faá, ʻa ia ko e kavei fuopotopoto ʻe ua ʻi he tafaʻaki ʻe taha mo e kavei fuopotopoto ʻe ua ʻi he tafaʻaki ʻe tahá. 13 Pea te ke ngaohi ha ongo vaʻakau mei he papa sitimí pea kofuʻaki ia ʻa e koula.+ 14 Te ke tui ʻa e ongo vaʻakaú ʻi he ngaahi kavei fuopotopoto ʻi he ongo tafaʻaki ʻo e ʻAʻaké koeʻuhi ke fuaʻaki ʻa e ʻAʻaké. 15 ʻE tuku maʻu ʻa e ongo vaʻakaú ʻi he ngaahi kavei fuopotopoto ʻo e ʻAʻaké; heʻikai ke toʻo kinaua mei ai.+ 16 Te ke tuku ʻi he ʻAʻaké ʻa e ongo lauʻimaka ʻoku hiki ai ʻa e Fakamoʻoni ʻa ia te u ʻoatu kiate koé.+

17 “Te ke ngaohi ha tāpuni ʻaki ʻa e koula haohaoa, ʻoku kiupite ʻe ua mo e konga hono lōloá pea kiupite ʻe taha mo e konga hono fālahí.+ 18 Te ke ngaohi ha selupimi koula ʻe ua; te ke ngaohiʻaki kinaua ʻa e koula kuo tuki ʻi he ongo ngataʻanga ʻo e tāpuní.+ 19 Ngaohi ʻa e ongo selupimí ʻi he ongo ngataʻangá, ko e selupimi ʻe taha ʻi he ngataʻanga taki taha ʻo e tāpuní. 20 Ko e ongo selupimí ʻe mafola atu ʻa hona kapakaú ʻi ʻolunga, ʻo fakamalumalu ʻa e tāpuní ʻaki hona ongo kapakaú,+ pea te na fehāngaaki. Ko e mata ʻo e ongo selupimí ʻe hanga ia ki he tāpuní. 21 Te ke fokotuʻu ʻa e tāpuní+ ki he ʻAʻaké, pea te ke tuku ʻi he ʻAʻaké ʻa e ongo lauʻimaka ʻoku hiki ai ʻa e Fakamoʻoni ʻa ia te u ʻoatu kiate koé. 22 Te u fakahaaʻi tonu atu au kiate koe ʻi ai pea te u folofola kiate koe mei ʻolunga ʻi he tāpuní.+ Mei he vahaʻa ʻo e ongo selupimi ʻoku ʻi he ʻaʻake ʻo e Fakamoʻoní,* te u ʻai ai ke ke ʻiloʻi ʻa e meʻa kotoa te u tuʻutuʻuni atu kiate koe maʻá e kau ʻIsilelí.

23 “Te ke ngaohi foki ha tēpile+ mei he papa sitimí, ʻoku kiupite ʻe ua hono lōloá pea kiupite ʻe taha hono fālahí pea kiupite ʻe taha mo e konga hono māʻolungá.+ 24 Te ke kofuʻaki ia ʻa e koula haohaoa pea fakatapa* koula takatakai ia. 25 Te ke ngaohi hano kofu takatakai ai ko hono fālahí ko e laulahi ʻo e lauʻinimá,* mo ha fakatapa* koula takatakai ʻi he kofú. 26 Te ke ngaohi ki ai ha ngaahi kavei fuopotopoto koula ʻe fā pea fokotuʻu ʻa e ngaahi kavei fuopotopotó ʻi he tuliki ʻe fā ko ia ʻoku fakamaʻu ki ai ʻa e ngaahi vaʻe ʻe faá. 27 ʻE ofi ʻa e ngaahi kavei fuopotopotó ki he kofú ke tui ai ʻa e ongo vaʻakaú ʻi hono fua ʻa e tēpilé. 28 Te ke ngaohi ʻa e ongo vaʻakaú mei he papa sitimi pea kofuʻaki ia ʻa e koula pea fuaʻaki ia ʻa e tēpilé.

29 “Te ke ngaohi foki ʻa hono ngaahi tisi, ko hono ngaahi ipu, mo hono ngaahi sioki mo e ngaahi poulu ʻa ia te nau lingi ʻaki ʻa e ngaahi feilaulau inú. Te ke ngaohi ia ʻaki ʻa e koula haohaoa.+ 30 Pea te ke tuku ʻi he tēpilé ʻa e mā foakí ʻi hoku ʻaó maʻu ai pē.+

31 “Te ke ngaohi ha tuʻunga-maama+ mei he koula haohaoa. Ko e tuʻunga-māmá ʻe ngaohiʻaki ia ʻa e koula kuo tuki. Ko hono meʻa-tuʻú, ko hono sinó, ko hono ngaahi vaʻá, ko hono ngaahi matalá, ko hono ngaahi motó, mo hono ngaahi lauʻimatalá te nau sino taha pē.+ 32 Pea ʻe haʻu ʻa e vaʻa ʻe ono mei he ongo tafaʻaki ʻo e tuʻunga-māmá, ko e vaʻa ʻe tolu mei he tafaʻaki ʻe taha pea ko e vaʻa ʻe tolu mei he tafaʻaki ʻe tahá. 33 Ko e matala ʻe tolu ʻa ia ʻoku hangē hono fuó ko e matalaʻi ʻalimoní ʻe ʻi he vaʻa ʻe taha, ʻo fakavahavaha ʻaki ʻa e motó mo e lauʻimatalá, pea ko e matala ʻe tolu ʻa ia ʻoku hangē hono fuó ko e matalaʻi ʻalimoní ʻe ʻi he vaʻa ia ʻe tahá, ʻo fakavahavaha ʻaki ʻa e motó mo e lauʻimatalá. Ko e anga eni ʻo e haʻu ʻa e vaʻa ʻe onó mei he sino ʻo e tuʻunga-māmá. 34 ʻE ʻi he sino ʻo e tuʻunga-māmá ʻa e matala ʻe fā ʻa ia ʻoku hangē hono fuó ko e matalaʻi ʻalimoní, ʻo fakavahavaha ʻaki ʻa hono motó mo hono lauʻimatalá. 35 ʻE ʻi ai ha moto ʻi lalo ʻi he ʻuluaki ongo vaʻa ʻoku haʻu mei he sinó mo ha moto ʻi lalo ʻi he ongo vaʻa hono hokó mo ha moto ʻi lalo ʻi he ongo vaʻa hono hokó, ki he vaʻa ʻe ono ʻoku haʻu mei he sinó. 36 Ko e ngaahi motó mo e ngaahi vaʻá mo e tuʻunga-māmá kakato ʻe ngaohi ia mei he konga koula haohaoa pē ʻe taha kuo tuki.+ 37 Te ke ngaohi ki ai ha maama ʻe fitu, pea ʻi he taimi ʻe tutu ai ʻa e ngaahi māmá, te nau ulo ʻi he feituʻu ʻi muʻa aí.+ 38 Ko hono ngaahi tongí mo hono ngaahi tānakiʻanga ʻo e vavae maama ʻosiʻosí ke ʻi he koula haohaoa.+ 39 ʻOku totonu ke ngaohi ia, fakataha mo e ngaahi naunau ko ení, mei ha talēniti* ʻo e koula haohaoa. 40 Fakapapauʻi ke ke ngaohi ia ʻo fakatatau ki honau sīpinga ʻa ia naʻe fakahaaʻi atu kiate koe ʻi he moʻungá.+

26 “Te ke ngaohi ʻa e tāpanekalé+ ʻaki ʻa e tupenu tēniti ʻe hongofulu ʻo e līneni lelei kuo vilohi hono filó, filo pulū, filo fulufuluʻisipi vāleti, mo e filo kula ʻahoʻaho. Te ke ngaohi ia ʻo tui ki ai ʻa e ngaahi fakatātā+ ʻo e selupimi.+ 2 Ko e tupenu tēniti taki taha ʻe kiupite* ʻe 28 hono lōloá pea kiupite ʻe 4 hono fālahí. Ko e ngaahi tupenu tēnití kotoa te nau lahi tatau.+ 3 Ko e tupenu tēniti ʻe nima ʻe hokoʻi fakataha ke maʻu ai ha konga ʻe taha, pea ko e tupenu tēniti ʻe nima kehé ʻe hokoʻi fakataha ia ki ha konga ʻe taha. 4 Te ke ngaohi ha ngaahi noʻo fakafuopotopoto ʻo e afo pulū ʻi he tapa ʻo e tupenu tēniti ʻe taha ʻi he ngataʻanga ʻo e konga ʻe tahá, pea te ke fai ʻa e meʻa tatau ki he tapa taupotu ki tuʻa ʻo e konga ʻe tahá ʻi he feituʻu ʻa ia ʻe hokoʻi aí. 5 Te ke ngaohi ʻa e noʻo fakafuopotopoto ʻe 50 ʻi he tupenu tēniti ʻe tahá mo e noʻo fakafuopotopoto ʻe 50 ʻi he tapa ʻo e tupenu tēniti ʻe tahá koeʻuhí ke nau tuʻu fehāngaaki ʻi he feituʻu ko ia ʻe hokoʻi aí. 6 Te ke ngaohi ʻa e meʻa-fakamaʻu koula ʻe 50 pea hokoʻi fakataha ʻa e ongo tupenu tēnití ʻaki ʻa e ngaahi meʻa-fakamaʻú, pea ʻe hoko ai ko e tāpanekale ʻe taha.+

7 “Te ke ngaohi foki ʻa e ngaahi tupenu fulufuluʻikosi+ ki he ʻufiʻufi ʻi he funga tāpanekalé. Te ke ngaohi ʻa e tupenu tēniti ʻe 11.+ 8 Ko e tupenu tēniti taki taha ʻe kiupite ʻe 30 hono lōloá pea kiupite ʻe 4 hono fālahí. Ko e tupenu tēniti kotoa ʻe 11 te nau lahi tatau. 9 Te ke hokoʻi fakataha ʻa e tupenu tēniti ʻe nima pea hokoʻi fakataha ʻa e tupenu tēniti ʻe ono kehé, pea te ke ʻai ke tautau hifo ʻa e tupenu tēniti hono onó ʻi he muʻa tēnití. 10 Pea te ke ngaohi ʻa e noʻo fakafuopotopoto ʻe 50 ʻi he tapa ʻo e tupenu tēniti ʻe tahá, ʻa e tapa taupotu ki tuʻa ʻo e konga ʻe taha ko iá, mo e noʻo fakafuopotopoto ʻe 50 ʻi he tapa ʻo e tupenu tēniti ʻe tahá ʻi he feituʻu ko ia ʻe hokoʻi aí. 11 Te ke ngaohi ʻa e meʻa-fakamaʻu kopa ʻe 50 pea ʻai ʻa e meʻa-fakamaʻú ki he ngaahi noʻo fakafuopotopotó pea hokoʻi fakataha ʻa e tēnití, pea ʻe hoko ia ʻo taha. 12 Ko e konga ʻo e ngaahi tupenu tēnití ʻa ia ʻoku toé ʻe tuku fakatātāupe ia. Ko e vaeua ʻo e tupenu tēniti ko ia ʻoku toé ʻe tautau ia ʻi he konga ki mui ʻo e tāpanekalé. 13 Ko e toenga ʻo e ngaahi tupenu ʻo e tēnití ʻe tuku fakatātāupe ia ʻi he tāpanekalé ʻo kiupite ʻe taha ʻi he tafaʻaki taki taha, koeʻuhí ke ʻufiʻufiʻaki ia.

14 “Te ke ngaohi foki ha ʻufiʻufi ki he tēnití ʻaki ʻa e kiliʻisipi tangata kuo fakalanu kulokula pea ʻi ʻolunga aí ko ha ʻufiʻufi kiliʻisila.+

15 “Te ke ngaohi ʻa e ngaahi tokotuʻu tapafā lōloa+ mei he papa sitimí ki he tāpanekalé ʻo fokotuʻu ke tuʻu hangatonu.+ 16 Ko e tokotuʻu tapafā lōloa taki taha ʻe kiupite ʻe hongofulu hono māʻolungá pea kiupite ʻe taha mo e konga hono fālahí. 17 Ko e tokotuʻu tapafā lōloa taki taha ʻoku ʻi ai hono fakanifo* ʻe ua ʻokú na tuʻu ʻotu taha. Ko e founga ia ʻoku totonu ke ke ngaohiʻaki ʻa e ngaahi tokotuʻu tapafā lōloa kotoa pē ʻo e tāpanekalé. 18 Te ke ngaohi ʻa e tokotuʻu tapafā lōloa ʻe 20 ki he tafaʻaki fakatonga ʻo e tāpanekalé, ʻo hanga ki he tongá.

19 “Te ke ngaohi ʻa e tuʻuʻanga+ siliva ʻe 40 ke ʻi lalo ʻi he tokotuʻu tapafā lōloa ʻe 20, ko e tuʻuʻanga ʻe ua ʻe ʻi lalo ia ʻi he tokotuʻu tapafā lōloa ʻe taha ki hono ongo fakanifó mo e tuʻuʻanga ʻe ua ke ʻi lalo ʻi he tokotuʻu tapafā lōloa taki taha ʻoku hoko atu aí ki hono ongo fakanifó.+ 20 Ki he tafaʻaki ʻe taha ʻo e tāpanekalé, ʻa e tafaʻaki fakatokelaú, te ke ngaohi ki ai ha tokotuʻu tapafā lōloa ʻe 20 21 mo honau tuʻuʻanga siliva ʻe 40, ko e tuʻuʻanga ʻe ua ʻe ʻi lalo ʻi he tokotuʻu tapafā lōloa ʻe taha mo e tuʻuʻanga ʻe ua ʻe ʻi lalo ia ʻi he tokotuʻu tapafā lōloa taki taha ʻoku hoko atu aí. 22 Ki he konga ki mui ʻo e tāpanekalé ki he hihifó, te ke ngaohi ki ai ha tokotuʻu tapafā lōloa ʻe ono.+ 23 Te ke ngaohi ʻa e tokotuʻu tapafā lōloa ʻe ua ke na hoko ko e ongo pou tuliki ʻi mui ʻo e tāpanekalé. 24 Ko e ongo pou tulikí ʻoku totonu ke tokotuʻu ʻe ua mei lalo ki ʻolunga, ʻo aʻu ki he ʻuluaki kavei fuopotopotó. ʻOku totonu ke fai eni ki ai fakatouʻosi, pea te na hoko leva ai ko e ongo pou tuliki. 25 Pea ʻe ʻi ai ʻa e tokotuʻu tapafā lōloa ʻe valu mo honau tuʻuʻanga siliva ʻe 16, ko e tuʻuʻanga ʻe ua ʻe ʻi lalo ʻi he tokotuʻu tapafā lōloa ʻe taha mo e tuʻuʻanga ʻe ua ʻe ʻi lalo ia ʻi he tokotuʻu tapafā lōloa taki taha ʻoku hoko atu aí.

26 “Te ke ngaohi ha ngaahi vaʻakau mei he papa sitimí, ko e vaʻakau ʻe nima ki he ngaahi tokotuʻu tapafā lōloa ʻo e tafaʻaki ʻe taha ʻo e tāpanekalé,+ 27 mo e vaʻakau ʻe nima ki he tokotuʻu tapafā lōloa ʻo e tafaʻaki ʻe taha ʻo e tāpanekalé, mo e vaʻakau ʻe nima ki he tokotuʻu tapafā lōloa ʻo e tafaʻaki ʻo e tāpanekalé ki he hihifó, ʻa hono konga ki muí. 28 Ko e vaʻakau ʻi loto ʻa ia ʻoku lele ʻi loto-mālie ʻi he ngaahi tokotuʻu tapafā lōloá ʻoku totonu ke lele ia mei he ngataʻanga ʻe tahá ki he ngataʻanga ʻe tahá.

29 “Te ke kofuʻaki ʻa e tokotuʻu tapafā lōloá ʻa e koula,+ pea te ke ngaohi honau ngaahi kavei fuopotopotó ʻaki ʻa e koula ke tui ai ʻa e ngaahi vaʻakaú, pea te ke kofuʻaki ʻa e ngaahi vaʻakaú ʻa e koula. 30 Kuo pau ke ke fokotuʻu ʻa e tāpanekalé ʻo fakatatau ki hono palani naʻe fakahaaʻi atu kiate koe ʻi he moʻungá.+

31 “Te ke ngaohi ha puipui+ mei he filo pulū, filo fulufuluʻisipi vāleti, filo kula ʻahoʻaho, mo e līneni lelei kuo vilohi hono filó. ʻE ngaohi ia ʻo tui ki ai ʻa e fakatātā ʻo e ngaahi selupimi. 32 Te ke tautau ia ʻi he pou sitimi ʻe fā kuo kofuʻaki ʻa e koula. Ko honau ngaahi huká ʻe koula ia. Ko e ngaahi poú ʻe fokotuʻu ia ʻi he tuʻuʻanga siliva ʻe fā. 33 Te ke tautau ʻa e puipuí ʻi lalo he ngaahi meʻa-fakamaʻú pea ʻomi ki ai ʻa e ʻaʻake ʻo e Fakamoʻoní*+ ʻi loto ʻi he puipuí. Ko e puipuí te ne vaheʻi kiate kimoutolu ʻa e Potu Toputapú+ mei he Potu Fungani Toputapú.+ 34 Kuo pau ke ke ʻai ʻa e tāpuní ki he ʻaʻake ʻo e Fakamoʻoní ʻi he Potu Fungani Toputapú.

35 “Te ke fokotuʻu ʻa e tēpilé ʻi he tuʻa puipuí, fakataha mo e tuʻunga-māmá+ ʻoku tuʻu ʻo hanga ki he tēpilé ʻi he tafaʻaki fakatonga ʻo e tāpanekalé; pea ko e tēpilé te ke tuku ia ʻi he tafaʻaki fakatokelaú. 36 Te ke ngaohi ki he hūʻanga ʻo e tēnití ha puipui mei he filo pulū, filo fulufuluʻisipi vāleti, filo kula ʻahoʻaho, mo e līneni lelei kuo vilohi hono filó ʻo lalanga fakataha.+ 37 Te ke ngaohi ʻa e pou sitimi ʻe nima ki he puipuí pea kofuʻaki ia ʻa e koula. Ko honau ngaahi huká ʻe koula, pea te ke haka ki he ngaahi poú ha tuʻuʻanga kopa ʻe nima.

27 “Te ke ngaohi ʻa e ʻōlita ʻo e papa sitimi;+ ʻe kiupite* ʻe nima hono lōloá pea kiupite ʻe nima hono fālahí. Ko e ʻōlitá ʻoku totonu ke tapafā tatau ia pea kiupite ʻe tolu hono māʻolungá.+ 2 Te ke ngaohi ha ngaahi meʻatui+ ʻi hono ngaahi tuliki ʻe faá; ko e ngaahi meʻatuí ʻe hoko ko e konga ʻo e ʻōlitá, pea te ke kofu ʻa e ʻōlitá ʻaki ʻa e kopa.+ 3 Te ke ngaohi ha ngaahi kane ki hono fetuku ʻa hono efuefú,* fakataha mo e ngaahi sāvolo, ngaahi poulu, ngaahi fuʻu huhu, mo e ngaahi ʻaiʻanga malala, pea te ke ngaohi ʻa hono ngaahi naunaú kotoa mei he kopá.+ 4 Te ke ngaohi ha meʻa vangavanga ki he ʻōlitá, ko ha meʻa vangavanga kopa, pea ʻe ʻi he meʻa vangavangá ha ngaahi kavei fuopotopoto kopa ʻe fā ʻi hono ngaahi tuliki ʻe faá. 5 Te ke fokotuʻu ia ʻi lalo hifo ʻi he kofu ʻo e ʻōlitá, pea ʻe fokotuʻu ʻa e meʻa vangavangá ʻi he vaeuaʻanga ʻo e ʻōlitá. 6 Te ke ngaohi ha ongo vaʻakau ʻo e papa sitimi ki he ʻōlitá pea kofuʻaki ia ʻa e kopa. 7 ʻE fakahū ʻa e ongo vaʻakaú ki he kavei fuopotopotó koeʻuhí ke ʻi he ongo tafaʻaki ʻo e ʻōlitá ʻa e ongo vaʻakaú ʻi he taimi ʻe fua aí.+ 8 Te ke ngaohi ʻa e ʻōlitá ʻi he faʻunga ʻo ha puha papa ʻoku ava ʻi loto. ʻOku totonu ke ngaohi ia ʻo hangē tofu pē ko ia naʻá Ne fakahaaʻi atu kiate koe ʻi he moʻungá.+

9 “Te ke ngaohi ʻa e lotoʻā+ ʻo e tāpanekalé. Ko e tafaʻaki fakatonga ʻo e lotoʻaá, ʻo hanga ki he tongá, ʻe ʻi ai hono puipui ʻo e līneni lelei kuo vilohi hono filó, ko e kiupite ʻe 100 ʻa e lōloa ʻo e tafaʻaki ʻe taha.+ 10 ʻE ʻi ai hono pou ʻe 20 fakataha mo e tuʻuʻanga kopa ʻe 20. Ko e ngaahi huka ʻo e ngaahi poú mo honau ngaahi tautauʻangá* ʻe ngaohi ia mei he silivá. 11 Ko e puipui ki he tafaʻaki fakatokelaú ʻe kiupite foki ʻe 100 hono lōloá, fakataha mo hono ngaahi pou ʻe 20 mo honau ngaahi tuʻuʻanga kopa ʻe 20, mo e ngaahi huka mo e ngaahi tautauʻanga* siliva ki he ngaahi poú. 12 ʻE ʻi ai ʻa e puipui kiupite ʻe 50 ki he fālahi ʻo e lotoʻaá ʻi he tafaʻaki fakahihifó, fakataha mo e pou ʻe hongofulu mo e tuʻuʻanga ʻe hongofulu. 13 Ko e fālahi ʻo e lotoʻaá ʻi he tafaʻaki fakahahake ki he hopoʻanga laʻaá ʻe kiupite ʻe 50. 14 ʻE kiupite ʻe 15 ʻa e puipui ʻi he tafaʻaki ʻe taha, fakataha mo e pou ʻe tolu mo e tuʻuʻanga+ ʻe tolu. 15 Pea ki he tafaʻaki ʻe tahá ʻe kiupite ʻe 15 ʻa e puipuí, fakataha mo e pou ʻe tolu mo e tuʻuʻanga ʻe tolu.

16 “Ko e hūʻanga ʻo e lotoʻaá ʻoku totonu ke ʻi ai ha puipui kiupite ʻe 20 hono lōloá ko e ngaohi mei he filo pulū, filo fulufuluʻisipi vāleti, filo kula ʻahoʻaho, mo e līneni lelei kuo vilohi hono filó kuo lalanga fakataha,+ fakataha mo e ngaahi pou ʻe fā mo honau ngaahi tuʻuʻanga ʻe fā.+ 17 Ko e kotoa ʻo e ngaahi pou ʻokú ne takatakaiʻi ʻa e lotoʻaá ʻe ʻi ai hono ngaahi meʻa-fakamaʻu siliva mo hono ngaahi huka siliva, ka ko honau ngaahi tuʻuʻangá ʻe ngaohi ia mei he kopá.+ 18 Ko e lotoʻaá ʻe kiupite ʻe 100 hono lōloá,+ kiupite ʻe 50 hono fālahí, pea kiupite ʻe 5 hono māʻolungá, kuo ngaohi mei he līneni lelei kuo vilohi hono filó, pea ʻoku totonu ke ʻi ai hono ngaahi tuʻuʻanga kopa. 19 Ko e ngaahi naunau mo e ngaahi meʻa kotoa ʻe ngāueʻaki ʻi he ngāue ʻo e tāpanekalé, pea pehē ki hono ngaahi pine tēnití pea mo e pine kotoa ʻo e lotoʻaá, ʻe ngaohi ia mei he kopá.+

20 “Te ke fekauʻi ʻa e kau ʻIsilelí ke nau ʻomi kiate koe ʻa e lolo ʻōlive haohaoa kuo tuki ke ʻai ki he māmá, koeʻuhí ke tauhi ke ulo maʻu pē ʻa e ngaahi māmá.+ 21 ʻI he tēniti feʻiloakiʻangá, ʻi he tuʻa puipui ʻoku ofi ki he ʻaʻake ʻo e Fakamoʻoní,*+ ʻe fokotuʻutuʻu ai ʻe ʻĒlone mo hono ngaahi fohá ke tauhi ʻa e ngaahi māmá ke ulo mei he efiafí ʻo aʻu ki he pongipongí ʻi he ʻao ʻo Sihová.+ Ko ha tuʻutuʻuni taʻengata ia ki honau ngaahi toʻutangatá kotoa, ke fakahoko ʻe he kau ʻIsilelí.+

28 “Te ke fekau ke haʻu mei he kau ʻIsilelí ho tokoua ko ʻĒloné, fakataha mo hono ngaahi fohá, koeʻuhí ke ne ngāue ko ha taulaʻeiki kiate au+—ko ʻĒlone,+ fakataha mo Nātapi mo ʻĀpiu,+ ʻEliesa mo ʻĪtama,+ ʻa e ngaahi foha ʻo ʻĒloné.+ 2 Te ke ngaohi ha ngaahi kofu toputapu moʻo ʻĒlone ko ho tokouá, ke lāngilangiʻia ai mo fakaʻofoʻofa.+ 3 Te ke lea ki he faʻahinga kotoa ʻoku pōtoʻí,* ʻa kinautolu kuó u fakafonuʻaki ʻa e laumālie ʻo e potó,+ pea te nau ngaohi ʻa e ngaahi kofu ʻo ʻĒloné ki hono fakamāʻoniʻoniʻí, koeʻuhí ke ne ngāue ai ko e taulaʻeiki kiate au.

4 “Ko e ngaahi meʻa eni te nau ngaohí: Ko ha sifa-fatafata,+ ko ha ʻēfoti,+ ko ha kofu taʻenima,+ ko ha kofu tōtōlofa pule-veimau, ko ha faʻufaʻu makehe,+ pea mo ha noʻo;+ te nau ngaohi ʻa e ngaahi meʻa toputapu ko ení moʻo ʻĒlone ko ho tokouá mo hono ngaahi fohá, koeʻuhí ke ne ngāue ko e taulaʻeiki kiate au. 5 ʻE ngāueʻaki ʻe he kau ngāue pōtoʻí ʻa e koula, ko e filo pulū, ko e filo fulufuluʻisipi vāleti, ko e filo kula ʻahoʻaho, pea mo e līneni lelei.

6 “Te nau ngaohi ʻa e ʻēfotí mei he koula, filo pulū, filo fulufuluʻisipi vāleti, filo kula ʻahoʻaho, mo e līneni lelei kuo vilohi hono filó, pea ʻoku totonu ke lalanga nikonikoʻi ia.+ 7 ʻOku totonu ke ʻi ai hono ongo konga ʻe ua ʻoku ʻi he funga umá ʻa ia ʻoku hoko‘i ‘i hono ongo tapa ‘i ‘olungá. 8 Ko e leta*+ kuo lalangá, ʻa ia ʻoku fakamaʻu ki he ʻēfotí ke haʻi maʻu ia ki hono tuʻuʻangá, ʻoku totonu ke ngaohi pē mei he meʻa tatau: Ko e koula, filo pulū, filo fulufuluʻisipi vāleti, filo kula ʻahoʻaho, pea mo e līneni lelei kuo vilohi hono filó.

9 “Te ke toʻo ʻa e ongo maka ʻōnike+ peá ke tongi ai ʻa e hingoa ʻo e ngaahi foha ʻo ʻIsilelí,+ 10 ko e hingoa ʻe ono ʻi he maka ʻe taha pea ko e hingoa ʻe ono ʻoku toé ʻi he maka ʻe tahá, ʻi he hokohoko ʻo honau fāʻeleʻí. 11 ʻE tongi ʻe ha tokotaha tongi maka ʻa e hingoa ʻo e ngaahi foha ʻo ʻIsilelí ʻi he ongo maka ʻe uá ʻo hangē ko ia ko haʻane tongi ha silá.+ Pea te ke fokotuʻu leva kinaua ʻi he ongo tuʻuʻanga koula. 12 Te ke fokotuʻu ʻa e ongo maká ʻi he ongo konga ʻi he funga uma ʻo e ʻēfotí ko ha ongo maka fakamanatu ki he ngaahi foha ʻo ʻIsilelí,+ pea kuo pau ke fataki ʻe ʻĒlone honau hingoá ʻi he ʻao ʻo Sihová ʻi he ongo konga ʻi hono funga umá ko ha fakamanatu. 13 Te ke ngaohi ha ongo tuʻuʻanga mei he koulá 14 mo e ongo sēini koula haohaoa kuo vilohi ʻo hangē ha afó,+ pea kuo pau ke ke fakamaʻu ʻa e ongo sēini afó ki he ongo tuʻuʻangá.+

15 “Te ke ʻai ha tokotaha lālanga nikonikoʻi ke ne ngaohi ʻa e sifa-fatafata ki he faifakamāú.+ ʻOku totonu ke ngaohi ia ʻo hangē ko e ʻēfotí, mei he koula, filo pulū, filo fulufuluʻisipi vāleti, filo kula ʻahoʻaho, pea mo e līneni lelei kuo vilohi hono filó.+ 16 ʻOku totonu ke tapafā tatau ia ʻi hono pelu uá, ko ha hanga* ʻa hono lōloá pea ko ha hanga ʻa hono fālahí. 17 ʻOku totonu ke ke fokotuʻu ʻi ai ha maka, ko e ʻotu maka ʻe fā. Ko e ʻuluaki ʻotú ko e lupi, tōpasi, mo e ʻemalata. 18 Ko e ʻotu hono uá ko e toakase, sāfaia, mo e siasipa. 19 Ko e ʻotu hono tolú ko e lesemi,* ʻakeiti, mo e ʻametisi. 20 Ko e ʻotu hono faá ko e kalisolaite, ʻōnike, mo e seiti. ʻOku totonu ke fokotuʻu kinautolu ʻi ha ngaahi tuʻuʻanga koula. 21 Ko e ngaahi maká ʻe fehoanaki ia mo e hingoa ʻo e ngaahi foha ʻo ʻIsileli ʻe toko 12. Ko e maka taki taha ʻoku totonu ke tongi ai hangē ha silá ʻa e hingoa taki taha ʻo ne fakafofongaʻi ʻa e taha ʻi he ngaahi matakali ʻe 12.

22 “Te ke ngaohi ʻa e sēini fīfī ki he sifa-fatafatá, ʻo hangē ko ha afo koula haohaoá.+ 23 Te ke ngaohi ki he sifa-fatafatá ʻa e ongo foʻi mama koula ʻe ua pea fakamaʻu ʻa e ongo foʻi mamá ki he ongo tuliki ʻi ʻolunga ʻo e sifa-fatafatá. 24 Te ke tui ʻa e ongo afo koulá ʻi he ongo foʻi mama he ongo tuliki ʻo e sifa-fatafatá. 25 Te ke tui ʻa e ongo muiʻi-afó ʻi he ongo tuʻuʻangá, pea kuo pau ke ke fakamaʻu kinaua ki he ongo konga ʻi he funga uma ʻo e ʻēfotí, ʻi muʻa. 26 Te ke ngaohi ha ongo foʻi mama koula ʻo fokotuʻu kinaua ʻi he ongo tuliki ʻo e tapa ki loto ʻi lalo ʻo e sifa-fatafatá, ʻo hanga ki he ʻēfotí.+ 27 ʻOku totonu ke ke ngaohi ha toe ongo foʻi mama koula ʻi muʻa ʻi he ʻēfotí, ʻi lalo hifo ʻi he ongo konga ki he funga umá, ʻo ofi ki he feituʻu ʻoku hokoʻi aí, ʻi ʻolunga ʻi he leta* kuo lalanga ʻo e ʻēfotí.+ 28 Ko e sifa-fatafatá ʻoku totonu ke fokotuʻu ia ki hono tuʻuʻangá ʻaki hano haʻi ha afo pulū mei hono ongo foʻi mamá ki he ongo foʻi mama ʻo e ʻēfotí. ʻE nofo maʻu ai heni ʻa e sifa-fatafatá ʻi he ʻēfotí, ʻi ʻolunga ʻi he leta* kuo lalangá.

29 “Kuo pau ke fataki maʻu pē ʻe ʻĒlone ʻa e hingoa ʻo e ngaahi foha ʻo ʻIsilelí ʻi he sifa-fatafata ki he faifakamāú ʻi hono funga mafú ʻi he taimi ʻokú ne hū ai ki he Potu Toputapú ko ha fakamanatu tuʻumaʻu ʻi he ʻao ʻo Sihová. 30 Te ke tuku ʻa e ʻŪlimí mo e Tūmemí*+ ʻi loto ʻi he sifa-fatafata ki he faifakamāú, pea kuo pau ke nau ʻi he funga mafu ʻo ʻĒloné ʻi he taimi ʻokú ne hū ai ki he ʻao ʻo Sihová, pea kuo pau ke fataki ʻe ʻĒlone ʻa e ongo meʻa ki he faifakamaau ʻo e kau ʻIsilelí ʻi hono funga mafú ʻi he ʻao ʻo Sihová maʻu ai pē.

31 “Te ke ngaohi ʻa e kofu taʻenima ʻoku tui ʻi loto ʻi he ʻēfotí mei he filo pulū ʻataʻatā.+ 32 ʻE ʻi ai ha ava ʻi ʻolunga* ʻi he loto-mālie ʻo e kofú. Ko e avá ʻoku totonu ke lalanga takatakaiʻi ʻa hono tapá ʻe ha tokotaha ngāue ʻi he meʻa lalangá. ʻOku totonu ke hangē ia ko e ava ʻo ha kofu-tau, koeʻuhí ke ʻoua ʻe mahae. 33 ʻOku totonu ke ke ngaohi ha ngaahi pomikānite filo pulū, filo fulufuluʻisipi vāleti, mo e filo kula ʻahoʻaho, fakataha mo ha ngaahi fafangu koula ʻi honau vahaʻá ʻo takatakai ʻi hono tapa kotoa ʻi laló. 34 ʻOku totonu ke ke fakavahavaha ha fafangu koula mo ha pomikānite, ko ha fafangu koula mo ha pomikānite, takatakai ʻi he tapa kotoa ʻi lalo ʻo e kofu taʻenimá. 35 Kuo pau ke tui ia ʻe ʻĒlone koeʻuhí ke ne lava ai ʻo fakahoko fatongia, pea ko e foʻi ongo mei aí kuo pau ke fanongoa ia ʻi he taimi te ne hū ai ki he feituʻu toputapú ʻi he ʻao ʻo Sihová pea ʻi he taimi te ne hū ai ki tuʻá, koeʻuhí ke ʻoua te ne mate.+

36 “Te ke ngaohi ha lauʻimeʻa ngingila mei he koula haohaoa pea tongi ai ʻo hangē ko hono tongi ʻe ha taha ha silá: ‘Ko e māʻoniʻoní ʻoku ʻa Sihova ia.’+ 37 Kuo pau ke ke fakamaʻu ia ki he faʻufaʻu makehé+ ʻaki ha afo pulū; ʻe fokotuʻu maʻu ia ʻi muʻa ʻi he faʻufaʻú. 38 ʻE ʻi he laʻe ia ʻo ʻĒloné, pea ʻe fai ʻe ʻĒlone ha tali ʻi he taimi ʻoku faihala ai ha taha ki he ngaahi meʻa ʻoku māʻoniʻoní,+ ʻa ia naʻe fakatoputapuʻi ʻe he kau ʻIsilelí ʻi he taimi ʻo ʻenau foaki ia ko e ngaahi meʻaʻofa māʻoniʻoní. Kuo pau ke fokotuʻu maʻu ai pē ia ʻi hono laʻé, koeʻuhí ke nau maʻu ai ʻa e fakahōifua ʻi he ʻao ʻo Sihová.

39 “Te ke lalanga ʻa e kofu tōtōlofa pule-veimaú mei he līneni lelei, ngaohi ha faʻufaʻu makehe mei he līneni lelei, pea ngaohi ha noʻo kuo lalanga.+

40 “Te ke ngaohi foki ha ngaahi kofu tōtōlofa, ngaahi noʻo, mo ha faʻufaʻu maʻá e ngaahi foha ʻo ʻĒloné,+ ke nau lāngilangiʻia ai mo fakaʻofoʻofa.+ 41 Te ke fakatui ʻa e kofú ʻia ʻĒlone ko ho tokouá mo hono ngaahi fohá fakataha mo ia, pea te ke pani kinautolu+ mo fakanofo kinautolu*+ mo fakamāʻoniʻoniʻi kinautolu, pea te nau ngāue ko e kau taulaʻeiki kiate au. 42 Ngaohi foki ha ngaahi talausese mutu* līneni maʻanautolu ke ʻufiʻufiʻaki ʻenau telefuá.+ ʻE ʻalu hifo ia mei he kongalotó ki he alangá. 43 Kuo pau ke tui ia ʻe ʻĒlone mo hono ngaahi fohá ʻi he taimi te nau hū ai ki he tēniti feʻiloakiʻangá pe ʻi he taimi te nau fakaofiofi ai ki he ʻōlitá ke fakahoko fatongia ʻi he potu toputapú, koeʻuhi ke ʻoua naʻa nau hoko ai ʻo halaia pea nau mate. Ko ha tuʻutuʻuni tuʻuloa ia kiate ia mo hono hako ʻi he hili iá.

29 “Ko e meʻa eni te ke fai ke fakamāʻoniʻoniʻi ʻaki kinautolu ke nau ngāue ko e kau taulaʻeiki kiate aú: Toʻo ha kiʻi pulu tangata, ongo sipi tangata taʻemele,+ 2 mā taʻelēvani, mo e mā taʻelēvani fuo hangē ha foʻi mamá kuo natu ʻaki ʻa e lolo, pea mo e mā manifinifi taʻelēvani kuo valiʻaki ʻa e lolo.+ Te ke ngaohi ia ʻaki ʻa e mahoaʻa uite lelei 3 pea faʻo ia ʻi ha kato ʻo ʻoatu ia ʻi he kató,+ fakataha mo e pulu tangatá mo e ongo sipi tangatá.

4 “Te ke ʻomi ʻa ʻĒlone mo hono ngaahi fohá ki he hūʻanga ʻo e tēniti feʻiloakiʻangá+ pea ke nau kaukau ʻi he vaí.+ 5 Te ke toʻo leva ʻa e ngaahi kofú+ pea fakatui ʻia ʻĒlone ʻa e kofu tōtōlofá, ko e kofu taʻenima ʻoku tui ʻi loto ʻi he ʻēfotí, ko e ʻēfotí, mo e sifa-fatafatá, pea te ke nonoʻo ke maʻu takatakai ʻi hono kongalotó+ ʻa e leta* ʻo e ʻēfotí ʻa ia kuo lalangá. 6 Te ke ʻai ʻa e faʻufaʻu makehé ki hono ʻulú pea ʻai ʻa e fakaʻilonga toputapu ʻo e fakatapuí ki he faʻufaʻú;+ 7 pea toʻo ʻa e lolo paní+ ʻo lilingi ia ʻi hono ʻulú pea pani ia.+

8 “Te ke ʻomai leva ki muʻa ʻa hono ngaahi fohá pea fakatui ʻia kinautolu ʻa e ngaahi kofu tōtōlofá+ 9 pea takai ʻa e noʻó takatakai ʻiate kinautolu, ʻia ʻĒlone pea pehē ki hono ngaahi fohá, pea ʻai honau faʻufaʻú; pea ʻe hoko ʻo ʻanautolu ʻa e tuʻunga taulaʻeikí ko ha tuʻutuʻuni tuʻuloa.+ Ko e founga eni te ke fakanofo ʻaki ʻa ʻĒlone mo hono ngaahi fohá ke nau ngāue ko e kau taulaʻeikí.*+

10 “Te ke ʻomi he taimi ko ení ʻa e pulu tangatá ki muʻa ki he tēniti feʻiloakiʻangá, pea ko ʻĒlone mo hono ngaahi fohá te nau hilifaki honau nimá ʻi he ʻulu ʻo e pulu tangatá.+ 11 Tāmateʻi ʻa e pulu tangatá ʻi he ʻao ʻo Sihová, ʻi he hūʻanga ʻo e tēniti feʻiloakiʻangá.+ 12 Toʻo ha konga ʻo e toto ʻo e pulu tangatá ʻi ho louhiʻinimá pea ʻai ia ki he ngaahi meʻatui ʻo e ʻōlitá,+ pea lilingi ʻa e toenga kotoa ʻo e totó ʻi he veʻe ʻōlitá.+ 13 Toʻo leva ʻa e ngako+ kotoa ʻokú ne kofu ʻa e ngākaú, ko e ngako ʻi he funga ʻaté, mo e ongo kofuuá pea mo e ngako ʻoku ʻi aí, pea tutu ia koeʻuhi ke kohu ʻi he funga ʻōlitá.+ 14 Ka ko e kakano ʻo e pulu tangatá mo hono kilí mo hono kinohaʻá, te ke tutu ia ʻaki ʻa e afi ʻi he tuʻa ʻapitangá. Ko ha feilaulau angahala ia.

15 “Te ke toʻo leva ʻa e sipi tangata ʻe taha, pea ko ʻĒlone mo hono ngaahi fohá te nau hilifaki honau nimá ʻi he ʻulu ʻo e sipi tangatá.+ 16 Tāmateʻi ʻa e sipi tangatá pea toʻo ʻa hono totó ʻo afuhi ia ʻi he tafaʻaki kotoa ʻo e ʻōlitá.+ 17 Tuʻutuʻu ʻa e sipi tangatá ʻi hono ngaahi kongokongá, pea fufulu ʻa hono ngākaú+ mo hono ngaahi kauvaʻé, pea fokotuʻutuʻu fakataha ʻa e ngaahi kongokongá mo hono ʻulú. 18 Kuo pau ke ke tutu ʻa e sipi tangatá fakakātoa, ʻo ʻai ke kohu ia ʻi he funga ʻōlitá. Ko ha feilaulau tutu ia kia Sihova, ko ha ngangatu fakahōifua.*+ Ko ha feilaulau ia ʻoku fai ʻaki ʻa e afi kia Sihova.

19 “Ko hono hokó te ke toʻo ʻa e sipi tangata ʻe tahá, pea ko ʻĒlone mo hono ngaahi fohá te nau hilifaki honau nimá ʻi he ʻulu ʻo e sipi tangatá.+ 20 Tāmateʻi ʻa e sipi tangatá pea toʻo ha konga ʻo hono totó ʻo ʻai ki he lauʻitelinga toʻomataʻu ʻo ʻĒloné pea ʻi he lauʻitelinga toʻomataʻu ʻo hono ngaahi fohá pea ʻi he motuʻa-tuhu ʻo honau nima toʻomataʻú pea mo e motuʻa-vaʻe ʻo honau vaʻe toʻomataʻú, pea afuhi ʻa e totó ʻi he tafaʻaki kotoa ʻo e ʻōlitá. 21 Toʻo leva ʻa e konga ʻo e toto ʻoku ʻi he funga ʻōlitá mo e konga ʻo e lolo paní+ ʻo afuhi ia ʻia ʻĒlone mo hono ngaahi kofú pea ʻi hono ngaahi fohá mo e ngaahi kofu ʻo hono ngaahi fohá, koeʻuhi ke hoko ai ia mo hono ngaahi kofú pea mo hono ngaahi fohá mo honau ngaahi kofú ʻo toputapu.+

22 “Toʻo leva mei he sipi tangatá ʻa e ngakó, ko e hiku ngakó, ko e ngako ʻokú ne kofu ʻa e ngākaú, ko e ngako ʻo e ʻaté, ko e ongo kofuuá mo e ngako ʻa ia ʻoku ʻi aí,+ pea mo e alanga toʻomataʻú, he ko ha sipi tangata ia ʻo e fakanofó.+ 23 Toʻo foki ha foʻi mā fuopotopoto mo ha foʻi mā fuo hangē ha foʻi mamá kuo natu ʻaki ʻa e lolo mo ha mā manifinifi mei he kato ʻo e mā taʻelēvani ʻa ia ʻoku ʻi he ʻao ʻo Sihová. 24 Kuo pau ke ke tuku kotoa ia ki he nima ʻo ʻĒloné pea ki he nima ʻo hono ngaahi fohá, pea te ke hapai ia ki muʻa mo mui ko ha feilaulau hapai ʻi he ʻao ʻo Sihová. 25 Te ke toʻo leva ia mei honau nimá ʻo tutu ʻi he ʻōlitá, ʻi ʻolunga he feilaulau tutú, ko ha ngangatu fakahōifua* ʻi he ʻao ʻo Sihová. Ko ha feilaulau ia ʻoku fai ʻaki ʻa e afi kia Sihova.

26 “Toʻo leva ʻa e fatafata ʻo e sipi tangata ʻo e fakanofó+ ʻa ia ʻoku feilaulauʻi koeʻuhi ko ʻĒloné, pea hapai ia ki muʻa mo mui ko ha feilaulau hapai ʻi he ʻao ʻo Sihová, pea ʻe hoko ia ko ho ʻinasi. 27 Te ke fakatoputapuʻi ʻa e fatafata ʻo e feilaulau hapaí mo e alanga ʻo e ʻinasi toputapú ʻa ia naʻe hapai pea naʻe toʻo mei he sipi tangata ʻo e fakanofó,+ mei he meʻa naʻe feilaulauʻaki koeʻuhi ko ʻĒlone pea koeʻuhi ko hono ngaahi fohá. 28 ʻE hoko ia ko e meʻa ʻa ʻĒlone mo hono ngaahi fohá ko ha tuʻutuʻuni tuʻuloa ke fakahoko ʻe he kau ʻIsilelí, he ko ha ʻinasi toputapu ia, pea ʻe hoko ia ko ha ʻinasi toputapu ke foaki ʻe he kau ʻIsilelí.+ Ko honau ʻinasi toputapu ia kia Sihova mei heʻenau ngaahi feilaulau feʻinasiʻakí.+

29 “Ko e ngaahi teunga toputapu+ ʻoku ʻo ʻĒloné ʻe ngāueʻaki ia ʻe hono ngaahi foha+ ʻamuí ʻi he taimi ʻe pani ai kinautolu pea fakanofo ke nau hoko ko e kau taulaʻeikí. 30 Ko e taulaʻeiki mei he lotolotonga ʻo hono ngaahi fohá ʻa ia te ne fetongi iá pea te ne haʻu ki he tēniti feʻiloakiʻangá ke fakahoko fatongia ʻi he potu toputapú te ne tui ia ʻi he ʻaho ʻe fitu.+

31 “Te ke toʻo ʻa e sipi tangata ʻo e fakanofó ʻo haka hono kakanó ʻi ha potu toputapu.+ 32 Ko ʻĒlone mo hono ngaahi fohá te nau kai+ ʻa e kakano ʻo e sipi tangatá mo e mā ʻa ia ʻoku ʻi he kató ʻi he hūʻanga ʻo e tēniti feʻiloakiʻangá. 33 Te nau kai ʻa e ngaahi meʻa ʻa ia naʻe fai ʻaki ʻa e feilaulau ʻufiʻufi angahala ke fakanofo kinautolu ko e kau taulaʻeikí* pea ke fakamāʻoniʻoniʻi kinautolú. Ka ko ha tokotaha taʻefakamafaiʻi* ʻe ʻikai te ne kai mei ai, he ko ha meʻa ia ʻoku toputapu.+ 34 Kapau ʻe toe ha kakano ʻo e feilaulau fakanofó pea mo e maá ʻo aʻu ki he pongipongí, kuo pau leva ke ke tutu ʻa e meʻa ʻoku toé ʻaki ʻa e afi.+ Kuo pau ke ʻoua naʻa kai ia, he ko ha meʻa ia ʻoku toputapu.

35 “Te ke fai peheni kia ʻĒlone mo hono ngaahi fohá, ʻo fakatatau ki he meʻa kotoa kuó u tuʻutuʻuni atu kiate koé. Ko e ʻaho ʻe fitu te ke fakanofo ai kinautolu ko e kau taulaʻeikí.*+ 36 Te ke foaki fakaʻaho ʻa e pulu tangata ʻo e feilaulau angahalá ki ha ʻufiʻufi angahala, pea te ke fakamaʻa ʻa e ʻōlitá mei he angahalá ʻaki hono fai ha feilaulau ke fakatoputapuʻi ʻa e ʻōlitá, pea kuo pau ke ke pani ia ke fakatoputapuʻi ia.+ 37 Ko e ʻaho ʻe fitu te ke fai ai ha feilaulau ʻufiʻufi angahala koeʻuhi ko e ʻōlitá, pea kuo pau ke ke fakatoputapuʻi ia koeʻuhi ke hoko ia ko ha ʻōlita mātuʻaki toputapu.+ Ko ha taha pē ʻe ala ki he ʻōlitá kuo pau ke ne māʻoniʻoni.

38 “Ko e meʻa eni te ke foaki ʻi he funga ʻōlitá: Ko e ongo sipi tangata taʻu taha ʻi he ʻaho taki taha, ʻo fai hokohoko.+ 39 Foaki ʻa e kiʻi sipi tangata ʻe taha ʻi he pongipongí pea ko e sipi tangata ʻe tahá ʻi he mamalu ʻa e poʻulí.*+ 40 Ko ha vahe hongofulu ʻe taha ʻo ha fua efa* ʻo e mahoaʻa lelei kuo natu ʻaki ha vahe fā ʻe taha ʻo ha hini* ʻo e lolo kuo tuki, pea mo ha feilaulau inu ʻo e vahe fā ʻe taha ʻo ha hini ʻo e uainé, ʻe ʻalu fakataha ia mo e ʻuluaki kiʻi sipi tangatá. 41 Te ke foaki ʻa e kiʻi sipi tangata hono uá ʻi he mamalu ʻa e poʻulí* fakataha mo e feilaulau meʻakai* mo e inu tatau hangē ko ia naʻe fai ʻi he pongipongí. Te ke ʻoatu ia ko ha ngangatu fakahōifua,* ko ha feilaulau ʻoku fai ʻaki ʻa e afi kia Sihova. 42 Ko ha feilaulau tutu ia ke fai tuʻumaʻu ʻi he kotoa homou ngaahi toʻutangatá ʻi he hūʻanga ʻo e tēniti feʻiloakiʻangá ʻi he ʻao ʻo Sihová, ʻa ia te u hā tonu atu ai kiate kimoutolu ke u folofola atu kiate koe ʻi ai.+

43 “Te u hā tonu atu ʻi ai ki he kau ʻIsilelí, pea ʻe fakatoputapuʻi ia ʻe hoku lāngilangí.+ 44 Te u fakatoputapuʻi ʻa e tēniti feʻiloakiʻangá mo e ʻōlitá, pea te u fakamāʻoniʻoniʻi ʻa ʻĒlone mo hono ngaahi fohá+ koeʻuhi ke nau ngāue ko e kau taulaʻeiki kiate au. 45 Te u ʻafio* ʻi he lotolotonga ʻo e kakai ʻo ʻIsilelí, pea te u hoko ko honau ʻOtua.+ 46 Pea te nau ʻiloʻi moʻoni ko au Sihova ko honau ʻOtuá, ʻa ia naʻá ku ʻomi kinautolu mei he fonua ko ʻIsipité koeʻuhi ke u ʻafio ʻi honau lotolotongá.+ Ko au Sihova ko honau ʻOtuá.

30 “Te ke ngaohi ha ʻōlita ko ha potu ki he tutu ʻinisēnisí;+ te ke ngaohi ia mei he papa sitimí.+ 2 ʻOku totonu ke tapafā tatau ia, ko e kiupite* ʻe taha hono lōloá, pea kiupite ʻe taha hono fālahí, pea kiupite ʻe ua hono māʻolungá. Ko hono ngaahi meʻatuí ʻe konga taha pē mo ia.+ 3 Te ke kofuʻaki ia ʻa e koula haohaoa: ʻA hono fungá, ʻa hono ngaahi tafaʻakí takatakai kotoa, mo hono ngaahi meʻatuí; pea te ke ngaohi ha fakatapa* koula takatakai ai. 4 Te ke ngaohi foki ha ongo kavei fuopotopoto koula ki ai ʻi lalo ʻi hono fakatapá* ʻi he ongo tafaʻaki ʻokú na tuʻu fehangahangaí, pea te nau puke ʻa e ongo vaʻakau ʻe ngāueʻaki ki hono fua iá. 5 Ngaohi ʻa e ongo vaʻakaú mei he papa sitimí pea kofuʻaki ia ʻa e koula. 6 Te ke tuku ia ʻi muʻa he puipui ʻa ia ʻoku ofi ki he ʻaʻake ʻo e Fakamoʻoní,*+ ʻi muʻa he tāpuni ʻa ia ʻoku ʻi he funga ʻaʻake ʻo e Fakamoʻoní, ʻa e feituʻu te u hā tonu atu ai kiate koé.+

7 “ʻE tutu ai+ ʻe ʻĒlone+ ʻa e ʻinisēnisi namu-kakalá,+ ʻo ʻai ia ke kohu ʻi he ʻōlitá ʻi he taimi te ne tokangaʻi ai ʻa e ngaahi māmá+ ʻi he pongipongi taki taha. 8 Pehē foki, ʻi he taimi ʻe tutu ai ʻe ʻĒlone ʻa e ngaahi māmá ʻi he mamalu ʻa e poʻulí,* te ne tutu ʻa e ʻinisēnisí. Ko ha foaki ʻinisēnisi tuʻumaʻu ia ʻi he ʻao ʻo Sihová ʻi he kotoa homou ngaahi toʻutangatá. 9 Kuo pau ke ʻoua naʻa mou foaki ai ha ʻinisēnisi kuo ʻikai fakamafaiʻi+ pe ko ha feilaulau tutu pe ko ha feilaulau meʻakai, pea kuo pau ke ʻoua naʻa mou lilingi ai ha feilaulau inu. 10 Kuo pau ke ʻai ʻe ʻĒlone ʻa e konga ʻo e toto ʻo e monumanu ʻo e feilaulau angahalá ʻi he ngaahi meʻatui ʻo e ʻōlitá koeʻuhí ke fakamaʻa+ ʻa e ʻōlitá. ʻOku totonu ke ne fai pehē ʻo tuʻo taha ʻi he taʻu+ koeʻuhi ke fakamaʻa ai ia ʻi he kotoa homou ngaahi toʻutangatá. ʻOku mātuʻaki māʻoniʻoni ia kia Sihova.”

11 Naʻe folofola leva ʻa Sihova kia Mōsese: 12 “ʻI ha taimi pē te ke fai ai ha tohi kakai pea lau ʻa e kau ʻIsilelí,+ ko e tokotaha taki taha kuo pau ke ne foaki ha huhuʻi kia Sihova koeʻuhi ko ʻene moʻuí ʻi he taimi ʻo e tohi kakaí. ʻOku fai ení koeʻuhi ke ʻoua naʻa hoko mai ha mala kiate kinautolu ʻi he taimi te nau lēsisita aí. 13 Ko e meʻa eni ʻe foaki ʻe he faʻahinga kotoa ʻe lēsisitá: Ko ha vaeuaʻi sikeli* ʻo fakatatau ki he tuʻunga ʻo e fua sikeli ʻo e potu toputapú.*+ Ko e kela* ʻe uofulú ʻoku tatau ia mo ha sikeli. Ko ha vaeuaʻi sikeli ʻa e meʻaʻofa kia Sihová.+ 14 Ko e tokotaha kotoa kuo lēsisita ʻa ia ʻoku taʻu 20 ʻo faai ki ʻolungá te ne foaki ʻa e meʻaʻofa kia Sihová.+ 15 Ko e koloaʻiá ʻoku ʻikai totonu ke ne foaki ʻa e meʻa lahi ange pea ko e masivá ʻoku ʻikai totonu ke ne foaki ʻo siʻi ange ʻi he vaeuaʻi sikelí* ke hoko ko ha meʻaʻofa ia kia Sihova koeʻuhí ke faiʻaki ha totongi huhuʻi* maʻamoutolu. 16 Te ke toʻo ʻa e paʻanga siliva ʻo e totongi huhuʻí mei he kau ʻIsilelí pea foaki ia ki he ngāue ʻi he tēniti feʻiloakiʻangá, koeʻuhi ke hoko ia ko ha fakamanatu ʻi he ʻao ʻo Sihová maʻá e kau ʻIsilelí, ke faiʻaki ha totongi huhuʻi maʻamoutolu.”

17 Naʻe hoko atu ʻa e folofola ʻa Sihova kia Mōsesé, ʻo pehē: 18 “Ngaohi ha fuʻu pēsoni kopa mo hano tuʻuʻanga ki he fakamaʻá;+ pea fokotuʻu ia ʻi he vahaʻa ʻo e tēniti feʻiloakiʻangá mo e ʻōlitá pea ʻai ki ai ha vai.+ 19 Ko ʻĒlone mo hono ngaahi fohá te nau fufulu honau nimá mo honau vaʻé ʻi ai.+ 20 ʻI he taimi te nau hū ai ki he tēniti feʻiloakiʻangá pe ko e taimi te nau fakaofiofi ai ki he ʻōlitá ke fakahoko fatongia pea ke fai ʻa e ngaahi feilaulau ʻaki ʻa e afi mo e kohu kia Sihová, te nau fakamaʻa kinautolu ʻaki ʻa e vaí koeʻuhí ke ʻoua naʻa nau mate. 21 Kuo pau ke nau fanofano mo fufulu honau vaʻé koeʻuhí ke ʻoua naʻa nau mate, pea kuo pau ke hoko ia ko ha tuʻutuʻuni tuʻuloa kiate kinautolu, kiate ia mo hono hakó, ʻi he kotoa honau ngaahi toʻutangatá.”+

22 Naʻe hoko atu ʻa Sihova ʻo ne folofola kia Mōsese: 23 “Ko hono hokó, toʻo ʻa e ngaahi meʻa namu-kakala lelei tahá: Ko e sikeli ʻe 500 ʻo e toiʻi mula, pea ko e vaeua ʻo e lahi ko iá, ko e sikeli ʻe 250 ʻo e sinamoni namu-lelei, sikeli ʻe 250 ʻo e kalamusi* namu-lelei, 24 mo e sikeli ʻe 500 ʻo e kasia,* kuo fua ʻo fakatatau ki he tuʻunga ʻo e sikeli ʻo e potu toputapú,*+ fakataha mo ha hini* ʻo e lolo ʻōlive. 25 Pea ngaohi mei ai ha lolo pani toputapu; ʻoku totonu ke fio fakataha ia ʻi he tuʻunga pōtoʻi.*+ ʻE hoko ia ko ha lolo pani toputapu.

26 “Te ke paniʻaki ia ʻa e tēniti feʻiloakiʻangá+ mo e ʻaʻake ʻo e Fakamoʻoní, 27 pea pehē ki he tēpilé mo e kotoa ʻo hono ngaahi naunaú, ko e tuʻunga-māmá mo hono ngaahi naunaú, ko e ʻōlita ʻo e ʻinisēnisí, 28 ko e ʻōlita ʻo e feilaulau tutú mo e kotoa ʻo hono ngaahi naunaú, mo e fuʻu pēsoní pea mo hono tuʻuʻangá. 29 Kuo pau ke ke fakatoputapuʻi ia ke nau hoko ʻo mātuʻaki toputapu.+ Ko ha taha pē ʻe ala ki ai kuo pau ke ne māʻoniʻoni.+ 30 Pea te ke pani ʻa ʻĒlone+ mo hono ngaahi fohá+ pea fakamāʻoniʻoniʻi kinautolu ke nau ngāue ko e kau taulaʻeiki kiate au.+

31 “Te ke lea ki he kau ʻIsilelí, ʻo pehē, ‘ʻE hokohoko atu eni ko ha lolo pani toputapu kiate au ʻi homou ngaahi toʻutangatá.+ 32 ʻE ʻikai ke ngāueʻaki ia ki he sino ʻo e faʻahinga ʻo e tangatá, pea kuo pau ke ʻoua naʻa mou ngaohi ha lolo kuo fio ʻo hangē ko iá. Ko ha meʻa ia ʻoku toputapu. ʻE hokohoko atu ʻene hoko ko ha meʻa ʻoku toputapu kiate kimoutolu. 33 Ko ha taha pē ʻokú ne ngaohi ha lolo namu-kakala ʻo hangē ko iá pea ʻokú ne ʻai ha konga ʻo ia ki ha tokotaha taʻefakamafaiʻi* kuo pau ke tuʻusi ia mei hono kakaí.’”*+

34 Naʻe folofola leva ʻa Sihova kia Mōsese: “Toʻo ha ngaahi konga lahi tatau ʻo e ngaahi meʻa namu-kakala+ ko ení: Toiʻi sitakiti, ʻōnika, kalipeno namu-kakala, mo e ʻinisēnisi hinehina haohaoa. 35 Ngaohi ia ko ha ʻinisēnisi;+ ko e sipaisi kuo fio ko ení ʻoku totonu ke fakatahaʻi ʻi he tuʻunga pōtoʻi,* kuo ʻai ki ai ha māsima,+ pea ʻoku haohaoa, mo toputapu. 36 Te ke tuki hano konga ke hoko ko ha efuefu momo iiki pea tuku hano konga ʻi he ʻao ʻo e ʻaʻake ʻo e Fakamoʻoní ʻi he tēniti feʻiloakiʻangá, ʻa e feituʻu te u hā tonu atu ai kiate koé. ʻOku totonu ke mātuʻaki toputapu ia kiate kimoutolu. 37 Kuo pau ke ʻoua naʻá ke ngaohi ke ke ngāueʻaki ʻa e ʻinisēnisi ʻokú ke ngaohiʻaki ʻa e ngaahi meʻa kuo fio+ ko ení. Te ke vakai ki ai ko ha meʻa ia ʻoku toputapu kia Sihova. 38 Ko ia pē te ne ngaohi ha meʻa ʻo hangē ko iá ke ne nanamu ki ai kuo pau ke tuʻusi ia mei hono kakaí.”*

31 Naʻe hoko atu ʻa e folofola ʻa Sihova kia Mōsesé, ʻo ne pehē: 2 “Vakai, kuó u fili ʻa* Pesalili+ ko e foha ʻo ʻUli ko e foha ʻo Hua ʻo e matakali ʻo Siutá.+ 3 Te u fakafonu ia ʻaki ʻa e laumālie ʻo e ʻOtuá, ʻo foaki kiate ia ʻa e poto, mahino, mo e ʻilo ki he faʻahinga kotoa pē ʻo e ngāue fakameaʻá, 4 ki hono faʻu ʻa e sīpinga ʻo e ngaahi meʻá, ki hono ngāueʻaki ʻa e koula, siliva, mo e kopa, 5 ki hono tutuʻu mo hono fokotuʻu ʻo e ngaahi maká,+ pea mo hono faʻu ʻa e faʻahinga kotoa pē ʻo e meʻa ʻoku ngaohi mei he papá.+ 6 ʻIkai ko ia pē, ke tokoni kiate iá kuó u fakanofo ʻa ʻAholiapi+ ko e foha ʻo ʻAhisamaki ʻo e matakali ʻo Taní, pea ʻoku ou ʻai ʻa e poto ki he loto ʻo e faʻahinga pōtoʻi* kotoa pē, koeʻuhí ke nau ngaohi ʻa e meʻa kotoa pē kuó u tuʻutuʻuni atu kiate kimoutolú:+ 7 ʻA e tēniti feʻiloakiʻangá,+ ko e ʻaʻake ʻo e Fakamoʻoní+ mo e tāpuni+ ʻoku ʻi ʻolunga aí, ʻa e ngaahi naunau kotoa ʻo e tēnití, 8 ʻa e tēpilé+ mo hono ngaahi naunaú, ko e tuʻunga-maama ʻo e koula haohaoa mo e kotoa ʻo hono ngaahi naunaú,+ ko e ʻōlita ʻo e ʻinisēnisí,+ 9 ko e ʻōlita ʻo e feilaulau tutú+ mo e kotoa ʻo hono ngaahi naunaú, ko e fuʻu pēsoní mo hono tuʻuʻangá,+ 10 ko e ngaahi kofu kuo tuitui leleí, ko e ngaahi kofu toputapu moʻo ʻĒlone ko e taulaʻeikí, ko e ngaahi kofu ʻo hono ngaahi fohá ki heʻenau ngāue ko e kau taulaʻeikí,+ 11 ko e lolo paní, pea mo e ʻinisēnisi namu-kakala ki he feituʻu toputapú.+ Te nau fai ʻa e meʻa kotoa pē kuó u tuʻutuʻuni atu kiate koé.”

12 Naʻe toe folofola ʻa Sihova kia Mōsese: 13 “Lea ki he kau ʻIsilelí ʻo tala kiate kinautolu, ‘Te mou mātuʻaki tauhi ʻa ʻeku ngaahi Sāpaté,+ he ko ha fakaʻilonga ia ʻi he vahaʻa ʻoʻoku mo kimoutolu ʻi homou ngaahi toʻutangatá koeʻuhi ke mou ʻilo ai, ko au Sihova, ʻoku ou fakamāʻoniʻoniʻi kimoutolú. 14 Kuo pau ke mou tauhi ʻa e Sāpaté, he ko ha meʻa ia ʻoku māʻoniʻoni kiate kimoutolu.+ ʻIlonga ha taha te ne maumauʻi ia kuo pau ke tāmateʻi. Kapau ʻe fai ʻe ha taha ha faʻahinga ngāue ai, ko e tokotaha leva ko iá kuo pau ke tuʻusi ia mei he lotolotonga ʻo hono kakaí.*+ 15 Ko e ʻaho ʻe ono ʻe lava ke fai ai ʻa e ngāué, ka ʻi he ʻaho hono fitú ko ha Sāpate ia ʻo e mālōlō fakaʻaufuli.+ Ko ha meʻa ia ʻoku māʻoniʻoni kia Sihova. Ko ha taha pē te ne fai ha ngāue ʻi he ʻaho Sāpaté kuo pau ke tāmateʻi ia. 16 Ko e kau ʻIsilelí kuo pau ke nau tauhi ʻa e Sāpaté; kuo pau ke nau tauhi ʻa e Sāpaté ʻi he kotoa honau ngaahi toʻutangatá. Ko ha fuakava taʻengata ia. 17 Ko ha fakaʻilonga tuʻuloa ia ʻi he vahaʻa ʻoʻoku mo e kakai ʻo ʻIsilelí,+ he naʻe ngaohi ʻe Sihova ʻi he ʻaho ʻe ono ʻa e langí mo e māmaní pea ʻi he ʻaho hono fitú naʻe tuku ai ʻene ngāué peá ne mālōlō.’”+

18 ʻI he hili pē ko ia ʻene folofola kiate ia ʻi he Moʻunga Sainaí, naʻá ne ʻoange kia Mōsese ʻa e ongo lauʻimaka ʻo e Fakamoʻoní,+ ʻa e ongo lauʻimaka kuo tohi ʻe he louhiʻinima ʻo e ʻOtuá.+

32 Lolotonga ení, naʻe vakai ʻa e kakaí kuo tuai ʻa e ʻalu hifo ʻa Mōsese mei he moʻungá.+ Ko ia naʻe fakatahataha ʻa e kakaí takatakai ʻia ʻĒlone ʻo nau pehē kiate ia: “Tuʻu hake, ngaohi maʻatautolu ha ʻotua ʻa ia te ne ʻalu muʻomuʻa ʻiate kitautolu,+ koeʻuhí ʻoku ʻikai te tau ʻiloʻi pe ko e hā kuo hoko ki he Mōsese ko ení, ʻa e tangata ko ia naʻá ne taki mai kitautolu mei he fonua ko ʻIsipité.” 2 ʻI he meʻá ni naʻe pehē ʻe ʻĒlone kiate kinautolu: “Vete ʻa e ngaahi hau koulá+ mei he telinga ʻo homou ngaahi uaifí, ko homou ngaahi fohá, pea mo homou ngaahi ʻofefiné pea ʻomai ia kiate au.” 3 Ko ia naʻe kamata ke vete ʻe he kakaí kotoa ʻa e ngaahi hau koula naʻe ʻi honau telingá ʻo ʻomai ia kia ʻĒlone. 4 Naʻá ne toʻo leva ʻa e koulá meiate kinautolu, pea naʻá ne tongi ia ʻaki ha meʻangāue ʻo ngaohiʻaki ha ʻīmisi* ʻo ha ʻuhikiʻi pulu.+ Naʻe kamata ke nau pehē: “Ko eni ho ʻOtuá, ʻe ʻIsileli, ʻa ia naʻá ne taki mai koe mei he fonua ko ʻIsipité.”+

5 ʻI he sio ʻa ʻĒlone ki he meʻa ko ení, naʻá ne fokotuʻu ha ʻōlita ʻi muʻa ai. Naʻe ui atu leva ʻa ʻĒlone: “ʻOku ʻi ai ha kātoanga kia Sihova ʻapongipongi.” 6 Ko ia naʻa nau tuʻu pongipongia hake he ʻaho hono hokó ʻo kamata foaki ha ngaahi feilaulau tutu mo ʻohake ha ngaahi feilaulau feʻinasiʻaki. Hili iá, naʻe tangutu hifo ʻa e kakaí ke nau kai mo inu. Pea naʻa nau tuʻu hake leva ke fakafiefia.+

7 Naʻe folofola he taimi ko ení ʻa Sihova kia Mōsese: “ʻAlu, ʻalu hifo, koeʻuhí ko ho kakai ʻa ia naʻá ke taki mai mei he fonua ko ʻIsipité, kuo nau fai ʻa e tōʻonga te nau ʻauha ai.+ 8 Kuo vave ʻenau afe mei he hala naʻá ku tuʻutuʻuni ke nau fou aí.+ Kuo nau ngaohi maʻanautolu ha ʻīmisi* ʻo ha ʻuhikiʻi pulu, pea nau hanganaki punou hifo ki ai ʻo faifeilaulau ki ai mo pehē, ‘Ko eni ho ʻOtuá, ʻe ʻIsileli, ʻa ia naʻá ne taki mai koe mei he fonua ko ʻIsipité.’” 9 Naʻe hoko atu ʻa Sihova ʻo ne folofola kia Mōsese: “Kuó u vakai ko ha kakai loto-fefeka*+ eni. 10 Ko ia tuku ange muʻa au, pea te u fakaʻauha ʻosi kinautolu ʻi he kakaha ʻa ʻeku houhaú, pea tuku ke u ngaohi ha puleʻanga lahi meiate koe.”+

11 Pea ko Mōsese naʻá ne kōlenga kia* Sihova ko hono ʻOtuá+ ʻo ne pehē: “Ko e hā ai, ʻe Sihova, ke ke fakahanga ʻa e kakaha ʻo hoʻo houhaú ki ho kakaí hili ia hono ʻomi kinautolu mei he fonua ko ʻIsipité ʻaki ʻa e fuʻu ivi mālohi mo ha nima māfimafi?+ 12 Ko e hā ke pehē ai ʻe he kau ʻIsipité, ‘Naʻe ʻi ai ʻene ngaahi taumuʻa kovi ʻi heʻene taki atu kinautolú. Naʻá ne loto ke tāmateʻi kinautolu ʻi he ngaahi moʻungá pea fakaʻauha ʻosi kinautolu mei he funga ʻo māmaní’?+ Tafoki mei he kakaha ʻo hoʻo houhaú pea toe fakakaukau ange ki hoʻo* fili ke ʻomai ʻa e mala ko ení ki ho kakaí. 13 Manatuʻi ʻa ʻĒpalahame, ʻAisake, mo ʻIsileli ko hoʻo kau sevānití, ʻa ia naʻá ke fai ha fuakava ʻiate koe pē ʻo pehē kiate kinautolu: ‘Te u fakatokolahi homou hakó ke hangē ko e ngaahi fetuʻu ʻo e langí,+ pea te u foaki ʻa e fonua kotoa ko eni kuó u vaheʻí ki homou hakó, koeʻuhi ke nau maʻu ia ko ha tofiʻa tuʻuloa.’”+

14 Ko ia naʻe kamata ke toe fakakaukau* ʻa Sihova ki he mala naʻá ne folofolaʻaki ʻe ʻomi ki hono kakaí.+

15 Pea naʻe tafoki ʻa Mōsese ʻo ne ʻalu hifo mei he moʻungá mo e ongo lauʻimaka ʻo e Fakamoʻoní+ ʻi hono nimá.+ Ko e ongo lauʻimaká naʻe tongi fakatouʻosi ʻa hono ongo tafaʻakí; ʻo tohi ai ʻi muʻa mo mui. 16 Ko e ongo lauʻimaká ko e ngāue ia ʻa e ʻOtuá, pea ko e tohí naʻe tohi ia ʻe he ʻOtuá ʻo tongi ʻi he ongo lauʻimaká.+ 17 ʻI he kamata ke fanongo ʻa Siosiua ki he longoaʻa ʻa e kakaí koeʻuhi ko ʻenau kaikailá, naʻá ne pehē ange kia Mōsese: “ʻOku ongo mai ha tau ʻi he ʻapitangá.” 18 Ka naʻe pehē ange ʻe Mōsese:

19 ʻI he fakaofi atu pē ʻa Mōsese ki he ʻapitangá ʻo ne sio ki he ʻuhikiʻi pulú+ mo e meʻé, naʻe kamata ke kakaha ʻa ʻene ʻitá, pea naʻá ne tolongi ʻa e ongo lauʻimaká mei hono nimá ʻo na movete ʻi he veʻe moʻungá.+ 20 Naʻá ne toʻo ʻa e ʻuhikiʻi pulu naʻa nau ngaohí ʻo ne tutu ia ʻaki ʻa e afi pea laiki ia ʻo efuefu;+ hili iá, naʻá ne afuhi ia ʻi he vaí peá ne ʻai ke inu ia ʻe he kau ʻIsilelí.+ 21 Pea naʻe pehē ʻe Mōsese kia ʻĒlone: “Ko e hā naʻe fai ʻe he kakaí ni kiate koé ʻo ke ʻomi ai ha fuʻu angahala kiate kinautolú?” 22 Naʻe tali ange ʻe ʻĒlone: “ʻOua naʻá ke tuputāmaki lahi, ʻe hoku ʻeiki. ʻOkú ke ʻiloʻi lelei ko e kakaí ʻoku nau hehema ke faikovi.+ 23 Ko ia naʻa nau pehē mai kiate au, ‘Ngaohi maʻatautolu ha ʻotua ʻa ia te ne ʻalu muʻomuʻa ʻiate kitautolu, he ʻoku ʻikai te tau ʻiloʻi pe ko e hā kuo hoko ki he Mōsese ko ení, ʻa e tangata ko ia naʻá ne taki mai kitautolu mei he fonua ko ʻIsipité.’+ 24 Ko ia naʻá ku pehē ange kiate kinautolu, ‘ʻIlonga ha taha ʻoku ʻi ai haʻane koula kuo pau ke ne vete ia ʻo ʻomai kiate au.’ Naʻá ku lī leva ia ki he afí pea maʻu mei ai ʻa e ʻuhikiʻi pulu ko ení.”

25 Naʻe sio ʻa Mōsese ko e kakaí naʻa nau anga-taʻefakamaʻumaʻu, he naʻe tuku ai pē kinautolu ʻe ʻĒlone ke nau hoko ʻo anga-taʻefakamaʻumaʻu, ʻo nau hoko ai ko ha meʻa fakamā ʻi he ʻao ʻo honau kau fakafepakí. 26 Naʻe tuʻu leva ʻa Mōsese ʻi he matapā ʻo e ʻapitangá ʻo ne pehē: “Ko hai ʻoku kau mo Sihová? Haʻu kiate au!”+ Pea ko e kau Līvaí kotoa naʻa nau fakatahataha takatakai ʻiate ia. 27 Naʻá ne pehē atu leva kiate kinautolu: “Ko e meʻa eni kuo folofolaʻaki ʻe Sihova ko e ʻOtua ʻo ʻIsilelí, ‘Ko kimoutolu taki taha kuo pau ke ne fakamaʻu ʻa ʻene heletaá pea laka atu ʻi he ʻapitangá kotoa mei he matapā ki he matapā, ʻo tāmateʻi ʻa hono tokoua, ko hono kaungāʻapi, mo hono kaumeʻa ofi.’”+ 28 Naʻe fai ʻa e kau Līvaí ki he meʻa naʻe leaʻaki ʻe Mōsesé. Ko ia ʻi he ʻaho ko iá, ko e kau tangata ʻe toko 3,000 nai naʻe tāmateʻí. 29 Naʻe pehē ange leva ʻe Mōsese: “Fakamavaheʻi kimoutolu* maʻa Sihova he ʻahó ni, he ko kimoutolu taki taha kuó ne ʻalu atu ki hono fohá tonu mo hono tokouá tonu;+ ʻi he ʻaho ní te ne ʻoatu kiate koe ha tāpuaki.”+

30 ʻI he ʻaho pē hono hokó, naʻe pehē ai ʻe Mōsese ki he kakaí: “Kuo mou fai ha fuʻu angahala lahi, pea ko eni te u ʻalu hake kia Sihova ke sio pe ʻe lava ke u fai ha kole fakamolemole koeʻuhi ko hoʻomou angahalá.”+ 31 Ko ia naʻe foki ʻa Mōsese kia Sihova ʻo ne pehē: “Ko ha angahala lahi moʻoni ē kuo fai ʻe he kakaí ni! Kuo nau ngaohi maʻanautolu ha ʻotua mei he koulá!+ 32 Ka ko eni kapau ʻokú ke finangalo lelei ki ai, fakamolemoleʻi muʻa ʻenau angahalá;+ kapau ʻe ʻikai, tāmateʻi ange muʻa au mei hoʻo tohi kuó ke hikí.”+ 33 Kae kehe, naʻe folofola ʻa Sihova kia Mōsese: “ʻIlonga ʻa ia kuó ne faiangahala kiate aú, te u tāmateʻi ia mei heʻeku tohí. 34 ʻAlu leva he taimí ni, taki ʻa e kakaí ki he feituʻu ʻa ia kuó u folofola atu kiate koe fekauʻaki mo iá. Vakai! ʻE ʻalu muʻomuʻa ʻa ʻeku ʻāngeló ʻiate koe,+ pea ʻi he ʻaho te u fai ai ha ʻeké, te u ʻomi ʻa e tautea kiate kinautolu ʻi heʻenau angahalá.” 35 Naʻe kamata leva ke taaʻi ʻe Sihova ʻa e kakaí koeʻuhí ko ʻenau ngaohi ʻa e ʻuhikiʻi pulú, ʻa e ʻuhikiʻi pulu ko ia naʻe ngaohi ʻe ʻĒloné.

33 Naʻe toe folofola ʻa Sihova kia Mōsese: “ʻAlu atu mei heni fakataha mo e kakai ʻa ia kuó ke taki mai mei he fonua ko ʻIsipité. Fononga ki he fonua ʻa ia naʻá ku fuakava fekauʻaki mo ia kia ʻĒpalahame, ʻAisake, mo Sēkope, ʻo pehē, ‘Te u foaki ia ki ho hakó.’+ 2 Te u fekau atu ha ʻāngelo ke ʻalu muʻomuʻa ʻiate koe+ pea te u kapusi ʻa e kau Kēnaní, ko e kau ʻĀmolí, ko e kau Hetí, ko e kau Pēlisí, ko e kau Heví, pea mo e kau Siepusí.+ 3 ʻAlu hake ki ha fonua ʻoku mahutafea ʻi he huʻakau mo e hone.+ Ka ʻe ʻikai te u ʻalu atu ʻi homou lotolotongá, he ko e kakai loto-fefeka*+ kimoutolu, pea telia naʻá ku fakaʻauha ʻosi kimoutolu ʻi he halá.”+

4 ʻI he fanongo ʻa e kakaí ki he lea fefeka ko ení, naʻe kamata ke nau mamahi, pea naʻe ʻikai ha taha ʻo kinautolu te ne tui ʻa ʻene ngaahi meʻa-teuteú. 5 Naʻe folofola ange ʻa Sihova kia Mōsese: “Lea ki he kau ʻIsilelí, ‘Ko e kakai loto-fefeka*+ kimoutolu. ʻE lava ke u ʻalu atu ʻi ha foʻi mōmeniti ʻi homou lotolotongá ʻo fakaʻauha ʻosi kimoutolu.+ Ko ia toʻo leva hoʻomou ngaahi meʻa-teuteú lolotonga ʻa ʻeku fakakaukauʻi pe ko e hā te u fai kiate kimoutolú.’” 6 Ko ia mei Moʻunga Hōlepi ʻo faai atu ai, naʻe ʻikai ke toe tui* ʻe he kau ʻIsilelí ʻa ʻenau ngaahi meʻa-teuteú.

7 Naʻe ʻave leva ʻe Mōsese hono tēnití ʻo ne fokotuʻu ia ʻi he tuʻa ʻapitangá, ʻo kiʻi mamaʻo atu mei he ʻapitangá, pea naʻá ne ui ia ko ha tēniti feʻiloakiʻanga. Ko e tokotaha kotoa pē naʻe kumi ki he tataki ʻa Sihová+ naʻá ne ʻalu atu ki he tēniti feʻiloakiʻangá, ʻa ia naʻe ʻi he tuʻa ʻapitangá. 8 ʻI he ʻalu atu pē ʻa Mōsese ki he tēnití, naʻe mālanga hake ʻa e kakaí kotoa ʻo tuʻu ʻi he hūʻanga ʻo honau ngaahi tēniti ʻonautolú, pea naʻa nau sio fakamamaʻu kia Mōsese kae ʻoua kuó ne hū ki he tēnití. 9 ʻI he hū pē ʻa Mōsese ki he tēnití, naʻe ʻalu hifo ʻa e pou ʻaó+ ʻo tuʻu ʻi he hūʻanga ʻo e tēnití lolotonga ia ʻa e folofola ʻa e ʻOtuá kia Mōsesé.+ 10 ʻI he sio ʻa e kakaí kotoa ki he pou ʻaó ʻoku tuʻu ʻi he hūʻanga ʻo e tēnití, naʻe mālanga hake ʻa e tokotaha taki taha ʻo kinautolu ʻo punou ʻi he hūʻanga ʻo hono tēniti ʻoʻoná. 11 Naʻe folofola ʻa Sihova kia Mōsese mata ki he mata,+ ʻo hangē tofu pē ko e talanoa ʻa ha tangata mo ha tangata. ʻI heʻene foki ki he ʻapitangá, ko Siosiua+ ko e foha ʻo Nuní, ʻa ʻene sevāniti mo e tauhí,+ naʻe ʻikai te ne mavahe mei he tēnití.

12 Naʻe pehē ange leva ʻe Mōsese kia Sihova: “Vakai, ʻokú ke folofola mai kiate au, ‘Taki hake ʻa e kakaí ni,’ ka kuo ʻikai te ke tuku au ke u ʻiloʻi pe ko hai te ke fekauʻi mai ke ʻalu mo aú. ʻIkai ngata aí, kuó ke folofola, ‘ʻOku ou ʻiloʻi ho hingoá* pea kuó ke maʻu foki ʻa ʻeku hōifuá.’ 13 Kātaki muʻa, kapau kuó u maʻu ʻa hoʻo hōifuá, ʻai au ke u ʻiloʻi ho ngaahi halá,+ koeʻuhí ke u ʻiloʻi koe pea hokohoko atu ʻa ʻeku maʻu ʻa hoʻo hōifuá. Manatuʻi foki, ko e puleʻangá ni ko ho kakai.”+ 14 Ko ia naʻá ne folofola: “Ko au tonu te u* ʻalu mo koe,+ pea te u foaki kiate koe ha mālōlō.”+ 15 Naʻe pehē ange leva ʻe Mōsese kiate ia: “Kapau ʻe ʻikai te ke haʻu ʻa koe tonu, ʻoua naʻá ke taki hake kimautolu mei heni. 16 ʻE ʻiloʻi fēfē kuó u maʻu ʻa hoʻo hōifuá, ʻa au mo ho kakaí? ʻIkai ko hoʻo ʻalu mo kimautolú,+ koeʻuhí ke fakafaikehekeheʻi ai au mo ho kakaí mei he kakai kehe kotoa pē ʻi he funga ʻo māmaní?”+

17 Naʻe hoko atu ʻa e folofola ʻa Sihova kia Mōsesé: “Te u fai foki ki he meʻa ko eni ʻokú ke kolé, koeʻuhí kuó ke maʻu ʻa ʻeku hōifuá pea ʻoku ou ʻiloʻi ho hingoá.” 18 Naʻá ne pehē ange leva: “Fakahaaʻi mai muʻa kiate au ho lāngilangí.” 19 Ka naʻá ne folofola: “Te u ʻai koe ke ke sio ki he kotoa ʻo hoku leleí, pea te u talaki ʻi ho ʻaó ʻa e huafa ʻo Sihová;+ pea te u hōifua ʻi he tokotaha ʻoku ou hōifua ki aí, pea te u fakahaaʻi ʻa e meesi ki he tokotaha ʻoku ou fakahaaʻi ki ai ʻa e mēsí.”+ 20 Ka naʻá ne toe pehē mai: “ʻE ʻikai lava ke ke sio ki hoku matá, he ʻoku ʻikai ha tangata ʻe lava ke sio kiate au pea moʻui.”

21 Naʻe toe folofola ʻa Sihova: “Ko eni ko ha potu ē ʻoku ofi mai kiate au. Tuʻu ʻi he funga maká. 22 ʻI he taimi ʻe fakalaka atu ai hoku lāngilangí, te u fokotuʻu koe ʻi ha avaʻi maka, pea te u fakapuliki koe ʻaki hoku nimá kae ʻoua ke u fakalaka atu. 23 ʻI he hili iá, te u toʻo ʻa hoku nimá, pea te ke sio ki hoku tuʻá. Ka ʻe ʻikai fai ha sio ki hoku matá.”+

34 Naʻe folofola leva ʻa Sihova kia Mōsese: “Tongi maʻau ha ongo lauʻimaka ʻo hangē ko e ʻuluaki ongo lauʻimaká,+ pea te u tohi ai ʻa e ngaahi lea naʻe hā ʻi he ʻuluaki ongo lauʻimaká,+ ʻa ē naʻá ke haʻaki ʻo moveté.+ 2 Teuteu ki he pongipongí, he te ke ʻalu hake ʻi he pongipongí ki Moʻunga Sainai ʻo tuʻu ai ʻi hoku ʻaó ʻi he tumutumu ʻo e moʻungá.+ 3 Ka ʻe ʻikai ke ʻalu hake ha taha mo koe, pea ke ʻoua naʻa ʻasi ha toe taha kehe ʻi ha feituʻu pē ʻi he moʻungá. Naʻa mo e fanga sipí pe ko e fanga pulú ke ʻoua naʻa nau kaikai ʻi muʻa ʻi he moʻunga+ ko iá.”

4 Ko ia naʻe tongi ʻe Mōsese ha ongo lauʻimaka ʻo hangē ko e ʻuluaki ongo lauʻimaká peá ne tuʻu pongipongia ʻo ʻalu hake ki Moʻunga Sainai, ʻo hangē tofu pē ko e tuʻutuʻuni ʻa Sihova kiate iá, pea naʻá ne toʻo ʻa e ongo lauʻimaká. 5 Naʻe hāʻele hifo+ leva ʻa Sihova ʻi he ʻaó ʻo ne tuʻu mo ia ʻi ai peá ne talaki ʻa e huafa ʻo Sihová.+ 6 Naʻe fakalaka atu ʻa Sihova ʻi hono ʻaó peá ne talaki: “Ko Sihova, ʻa Sihova, ko ha ʻOtua mohu meesi+ mo manavaʻofa,*+ tuai ki he houhau+ pea fonu ʻi he ʻofa mateaki*+ mo e moʻoni,*+ 7 ʻokú ne fakahaaʻi ʻa e ʻofa mateaki ki he laui afe,+ ʻo fakamolemoleʻi ʻa e faihalá mo e laka halá pea mo e angahalá,+ ka ʻe ʻikai ʻaupito te ne tuku taʻetautea+ ʻa e halaiá, ʻokú ne ʻomai ʻa e tautea ki he faihala ʻa e ngaahi tamaí ʻo hilifaki ki he ngaahi fohá mo e fanga makapuná, ki he toʻutangata hono tolú pea ki he toʻutangata hono faá.”+

8 Naʻe fakavavevave ʻa Mōsese ʻo ne punou hifo ki he kelekelé peá ne fakatōmapeʻe. 9 Naʻá ne pehē leva: “Ko eni, kapau kuó u maʻu ʻa hoʻo hōifuá, ʻe Sihova, pea kātaki muʻa Sihova, ʻo ʻalu mo kimautolu ʻi homau lotolotongá,+ neongo ko ha kakai loto-fefeka*+ kimautolu, pea fakamolemoleʻi ʻemau faihalá mo ʻemau angahalá,+ ʻo toʻo kimautolu ke mau hoko ko e tofiʻa ʻoʻou.” 10 ʻI he meʻa ko iá naʻá ne folofola: “Ko eni ʻoku ou fai ha fuakava: ʻI he ʻao ʻo ho kakaí kotoa, te u fai ai ʻa e ngaahi meʻa fakaofo ʻa ia kuo teʻeki ai ʻaupito ke fai ʻi he kotoa ʻo e māmaní pe ʻi he lotolotonga ʻo e ngaahi puleʻangá kotoa,+ pea ko e kakai kotoa ʻa ia ʻokú ke nofo ʻi honau lotolotongá te nau sio ki he ngāue ʻa Sihová, he ko ha meʻa fakamanavahē ia te u fai kiate koé.+

11 “Tokanga ki he meʻa ʻoku ou tuʻutuʻuni atu kiate koe he ʻaho ní.+ Ko eni ʻoku ou kapusi mei ho ʻaó ʻa e kau ʻĀmolí, ko e kau Kēnaní, ko e kau Hetí, ko e kau Pēlisí, ko e kau Heví, pea mo e kau Siepusí.+ 12 Tokanga ke ʻoua naʻá ke fai ha fuakava mo e kakai ʻo e fonua ʻa ia ʻokú ke ʻalu ki aí,+ telia naʻa hoko ko ha tauhele ia ʻi ho lotolotongá.+ 13 Ka te mou holoki honau ngaahi ʻōlitá, te mou laiki honau ngaahi pou maka toputapú, pea ko ʻenau ngaahi pou ʻakau toputapú* te mou tā hifo.+ 14 Kuo pau ke ʻoua naʻá ke punou ki ha toe ʻotua ʻe taha,+ he ko Sihová ʻoku ʻiloa ia ʻi heʻene* fiemaʻu ʻa e anga-līʻoa maʻataʻataá.* ʻIo, ko ha ʻOtua ia ʻokú ne fiemaʻu ʻa e anga-līʻoa maʻataʻatā.+ 15 Tokanga ke ʻoua ʻe fai ha fuakava mo e kakai ʻo e fonuá, koeʻuhí ʻi heʻenau faifeʻauaki* ki honau ngaahi ʻotuá pea feilaulau ki honau ngaahi ʻotuá,+ ʻe fakaafeʻi ai koe ʻe ha taha pea te ke kai mei heʻene feilaulaú.+ 16 Ko e moʻoni te ke ʻomi leva ai ʻa e niʻihi ʻo honau ngaahi ʻofefiné maʻa ho ngaahi fohá,+ pea ko honau ngaahi ʻofefiné te nau faifeʻauaki ki honau ngaahi ʻotuá pea fakatupunga ai ho ngaahi fohá ke nau faifeʻauaki ki honau ngaahi ʻotuá.+

17 “Kuo pau ke ʻoua naʻá ke ngaohi ha ngaahi ʻotua ʻo e mētale kuo haka.+

18 “Te ke tauhi ʻa e Kātoanga ʻo e Mā Taʻelēvaní.+ Te ke kai mā taʻelēvani, ʻo hangē tofu pē ko ʻeku tuʻutuʻuni kiate koé; fai eni ʻi he ʻaho ʻe fitu ʻi he taimi kuo kotofá ʻi he māhina ko ʻĀpipí,*+ koeʻuhí ko e māhina ko ʻĀpipí naʻá ke haʻu ai mei ʻIsipité.

19 “Ko e ʻuluaki tama tangata kotoa pē* ʻoku ʻaʻaku ia,+ ʻo kau ai ʻa e kotoa ʻo hoʻo fanga monumanú, tatau ai pē pe ko e ʻuluaki pulu tangata pe sipi tangata.+ 20 Ko e ʻuluaki ʻuhiki tangata ʻo ha ʻasi te ke huhuʻi ia ʻaki ha sipi. Ka ʻo kapau ʻe ʻikai te ke huhuʻi ia, kuo pau leva ke ke fesiʻi ʻa hono kiá. Te ke huhuʻi ʻa e ʻuluaki tama kotoa pē ʻi ho ngaahi fohá.+ ʻE ʻikai ha taha ʻe hā mola pē ʻi hoku ʻaó.

21 “Ko e ʻaho ʻe ono te ke ngāue ai, ka ʻi he ʻaho hono fitú te ke mālōlō ai.*+ Naʻa mo e ʻi he lolotonga ʻo e taimi palaú pea ʻi he utu-taʻú, te ke mālōlō ai.

22 “Pea te ke kātoangaʻi hoʻo Kātoanga ʻo e Ngaahi Uiké ʻaki ʻa e ʻuluaki fua kuo motuʻa ʻo e utu-taʻu uité, pea mo e Kātoanga ʻo e Tānakí* ʻi he fakaʻosinga ʻo e taʻú.+

23 “Tuʻo tolu ʻi he taʻu, ʻe hā ai ʻa hoʻo kakai tangatá kotoa ʻi he ʻao ʻo e ʻEiki moʻoní, ʻa Sihova, ko e ʻOtua ʻo ʻIsilelí.+ 24 He te u kapusi ʻa e ngaahi puleʻangá mei ho ʻaó,+ pea te u fakalahi ho feituʻú, pea ʻe ʻikai ha taha ʻe holi ki ho fonuá lolotonga hoʻo ʻalu hake ke sio ki he fofonga ʻo Sihova ko ho ʻOtuá tuʻo tolu ʻi he taʻu.

25 “Kuo pau ke ʻoua naʻá ke foaki ʻa e toto ʻo e feilaulau kiate aú fakataha mo ha meʻa pē kuo fakalēvani.+ Ko e feilaulau ʻo e kātoanga Pāsová ʻe ʻikai ke tuku ia ʻi he pō ko iá ʻo aʻu ki he pongipongí.+

26 “Ko e lelei taha ʻo e ʻuluaki fua kuo motuʻa ʻi ho kelekelé te ke ʻomi ia ki he fale ʻo Sihova ko ho ʻOtuá.+

“Kuo pau ke ʻoua naʻá ke haka ha kiʻi kosi ʻi he huʻahuhu ʻo ʻene faʻeé.”+

27 Naʻe hoko atu ʻa e folofola ʻa Sihova kia Mōsesé: “Te ke hiki ʻa e ngaahi leá ni,+ koeʻuhí ʻi he fakatatau ki he ngaahi leá ni, ʻoku ou fai ai ha fuakava mo koe pea mo ʻIsileli.”+ 28 Pea naʻá ne nofo ai mo Sihova ʻi he ʻaho ʻe 40 mo e pō ʻe 40. Naʻe ʻikai te ne kai ha mā mo inu ha vai.+ Pea naʻá Ne hiki ʻi he ongo lauʻimaká ʻa e ngaahi lea ʻo e fuakavá, ʻa e Fekau ʻe Hongofulú.*+

29 Naʻe ʻalu hifo leva ʻa Mōsese mei Moʻunga Sainai, pea ko e ongo lauʻimaka ʻo e Fakamoʻoní naʻe ʻi hono nimá.+ ʻI heʻene ʻalu hifo mei he moʻungá, naʻe ʻikai ke ʻilo ʻe Mōsese naʻe ulo ʻa e kili ʻo hono matá koeʻuhí naʻá ne talanoa mo e ʻOtuá. 30 ʻI he sio ʻa ʻĒlone mo e kotoa ʻo e kau ʻIsilelí kia Mōsesé, naʻa nau fakatokangaʻi naʻe ulo ʻa e kili ʻo hono matá pea naʻa nau ilifia ke fakaofiofi kiate ia.+

31 Ka naʻe ui atu ʻa Mōsese kiate kinautolu, ko ia naʻe ʻalu atu ʻa ʻĒlone mo e ngaahi ʻeiki kotoa ʻo e fuʻu fakatahá kiate ia, pea naʻe talanoa ʻa Mōsese mo kinautolu. 32 ʻI he hili iá, naʻe fakaofiofi atu ʻa e kotoa ʻo e kau ʻIsilelí kiate ia, pea naʻá ne ʻoange kiate kinautolu ʻa e ngaahi fekau kotoa pē naʻe ʻoange ʻe Sihova kiate ia ʻi Moʻunga Sainaí.+ 33 ʻI he ʻosi ʻa e talanoa ʻa Mōsese mo kinautolú, naʻá ne ʻai ha pūlou ki hono matá.+ 34 Ka ʻi he taimi naʻe hū atu ai ʻa Mōsese ki he ʻao ʻo Sihová ke talanoa mo iá, naʻá ne toʻo ʻa e pūloú kae ʻoua kuó ne hū ki tuʻa.+ Naʻá ne hū leva ki tuʻa ʻo ne fakahā ki he kau ʻIsilelí ʻa e ngaahi fekau naʻá ne maʻú.+ 35 Pea naʻe sio ʻa e kau ʻIsilelí naʻe ulo ʻa e kili ʻo e mata ʻo Mōsesé; pea naʻe fakafoki leva ʻe Mōsese ʻa e pūloú ki hono matá kae ʻoua ke ne hū ki loto ke talanoa mo e ʻOtuá.*+

35 Ki mui ai, naʻe fakatahatahaʻi mai ʻe Mōsese ʻa e fuʻu fakataha fakakātoa ʻo e kau ʻIsilelí peá ne pehē kiate kinautolu: “Ko e ngaahi meʻa eni kuo tuʻutuʻuni ʻe Sihova ke faí:+ 2 Ko e ngāué ke fai ia ʻi he ʻaho ʻe ono, ka ko e ʻaho hono fitú ʻe hoko ia ʻo māʻoniʻoni kiate kimoutolu, ko ha Sāpate ʻo e mālōlō fakaʻaufuli kia Sihova.+ Ko ha taha pē ʻokú ne fai ai ha ngāue ʻe tāmateʻi.+ 3 Kuo pau ke ʻoua naʻa mou tutu ha afi ʻi ha taha pē ʻo homou ngaahi nofoʻangá ʻi he ʻaho Sāpaté.”

4 Naʻe pehē leva ʻe Mōsese ki he fuʻu fakataha fakakātoa ʻo e kau ʻIsilelí: “Ko e meʻa eni kuo tuʻutuʻuni ʻe Sihová, 5 ‘Tānaki ha meʻaʻofa maʻa Sihova mei homou lotolotongá.+ Tuku ki he tokotaha kotoa ʻoku loto-leleí+ ke ne ʻomi ha meʻaʻofa kia Sihova: Ko e koula, siliva, kopa, 6 filo pulū, filo fulufuluʻisipi vāleti, filo kula ʻahoʻaho, līneni lelei, fulufuluʻikosi,+ 7 kiliʻisipi tangata kuo fakalanu kulokula, kiliʻisila, papa sitimi, 8 lolo ki he ngaahi māmá, paʻame* ki he lolo paní pea ki he ʻinisēnisi namu-kakalá,+ 9 maka ʻōnike, mo e ngaahi maka kehe ke fokotuʻu ʻi he ʻēfotí+ pea mo e sifa-fatafatá.+

10 “‘Tuku ke haʻu ʻa e tokotaha kotoa ʻoku pōtoʻi*+ ʻi homou lotolotongá ʻo ngaohi ʻa e meʻa kotoa pē kuo tuʻutuʻuni ʻe Sihová, 11 ʻa ia ko e tāpanekalé mo hono kongokongá kotoa pea mo hono ʻufiʻufí, ko hono ngaahi meʻa-fakamaʻú mo hono ngaahi tokotuʻu tapafā lōloá, ko hono ngaahi vaʻakaú, ko hono ngaahi poú, mo hono ngaahi tuʻuʻangá; 12 ko e ʻAʻaké+ mo hono ongo vaʻakaú,+ ko e tāpuní,+ mo e puipui+ vahevahé; 13 ko e tēpilé+ mo hono ongo vaʻakaú mo e kotoa ʻo hono ngaahi naunaú pea mo e mā foakí;+ 14 ko e tuʻunga-maama+ ke maama aí mo hono ngaahi naunaú mo hono ngaahi māmá pea mo e lolo ke uloʻakí;+ 15 ko e ʻōlita ʻo e ʻinisēnisí+ mo hono ongo vaʻakaú; ko e lolo paní mo e ʻinisēnisi namu-kakalá;+ ko e puipui ki he hūʻanga ʻo e tāpanekalé; 16 ko e ʻōlita ʻo e feilaulau tutú+ mo hono meʻa vangavanga kopá, ko hono ongo vaʻakaú mo e kotoa ʻo hono ngaahi naunaú; ko e fuʻu pēsoní mo hono tuʻuʻangá;+ 17 ko e puipui ʻo e lotoʻaá,+ ko hono ngaahi poú mo hono ngaahi tuʻuʻangá; ko e puipui ʻo e hūʻanga ki he lotoʻaá; 18 ko e ngaahi pine tēniti ʻo e tāpanekalé mo e ngaahi pine tēniti ʻo e lotoʻaá mo honau ngaahi afó;+ 19 ko e ngaahi kofu+ kuo tuitui lelei ki he fakahoko fatongia ʻi he feituʻu toputapú, ko e ngaahi kofu toputapu moʻo ʻĒlone+ ko e taulaʻeikí, mo e ngaahi kofu ʻo hono ngaahi fohá ki heʻenau ngāue ko e kau taulaʻeikí.’”

20 Ko ia naʻe ʻalu atu ʻa e fuʻu fakataha kotoa ʻo e kau ʻIsilelí mei he ʻao ʻo Mōsesé. 21 Pea ko e tokotaha kotoa ʻa ia naʻe ueʻi ia ʻe hono lotó+ mo e tokotaha kotoa ʻa ia naʻe ueʻi ia ʻe hono laumālié naʻa nau haʻu ʻo ʻomi ʻenau meʻaʻofa kia Sihová ke ngāueʻaki ki he tēniti feʻiloakiʻangá, ki he ngāue kotoa aí, pea ki he ngaahi kofu toputapú. 22 Naʻa nau hanganaki haʻu, ko e kau tangata fakataha mo e kau fefine, ʻo nau haʻu taki taha mo ha loto-lelei, ʻo ʻomi ʻa e ngaahi foʻi pine, ngaahi hau, ngaahi foʻi mama, mo e meʻa-teuteu kehe, pea pehē ki he ngaahi meʻa koula kehekehe. Naʻa nau ʻoatu kotoa ʻa ʻenau ngaahi feilaulau* ʻo e koulá kia Sihova.+ 23 Pea ko e faʻahinga kotoa naʻe ʻi ai ʻenau filo puluú, filo fulufuluʻisipi vāletí, filo kula ʻahoʻahó, līneni leleí, fulufuluʻikosí, kiliʻisipi tangata kuo fakalanu kulokulá, mo e kiliʻisilá naʻa nau ʻomi ia. 24 Ko e faʻahinga kotoa naʻa nau meʻaʻofaʻaki ʻa e silivá mo e kopá naʻa nau ʻomi ʻa e meʻaʻofa ke foaki kia Sihova, pea ko e faʻahinga kotoa naʻe ʻi ai ʻenau papa sitimi ke ngāueʻaki ʻi ha tafaʻaki pē ʻo e ngāué naʻa nau ʻomi ia.

25 Ko e kotoa ʻo e kau fefine pōtoʻí+ naʻa nau ngaohi filo ʻaki honau nimá, pea naʻa nau ʻomi ʻa e meʻa naʻa nau ngaohí: Ko e filo pulū, filo fulufuluʻisipi vāleti, filo kula ʻahoʻaho, mo e līneni lelei. 26 Pea ko e kotoa ʻo e kau fefine pōtoʻí ʻa ia naʻe ueʻi kinautolu ʻe honau lotó naʻa nau ngaohi filo ʻaki ʻa e fulufuluʻikosí.

27 Pea ko e ngaahi ʻeikí naʻa nau ʻomai ʻa e ngaahi maka ʻōnike mo e ngaahi maka kehe ke fokotuʻu ʻi he ʻēfotí mo e sifa-fatafatá,+ 28 mo e paʻame pea mo e lolo+ ke uloʻakí pea ki he paní pea ki he ʻinisēnisi namu-kakalá.+ 29 Ko e kotoa ʻo e kau tangata mo e kau fefine ʻa ia naʻe ueʻi kinautolu ʻe honau lotó naʻa nau ʻomai ha meʻa ki he ngāue ʻa ia naʻe tuʻutuʻuni ʻe Sihova, fakafou ʻia Mōsese ke faí; naʻe ʻomai ia ʻe he kau ʻIsilelí ko ha feilaulau loto-tauʻatāina kia Sihova.+

30 Naʻe pehē leva ʻe Mōsese ki he kau ʻIsilelí: “Vakai, kuo fili ʻe Sihova ʻa Pesalili ko e foha ʻo ʻUli ko e foha ʻo Hua ʻo e matakali ʻo Siutá.+ 31 Kuó ne fakafonu ia ʻaki ʻa e laumālie ʻo e ʻOtuá, ʻo ne foaki kiate ia ʻa e poto, mahino, mo e ʻilo ki he faʻahinga kotoa pē ʻo e ngāue fakameaʻá 32 ki hono faʻu ʻa e sīpinga ʻo e ngaahi meʻá, ki hono ngāueʻaki ʻa e koula, siliva, mo e kopa, 33 ki hono tutuʻu mo hono fokotuʻu ʻo e ngaahi maká, pea ki hono ngaohi ʻa e ngaahi meʻa fakasanisani kehekehe mei he papá. 34 Pea kuó ne ʻai ʻa e malava ke faiakó ki hono lotó, kiate ia mo ʻAholiapi+ ko e foha ʻo ʻAhisamaki ʻo e matakali ʻo Taní. 35 Kuó ne fakafonu kinaua ʻaki ʻa e pōtoʻi*+ ke na fai ʻa e ngāue kotoa ʻa ha tangata nima-meaʻa, ko ha tokotaha tui nikonikoʻi, mo ha tokotaha lālanga ʻo ngāueʻaki ʻa e filo pulū, filo fulufuluʻisipi vāleti, filo kula ʻahoʻaho, mo e līneni lelei, pea mo ha tokotaha ngāue ʻi he meʻa lalangá. Ko e ongo tangatá ni te na fai ʻa e faʻahinga ngāue kehekehe pea teuteu ʻa e faʻahinga sīpinga kehekehe.

36 “ʻE ngāue ʻa Pesalili fakataha mo ʻAholiapi pea mo e tangata pōtoʻi* kotoa pē ʻa ia kuo foaki ki ai ʻe Sihova ʻa e poto mo e mahino koeʻuhi ke ne ʻiloʻi ʻa e founga ke fakahoko ai ʻa e ngāue kotoa pē ʻi he ngāue toputapú ʻo hangē tofu pē ko ia naʻe tuʻutuʻuni ʻe Sihová.”+

2 Naʻe ui leva ʻe Mōsese ʻa Pesalili mo ʻAholiapi mo e tangata pōtoʻi kotoa pē kuo ʻai ʻe Sihova ʻa e potó+ ki hono lotó, ʻa e tokotaha kotoa pē naʻe ueʻi ia ʻe hono lotó ke ne pole ke fai ʻa e ngāué.+ 3 Naʻa nau toʻo leva meia Mōsese ʻa e meʻaʻofa+ kotoa pē naʻe ʻomi ʻe he kau ʻIsilelí ki he ngāue ʻo e feituʻu toputapú. Kae kehe, naʻe hokohoko atu pē ʻenau ʻomi kiate ia ha ngaahi feilaulau loto-tauʻatāina ʻi he pongipongi ki he pongipongi.

4 Pea ʻi he hili ʻenau kamataʻi ʻa e ngāue toputapú, naʻe haʻu taha taha ʻa e kau ngāue pōtoʻí kotoa, 5 pea naʻa nau tala ange kia Mōsese: “ʻOku ʻomi ʻe he kakaí ʻa e meʻa ʻoku hulu atu ia ʻi he meʻa ʻoku fiemaʻu ki he ngāue kuo tuʻutuʻuni ʻe Sihova ke faí.” 6 Ko ia naʻe tuʻutuʻuni ʻe Mōsese ke fai ha fanongonongo ʻi he kotoa ʻo e ʻapitangá, ʻo pehē: “Kau tangata mo e kau fefine, ʻoua ʻe toe ʻomai ha ngaahi koloa ki he meʻaʻofa toputapú.” ʻI he meʻa ko iá naʻe taʻofi ai ʻa e kakaí mei hono toe ʻomi ha meʻá. 7 Naʻe feʻungaʻānoa ʻa e koloá ki he ngāue kotoa pē ke faí, pea naʻe mahulu atu ia ai.

8 Ko ia naʻe ngaohi ʻe he kau ngāue pōtoʻí+ kotoa ʻa e tāpanekalé+ ʻaki ʻa e tupenu tēniti ʻe hongofulu ʻo e līneni lelei kuo vilohi hono filó, filo pulū, filo fulufuluʻisipi vāleti, mo e filo kula ʻahoʻaho; naʻá ne* ngaohi ia pea tui ki ai ʻa e fakatātā ʻo e ngaahi selupimi.+ 9 Ko e tupenu tēniti taki taha naʻe kiupite* ʻe 28 hono lōloá pea kiupite ʻe 4 hono fālahí. Ko e ngaahi tupenu tēnití kotoa naʻa nau lahi tatau. 10 Naʻá ne hokoʻi fakataha leva ʻa e tupenu tēniti ʻe nima, pea ko e tupenu tēniti ʻe nima kehé naʻá ne hokoʻi fakataha. 11 ʻI he hili iá, naʻá ne ngaohi ha ngaahi noʻo fakafuopotopoto ʻo e afo pulū ʻi he tapa ʻo e tupenu tēniti ʻe taha ʻi he feituʻu ʻa ia ʻe hokoʻi aí. Naʻá ne fai ʻa e meʻa tatau ki he tapa taupotu ki tuʻa ʻo e tupenu tēniti ʻe tahá ʻi he feituʻu tatau ko ē ʻa ia ʻe hokoʻi aí. 12 Naʻá ne ngaohi ʻa e noʻo fakafuopotopoto ʻe 50 ʻi he tupenu tēniti ʻe tahá mo e noʻo fakafuopotopoto ʻe 50 ʻi he tapa ʻo e tupenu tēniti ʻe tahá ʻi he feituʻu ʻa ia ʻe hokoʻi aí koeʻuhí ke tuʻu fehāngaaki ʻa e ngaahi noʻo fakafuopotopotó. 13 Fakaʻosí, naʻá ne ngaohi ʻa e meʻa-fakamaʻu koula ʻe 50 pea hokoʻi fakataha ʻa e ongo tupenu tēnití ʻaki ʻa e ngaahi meʻa-fakamaʻú, koeʻuhí ke hoko ai ʻa e tāpanekalé ʻo taha.

14 Naʻá ne ngaohi leva ʻa e ngaahi tupenu tēniti fulufuluʻikosi ki he ʻufiʻufi ʻi he funga tāpanekalé. Naʻá ne ngaohi ʻa e tupenu tēniti ʻe 11.+ 15 Ko e tupenu tēniti taki taha naʻe kiupite ʻe 30 hono lōloá pea kiupite ʻe 4 hono fālahí. Ko e tupenu tēniti ʻe 11 naʻa nau lahi tatau. 16 Naʻá ne hokoʻi fakataha leva ʻa e tupenu tēniti ʻe nima, peá ne hokoʻi fakataha mo e tupenu tēniti ʻe ono kehé. 17 Ko hono hokó, naʻá ne ngaohi ʻa e noʻo fakafuopotopoto ʻe 50 ʻo lele ʻi he tapa taupotu ki tuʻa ʻo e tupenu tēnití ʻi he feituʻu ʻe hokoʻi aí, pea naʻá ne ngaohi ʻa e noʻo fakafuopotopoto ʻe 50 ʻo lele ʻi he tapa ʻo e tupenu tēniti ʻe taha ʻa ia ʻe hokoʻi fakataha mo iá. 18 Pea naʻá ne ngaohi ʻa e meʻa-fakamaʻu kopa ʻe 50 ke hokoʻi fakataha ʻaki ʻa e tēnití ke hoko ʻo taha pē.

19 Naʻá ne ngaohi ha ʻufiʻufi ki he tēnití mei he kiliʻisipi tangata kuo fakalanu kulokula pea mo ha ʻufiʻufi mei he kiliʻisila ke hili hifo ʻi ʻolunga ai.+

20 Naʻá ne ngaohi leva ʻa e ngaahi tokotuʻu tapafā lōloa ʻo e tāpanekalé mei he papa sitimi,+ ʻa ia naʻe tuʻu hangatonu.+ 21 Ko e tokotuʻu tapafā lōloa taki taha naʻe kiupite ʻe hongofulu hono māʻolungá pea kiupite ʻe taha mo e konga hono fālahí. 22 Ko e tokotuʻu tapafā lōloa taki taha naʻe ʻi ai hono fakanifo* ʻe ua naʻe tuʻu ʻotu taha. Ko e anga ia ʻo ʻene ngaohi ʻa e ngaahi tokotuʻu tapafā lōloa kotoa pē ʻo e tāpanekalé. 23 Ko ia naʻá ne ngaohi ʻa e ngaahi tokotuʻu tapafā lōloa ki he tafaʻaki fakatonga ʻo e tāpanekalé, ko e tokotuʻu tapafā lōloa ʻe 20, ʻo hanga ki he tongá. 24 Naʻá ne ngaohi leva ʻa e tuʻuʻanga siliva ʻe 40 ke fokotuʻu ʻi lalo ʻi he tokotuʻu tapafā lōloa ʻe 20, ko e tuʻuʻanga ʻe ua ʻi lalo ʻi he tokotuʻu tapafā lōloa ʻe taha ki hono ongo fakanifó mo e tuʻuʻanga ʻe ua ʻi lalo ʻi he tokotuʻu tapafā lōloa taki taha ʻe hoko atu aí ki hono ongo fakanifó.+ 25 Ki he tafaʻaki ʻe taha ʻo e tāpanekalé, ʻa e tafaʻaki fakatokelaú, naʻá ne ngaohi ki ai ʻa e tokotuʻu tapafā lōloa ʻe 20 26 mo honau tuʻuʻanga siliva ʻe 40, ko e tuʻuʻanga ʻe ua ʻi lalo ʻi he tokotuʻu tapafā lōloa ʻe taha mo e tuʻuʻanga ʻe ua ʻi lalo ʻi he ngaahi tokotuʻu tapafā lōloa taki taha ko eé.

27 Ki he konga ki mui ʻo e tāpanekalé ki he hihifó, naʻá ne ngaohi ki ai ʻa e tokotuʻu tapafā lōloa ʻe ono.+ 28 Naʻá ne ngaohi ʻa e tokotuʻu tapafā lōloa ʻe ua ke hoko ko e ongo pou tuliki ʻo e tāpanekalé ʻi he ongo tuliki ʻi muí. 29 Ko e ongo poú naʻe tokotuʻu ʻe ua mei lalo ki ʻolunga, ʻo aʻu ki he ʻuluaki kavei fuopotopotó. Ko e meʻa ia naʻá ne fai ki he ongo pou tulikí. 30 Ko ia naʻe feʻunga fakakātoa ia mo e tokotuʻu tapafā lōloa ʻe valu fakataha mo honau tuʻuʻanga siliva ʻe 16, ko e tuʻuʻanga ʻe ua ʻi lalo ʻi he tokotuʻu tapafā lōloa taki taha.

31 Naʻá ne ngaohi leva ʻa e ngaahi vaʻakau mei he papa sitimí, ko e vaʻakau ʻe nima ki he ngaahi tokotuʻu tapafā lōloa ʻo e tafaʻaki ʻe taha ʻo e tāpanekalé+ 32 mo e vaʻakau ʻe nima ki he tokotuʻu tapafā lōloa ʻo e tafaʻaki ʻe taha ʻo e tāpanekalé mo e vaʻakau ʻe nima ki he tokotuʻu tapafā lōloa ʻo e tāpanekalé ki he konga ki muí ki he hihifó. 33 Naʻá ne ngaohi ʻa e vaʻakau ʻi loto ke lele ʻi loto-mālie ʻi he ngaahi tokotuʻu tapafā lōloá mei he ngataʻanga ʻe tahá ki he ngataʻanga ʻe tahá. 34 Naʻá ne kofuʻaki ʻa e ngaahi tokotuʻu tapafā lōloá ʻa e koula, pea naʻá ne ngaohi ʻa honau ngaahi kavei fuopotopotó ʻaki ʻa e koula ke tui ai ʻa e ngaahi vaʻakaú, pea naʻá ne kofuʻaki ʻa e ngaahi vaʻakaú ʻa e koula.+

35 Naʻá ne ngaohi leva ha puipui+ mei he filo pulū, filo fulufuluʻisipi vāleti, filo kula ʻahoʻaho, mo e līneni lelei kuo vilohi hono filó. Naʻá ne ngaohi ia ʻo tui ki ai+ ʻa e fakatātā ʻo e ngaahi selupimi.+ 36 Pea naʻá ne ngaohi ki ai ha pou sitimi ʻe fā pea kofuʻaki ia ʻa e koula, fakataha mo e ngaahi huka koula, pea haka ki ai ʻa e tuʻuʻanga siliva ʻe fā. 37 Ko hono hokó, naʻá ne ngaohi ki he hūʻanga ʻo e tēnití ha puipui mei he filo pulū, filo fulufuluʻisipi vāleti, filo kula ʻahoʻaho, mo e līneni lelei kuo vilohi hono filó ʻo lalanga fakataha,+ 38 pehē foki ki hono pou ʻe nimá mo honau ngaahi huká. Naʻá ne kofuʻaki ʻa e koula ʻa e ngaahi ʻuluʻi-poú mo honau ngaahi tautauʻangá,* ka ko honau tuʻuʻanga ʻe nimá naʻe ngaohi ia mei he kopá.

37 Naʻe ngaohi leva ʻe Pesalili+ ʻa e ʻAʻaké+ mei he papa sitimí. Naʻe kiupite* ʻe ua mo e konga hono lōloá pea kiupite ʻe taha mo e konga hono fālahí pea kiupite ʻe taha mo e konga hono māʻolungá.+ 2 Naʻá ne kofuʻaki ia ʻa e koula haohaoa ʻi loto mo tuʻa pea fakatapa* koula takatakai ia.+ 3 ʻI he hili iá, naʻá ne haka ha kavei fuopotopoto koula ʻe fā ki ai, ki ʻolunga hake ʻi hono vaʻe ʻe faá, ʻa ia ko e kavei fuopotopoto ʻe ua ʻi hono tafaʻaki ʻe taha mo e kavei fuopotopoto ʻe ua ʻi hono tafaʻaki ʻe tahá. 4 Ko hono hokó, naʻá ne ngaohi ha ongo vaʻakau mei he papa sitimí pea kofuʻaki ia ʻa e koula.+ 5 Hili iá, naʻá ne tui ʻa e ongo vaʻakaú ʻi he ngaahi kavei fuopotopotó ʻi he ongo tafaʻaki ʻo e ʻAʻaké ki hono fua ʻo e ʻAʻaké.+

6 Naʻá ne ngaohi ʻa e tāpuní mei he koula haohaoa.+ Naʻe kiupite ʻe ua mo e konga hono lōloá pea kiupite ʻe taha mo e konga hono fālahí.+ 7 Naʻá ne ngaohi leva ʻa e selupimi ʻe ua+ mei he koula kuo tuki ʻi he ongo ngataʻanga fakatouʻosi ʻo e tāpuní.+ 8 Ko e selupimi ʻe taha naʻe ʻi he ngataʻanga ʻe taha, pea ko e selupimi ʻe taha ʻi he ngataʻanga ʻe tahá. Naʻá ne ngaohi ʻa e ongo selupimí ʻi he ongo ngataʻanga fakatouʻosi ʻo e tāpuní. 9 Ko e ongo selupimí naʻe mafola atu ʻa hona kapakaú ʻi ʻolunga, ʻo na fakamalumalu ʻa e tāpuní ʻaki hona ongo kapakaú.+ Naʻá na fehāngaaki, pea ko hona matá naʻe hanga ia ki he tāpuní.+

10 Naʻá ne ngaohi leva ʻa e tēpilé mei he papa sitimí.+ Naʻe kiupite ʻe ua hono lōloá, kiupite ʻe taha hono fālahí, pea kiupite ʻe taha mo e konga hono māʻolungá.+ 11 Pea naʻá ne kofuʻaki ia ʻa e koula haohaoa pea fakatapa* koula takatakai ia. 12 Ko hono hokó, naʻá ne ngaohi hano kofu ko hono fālahí ko e laulahi ʻo e lauʻinimá* ke lele takatakai ʻi ai mo ha fakatapa* koula takatakai ʻi he kofú. 13 ʻIkai ngata aí, naʻá ne haka ha kavei fuopotopoto koula ʻe fā ki ai pea fokotuʻu ʻa e ngaahi kavei fuopotopotó ʻi he tuliki ʻe fā ko ia naʻe fakamaʻu ki ai ʻa e vaʻe ʻe faá. 14 Ko e ngaahi kavei fuopotopotó naʻe ofi ia ki he kofú ke tui ai ʻa e ongo vaʻakau naʻe ngāueʻaki ki hono fua ʻo e tēpilé. 15 Naʻá ne ngaohi leva ʻa e ongo vaʻakau ki hono fua ʻo e tēpilé mei he papa sitimí pea kofuʻaki ia ʻa e koula. 16 ʻI he hili iá, naʻá ne ngaohi mei he koula haohaoa ʻa e ngaahi naunau naʻe ʻai ki he tēpilé—ʻa hono ngaahi tisí, ko hono ngaahi ipú, mo hono ngaahi poulú mo e ngaahi sioki ʻa ia ʻe lingi ʻaki ʻa e ngaahi feilaulau inú.+

17 Naʻá ne ngaohi leva ʻa e tuʻunga-māmá+ mei he koula haohaoa. Naʻá ne ngaohi ʻa e tuʻunga-māmá mei he koula kuo tuki. Ko hono meʻa-tuʻú, ko hono sinó, ko hono ngaahi matalá, ko hono ngaahi motó, mo hono ngaahi lauʻimatalá naʻa nau sino taha pē.+ 18 Ko e vaʻa ʻe ono naʻe haʻu mei hono sinó, ko e vaʻa ʻe tolu ʻo e tuʻunga-māmá mei hono tafaʻaki ʻe taha mo e vaʻa ʻe tolu mei hono tafaʻaki ʻe tahá. 19 Ko e matala ʻe tolu ʻa ia ʻoku hangē hono fuó ko e matalaʻi ʻalimoní naʻe ʻi he vaʻa ʻe taha, ʻo fakavahavaha ʻaki ʻa e motó mo e lauʻimatalá, pea mo e matala ʻe tolu ʻa ia ʻoku hangē hono fuó ko e matalaʻi ʻalimoní naʻe ʻi he vaʻa ia ʻe tahá, ʻo fakavahavaha ʻaki ʻa e motó mo e lauʻimatalá. Naʻe fai eni ki he vaʻa ʻe ono naʻe haʻu mei he sino ʻo e tuʻunga-māmá. 20 Pea ʻi he sino ʻo e tuʻunga-māmá naʻe ʻi ai ʻa e matala ʻe fā ʻa ia ʻoku hangē hono fuó ko e matalaʻi ʻalimoní, ʻo fakavahavaha ʻaki ʻa e motó mo e lauʻimatalá. 21 Naʻe ʻi ai ha moto ʻi lalo ʻi he ʻuluaki ongo vaʻa naʻe haʻu mei he sinó mo ha moto ʻi lalo ʻi he ongo vaʻa hono hokó mo ha moto ʻi lalo ʻi he ongo vaʻa hono hokó, ki he vaʻa ʻe ono naʻe haʻu mei he sino ʻo e tuʻunga-māmá. 22 Ko e ngaahi motó mo e ngaahi vaʻá mo e tuʻunga-māmá kakato naʻe ngaohi ia ke hoko ko e konga koula haohaoa pē ʻe taha kuo tuki. 23 Naʻá ne ngaohi leva hono maama+ ʻe fitú mo hono ngaahi tongí mo hono ngaahi tānakiʻanga ʻo e vavae maama ʻosiʻosí mei he koula haohaoa. 24 Naʻá ne ngaohi ia, fakataha mo hono naunaú kotoa, mei ha talēniti* ʻo e koula haohaoa.

25 Naʻá ne ngaohi he taimi ko ení ʻa e ʻōlita ʻo e ʻinisēnisí+ mei he papa sitimí. Naʻe tapafā tatau ia, ko e kiupite ʻe taha hono lōloá, kiupite ʻe taha hono fālahí pea kiupite ʻe ua hono māʻolungá. Ko hono ngaahi meʻatuí naʻe konga taha pē mo ia.+ 26 Naʻá ne kofuʻaki ia ʻa e koula haohaoa, ʻa hono fungá mo hono ngaahi tafaʻakí takatakai kotoa mo hono ngaahi meʻatuí, pea naʻá ne ngaohi ha fakatapa* koula takatakai ai. 27 Naʻá ne ngaohi ʻa e ongo kavei fuopotopoto koula ki ai ʻi lalo ʻi hono fakatapá* ʻi he ongo tafaʻaki ʻokú na tuʻu fehangahangaí ke tui ai ʻa e ongo vaʻakau naʻe ngāueʻaki ki hono fua iá. 28 Hili iá, naʻá ne ngaohi ʻa e ongo vaʻakaú mei he papa sitimí pea kofuʻaki ia ʻa e koula. 29 Naʻá ne ngaohi foki ʻa e lolo pani+ toputapú mo e ʻinisēnisi namu-kakala+ haohaoá, kuo fio ʻi he tuʻunga pōtoʻi.*

38 Naʻá ne ngaohi ʻa e ʻōlita ʻo e feilaulau tutú mei he papa sitimí. Naʻe tapafā tatau ia, ko e kiupite* ʻe nima hono lōloá, kiupite ʻe nima hono fālahí, pea kiupite ʻe tolu hono māʻolungá.+ 2 Pea naʻá ne ngaohi ʻa hono ngaahi meʻatuí ʻi hono ngaahi tuliki ʻe faá. Ko hono ngaahi meʻatuí naʻe konga taha pē mo ia. Ko hono hokó naʻá ne kofuʻaki ia ʻa e kopa.+ 3 ʻI he hili iá, naʻá ne ngaohi ʻa e ngaahi naunau kotoa ʻo e ʻōlitá, ko e ngaahi kané, ko e ngaahi sāvoló, ko e ngaahi poulú, ko e ngaahi fuʻu huhú, pea mo e ngaahi ʻaiʻanga malalá. Ko hono ngaahi naunaú kotoa naʻá ne ngaohi ia mei he kopá. 4 Naʻá ne toe ngaohi ha meʻa vangavanga ki he ʻōlitá, ko ha meʻa vangavanga kopa, ʻi lalo hifo ʻi hono kofú, ʻo fokotuʻu ia ʻi hono vaeuaʻangá. 5 Naʻá ne haka ha kavei fuopotopoto ʻe fā ki he tuliki ʻe fā ofi ki he meʻa vangavanga kopá, ko ha meʻa ke tui ai ʻa e ongo vaʻakaú. 6 ʻI he hili iá, naʻá ne ngaohi ʻa e ongo vaʻakaú mei he papa sitimí pea kofuʻaki ia ʻa e kopá. 7 Naʻá ne tui ʻa e ongo vaʻakaú ʻi he ngaahi kavei fuopotopoto ʻi he ongo tafaʻaki ʻo e ʻōlitá ki hono fua iá. Naʻá ne ngaohi ʻa e ʻōlitá ko ha puha papa ʻoku ava ʻa loto.

8 Pea naʻá ne ngaohi ʻa e fuʻu pēsoní mei he kopá+ mo hono tuʻuʻanga kopá; naʻá ne ngāueʻaki ʻa e ngaahi sioʻata* ʻa e kau fefine ʻa ia naʻe fokotuʻutuʻu maau ke nau ngāue ʻi he hūʻanga ʻo e tēniti feʻiloakiʻangá.

9 Naʻá ne ngaohi leva ʻa e lotoʻaá.+ Naʻá ne ngaohi ʻa e puipui ki he tafaʻaki fakatonga ʻo e lotoʻaá, mei he līneni lelei kuo vilohi hono filó, ko e kiupite ʻe 100,+ ʻo hanga ki he tongá. 10 Naʻe ʻi ai ʻa e pou ʻe 20 mo e tuʻuʻanga kopa ʻe 20, pea ko e ngaahi huka ʻo e ngaahi poú mo honau ngaahi tautauʻangá* naʻe ngaohi ia mei he silivá. 11 Pehē foki, ki he tafaʻaki fakatokelaú, naʻe ʻi ai ʻa e puipui naʻe kiupite ʻe 100. Ko honau pou ʻe 20 mo honau tuʻuʻanga ʻe 20 naʻe ngaohi ia mei he kopá. Ko e ngaahi huka ʻo e ngaahi poú mo honau ngaahi tautauʻangá* naʻe ngaohi ia mei he silivá. 12 Ka ki he tafaʻaki fakahihifó, ko e puipuí naʻe kiupite ʻe 50. Naʻe ʻi ai ʻa e pou ʻe hongofulu mo e tuʻuʻanga ʻe hongofulu, pea ko e ngaahi huka ʻo e ngaahi poú mo honau ngaahi tautauʻangá* naʻe ngaohi ia mei he silivá. 13 Ko e fālahi ʻo e tafaʻaki fakahahaké, ki he hopoʻanga laʻaá, naʻe kiupite ʻe 50. 14 Naʻe kiupite ʻe 15 ʻa e puipui ʻi he tafaʻaki ʻe taha ʻo e hūʻangá, fakataha mo e pou ʻe tolu mo e tuʻuʻanga ʻe tolu. 15 Pea ki he tafaʻaki ʻe taha ʻo e hūʻanga ʻo e lotoʻaá, naʻe ʻi ai ʻa e puipui naʻe kiupite ʻe 15, mo e pou ʻe tolu mo e tuʻuʻanga ʻe tolu. 16 Ko e kotoa ʻo e puipui takatakai ʻi he lotoʻaá naʻe ngaohi ia mei he līneni lelei kuo vilohi hono filó. 17 Ko e ngaahi tuʻuʻanga ki he ngaahi poú naʻe ngaohi ia mei he kopá, ko e ngaahi huka ʻo e ngaahi poú mo honau ngaahi tautauʻangá* naʻe ngaohi ia mei he silivá, ko e funga poú naʻe kofuʻaki ia ʻa e silivá, pea naʻe ʻi ai ʻa e ngaahi meʻa-fakamaʻu siliva ki he ngaahi pou kotoa ʻo e lotoʻaá.+

18 Ko e puipui ʻo e hūʻanga ʻo e lotoʻaá naʻe lalanga ia mei he filo pulū, filo fulufuluʻisipi vāleti, filo kula ʻahoʻaho, mo e līneni lelei kuo vilohi hono filó. Naʻe kiupite ʻe 20 hono lōloá pea kiupite ʻe 5 hono māʻolungá, ʻo māʻolunga tatau mo e puipui ʻo e lotoʻaá.+ 19 Ko honau pou ʻe faá mo honau tuʻuʻanga ʻe faá naʻe ngaohi ia mei he kopá. Ko honau ngaahi huká mo honau ngaahi tautauʻangá* naʻe ngaohi ia mei he silivá, pea ko e ngaahi funga poú naʻe kofuʻaki ia ʻa e silivá. 20 Ko e pine tēniti kotoa ki he tāpanekalé pea mo e lotoʻaá takatakai naʻe ngaohi ia mei he kopá.+

21 Ko eni ʻa e lisi ʻo e ngaahi meʻa ʻi he tāpanekalé, ʻa e tāpanekale ʻo e Fakamoʻoní,+ ʻa ia naʻe fakalau ʻi he tuʻutuʻuni ʻa Mōsesé, ko e fatongia ia ʻo e kau Līvaí+ ʻi he fakahinohino ʻa ʻĪtama+ ko e foha ʻo ʻĒlone ko e taulaʻeikí. 22 Ko Pesalili+ ko e foha ʻo ʻUli ko e foha ʻo Hua ʻo e matakali ʻo Siutá naʻá ne fai ʻa e meʻa kotoa ʻa ia naʻe tuʻutuʻuni ʻe Sihova kia Mōsesé. 23 Naʻe kau fakataha mo ia ʻa ʻAholiapi+ ko e foha ʻo ʻAhisamaki ʻo e matakali ʻo Taní, ko ha tangata nima-meaʻa pea ko ha tokotaha tui nikonikoʻi pea mo ha tokotaha lālanga ʻo e filo puluú, ko e filo fulufuluʻisipi vāletí, ko e filo kula ʻahoʻahó, mo e līneni leleí.

24 Ko e koula kotoa naʻe ngāueʻaki ki he kotoa ʻo e ngāue ʻo e potu toputapú naʻe tatau ia mo e lahi ʻo e koula ʻo e feilaulau hapaí,+ ko e talēniti* ʻe 29 mo e sikeli* ʻe 730 ʻo fakatatau ki he tuʻunga ʻo e fua sikeli ʻo e potu toputapú.* 25 Pea ko e siliva ʻa e faʻahinga naʻe lēsisita ʻi he fuʻu fakatahá ko e talēniti ʻe 100 mo e sikeli ʻe 1,775 ʻo fakatatau ki he tuʻunga ʻo e fua sikeli ʻo e potu toputapú.* 26 Ko e vaeuaʻi sikeli ki he tokotaha taki taha ko ha vaeuaʻi sikeli ia ʻo fakatatau ki he tuʻunga ʻo e fua sikeli ʻo e potu toputapú,* ki he tangata kotoa pē naʻe ʻi he lotolotonga ʻo e faʻahinga ʻa ia naʻe lēsisitá mei he 20 ʻo faai ki ʻolunga,+ ko honau fakakātoá ko e toko 603,550.+

27 Ko hono haka ʻo e ngaahi tuʻuʻanga ʻo e potu toputapú mo e ngaahi tuʻuʻanga ʻo e puipuí naʻe feʻunga ia mo e talēniti ʻe 100; ko e tuʻuʻanga ʻe 100 naʻe tatau ia ki he talēniti ʻe 100, ko e talēniti ʻe taha ki he tuʻuʻanga taki taha.+ 28 Naʻá ne ngaohi mei he sikeli ʻe 1,775 ʻa e ngaahi huka ki he ngaahi poú mo kofu ʻa e ngaahi funga poú pea hokoʻi fakataha kinautolu.

29 Ko e kopa ʻo e feilaulaú* naʻe talēniti ia ʻe 70 mo e sikeli ʻe 2,400. 30 Naʻá ne ngaohiʻaki eni ʻa e ngaahi tuʻuʻanga ʻo e hūʻanga ʻo e tēniti feʻiloakiʻangá, ko e ʻōlita kopá mo hono meʻa vangavanga kopá, ko e kotoa ʻo e ngaahi naunau ʻo e ʻōlitá, 31 ko e ngaahi tuʻuʻanga ʻi he lotoʻaá takatakai, ko e ngaahi tuʻuʻanga ʻo e hūʻanga ʻo e lotoʻaá, mo e pine tēniti kotoa ʻo e tāpanekalé pea mo e pine tēniti+ kotoa ʻi he lotoʻaá takatakai.

39 Mei he filo puluú, filo fulufuluʻisipi vāletí, mo e filo kula ʻahoʻahó,+ naʻa nau ngaohi mei ai ʻa e ngaahi kofu naʻe tuitui lelei ki he fakahoko fatongia ʻi he potu toputapú. Naʻa nau ngaohi ʻa e ngaahi kofu toputapu naʻe ʻai moʻo ʻĒloné,+ ʻo hangē tofu pē ko e tuʻutuʻuni ʻa Sihova kia Mōsesé.

2 Naʻá ne ngaohi ʻa e ʻēfotí+ mei he koulá, filo puluú, filo fulufuluʻisipi vāletí, filo kula ʻahoʻahó, pea mo e līneni lelei kuo vilohi hono filó. 3 Naʻa nau tuki ha ngaahi lauʻikoula ke manifi, pea naʻá ne hifi ia ko ha ngaahi filo ke lalanga fakataha mo e filo puluú, filo fulufuluʻisipi vāletí, filo kula ʻahoʻahó, pea mo e līneni leleí, pea naʻe nikonikoʻi ia. 4 Naʻa nau ngaohi ki ai ʻa e ongo konga ki he funga umá ʻa ia naʻe hoko‘i ʻi hono ongo tapa ʻe ua ‘i ‘olungá. 5 Pea ko e leta* kuo lalangá, ʻa ia naʻe fakamaʻu ki he ʻēfotí ke haʻi maʻu ia ki hono tuʻuʻangá,+ naʻe ngaohi ia mei he meʻa tatau, mei he koula, filo pulū, filo fulufuluʻisipi vāleti, filo kula ʻahoʻaho, pea mo e līneni lelei kuo vilohi hono filó, ʻo hangē tofu pē ko e tuʻutuʻuni ʻa Sihova kia Mōsesé.

6 Naʻa nau fokotuʻu leva ʻa e ongo maka ʻōniké ʻi he ongo tuʻuʻanga koulá, pea nau tongi ai ʻa e hingoa ʻo e ngaahi foha ʻo ʻIsilelí, ʻo hangē ko ia ko ʻenau tongi ha silá.+ 7 Naʻá ne fokotuʻu kinaua ki he ongo konga ʻi he funga uma ʻo e ʻēfotí ko ha ongo maka fakamanatu ki he ngaahi foha ʻo ʻIsilelí,+ ʻo hangē tofu pē ko e tuʻutuʻuni ʻa Sihova kia Mōsesé. 8 Naʻá ne ngaohi leva ʻa e sifa-fatafatá+ ʻi he founga ngaohi ʻa ha tokotaha lalanga nikonikoʻi, hangē ko e founga ngaohi ʻo e ʻēfotí, mei he koulá, filo puluú, filo fulufuluʻisipi vāletí, filo kula ʻahoʻahó, pea mo e līneni lelei kuo vilohi hono filó.+ 9 Naʻe tapafā tatau ia ʻi hono pelu uá. Naʻa nau ngaohi ʻa e sifa-fatafatá, ʻa ia ʻi hono pelu uá, naʻe tatau hono lōloá mo hono fālahí mo e hanga ʻe taha.* 10 Naʻa nau fokotuʻu ʻi ai ha ʻotu maka ʻe fā. Ko e ʻuluaki ʻotú ko e lupi, tōpasi, mo e ʻemalata. 11 Ko e ʻotu hono uá ko e toakase, sāfaia, mo e siasipa. 12 Ko e ʻotu hono tolú ko e lesemi,* ʻakeiti, mo e ʻametisi. 13 Pea ko e ʻotu hono faá ko e kalisolaite, ʻōnike, mo e seiti. Naʻe fokotuʻu kinautolu ʻi he ngaahi tuʻuʻanga koula. 14 Ko e ngaahi maká naʻe fehoanaki ia mo e hingoa ʻo e ngaahi foha ʻo ʻIsileli ʻe toko 12, pea ko e ngaahi hingoá naʻe tongi hangē ha silá, ko e hingoa taki taha naʻá ne fakafofongaʻi ʻa e taha ʻo e ngaahi matakali ʻe 12.

15 Naʻa nau ngaohi leva ʻa e sēini fīfī ki he sifa-fatafatá, ʻo hangē ko ha afo koula haohaoá.+ 16 Pea naʻa nau ngaohi ha tuʻuʻanga koula ʻe ua mo e ongo foʻi mama koula ʻe ua pea fakamaʻu ʻa e ongo foʻi mamá ki he ongo tuliki ʻo e sifa-fatafatá. 17 ʻI he hili iá, naʻa nau tui ʻa e ongo afo koula ʻi he ongo foʻi mama ʻi he ongo tuliki ʻo e sifa-fatafatá. 18 Naʻa nau tui leva ʻa e ongo muiʻi-afó ʻi he ongo tuʻuʻangá pea fakamaʻu kinaua ki he ongo konga ʻi he funga umá ʻi muʻa ʻi he ʻēfotí. 19 Ko hono hokó naʻa nau ngaohi ha ongo foʻi mama koula ʻo fokotuʻu kinaua ʻi he ongo tuliki ʻo e tapa ki loto ʻo e sifa-fatafatá, ʻo hanga ki he ʻēfotí.+ 20 Naʻa nau ngaohi leva ha toe ongo foʻi mama koula pea ʻai kinaua ʻi muʻa ʻi he ʻēfotí, ʻi lalo hifo ʻi he ongo konga ki he funga umá, ʻo ofi ki he feituʻu ʻoku hokoʻi aí, ʻi ʻolunga ʻi he leta* kuo lalanga ʻo e ʻēfotí. 21 Fakaʻosí, naʻa nau haʻi ʻa e sifa-fatafatá ʻaki ha afo pulū mei hono ongo foʻi mamá ki he ongo foʻi mama ʻo e ʻēfotí, koeʻuhi ke nofo maʻu ai ʻa e sifa-fatafatá ʻi hono tuʻuʻanga ʻi he ʻēfotí, ʻi ʻolunga ʻi he leta* kuo lalangá, ʻo hangē tofu pē ko e tuʻutuʻuni ʻa Sihova kia Mōsesé.

22 Naʻá ne ngaohi leva ʻa e kofu taʻenima ʻoku tui ʻi loto ʻi he ʻēfotí, kuo lalanga ʻe ha tokotaha ngāue ʻi he meʻa lalangá, mei he filo pulū ʻataʻatā.+ 23 Ko e ava ʻi he kofu taʻenimá naʻe ʻi loto-mālie ia, ʻo hangē ko e ava ʻo ha kofu-taú. Ko e avá naʻe fakatapa takatakai ia, koeʻuhí ke ʻoua ʻe mahae. 24 Ko hono hokó naʻa nau ngaohi ʻi he tapa ʻi lalo ʻo e kofu taʻenimá ha ngaahi pomikānite filo pulū, filo fulufuluʻisipi vāleti, mo e filo kula ʻahoʻaho, kuo vilohi fakataha. 25 Pea naʻa nau ngaohi ha ngaahi fafangu mei he koula haohaoa pea ʻai ʻa e ngaahi fafangú ʻi he vahaʻa ʻo e ngaahi pomikānité ʻo takatakai kotoa ʻi he tapa ʻi lalo ʻo e kofu taʻenimá, ʻi he vahaʻa ʻo e ngaahi pomikānité; 26 naʻa nau fakavahavaha ha fafangu mo ha pomikānite, ko ha fafangu mo ha pomikānite, takatakai ʻi he tapa kotoa ʻi lalo ʻo e kofu taʻenimá, ʻa ia naʻe ngāueʻaki ki he fakahoko fatongiá, ʻo hangē tofu pē ko e tuʻutuʻuni ʻa Sihova kia Mōsesé.

27 Pea naʻa nau ngaohi ʻa e ngaahi kofu tōtōlofá mei he līneni lelei, kuo lalanga ʻe ha tokotaha ngāue ʻi he meʻa lalangá, moʻo ʻĒlone mo hono ngaahi fohá,+ 28 pea mo e faʻufaʻu makehé+ mei he līneni lelei, ko e faʻufaʻu teuteú+ mei he līneni lelei, ko e ngaahi talausese mutu*+ līnení mei he līneni lelei kuo vilohi hono filó, 29 pea mo e noʻó mei he līneni lelei kuo vilohi hono filó, filo pulū, filo fulufuluʻisipi vāleti, mo e filo kula ʻahoʻaho kuo lalanga fakataha, ʻo hangē tofu pē ko e tuʻutuʻuni ʻa Sihova kia Mōsesé.

30 Fakaʻosí, naʻa nau ngaohi ʻa e lauʻimeʻa ngingilá, ʻa e fakaʻilonga toputapu ʻo e fakatapuí, mei he koula haohaoa pea tongi ai ha tohi ʻo hangē ko hano tongi ʻe ha taha ha silá: “Ko e māʻoniʻoní ʻoku ʻa Sihova ia.”+ 31 Naʻa nau fakamaʻu ki ai ha afo naʻe ngaohi mei he filo pulū koeʻuhí ke ʻai ia ki he faʻufaʻu makehé, ʻo hangē tofu pē ko e tuʻutuʻuni ʻa Sihova kia Mōsesé.

32 Ko ia ko e ngāue kotoa ki he tāpanekalé, ʻa e tēniti feʻiloakiʻangá, naʻe kakato ia, pea naʻe fai ʻe he kau ʻIsilelí ʻa e meʻa kotoa pē naʻe tuʻutuʻuni ʻe Sihova kia Mōsesé.+ Naʻa nau fai ʻo hangē tofu pē ko iá.

33 Pea naʻa nau ʻomi ʻa e tāpanekalé+ kia Mōsese, ʻa e tēnití+ mo e kotoa ʻo hono ngaahi naunaú: Ko hono ngaahi meʻa-fakamaʻú,+ ko hono ngaahi tokotuʻu tapafā lōloá,+ ko hono ngaahi vaʻakaú+ mo hono ngaahi poú pea mo hono ngaahi tuʻuʻangá;+ 34 ko hono ʻufiʻufi kiliʻisipi tangata kuo fakalanu kulokulá,+ ko hono ʻufiʻufi kiliʻisilá, ko e puipui vahevahé;+ 35 ko e ʻaʻake ʻo e Fakamoʻoní* mo hono ongo vaʻakaú+ pea mo e tāpuní;+ 36 ko e tēpilé, mo e kotoa ʻo hono ngaahi naunaú+ pea mo e mā foakí; 37 ko e tuʻunga-maama koula haohaoá, ko hono ngaahi māmá,+ ʻa e ʻotu māmá, pea mo e kotoa ʻo hono naunaú+ mo e lolo ki he māmá;+ 38 ko e ʻōlita+ koulá, ko e lolo paní,+ ko e ʻinisēnisi namu-kakalá,+ ko e puipui+ ki he hūʻanga ʻo e tēnití; 39 ko e ʻōlita kopá+ mo hono meʻa vangavanga kopá, ko hono ongo vaʻakaú,+ ko e kotoa ʻo hono ngaahi naunaú,+ ko e fuʻu pēsoní mo hono tuʻuʻangá;+ 40 ko e puipui ʻo e lotoʻaá, ko hono ngaahi poú mo hono ngaahi tuʻuʻangá,+ ko e puipui+ ki he hūʻanga ʻo e lotoʻaá, ko hono ngaahi afo tēnití mo hono ngaahi pine tēnití+ pea mo e kotoa ʻo e ngaahi naunau ki he ngāue ʻi he tāpanekalé, ʻa e tēniti feʻiloakiʻangá; 41 ko e ngaahi kofu kuo tuitui lelei ki he fakahoko fatongia ʻi he feituʻu toputapú, ko e ngaahi kofu toputapu moʻo ʻĒlone ko e taulaʻeikí,+ mo e ngaahi kofu ʻo hono ngaahi fohá ki heʻenau ngāue ko e kau taulaʻeikí.

42 Fakatatau ki he meʻa kotoa naʻe tuʻutuʻuni ʻe Sihova kia Mōsesé, naʻe pehē ʻa hono fai ʻe he kau ʻIsilelí ʻa e ngāué kotoa.+ 43 ʻI he taimi naʻe sivi ai ʻe Mōsese ʻa ʻenau ngāué kotoa, naʻá ne sio naʻa nau fai ia ʻo hangē tofu pē ko e tuʻutuʻuni ʻa Sihová; pea naʻe tāpuakiʻi ʻe Mōsese kinautolu.

40 Naʻe folofola leva ʻa Sihova kia Mōsese: 2 “ʻI he ʻuluaki ʻaho ʻo e ʻuluaki māhiná, te ke fokotuʻu ai ʻa e tāpanekalé, ʻa e tēniti feʻiloakiʻangá.+ 3 Tuku ki ai+ ʻa e ʻaʻake ʻo e Fakamoʻoní* pea tau puipui+ ʻa e ʻAʻaké. 4 Te ke fakahū mai ʻa e tēpilé+ pea fokotuʻutuʻu ʻa e ngaahi meʻa ʻo e tēpilé pea fakahū mai ʻa e tuʻunga-māmá+ ʻo tutu hono ngaahi māmá.+ 5 Hili iá, te ke tuku ʻa e ʻōlita koula ki he ʻinisēnisí+ ʻi muʻa ʻi he ʻaʻake ʻo e Fakamoʻoní pea fokotuʻu ʻa e puipui ki he hūʻanga ʻo e tāpanekalé ki hono tuʻuʻangá.+

6 “Te ke tuku ʻa e ʻōlita ʻo e feilaulau tutú+ ʻi muʻa ʻi he hūʻanga ʻo e tāpanekalé, ʻa e tēniti feʻiloakiʻangá, 7 pea fokotuʻu ʻa e fuʻu pēsoní ʻi he vahaʻa ʻo e tēniti feʻiloakiʻangá mo e ʻōlitá pea ʻai ki ai ʻa e vai.+ 8 Fokotuʻu leva ʻa e lotoʻā+ takatakai ʻi ai pea fokotuʻu ʻa e puipui+ ki he hūʻanga ʻo e lotoʻaá. 9 Ko hono hokó, te ke toʻo ʻa e lolo paní+ ʻo pani ʻa e tāpanekalé mo e meʻa kotoa ʻoku ʻi aí,+ pea fakatoputapuʻi ia mo e kotoa ʻo hono ngaahi naunaú, koeʻuhi ke hoko ai ia ko ha meʻa toputapu. 10 Te ke pani ʻa e ʻōlita ʻo e feilaulau tutú mo e kotoa ʻo hono ngaahi naunaú pea fakatoputapuʻi ʻa e ʻōlitá, koeʻuhi ke hoko ai ia ko ha ʻōlita mātuʻaki toputapu.+ 11 Pea te ke pani ʻa e fuʻu pēsoní mo hono tuʻuʻangá pea fakatoputapuʻi ia.

12 “Pea ʻomi leva ʻa ʻĒlone mo hono ngaahi fohá ke ofi ki he hūʻanga ʻo e tēniti feʻiloakiʻangá, pea ke nau kaukau ʻi he vaí.+ 13 Pea te ke fakatui ʻia ʻĒlone ʻa e ngaahi kofu toputapú+ pea pani ia+ mo fakamāʻoniʻoniʻi ia, pea te ne ngāue ko e taulaʻeiki kiate au. 14 Hili iá, te ke ʻomi ke ofi ʻa hono ngaahi fohá, pea fakatui ʻia kinautolu ʻa e ngaahi kofu tōtōlofá.+ 15 Te ke pani kinautolu ʻo hangē tofu pē ko hoʻo pani ʻenau tamaí,+ koeʻuhí ke nau ngāue ai ko e kau taulaʻeiki kiate au, pea ko hono pani kinautolú ʻe hokohoko atu ai ʻenau hoko ko ha tuʻunga taulaʻeiki taʻengata ʻi he lolotonga honau ngaahi toʻutangatá.”+

16 Naʻe fai ʻe Mōsese ʻo fakatatau ki he meʻa kotoa pē naʻe tuʻutuʻuni ʻe Sihova kiate iá.+ Naʻá ne fai ʻa e meʻa tofu pē ko iá.

17 ʻI he ʻuluaki māhiná, ʻi he taʻu hono uá, ʻi he ʻuluaki ʻaho ʻo e māhiná, naʻe fokotuʻu ai ʻa e tāpanekalé.+ 18 ʻI he taimi naʻe fokotuʻu ai ʻe Mōsese ʻa e tāpanekalé, naʻá ne ʻai hono ngaahi tuʻuʻangá+ ʻi lalo, fokotuʻu ʻa e ngaahi tokotuʻu tapafā lōloá,+ tui hono ngaahi vaʻakaú,+ pea fokotuʻu hono ngaahi poú. 19 Naʻá ne folahi atu ʻa e tupenu tēnití+ ʻi ʻolunga ʻi he tāpanekalé pea hili hifo ʻa e ʻufiʻufi+ ʻi tuʻá ʻi ʻolunga ai, ʻo hangē tofu pē ko e tuʻutuʻuni ʻa Sihova kia Mōsesé.

20 Hili iá, naʻá ne toʻo ʻa e ongo lauʻimaka ʻo e fakamoʻoní+ ʻo tuku ia ki he ʻAʻaké+ pea tui ʻa e ongo vaʻakaú+ ki he ʻAʻaké pea ʻai ʻa e tāpuní+ ʻi he funga ʻAʻaké.+ 21 Naʻá ne ʻomi ʻa e ʻAʻaké ki he tāpanekalé pea fokotuʻu ʻa e puipui+ vahevahé ki hono tuʻuʻangá ʻo puipuiʻi ʻa e ʻaʻake ʻo e Fakamoʻoní,+ ʻo hangē tofu pē ko e tuʻutuʻuni ʻa Sihova kia Mōsesé.

22 Ko hono hokó, naʻá ne tuku ʻa e tēpilé+ ʻi he tēniti feʻiloakiʻangá ʻi he tafaʻaki fakatokelau ʻo e tāpanekalé ʻi he tuʻa puipuí, 23 pea naʻá ne fokotuʻutuʻu ʻa e fokotuʻunga maá+ ki ai ʻi he ʻao ʻo Sihová, ʻo hangē tofu pē ko e tuʻutuʻuni ʻa Sihova kia Mōsesé.

24 Naʻá ne fokotuʻu ʻa e tuʻunga-māmá+ ʻi he tēniti feʻiloakiʻangá ʻi muʻa ʻi he tēpilé, ʻi he tafaʻaki fakatonga ʻo e tāpanekalé. 25 Naʻá ne tutu ʻa e ngaahi māmá+ ʻi he ʻao ʻo Sihová, ʻo hangē tofu pē ko e tuʻutuʻuni ʻa Sihova kia Mōsesé.

26 Naʻá ne hoko atu leva ʻo fokotuʻu ʻa e ʻōlita koulá+ ʻi he tēniti feʻiloakiʻangá ʻi muʻa ʻi he puipuí, 27 koeʻuhí ke tutu ke kohu ai+ ʻa e ʻinisēnisi namu-kakalá,+ ʻo hangē tofu pē ko e tuʻutuʻuni ʻa Sihova kia Mōsesé.

28 Naʻá ne fokotuʻu leva ʻa e puipui+ ki he hūʻanga ʻo e tāpanekalé ki hono tuʻuʻangá.

29 Naʻá ne fokotuʻu ʻa e ʻōlita ʻo e feilaulau tutú+ ʻi he hūʻanga ʻo e tāpanekalé, ʻa e tēniti feʻiloakiʻangá, koeʻuhí ke ne ʻohake ai ʻa e feilaulau tutú+ mo e feilaulau meʻakaí, ʻo hangē tofu pē ko e tuʻutuʻuni ʻa Sihova kia Mōsesé.

30 Naʻá ne fokotuʻu leva ʻa e fuʻu pēsoní ʻi he vahaʻa ʻo e tēniti feʻiloakiʻangá mo e ʻōlitá pea ʻai ki ai ʻa e vai ki he fakamaʻá.+ 31 Ko Mōsese mo ʻĒlone mo hono ngaahi fohá naʻa nau fufulu honau nimá mo honau vaʻé ʻi ai. 32 ʻI ha taimi pē naʻa nau hū ai ki he tēniti feʻiloakiʻangá pe fakaofiofi ki he ʻōlitá, naʻa nau fakamaʻa+ kinautolu, ʻo hangē tofu pē ko e tuʻutuʻuni ʻa Sihova kia Mōsesé.

33 Fakaʻosí, naʻá ne fokotuʻu ʻa e lotoʻā+ takatakai ki he tāpanekalé pea mo e ʻōlitá pea fokotuʻu ʻa e puipui ki he hūʻanga ʻo e lotoʻaá.+

Ko ia naʻe fai ʻe Mōsese ʻa e ngāué ʻo ʻosi. 34 Pea naʻe kamata ke ʻufiʻufi ʻe he ʻaó ʻa e tēniti feʻiloakiʻangá, pea naʻe fakafonu ʻe he lāngilangi ʻo Sihová ʻa e tāpanekalé.+ 35 Naʻe ʻikai lava ʻa Mōsese ke hū ki he tēniti feʻiloakiʻangá koeʻuhí naʻe nofo ʻa e ʻaó ʻi ʻolunga ai, pea naʻe fakafonu ʻe he lāngilangi ʻo Sihová ʻa e tāpanekalé.+

36 Pea ʻi he taimi naʻe mahiki hake ai ʻa e ʻaó mei he tāpanekalé, naʻe veteki ʻe he kau ʻIsilelí ʻa e ʻapitangá ʻo nau hiki lolotonga ʻa e vāʻihala kotoa ʻo ʻenau fonongá.+ 37 Kae kehe, kapau naʻe ʻikai ke mahiki hake ʻa e ʻaó, naʻe ʻikai leva ke nau veteki ʻa e ʻapitangá kae ʻoua ke aʻu ki he ʻaho naʻe mahiki hake aí.+ 38 He ko e ʻao ʻa Sihová naʻe ʻi ʻolunga ʻi he tāpanekalé ʻi he ʻahó, pea naʻe ʻi ʻolunga ai pē ko ha afi ʻi he poʻulí ʻo sio ki ai ʻa e fale kotoa ʻo ʻIsilelí lolotonga ʻa e vāʻihala kotoa ʻo ʻenau fonongá.+