Ko e Faʻahitaʻu ʻAho Mālōloó—Te Ne Fakahoko Hoʻo Ngaahi Fakaʻamú?

“Naʻe tuʻutuʻuni ʻe Pita [ko e Lahi] ke fakahoko ha ngaahi fakataha fakalotu Taʻu Foʻou ʻi he kotoa ʻo e ngaahi siasí ʻi Sanuali 1. Tānaki atu ki ai, naʻá ne fakahinohinoʻi ke ngāueʻaki ʻa e ngaahi vaʻa ʻo e ʻakau laumata feʻunga ki he kātoangá ke teuteuʻiʻaki ʻa e ngaahi kaumatapā ʻi loto ʻi he ngaahi falé, peá ne fekauʻi ʻo pehē ʻoku totonu ki he kakai kotoa pē ʻi Mosikoú ke nau ‘fakahaaʻi ʻenau fiefiá ʻaki ʻenau fetalamonūʻaki leʻo lahi’ ʻi he Taʻu Foʻoú.”​—Peter the Great​—His Life and World.

KO E HĀ ʻa e meʻa ʻokú ke fakatuʻotuʻa atu ki ai lolotonga ʻa e meʻa ʻoku ui ʻe he tokolahi ko e faʻahitaʻu ʻaho mālōloó? Ko e kakai takatakai ʻi he kolopé ʻoku nau pehē ko e faʻahitaʻu ko ení ʻoku fakatefito ia ʻi he Kilisimasí, ko e ʻaho tukufakaholo ia ʻo e ʻaloʻi ʻo Kalaisí, ka ʻoku toe kau ai ʻa e kātoanga Taʻu Foʻoú. Ko ia ko ha vahaʻa taimi ʻaho mālōlō lōloa ia. Ko e ngaahi mātuʻá mo e fānaú fakatouʻosi te nau kiʻi mālōlō nai mei he ngāué mo e akó lolotonga ʻa e taimi ko ení, ko ia ʻoku hā ngali ko ha taimi lelei ia maʻá e ngaahi fāmilí ke nau fakamoleki fakataha. Kae kehe, ʻoku fakakaukau ʻa e niʻihi kehé ia ki he faʻahitaʻu ko ení ko e “faʻahitaʻu Kilisimasi,” koeʻuhi ʻoku nau fakaʻamu ke fakalāngilangiʻi ʻa Kalaisi ʻi he taimi ko eni ʻo e taʻú. Mahalo ko koe foki ʻokú ke ongoʻi ko e tafaʻaki mahuʻinga taha eni ʻo e faʻahitaʻú.

Pe ko e ʻai ke fakalāngilangiʻiʻaki ʻa Sīsū, pe ke fiefia fakataha ai mo hoto fāmilí, pe fakatouʻosi, ʻoku laui miliona ʻa e ngaahi husepāniti, uaifi mo e fānau takatakai he māmaní ʻoku nau tatali fakataha mo fakatuʻamelie atu ki he taimi ko ení. Fēfē ʻa e taʻú ni? ʻE hoko ia ko e taimi makehe ki he fāmilí, pea ʻoku makehe ia ki he ʻOtuá? Kapau ʻe ʻi ai ha fakatahataha fakafāmili, te ne fakahoko hoʻo ngaahi fakaʻamú, pe ʻe siva ai hoʻo ʻamanakí?

Ko e tokolahi ʻoku nau fakatuʻotuʻa atu ki he tafaʻaki fakalotú ʻoku nau fakatokangaʻi ko e Kilisimasí mo e Taʻu Foʻoú fakatouʻosi ʻoku faʻa kātoangaʻi ia ʻaki ha meʻa pē ʻo ʻikai kau ai ʻa e Laumālie ʻo Kalaisí. ʻI hono kehé, ko e faʻahitaʻu ʻaho mālōloó ʻoku hoko ia ko ha taimi pē ke maʻu ai ʻa e ngaahi meʻaʻofa, ko ha ʻuhinga ia ke fai ai ha paati ʻa ia ʻe kau nai ai ʻa e ʻulungāanga ʻoku taʻefakalāngilangiʻi ai ʻa Kalaisí, pe ko ha ʻuhinga tefito ia ki ha toe fakatahataha fakafāmili. ʻI he taimi lahi, ko ha fakatahataha pehē ʻoku maumauʻi ia ʻe ha mēmipa ʻe toko taha pe tokolahi ange ʻoku nau maʻu ʻo fuʻu hulu ʻa e meʻakaí mo e ʻolokaholó, ʻo kamataʻi ai ʻa e ngaahi fakafekiki ʻoku faʻa fakatupunga kotoa ai ʻa e fakamālohi ʻi he fāmilí. Kuó ke ʻosi fakatokangaʻi nai ia, pe mahalo ko e meʻa ia kuó ke hokosiá.

Kapau ko ia, ʻoku hā ngali kia koe kuo liliu ha meʻa siʻisiʻi ʻaupito talu mei he taimi ʻo e Sā Lūsia ko Pita ko e Lahí, ʻa ia naʻe fakamatalaʻi ʻi he kamataʻangá. ʻI hono uesia ʻe he tuʻunga lolotongá, ʻoku fakaʻamu ʻa e tokolahi ʻe lava ke hoko ʻa e faʻahitaʻu ʻaho mālōloó ko ha taimi ia ki he fakalaulauloto fakalotu loloto pea mo e feohi fakafāmili lelei. ʻOku aʻu ʻo ngāue mālohi ʻa e niʻihi ki ha liliu, ʻo ngāueʻaki ʻa e moto ko ia, ko Sīsū ʻa e ʻuhinga ki he faʻahitaʻu ko iá. Ka ʻe lava ke fakahoko ha liliu? Pea ʻe ʻoatu moʻoni nai ʻe he meʻá ni ʻa e fakalāngilangí kia Kalaisi? ʻOku ʻi ai ha ngaahi ʻuhinga ki hono maʻu ha vakai kehe ki he faʻahitaʻu ʻaho mālōloó?

Ke maʻu ha ngaahi tali fakafiemālie, tau vakai angé ki he tuʻungá ʻo fakafou ʻi he anga ʻo e vakai ʻa e kakai ʻo e puleʻanga ʻe taha ʻa ia ʻoku totonu ke ʻi ai ʻenau ʻuhinga makehe ke nau fakahaaʻi ai ʻenau houngaʻia ʻi he taimi ko eni ʻo e taʻú.