ʻUhinga ke Falala Ai ki he Tohi Tapú
2. Lea Hangatonu mo Faitotonu
Ko e faitotonú ʻoku ʻomai ai ʻa e makatuʻunga ki he falalá. Ko ha tangata ʻoku ʻiloa ʻi he faitotonú te ne maʻu nai hoʻo falalá, ka ʻo kapau te ne loi kiate koe neongo ko e tuʻo taha, ʻe mole leva mei ai ʻa e falalá.
KO E kau hiki Tohi Tapú ko e kau tangata faitotonu ʻa ia naʻa nau tohi ʻi he loto-moʻoni. ʻOku hā mahino mei heʻenau lea hangatonú ʻoku moʻoni ʻa e meʻa naʻa nau tohí.
Fehālaaki mo e tōnounou.
Naʻe fakahaaʻi moʻoni ʻe he kau hiki Tohi Tapú ʻenau ngaahi taʻelavameʻá mo honau vaivaiʻangá tonu. Naʻe fakamatala ʻa Mōsese ki ha fehālaaki naʻá ne fai ʻo ne faingataʻaʻia lahi ai ʻi hono nunuʻá. (Nomipa 20:7-13) Naʻe fakamatala ʻa ʻĒsafe ki ha taimi naʻá ne meheka ai ʻi he moʻui tuʻumālie ʻa e fulikivanú. (Sāme 73:1-14) Naʻe fakamatala ʻa Siona ki heʻene talangataʻá mo e fakakaukau ʻikai sai naʻá ne tomuʻa maʻu ʻi hono fakahāhā ʻe he ʻOtuá ʻa e meesi ki he kau angahala fakatomalá. (Siona 1:1-3; 3:10; 4:1-3) Naʻe fakamatala hangatonu ʻa Mātiu ʻo pehē naʻá ne liʻaki ʻa Sīsū ʻi he pō naʻe puke ai iá.—Mātiu 26:56.
Ko e kau hiki-tohi ʻo e Ngaahi Konga Tohi Tapu Faka-Hepeluú naʻa nau fakahaaʻi ʻa e toutou lāunga mo e angatuʻu ʻa honau kakaí tonu. (2 Kalonikali 36:15, 16) Naʻe ʻikai ke maluʻi ʻo taʻefakakau ʻe he kau hiki-tohí ha taha, naʻa mo e kau pule ʻo honau fonuá. (Isikeli 34:1-10) ʻI he lea hangatonu meimei tatau, naʻe fakamatala ʻi he ngaahi tohi ʻa e kau ʻapositoló ʻa e ngaahi palopalema mafatukituki naʻe hokosia ʻe he kau Kalisitiane tāutaha, ʻo kau ai ʻa e faʻahinga fua fatongia, pea pehē ki he ngaahi fakatahaʻanga ʻe niʻihi ʻi he ʻuluaki senituli T.S.—1 Kolinito 1:10-13; 2 Timote 2:16-18; 4:10.
Ko e kau hiki Tohi Tapu, hangē ko Sioná, naʻa nau lēkooti ʻenau ngaahi fehālaakí tonu
Moʻoni ʻikai hā lelei.
Naʻe ʻikai feinga ʻa e kau hiki Tohi Tapú ke liʻaki ha meʻa naʻe vakai nai ki ai ha niʻihi ko e moʻoni fakamā. Ko e kau Kalisitiane he ʻuluaki senitulí naʻa nau fakahaaʻi hangatonu naʻe ʻikai ke leleiʻia ʻa e māmaní takatakai ʻia kinautolu, ka naʻe siolalo kia kinautolu ko e kau vale mo māʻulalo. (1 Kolinito 1:26-29) Naʻe fakahaaʻi ʻe he kau hiki-tohí ko e kau ʻapositolo ʻa Sīsuú naʻe hā ko e faʻahinga ‘taʻe kolisi, pea taʻe maʻu tuʻunga.’—Ngāue 4:13.
Naʻe ʻikai mioʻi ʻe he kau hiki Kōsipelí ʻa e ngaahi moʻoniʻi meʻá koeʻuhi ke ʻai ai ʻa Sīsū ke hā lelei ange. ʻI hono kehé, naʻa nau līpooti faitotonu naʻe ʻaloʻi ia ʻi he ngaahi tuʻunga māʻulalo ʻi ha fāmili masiva, ʻa ia naʻe ʻikai te ne ako ʻi he ngaahi akoʻanga ʻiloa ʻi hono taimí, pea ko e tokolahi taha ʻo ʻene kau fanongó naʻa nau siʻaki ʻene pōpoakí.—Mātiu 27:25; Luke 2:4-7; Sione 7:15.
ʻOku hā mahino, ʻoku ʻomai ʻe he Tohi Tapú ʻa e fakamoʻoni feʻunga ko e ngāue ia ʻa ha kau hiki-tohi faitotonu. ʻOku ʻai ʻe heʻenau faitotonú ke ke falala ki ai?