Fehuʻi mei he Kau Lautohí
Ko e hā ʻa e “fakakaukau” ʻe ʻai ʻe Sihova ki he loto ʻo e ngaahi puleʻangá ʻi he kahaʻu vave maí?
ʻI he kamata ʻa e fuʻu mamahi lahí, ʻoku pehē ʻi he Fakahā 17:16, 17: “Ko e meʻatui ʻe hongofulu naʻá ke sio ki aí pea mo e manu fekaí te nau fehiʻa ki he fefine feʻauakí pea te nau ʻai ia ke hoko ko e koto halaʻatā mo telefua, pea te nau keina hono kakanó pea tutu fakaʻaufuli ia ʻaki ʻa e afi. He kuo ʻai ʻe he ʻOtuá ki honau lotó ke nau fakahoko ʻa ʻene fakakaukaú, ʻio, ke fakahoko ʻenau fakakaukau pē tahá ʻaki hono ʻoange honau puleʻangá ki he manu fekaí.” ʻI he kuohilí, naʻe pehē ʻi heʻetau ʻū tohí ko e “fakakaukau” ʻe ʻai ʻe Sihova ki he loto ʻo e ngaahi puleʻangá ke nau hanga ʻo fakaʻauha ʻa e lotu loí.
Kae kehe, naʻe fiemaʻu ke fai ha fakatonutonu. Ko e “fakakaukau” ʻe ʻai ʻe Sihova ki he loto ʻo e ngaahi puleʻangá ko hono ʻai ke nau “ʻoange honau puleʻangá ki he manu fekaí.” Ke mahinoʻi ʻa e founga ʻe fakahoko ai ení, fakakaukau ki he ngaahi fehuʻi ko ení.
Ko hai ʻa e faʻahinga tefito ʻi he kikité? Ko e “fefine feʻauakí” ʻoku toe ui ia ko “Pāpilone ko e Lahi”; ʻokú ne fakafofongaʻi ʻa e ʻemipaea ʻo e lotu loí ʻi he māmaní. Ko e ‘manu fekai lanu kula ʻahoʻahó’ ko ha fakaʻilonga ia ʻo e kautaha fakamelino naʻe kamata ngāue ʻi he 1919 ko e Kautaha ʻa e Ngaahi Puleʻangá pea ʻi he taimí ni ko e Ngaahi Puleʻanga Fakatahatahá ia. (Fkh. 17:3-5) Ko e ‘meʻatui ʻe hongofulú’ ʻokú ne fakafofongaʻi ʻa e ngaahi mafai fakapuleʻanga kotoa ʻoku nau poupou ki he manu fekaí.
Ko e hā ʻa e felāveʻi ʻi he vahaʻa ʻo e fefine feʻauakí mo e manu fekai lanu kula ʻahoʻahó? Ko e fefine feʻauakí kuó ne “heka mai” ʻi he manu fekaí, ʻo ʻoange ki he manu fekaí ʻene poupoú pea feinga ke tākiekina naʻa mo hono puleʻi ia.
Ko e hā ʻe hoko ki he fefine feʻauakí? Ko e manu fekaí, fakataha mo e meʻatui ʻe hongofulu ʻa ia ʻoku nau poupouʻi iá, “te nau fehiʻa ki he fefine feʻauakí.” ʻI he fakahaaʻi ʻenau tāufehiʻá, te nau ʻave fakamālohi ʻene koloá pea fakaeʻa ʻene fulikivanú. Pea te nau fakahoko ʻa e fakamaau ʻa Sihova ki he fefine feʻauakí, ʻa ia, ko hono fakaʻauha fakaʻaufuli ia. (Fkh. 17:1; 18:8) Ko e ngataʻanga ia ʻo e ngaahi kautaha lotu loí. Kae kehe, ki muʻa ke hoko iá, ʻe ʻai ʻe Sihova ʻa e ngaahi puleʻangá ke nau fai ha meʻa taʻehanotatau ʻi he hisitōlia ʻo e tuʻunga-pule fakaetangatá.
Ko e hā ʻe ʻai ʻe Sihova ke fai ʻe he ngaahi puleʻangá? Te ne ʻai ki he loto ʻo e meʻatui ʻe hongofulú “ʻa ʻene fakakaukaú,” ʻa ia “ʻoku nau ʻave ai honau mālohí mo e mafaí ki he manu fekaí [lanu kula ʻahoʻahó]”—ʻa e Ngaahi Puleʻanga Fakatahatahá. (Fkh. 17:13) Fakakaukau ki he ʻuhinga ʻo e meʻa ko iá. ʻE fili ʻa e ngaahi puleʻanga fakaetangatá ʻiate kinautolu pē ke ʻave honau mālohí mo e mafaí ki he manu fekaí? ʻIkai! ʻOku fakahaaʻi ʻe he kikité ko e ʻOtuá tonu te ne tākiekina kinautolu ke nau fakahoko ʻa e meʻa ko iá. (Pal. 21:1; fakafehoanaki mo e ʻAisea 44:28.) ʻE hoko māmālie ʻa e fetongi ko eni ʻo e mafaí? ʻIkai! ʻOku hā mahino ʻe hoko fakafokifā mo vave ʻa e liliu ko iá. Pea ʻi hono maʻu ʻe he manu fekai ko ení ʻa e mafaí te ne fakahoko leva ʻa e fakamaau ʻa Sihová ki he ngaahi kautaha lotu loí ʻaki hono toʻo fakaʻaufuli atu kinautolu.
Ko e hā leva te tau ʻamanekiná? ʻOku ʻikai totonu ke tau fakasio ʻi he ngaahi ongoongó ki ha fakaʻilonga ʻo e kamata māmālie ʻa e ngaahi puleʻangá ke poupouʻi lahi ange ʻa e Ngaahi Puleʻanga Fakatahatahá. Ko e meʻa eni ʻoku tau ʻamanekiná: ʻE hoko taʻeʻamanekina fakafokifā ʻa hono ʻai ʻe Sihova ki he loto ʻo e ngaahi puleʻangá ke nau ʻave honau mafaí ki he manu fekaí. ʻI he hoko iá, te tau ʻiloʻi ʻoku teu ke kamata ʻa e fuʻu mamahi lahí. ʻI he lolotonga ní, “tuku ke tau nofoʻaki ʻāʻā mo tauhi maʻu ʻetau fakakaukau leleí” koeʻuhí ko e ngaahi liliu fakafokifaá ʻoku vavé ni ke hoko!—1 Tes. 5:6.