Ko ha Fakahāhā Tuʻuloa ʻo e ʻOfa ʻa e ʻOtuá
NAʻE ʻi ai ʻa e ngaahi meʻa naʻe ui ko e ngaahi meʻa fakaofo ʻe fitu ʻo e māmani motuʻá, koeʻuhi ko e ofoofo ʻa e ʻatamai ʻo e tangatá ʻi he vakai ki aí. Neongo ia, ʻi he ʻikai kau ai ʻa e ngaahi pilamitá, ko e ngaahi fuʻu langa ko ení ʻoku ʻikai ke kei tuʻu. ʻI he tafaʻaki ʻe tahá, ko e Tohi Tapú, neongo naʻe hiki ia ʻe ha kau tangata anga-fakatōkilalo ʻi he ngaahi naunau ʻauhangofua, ʻoku kei tolonga pē pea kuo fakaaʻu totonu mai ia ki hotau ʻahó ni tonu. ʻOku lava ke tau maʻu ʻa e falala pau fakaʻaufuli ki he tohi laulōtaha ko ení.—Aisea 40:8; 2 Timote 3:16, 17.
ʻI hono fokotuʻutuʻu ke hiki ʻene ngaahi fakakaukaú, naʻe fakapapauʻi ʻe Sihova ko e ʻOtuá ko hono ʻomaí heʻikai tuku pē ia ki he ngaahi manatu taʻehaohaoa ʻa e tangatá. Tānaki atu ki ai, ko e lea faingofua naʻe ngāueʻaki ʻe he kau tangata tohi ʻa e ʻOtuá ʻoku aʻu ʻo ʻai ai ke malava ʻe he tokolahi ʻoku fakangatangata ʻa honau tuʻunga fakaakó ke nau lau ʻo mahinoʻi ʻa e Tohi Tapú. (Ngāue 4:13) ʻIkai ko e meʻa ia naʻá ke mei ʻamanekina mei he Tokotaha-Fakatupú mo ʻene kau sekelitali fakamānavaʻí? ʻIkai ko ia pē, ko e tufaki lahi ʻo e Tohi Tapú ʻoku ʻomai ai ʻa e fakamoʻoni ʻo e ʻofa lahi ʻa e ʻOtuá ki heʻene fakatupu fakaetangatá, ʻo tatau ai pē pe ʻoku nofo ʻa e kakaí ʻi fē pe ko e hā ʻa e lea ʻoku nau leaʻakí. (1 Sione 4:19) Ko e moʻoni, ko e ala maʻu lahi ʻo e Tohi Tapú ʻoku ʻikai ke tuku hifo ai hono mahuʻingá ka ʻi hono kehé, ʻokú ne hakeakiʻi ia!
Ko e ngaahi meʻa ʻoku ʻi he Tohi Tapú ʻoku fakahaaʻi ai ʻa e fakamoʻoni lahi ange fekauʻaki mo e ʻofa ʻa e ʻOtuá. Hangē ko ia kuo tau sio ki ai ʻi he ngaahi kupu ki muʻá, ko e Folofola ʻa e ʻOtuá ʻoku fakamatalaʻi ai ʻa e feituʻu naʻa tau haʻu mei aí, ʻuhinga ʻoku fuonounou ai ʻa e moʻuí pea fonu ʻi he faingataʻá, mo e founga ʻe fakaleleiʻi ai ʻe he ʻOtuá ʻa e tuʻungá ni fakafou ʻi hono Puleʻangá. Kuo tau toe lāulea foki ki he ngaahi faleʻi Fakatohitapu lelei ʻaupito ʻe niʻihi ki he founga ke maʻu ai ha moʻui fiefia mo fakafiemālie ʻi he taimí ni. (Sāme 19:7-11; Aisea 48:17, 18) Hiliō he meʻa kotoa, kuo tau ako ki he founga ʻe fakaʻataʻatā ai ʻe hotau Tokotaha-Fakatupú ʻa hono huafá mei he luma kotoa pē kuo fai ki ai ʻe he ngaahi loi ʻa Sētané.—Mātiu 6:9.
Ko e hā ha toe tohi kehe ʻe mātuʻaki mahuʻinga, mātuʻaki kaungatonu, mātuʻaki ʻaonga pea mātuʻaki fonu ʻi he ʻamanaki ki he faʻahinga faingataʻaʻia ʻo e tangatá? ʻIo, ʻi he ʻikai hangē ko e ngaahi meʻa fakaofo ʻe fitu ʻo e māmani motuʻá, ʻa ia ko e lahi taha aí naʻe faʻu ia ke fakalāngilangiʻi ai ʻa e ngaahi ʻotua loi pe kau tangata maʻu mafaí, ko e moʻoni ko e Tohi Tapú ko ha fakahāhā tuʻuloa ia ʻo e ʻofa taʻesiokita ʻa Sihova ki heʻene fakatupu fakaetangatá.
Kapau kuo teʻeki te ke fai ʻeni, fēfē ke ke sivisiviʻi ʻiate koe pē ʻa e Tohi Tapú. ʻI he lolotonga ní, ʻoku fai taʻetotongi ai ʻe he Kau Fakamoʻoni ʻa Sihová ʻa e ngaahi ako Tohi tapu mo e kakai laka hake he toko ono milioná ʻi māmani lahi. ʻOku nau lau ko ha monū ia ke tokoniʻi ʻa e faʻahinga loto-moʻoní ke nau ʻiloʻi ʻiate kinautolu pē ko e Tohi Tapú ʻoku alafalalaʻanga moʻoni, ko e Folofola fakamānavaʻi ia ʻa e ʻOtuá.—1 Tesalonaika 2:13.