Ko e Hā Kuo Hoko ki he Fāʻūtaha ʻa e Māmaní?
“ʻI he ʻuluaki taimi talu mei he Tau II ʻa Māmaní ʻoku fāʻūtaha ai ʻa e kakai fakavahaʻapuleʻangá. . . . ʻOku lava ai ke puke ʻe he māmaní ʻa e faingamālié ni ke fakahoko ai ʻa e talaʻofa fokotuʻutuʻu māmani foʻou naʻe tatali fuoloa ki aí.”
KO E lea ia ʻa ha palesiteni ʻo e ʻIunaite Seteté ʻi he hongofuluʻi taʻu fakaʻosi ʻo e senituli hono 20. ʻI he taimi ko iá, naʻe hā ngali fakahaaʻi ʻe he ngaahi meʻa naʻe hoko fakavahaʻapuleʻangá naʻe hā ʻoneʻone mai ʻa e fāʻūtaha ʻa e māmaní. Naʻe tō tahataha ʻa e ngaahi founga-pule fakaaoaó. Naʻe holoki hifo ʻa e ʻĀ ʻo Pēliní, ʻo fakaʻilongaʻi ai ha kuonga foʻou ki ʻIulope. Ko e Sovieti ʻIunioní, naʻe vakai ki ai ʻa e tokolahi ʻi he Hihifó ʻokú ne fakalanga ʻa e ngaahi fepaki ʻi he kolopé, naʻe puli atu ia ʻo ʻohovale ai ʻa e māmaní. Naʻe ngata ʻa e Tau Momokó, pea naʻe ʻi ai ʻa e talanoa fakatuʻamelie fekauʻaki mo e huʻi-mahafu, ʻo kau ai ʻa e huʻi-mahafu niukiliá. Ko hono moʻoní, naʻe mapuna hake ʻa e tau ʻi he Kūlifa Pēsiá, ka naʻe hā ngali ko ha palopalema fakataimi pē ia ʻa ia naʻe fakatupunga ai ʻa e konga lahi ʻo e māmaní ke nau toe fakapapauʻi ange ai ke tuli ki ha tuʻunga melino.
Naʻe lava ke vakai ki ha ngaahi fakaʻilonga lelei ʻo ʻikai ʻi he ngaahi meʻa fakapolitikí pē ka ʻi he ngaahi tafaʻaki kehe ʻo e moʻuí. Naʻe fakalakalaka ʻa e tuʻunga ʻo e moʻuí ʻi he ngaahi konga lahi ʻo e māmaní. Ko e laka ki muʻa ʻi he malaʻe fakafaitoʻó naʻe ʻai ai ke malava ʻa e kau toketaá ʻo fai ʻa e ngaahi meʻa ʻa ia ne mei ui ko ha ngaahi mana ʻi he ngaahi hongofuluʻi taʻu siʻi ki muʻá. Ko e tupu fakaʻekonōmiká ʻi he ngaahi fonua lahi naʻe laka ki muʻa ia ʻi ha tuʻunga vave ʻa ia naʻe hā ʻoku taki atu ki he lakalakaimonū ʻi he kolopé. Ne hā ʻo hangē naʻe huʻu atu ʻa e ngaahi meʻá ki he tafaʻaki totonú.
ʻI he ʻahó ni, ʻi he ʻikai ko e ngaahi taʻu lahi ia ki mui aí, ʻoku pau ai ke tau ʻeke: ‘Ko e hā naʻe hokó? Ko fē ʻa e fāʻūtaha ʻa e māmaní naʻe talaʻofá?’ ʻI hono kehé, ʻoku hā ngali ngaʻunu ʻa e māmaní ki he tafaʻaki fehangahangaí. Ko e ngaahi laku pomu taonakitá, ngaahi ʻoho fakaetautoitoí, tupu fakautuutu ʻoku līpooti ʻo e ngaahi meʻatau fakaʻauha fakatokolahí mo e ngaahi meʻa fakahohaʻa kehe ʻoku tupulakí kuo hoko ko e ngaahi tafaʻaki tuʻumaʻu ia ʻo e ongoongo ʻoku pulusí. Ko e ngaahi meʻa peheé ʻoku hā ʻoku nau tekeʻi ʻa e māmaní ke toe mamaʻo lahi ange mei he fāʻūtahá. Naʻe pehē ki muí ni ʻe ha tokotaha ʻinivesi ʻiloa: “ʻOku tau hoko ʻo fihia ʻi ha siakale fulikivanu ʻo e fakamālohi lahi fakautuutu.”
Fāʻūtaha ʻa e Māmaní pe Movete Fakalūkufua?
ʻI he taimi naʻe faʻu ai ʻa e Ngaahi Puleʻanga Fakatahatahá, ko e taha ʻo e ngaahi taumuʻa naʻe fakahāʻí ko e pehē “ke fakatupu ha ngaahi vā fakakaumeʻa ʻi he lotolotonga ʻo e ngaahi puleʻangá makatuʻunga ʻi he fakaʻapaʻapa ki he tefitoʻi moʻoni ʻo e ngaahi totonu mo e fakapapauʻi-fakaekita tatau ʻa e ngaahi kakaí.” Hili ʻa e meimei taʻu ʻe 60, kuo aʻusia ʻa e taumuʻa lelei ʻaupito ko iá? Mole ke mamaʻo! ʻI he ʻikai ha “ngaahi vā fakakaumeʻa,” ko e kupuʻi lea “fakapapauʻi-fakaekita” ʻoku hā ko ha meʻa lahi ange ia ʻi he fakakaukau ʻa e ngaahi puleʻangá. Ko e fāinga ʻa e ngaahi kakaí mo e ngaahi kulupu fakafaʻahingá ke fokotuʻu honau fakaʻilonga mo e tuʻunga-hau ʻonautolú kuo fakautuutu ai ʻa e māvahevahe ʻa e māmaní. ʻI he taimi naʻe fokotuʻu ai ʻa e Ngaahi Puleʻanga Fakatahatahá, naʻe ʻi ai hono ngaahi fonua mēmipa ʻe 51. ʻI he ʻaho ní, ʻoku ʻi ai ʻa e fonua ʻe 191.
Hangē ko ia kuo tau mamata ki aí, ʻi he fakaofi ki he ngataʻanga ʻo e senituli hono 20, naʻe mafolalahia ai ʻa e ʻamanaki ki ha māmani fāʻūtahá. Talu mei ai, kuo mafuli ʻa e ʻamanaki ko iá ki he fakalotosiʻi ʻi he siotonu ʻa e faʻahinga ʻo e tangatá ki he movetevete fakautuutu ʻa e kakai ʻi he māmaní. Ko e taʻefāʻūtaha lahi ʻa ʻIukosilāviá, ko e ngaahi fepaki ʻi he vahaʻa ʻo Sesinia mo Lūsiá, ko e tau ʻi ʻIulakí mo e tāmate tavale hokohoko ʻi he Hahake Lotolotó—kuo hoko kotoa ia ko e fakamoʻoni ʻo e taʻefāʻūtaha ʻoku toe lahi ange.
ʻOku ʻikai ha veiveiua ʻoku moʻoni mo taumuʻa lelei ʻa e ngaahi feinga lahi ki he melinó. Neongo ʻa e meʻá ni, ʻoku hā ngali ʻikai ala maʻu ʻa e fāʻūtaha ʻi he māmaní. ʻOku hoko ai ʻa e tokolahi ʻo fifili: ‘Ko e hā ʻoku mātuʻaki maʻungataʻa ai pē ʻa e fāʻūtaha ʻa e māmaní? Ko e huʻu ʻa e māmaní ki fē?’
[Maʻuʻanga ʻo e Tā ʻi he peesi 3]
AP Photo/Lionel Cironneau
Arlo K. Abrahamson/AFP/ Getty Images