Līpooti ʻa e Kau Fanongonongo ʻo e Puleʻangá

Tali ʻa Lativia ki he Ongoongo Leleí

ʻOKU fakahaaʻi mahino ʻe he Tohitapú ko e finangalo ia ʻo e ʻOtuá ke “maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Timote 2:4) Ko e faʻahinga ʻa ia naʻe fakaʻikaiʻi kiate kinautolu ʻi he ngaahi taʻu lahi ʻa e faingamālie ke fanongo ki he ongoongo leleí ʻoku nau fanongo ki ai he taimí ni! ʻI Lativia, hangē ko ia ʻi he ngaahi tapa kehe ʻo e māmaní, ʻoku tali ai ʻe he kakai ʻo e taʻumotuʻa mo e ngaahi ʻātakai kehekehe kotoa pē ʻa e pōpoakí, ʻo hangē ko ia ʻoku fakahaaʻi ʻe he meʻa hoko hake ko ia naʻe hokosiá.

• ʻI Rēzekne, ko ha kolo ʻi he fakahahake ʻo Lativiá, naʻe kole ai ha faʻē mo ʻene taʻahine taʻu hongofulu tupu ki ha fefine ʻi he halá ki ha ngaahi fakahinohino. Hili hono ʻoange kiate kinaua ʻa e fakamatalá, ko e fefiné, ʻa ia ko e taha ia ʻo e Kau Fakamoʻoni ʻa Sihová, naʻá ne fai ange ai kiate kinaua ha fakaafe ki he ngaahi fakataha ʻa e Kau Fakamoʻoní.

Koeʻuhi naʻe hehema fakalotu fakatouʻosi ʻa e faʻeé mo ʻene tamá, naʻá na fili ai ke na ō ki he fakatahá. ʻI heʻena ʻalu ki aí, naʻá na fai ha felotoi kapau te na ʻilo ha meʻa taʻetotonu ʻi ai, te na mavahe pē he taimi ko iá. Kae kehe, naʻe mātuʻaki fakamānako ʻa e fakatahá ʻo ʻikai ʻaupito haʻu ai ki heʻena fakakaukaú ke na mavahe. Naʻá na tali ha tuʻuaki ange ke ako ʻa e Tohitapú, pea kamata ke na maʻu tuʻumaʻu ʻa e ngaahi fakatahá. ʻI he māhina pē ʻe tolu, naʻá na fakahāhā ai ʻa e holi ke kau ʻi he ngāue fakamalangá peá na fakatuʻotuʻa atu ke na papitaiso.

• ʻI ha kolo ʻi he fakahihifo ʻo Lativiá, naʻe fetaulaki ai ha Fakamoʻoni mo e tokotaha taʻu 85 ko Anna, ʻa ia naʻá ne fakahaaʻi ʻa e mahuʻingaʻia moʻoni peá ne tali ha ako Tohitapu. Ko ʻene taʻahiné mo e ngaahi mēmipa kehe ʻi he fāmilí naʻa nau fakafepakiʻi mālohi ia. Ka naʻe ʻikai ke fakaʻatā ʻe Anna ʻa e meʻa ko iá pe ko ʻene taʻumotuʻá mo e mahamahakí ke taʻofi ia mei he hokohoko atu ʻa ʻene ako Tohitapú.

ʻI he ʻaho ʻe taha naʻe tala ange ai ʻe Anna ki heʻene taʻahiné te ne papitaiso. “Kapau te ke papitaiso, te u ʻave leva koe ki he ʻapi ʻoku tauhi ai ʻa e kau vaivaí,” ko e tali ange ia ʻa e taʻahine ʻa Anna. Kae kehe, ko e fakamanamana ko ení, naʻe ʻikai te ne taʻofi ʻa Anna. Koeʻuhi ko hono tuʻunga fakaesinó, naʻe papitaiso ia ʻi hono ʻapí tonu.

Naʻe anga-fēfē ʻa e tali ʻa e taʻahine ʻa Anna ki he meʻá ni? Naʻe liliu ʻa ʻene fakakaukaú, pea naʻá ne teuteu ha meʻakai makehe maʻa ʻene faʻeé ʻi he hili ʻa e papitaisó. Naʻá ne ʻeke ange leva ki heʻene faʻeé, “ʻI hoʻo papitaiso he taimi ní, ʻoku fēfē hoʻo ongoʻí?” Ko e tali ʻa Anna? “Hangē ha toki fanauʻi foʻoú!”

• ʻI Tīsema 1998, naʻe fetaulaki ai ha ongo Fakamoʻoni ʻe toko ua mo ha ʻōfisa fakakautau mālōlō ʻo e Sovieti ʻIunioni ki muʻá. Koeʻuhi he naʻá ne tui ki ha Tokotaha-Fakatupu, naʻá ne tali ha ako Tohitapu, pea naʻe kau ki mui ki ai ʻa hono uaifí. Naʻá na fai ha fakalakalaka vave pea vave ʻa ʻena hoko ko e ongo malanga teʻeki papitaiso. ʻI he faʻahitaʻu māfana hono hokó, naʻe papitaiso ai ʻa e ʻōfisa ko ia ki muʻá. Ko e ʻofa lahi ʻa e ongo meʻá ni ki he ngaahi meʻa fakalaumālié kuo hoko ia ko ha fakalototoʻa ki he faʻahinga kotoa ʻi he fakatahaʻangá. Tānaki atu ki ai, naʻá na tuku atu kinaua ki he ngāue ko hono toe fakaleleiʻi ha nofoʻanga fakalotofonua ki ha Fale Fakatahaʻanga lelei.