‘Te Nau Tuki Huo Toho ʻAki ʻEnau Ngaahi Heletaá’—ʻAfē?
KO HA maka fakamanatu ʻiloa ʻi he Ngaahi Puleʻanga Fakatahatahá ʻi Kolo Niu ʻIoke ʻoku fakatātaaʻi ai ha tangata ʻokú ne tuki ha heletā ke hoko ko ha huo toho. ʻOku makatuʻunga ia ʻi he ongo kikite ʻa e Tohitapú ʻi he Aisea vahe 2, veesi 4, mo e Maika vahe 4, veesi 3. ʻOku anga-fēfē pea ko ʻafē ʻe fakahoko ai ʻa e ngaahi leá ni?
Ko ha līpooti ki muí ni ʻi he The New York Times naʻe ʻomai ai ʻa e ʻuluʻi kaveinga “ʻAlu Hake ʻa e Fakatau ʻo e Ngaahi Meʻa Tau ʻi Māmani Lahí ki he $30 Piliona”! ʻI he 1999 ko hai ʻa e kau tokonaki muʻomuʻa ʻo e ngaahi meʻatau lahi kāfakafa ko ení? Naʻe taki ʻa e ʻIunaite Seteté ʻi heʻenau paʻanga fakatau atu ko e $11.8 piliona. Naʻe fika ua ʻa Lūsia ʻo siʻi hifo ʻi he vaeua ʻo e lahi ko iá. Kae kehe, naʻe meimei liunga ua ʻa e fakatau ʻa Lūsiá ʻi he taʻu ki muʻá. Naʻe hoko mai leva ai ʻa Siamane, Siaina, Falanisē, Pilitānia, mo ʻĪtali. Naʻe hoko atu ʻa e līpooti tatau: “Hangē ko ia ʻi he kuohilí, ʻoku fakafuofua ki he vahe tolu ʻe ua ʻo e meʻatau kotoa pē naʻe fakatau atu ia ki he ngaahi puleʻanga langalanga haké.”
Hili ʻa e ongo tau ʻe ua ʻa e māmaní pea mo e ngaahi tau lalahi lahi kehe he lolotonga ʻa e senituli hono 20, ʻa ia naʻe iku ai ʻo mate mo kafo ʻa e laui teau miliona, ʻoku taki atu ai ha taha ke ne ʻeke, “Ko ʻafē nai ʻe faifai pea ako ai ʻa e ngaahi puleʻangá ki he melinó kae ʻikai ko e taú?” ʻOku fakahaaʻi ʻe he Tohitapú ko e hanga ko eni ki he melinó ʻe “ʻi he kuonga ʻamui.” (Aisea 2:2) Ko hono moʻoní, ʻoku ʻosi fakahoko ʻa e kikite ko ení, ʻi he fakaʻatā ʻe he meimei toko ono miliona ʻo e Kau Fakamoʻoni ʻa Sihová ʻa kinautolu ‘ke akoʻi ʻe Sihova.’ Ko hono olá, ʻoku ‘lahi ai ʻenau fiemalié.’—Aisea 54:13.
ʻE vavé ni ke fakangata ʻe Sihova ʻa e ngaahi meʻatau mo e ngaahi tau kotoa pē pea mo e faʻahinga ʻoku nau pouaki kinautolú, he te ne “fakaʻauha ʻakinautolu ʻoku fakaʻauha ʻa e fonua.” Kapau te ke saiʻia ke ʻilo lahi ange fekauʻaki mo e liliu fakaofo ko ení, kātaki ʻo ongoʻi tauʻatāina ke fetuʻutaki ki he Kau Fakamoʻoni ʻa Sihova ʻi ho feituʻú pe tohi ki he tuʻasila feʻungamālie ʻoku lisi ʻi he peesi 5.—Fakahā 11:18.