ʻOku ʻI Ai ha Taha ʻOku Tokanga Moʻoni Mai?
“Ko e loʻimata é ʻo siʻi fakamalohia” kuo hoko ia ko ha vaitafe mālohi. ʻOku nau ngangana mai mei he faʻahinga ʻoku maʻukovia ʻi he “ngaahi fakamalohi” ʻi he kotoa ʻo e māmaní. Ko e faʻahinga ko ia kuo maʻukoviá ʻoku nau faʻa ongoʻi ʻoku ʻikai hanau “taha ke fakafiemalie”—ʻa ia ʻoku ʻikai ha taha ia ʻoku tokanga moʻoni mai fekauʻaki mo kinautolu.—Koheleti 4:1.
NEONGO ʻa e vaitafe mālohi ko eni ʻo e loʻimatá, ʻoku ʻikai ke ueʻi ʻa e niʻihi ia ʻe he faingataʻaʻia ʻa honau kaungā faʻahinga ʻo e tangatá. ʻOku nau fakamataʻivalea loi ki he mamahi ʻa e kakai kehé, hangē ko ia naʻe fai ʻe he taulaʻeiki pea mo e tokotaha Līvai ʻi he talanoa fakatātā ʻa Sīsū Kalaisi fekauʻaki mo ha tangata naʻe ʻohofi fakamālohi, ʻo kaihaʻasia, pea tuku kuo mei mate ʻi he veʻehalá. (Luke 10:30-32) Ke kei lele lelei pē ʻi ha tuʻunga ʻa e ngaahi meʻá kiate kinautolu mo honau fāmilí, ʻoku ʻikai te nau hohaʻa kinautolu fekauʻaki mo e niʻihi kehé. Ko hono moʻoní, ʻoku nau pehē, “Ko hai ia ʻoku tokanga ki ai?”
ʻOku ʻikai totonu ke tau ofo ʻi he meʻá ni. Naʻe tomuʻa tala ʻe he ʻapositolo ko Paulá ʻo pehē ʻi he “kuonga fakamui” ko e kakai tokolahi te nau “taeofa-ki-hoʻota.” (2 Timote 3:1, 3) Naʻe mamahi ʻa e tokotaha faifakamatala ʻe taha ʻi he ngaahi fakakaukau taʻetokanga kuo tupulekiná. “Ko e filōsofia mo e talatukufakaholo ʻAilani motuʻa fekauʻaki mo e fetokangaʻakí mo e fevahevaheʻakí,” ko ʻene leá ia, “ʻoku fetongi ia ʻe ha lao foʻou ʻo e faʻu mo e toʻo maʻatautolú.” ʻI māmani lahi, ʻoku faʻu meʻa ʻa e kakaí pea toʻo maʻanautolu, fakataha mo e meimei taʻetokanga fakaʻaufuli ki he tuʻunga faingataʻaʻia ʻo e niʻihi kehé.
Ko ha Fiemaʻu ki ha Taha ke Tokanga Mai
ʻOku ʻi ai moʻoni ha fiemaʻu ki ha taha ke tokanga mai. Ko e fakatātaá, fakakaukau atu fekauʻaki mo ha tangata taʻelata ʻi Siamane ʻa ia naʻe “maʻu ʻokú ne tangutu ʻi muʻa ʻi heʻene seti televīsoné—ʻi he taʻu ʻe nima hili ʻa ʻene maté ʻi ha Kilisimasi.” Ko e “tokotaha ʻosi vete, faingataʻaʻia mo nofo tokotaha” ko ení, naʻá ne loto-kona ʻi he ngaahi meʻa fakamamahi naʻá ne hokosia ʻi he moʻuí, naʻe ʻikai ke ʻiloʻi ia ka ne taʻeʻoua ʻa e ʻosi ʻa e ʻakauni pangikē naʻe totongiʻaki ʻa ʻene nofo totongí. Naʻe ʻikai ha taha ʻe tokanga moʻoni ʻo fekauʻaki mo ia.
Fakakaukau atu foki, fekauʻaki mo e faʻahinga maʻukovia ʻo ʻikai te nau lava ha meʻa ʻa e kau pule mālohi mo mānumanú. ʻI he feituʻu ʻe taha, ko e kakai ʻe toko 200,000 nai (ko e kuata ia ʻo e tokolahí) “naʻa nau mate ʻi he fakangatangatá pea mo e hongé” hili hano toʻo fakamālohi meiate kinautolu ʻa honau kelekelé. Pe fakakaukau atu ki he fānau ʻa ia naʻa nau sio ki he ngaahi tuʻunga fakamamahi ʻoku meimei faingataʻa ke tui ki ai. Naʻe pehē ʻe ha līpooti ʻe taha: “Ko e peseti ʻo e fānau ʻi he [fonua ʻe taha] ʻa ia naʻa nau sio tonu ʻi he ngaahi meʻa fakalilifu lahi—ʻa e ngaahi tāmaté, ko e ngaahi taá, tohotohó, ko e taimi ʻe niʻihi naʻe fai ia ʻe he fānau tupu kehé, ʻoku mātuʻaki lahi ʻaupito.” ʻOku lava ke mahino kiate koe ʻa e ʻuhinga ʻe ʻeke nai ai ʻe ha tokotaha maʻukovia ʻo e ngaahi fakamaau taʻetotonu peheé ʻi he fakatōloʻimata, “ʻOku ʻi ai ha taha ʻoku tokanga moʻoni mai fekauʻaki mo au?”
Fakatatau ki ha līpooti ʻa e Ngaahi Puleʻanga Fakatahatahá, ko e kakai ʻe toko 1.3 piliona ʻi he māmani langalanga haké kuo pau ke nau moʻui ʻi he tuʻunga tatau ʻo e siʻi hifo ʻi he tola U.S. ʻe taha ʻi he ʻaho. Kuo pau ke nau fifili pe ʻoku ʻi ai ha taha ʻoku tokanga mai. ʻOku pehē pē mo e laui afe ʻo e kau kumi hūfangá, ʻa ia ʻoku pehē ʻe ha līpooti ʻi he The Irish Times, “ʻoku nau fehangahangai mo e fili faingataʻa ʻo e nofo ʻi ha kemi māʻulalo ʻaupito pe ʻi ha fonua ʻikai anga talitali kakai pe feinga ke foki ki ha fonua tupuʻanga ʻoku kei movete [pe, veuveuki] ʻe he taú pe ko e māvahevahe fakamatakalí.” ʻOku kau ʻi he līpooti tatau ʻa e tuʻunga fakamamahi ko ení: “Kuikui ho matá, lau ki he tolu, ko e mate ia ʻa ha kiʻi tama. Ko e taha ia ʻi he fānau ʻe toko 35,000 te nau mate ʻi he ʻahó ni mei he fasimanavá pe mahaki taʻealakalofí.” ʻOku ʻikai ha ofo ʻi he tangi ʻa e tokolahi ʻi he loto-haʻihaʻisiá mo e loto-koná!—Fakafehoanaki mo Siope 7:11.
Ko e meʻá ni kotoa naʻe fakataumuʻa pē ia ke pehē? Ko hono moʻoní, ʻoku ʻi ai ha taha ʻoku ʻikai ngata pē ʻi heʻene tokanga maí ka ʻokú ne toe maʻu ʻa e mālohi ke fakangataʻaki ʻa e faingataʻaʻiá pea ke fakamoʻui ʻa e mamahi kotoa kuo aʻusia ʻe he kakaí?
[Maʻuʻanga ʻo e Tā ʻi he peesi 2]
Takafí mo e peesi 32: Reuters/Nikola Solic/Archive Photos
[Maʻuʻanga ʻo e Tā ʻi he peesi 3]
A. Boulat/Sipa Press