Meʻa ʻOku ʻIkai ke ʻIloʻi ʻe he Kau Faisaienisí
ʻOku hā ngali kuo ako ʻe he kau faisaienisí ʻa e meimei tafaʻaki kotoa ʻo e ʻunivēsí. Neongo ia, ʻoku lahi ʻa e ngaahi fehuʻi mahuʻinga ʻoku ʻikai ke nau lava ʻo tali.
Kuo fakapapauʻi ʻe he saienisí ʻa e founga naʻe kamata ai ʻa e ʻunivēsí mo e moʻuí? Ko e talí ko e ʻikai. ʻOku pehē ʻe he niʻihi ko e kau faisaienisi ʻoku nau ako ki he ʻunivēsí ʻe lava ke nau fakamatalaʻi ʻa hono tupuʻangá. Kae kehe, ko ha palōfesa ʻi he ʻApiako Dartmouth, ko Marcelo Gleiser, ʻa ia ko ha tokotaha ʻakinositika, ʻokú ne pehē: “Kuo teʻeki ai ʻaupito ke mau lava ʻo fakamatalaʻi ʻa e tupuʻanga ʻo e ʻunivēsí.”
Pehē foki, ʻoku pehē ʻi he makasini Science News: “Mahalo pē ʻe taʻemalava ke fakapapauʻi ʻa e founga naʻe kamata moʻoni ai ʻa e moʻuí ʻi Māmaní: Ko e lahi taha ʻo e ngaahi lēkooti fakasioloki ʻo e meʻa naʻe hoko moʻoni ʻi he muʻaki ngaahi ʻaho ʻo e Māmaní kuo fuoloa ʻene mole.” ʻOku hā mei he ongo fakamatalá kuo teʻeki ke tali ʻe he saienisí ʻa e fehuʻi, Naʻe anga-fēfē kamata ʻa e ʻunivēsí mo e moʻuí?
Ka te ke fifili nai, ‘Kapau naʻe tisaini ʻa e moʻuí, ko hai ʻa hono tokotaha-tisainí?’ Te ke toe ʻeke nai: ‘Kapau ʻoku ʻi ai ha Tokotaha-Fakatupu poto mo ʻofa, ko e hā te ne fakaʻatā ai ʻa e faʻahinga ʻo e tangatá ke nau faingataʻaʻiá? Ko e hā te ne fakaʻatā ai ʻa e ngaahi founga lotu fepakipakí? Ko e hā te ne fakaʻatā ai ʻene kau lotú ke nau fai ʻa e ngaahi meʻa lahi ʻoku koví?’
ʻOku ʻikai lava ke tali ʻe he saienisí ʻa e ngaahi fehuʻi ko iá. Ka ʻoku ʻikai ʻuhinga iá heʻikai ke ke lava ʻo maʻu ha tali mohu ʻuhinga. Ko hono moʻoní, ko e kakai tokolahi kuo nau maʻu ha tali fakafiemālie ʻi he Tohi Tapú.
Ko e kau faisaienisi ʻe niʻihi kuo nau vaheʻi ʻa e taimi ke ako ʻa e Tohi Tapú, ko ia kapau te ke saiʻia ke ʻiloʻi ʻa e ʻuhinga ʻoku nau pehē ai ʻoku nau tui ki ha Tokotaha-Fakatupú, ʻaʻahi ki he jw.org. Kumi ki he vitiō hokohoko Vakai ki he Tupuʻanga ʻo e Moʻuí.