ʻAi ke ʻIloa ʻa e Huafa ʻo e ʻOtuá!

● ʻI haʻo luelue atu he ʻotu motu fakaʻofoʻofa ʻo Orleans, ofi ki he Kolo ko Quebec, ʻi Kānatá, te ke fakamoʻoniʻi ai ko e faʻahinga naʻe fuofua tūʻuta aí ko e kakai lotu. ʻOku kei mātā pē ʻa e ngaahi fale lotu fakahisitōlia ʻi he veʻe halá, ko e fakamanatu ia ʻo e kuohilí, ʻo nau tuʻu takai ʻi he ʻotu motú pea ko e vāhenga fakasiasi taki taha ʻoku ʻi ai honau fale lotu.

ʻI he kolo ko Saint-Pierre ʻoku tuʻu ai ʻa e fale lotu motuʻa taha ʻi he feituʻu ʻuta ʻi Quebec, ko e talu mei he 1717. ʻI heʻene hoko ko ha mātanga he taimi ní, ʻoku ʻi he fale lotú ha meʻa ʻoku makehe. ʻOku ʻi ʻolunga ʻi he ʻōlitá ʻa e Tetakalamatoní—ʻa e mataʻitohi faka-Hepelū ʻe fā ʻoku faʻuʻaki ʻa e huafa tonu ʻo e ʻOtua ʻi he Tohi Tapú, ʻa Sihova.

ʻI he ʻahó ni, ʻoku aʻu ʻo tātātaha ke fanongo ki hano leaʻaki ʻa e huafa ʻo e ʻOtuá ʻi ha siasi Katolika, pea ʻoku tātātaha ange ʻa e sio ki hano hiki. Ko e moʻoni, ko ha fakamatala naʻe ʻomai ʻe he Vatikanó ʻi he 2008 naʻe pehē ai fakatatau ki he fakahinohino ʻa e tuʻitapú, ko e huafa ʻo e ʻOtuá ʻe “ʻikai ngāueʻaki pe leaʻaki” ʻi he ngaahi ouau fakalotu, himi pe lotu ʻa e siasi Katoliká. Ka neongo ia, ʻoku fakamahinoʻi mai ʻe he Tohi Tapú ʻoku fiemaʻu ʻe Sihova ko e ʻOtuá ʻa hono huafá ke ‘fakaogo atu i mamani kotoabe.’—Ekisoto 9:16, PM.

ʻOku tui ʻa e Kau Fakamoʻoni ʻa Sihová ko hono fakahōifuaʻi ʻa e ʻOtuá ʻoku fiemaʻu ki ai ʻa e meʻa lahi ange ia ʻi hono fakaʻaliʻali pē hono huafá ʻi ha fale. ʻI he taʻu taki taha, ʻi māmani lahi, ʻoku nau fakamoleki ʻa e houa ʻe 1.5 piliona tupu ʻi hono akoʻi ʻa e kakaí ʻo fekauʻaki mo e huafa ʻo e ʻOtuá mo ʻene ngaahi taumuʻá. Kuo aʻu ʻo nau fakafoki ʻa e huafa ʻo e ʻOtuá, ʻa e Sihová ki hono tuʻunga totonú. Ko e Tohi Tapu kuo nau pulusí—ʻa e New World Translation of the Holy Scriptures—ʻoku muimui ofi ia ʻi he konga tohi ʻo e muʻaki leá, ʻa ia ʻoku hā ai ʻa e huafa Sihová ʻo tuʻo 7,000 nai. Aʻu mai ki he taimí ni, kuo laka hake ʻi he tatau ʻe 165,000,000 ʻo e New World Translation kuo pulusí, fakakātoa pe ʻi hano konga, ʻi he lea ʻe 83. Ko hono moʻoní, ʻi heʻene fekauʻaki mo e huafa ʻo e ʻOtuá, ʻa e Sihová, ʻoku ʻikai ko e fehuʻí ʻa e pehē Ko e hā ʻa e makatuʻunga ʻoku tau maʻu ki hono ngāueʻaki iá? ka Ko e hā ʻa e makatuʻunga ʻoku ʻikai ke tau ngāueʻaki ai iá?

[Fakatātā ʻi he peesi 23]

Ko e New World Translation, ʻa ia ʻoku hā ai ʻa e huafa Sihová ʻo tuʻo 7,000 nai, ʻoku pulusi, fakakātoa pe ʻi hano konga, ʻi he lea ʻe 83