ʻOku Kei Malu ʻa e Puná?

NAʻE puke fakamālohi ha vakapuna seti ʻe fā. Havehave ʻa e fā. Ko e fakaʻauha ʻo e ngaahi langa ʻiloá. Ko e fakatātā ʻo ha vakapuna seti 767 ʻokú ne tuiʻi ʻa e taha ʻo e Ongo Taua Māhangá, naʻe toutou fakaʻaliʻali ia ʻi he televīsoné.

Ko e ngaahi ʻohofi ʻi Sepitema 11, 2001, naʻá ne ʻomai kitautolu ki ha kuonga foʻou fakamanavahē ʻo e ngāue fakaaoao fakaetautoitoí. Naʻe hoko ʻa e ngaahi kautaha vakapuná ko e ngaahi founga ia ki ha taumuʻa fakamate, pea naʻe hoko ʻa e vakapuná ko e ngaahi meʻa fakatupunga vela lahi.

Ko hono olá, kuo eʻa mai ai ha sīpinga foʻou ʻo e kau manavahē he puná: Ko e faʻahinga ia naʻa nau faʻa ongoʻi malu ka ʻoku nau tailiili he taimí ni ʻi he ala malava ke hoko ha ngaahi ʻohofi fakaetautoitoí. ʻIkai ngata aí, ko ha hokohoko ʻo e ngaahi fakatuʻutāmaki vakapuna fakatupu mate ʻikai fekauʻaki mo e tautoitoí ʻi he hili ʻa Sepitema 11, kuo fakalahi ai ʻa e manavahē ʻa e tokolahi ki he puná.

ʻOku hā mahino, ko e folau ʻi he ʻeá ko ha moʻui tuʻumālie ia ʻoku ʻikai ala aʻusia ʻe he laui miliona ʻi māmani lahi. Kae kehe, ki he niʻihi kehé, ko e puná ko ha fiemaʻu anga-maheni ia. Ki he faʻahinga ʻoku ʻi ai ʻenau ngaahi ngāue ʻoku fiemaʻu ai ha folau lahi fakapisinisí, ʻoku ʻikai ala kalofi ʻa e folau vakapuná. Ko e kau misinale mo e kau faifekau Kalisitiané ʻoku faʻa pau ke nau fai ha ngaahi fepunaʻaki lōloa ʻi he ʻalu ki honau ngaahi vāhenga-ngāué pea mo e fokí. Naʻa mo e kakai masivá, ko e vakapuná ko e founga feʻungamālie pē ia ʻe taha ʻi he taimi ʻe niʻihi ki he fefonongaʻakí lolotonga ha tuʻunga fakavavevave fakafaitoʻo. Pea ʻoku maʻu ʻa e moʻui ʻa e kau pailate mo e kau ngāue vakapuna ʻe laui afe ʻi he puná.

Ko e tokolahi ʻo e kau folau ko eni ʻi he ʻeá, mahalo nai ʻoku nau ilifia mo kinautolu, kuo pau ke nau fakanonga ʻa e ngaahi hoa mali loto-hohaʻá mo e fānau ilifiá ki muʻa ke nau mavahe haké. Pea ʻi he hoko ʻa e ngaahi folau naʻe anga-maheni ki ai ki muʻá ko e ngaahi tuʻunga faingataʻá, ʻoku fifili ai ʻa e kau folaú pe ʻoku kei hoko ʻa e puná ko ha founga lelei ia ki he folaú.

Ke lāulea ki he ngaahi meʻa fakatupu tokanga peheé, naʻe kumi faleʻi ʻa e ʻĀ Hake! ki he kau leʻo mataotao, kau ngāue vakapuna, kau ʻōfisa kautaha vakapuna, pea mo e kau ngāue monomono vakapuna. ʻOku hā ʻoku nau loto-tatau kotoa ʻi he meʻá ni: Neongo ʻoku kei hoko pē ʻa e puná ko e taha ia ʻo e ngaahi founga malu taha ʻi he folaú, ko e ngaahi fakamanamana foʻoú ʻoku fiemaʻu ki ai ʻa e ngaahi founga foʻou ke fakalahi ai ʻa e tuʻunga malu ʻo e kakai ʻoku folaú.

ʻE lāulea ʻi he kupu hoko maí ki he ngaahi palopalema ʻoku fekauʻaki mo e meʻa ʻe lava ke ke fai fakafoʻituitui ke fakalahi ai hoʻo malu mo e fiemālie lolotonga ʻa e puná.