666—ʻIkai ko ha Misiteli Pē

“[Ko e manu fekaí] ʻoku ne kouna ʻa e kakai kotoa pe . . . ke nau ʻai kiate kinautolu ha fakaʻilonga ʻi honau nima toʻomataʻu, pe ʻi honau laʻe: pea ke ʻoua naʻa lava ha taha ke fakatau mai pe fakatau atu, ʻo kapau ʻoku ʻikai ʻiate ia ʻa e fakaʻilonga ko ia, ʻa ia ko e hingoa ʻo e manu fekai, pe ko e fika ʻo hono hingoa. ʻOku ʻi he meʻa ni ʻa e poto. Ko ia ʻoku ʻatamai, ke ne fatu ʻa e fika ʻo e manu fekai; he ko e fika fakaetangata ia: pea ko hono fika ko e onongeau ma onongofulu ma ono.”—Fakahā 13:​16-18.

ʻOKU siʻi ʻa e ngaahi tuʻunga-lea Fakatohitapu kuó ne langaʻi ʻa e mahuʻingaʻia mo e tokanga lahi tatau pea mo e kikite ʻo fekauʻaki mo e fakaʻilonga fakamisiteli, pe hingoa, ʻo e “manu fekai”​—ʻa e fika 666. ʻI he televīsoné mo e ʻInitanetí, pea pehē ki he ngaahi faivá, ngaahi tohí, mo e ngaahi makasiní, ko e fakaʻilonga ʻo e manu fekaí kuo hoko ia ko e tuʻunga-lea ʻo e fakamahamahalo taʻehanongataʻanga.

ʻOku tui ʻa e niʻihi ko e 666 ko e fakaʻilonga ia ʻo e kau Kalaisi loi ʻi he Tohi Tapú. ʻOku pehē ʻe he niʻihi ʻokú ne fakahaaʻi ha founga ʻo e ʻiloʻanga pau, hangē ko ha tā-tatau pe ko ha sēketi maʻuʻanga fakamatala fakataha mo ha fakaʻilonga fakaʻilekitulōnika ʻokú ne fakaʻilongaʻi ʻa e tokotahá ko ha sevāniti ʻa e manu fekaí. Lolotonga ia ʻoku tui ʻa e niʻihi kehe ko e 666 ko e fakaʻilonga ia ʻo e lakanga fakatuʻitapu faka-Katoliká. ʻI hono liliuʻi ʻo e ngaahi mataʻifika faka-Lomá ki he ngaahi mataʻitohi ʻi he faʻunga ʻo e hingoa fakalakanga fakaʻofisiale ʻo e tuʻitapú, ko Vicarius Filii Dei (Vika ʻa e ʻAlo ʻo e ʻOtuá), pea ʻi hono kiʻi liliu ʻa e ngaahi mataʻifiká, ʻoku nau maʻu ai ʻa e 666. ʻOku toe taukaveʻi ko e fika tatau ʻe lava ke fikaʻi ia mei he hingoa faka-Latina ʻo ʻEmipola Tiokilitiane ʻo Lomá pea mei he liliu faka-Hepelū ʻo e hingoa Nelo Sisá.a

Kae kehe, ko e ngaahi fakaʻuhinga fakaefakakaukau mo toki faʻu ko ení, ʻoku kehe ʻaupito ia mei ha meʻa ʻoku leaʻaki ʻe he Tohi Tapú tonu fekauʻaki mo e fakaʻilonga ʻo e manu fekaí, ʻo hangē ko ia te tau sio ki ai ʻi he kupu hoko maí. ʻOku fakahaaʻi ʻe he Tohi Tapú ko e faʻahinga ʻoku nau maʻu ʻa e fakaʻilongá te nau hokosia ʻa e houhau ʻa e ʻOtuá ʻi he taimi te ne ʻomai ai ha ngataʻanga ki he fokotuʻutuʻu lolotonga ʻo e ngaahi meʻá. (Fakahā 14:​9-​11; 19:20) Ko ia ai, ko hono mahinoʻi ʻa e ʻuhinga ʻo e 666, ʻoku lahi mamaʻo ange ia ʻi hono solova pē ʻo ha misiteli fakatoʻoaloto. Ko e meʻa fakafiefiá, ko Sihova ko e ʻOtuá, ʻa e fakasino tonu ʻo e ʻofá mo e Matavai ʻo e maama fakalaumālié, kuo ʻikai te ne tuku ke taʻeʻilo ʻa ʻene kau sevānití ki he meʻa mahuʻinga ko ení.​—2 Timote 3:​16; 1 Sione 1:5; 4:8.

[Fakamatala ʻi lalo]