Ko e Hā ʻa e “Kuonga Fakamui”?

ʻOKÚ KE fifili pe ko e hā ʻoku tuku tauhi mai kiate koe mo e faʻahinga ʻokú ke ʻofa aí ʻi he kahaʻú? ʻOku tokanga lelei ʻa e kakai tokolahi ki he ongoongo ʻi he mītiá ke sio ai ki he founga ʻe laveʻi nai ai ʻenau moʻuí ʻe he ngaahi meʻa ʻoku hoko ʻi he māmaní. Kae kehe, ko e tokanga ki he Folofola fakamānavaʻi ʻa e ʻOtuá, ʻoku ʻomai ai kia kitautolu ʻa e fakamaama moʻoni. ʻOku peheé koeʻuhi he naʻe tomuʻa tala fuoloa ʻe he Tohi Tapú ʻo ʻikai ngata pē ʻi he ngaahi meʻa ʻoku lolotonga hokó kae toe pehē foki ki he ngaahi meʻa ka hoko mai ʻi he kahaʻú.

Ko e fakatātaá, ʻi he taimi naʻe ʻi māmani ai ʻa Sīsū Kalaisí, naʻá ne talanoa lahi ʻo fekauʻaki mo e Puleʻanga ʻo e ʻOtuá. (Luke 4:​43) ʻI ha ʻuhinga lelei, ko e kakai naʻa nau fanongo kiate iá naʻa nau loto ke ʻiloʻi ʻa e taimi ʻe hoko mai ai ʻa e Puleʻanga fakaofo ko iá. Ko e moʻoni, ʻi he ʻaho ʻe tolu ki muʻa ke fakapoongi taʻetotonu ʻa Sīsuú, naʻe ʻeke ʻe heʻene kau ākongá kiate ia: “Ko e ha nai ʻa e fakaʻilonga ʻo haʻo ha mai [ʻi he mafai ʻo e Puleʻangá], mo e faka ʻosi ʻo e kuonga?” (Mātiu 24:3) Naʻe tala ange ʻe Sīsū kia kinautolu ko Sihova pē ko e ʻOtuá ʻokú ne ʻiloʻi ʻa e taimi tonu ʻe puleʻi kakato ai ʻe he Puleʻangá ʻa e foʻi māmaní. (Mātiu 24:36; Maake 13:32) Kae kehe, ko Sīsū mo e niʻihi kehé naʻa nau tomuʻa tala ʻa e ngaahi meʻa pau ʻe hoko ʻi he māmaní ʻa ia te ne ʻomai ʻa e fakamoʻoni ʻoku pule ʻa Kalaisi ʻi he mafai ʻo e Puleʻangá.

Ki muʻa ke tau sivisiviʻi ʻa e fakamoʻoni hā mai ʻoku tau moʻui ʻi he “kuonga fakamui” ʻo e fokotuʻutuʻu lolotonga ní, tau lāulea nounou angé ki ha meʻa mahuʻinga naʻe hoko ʻi he nofoʻanga fakalaumālie taʻehāmaí. (2 Timote 3:1) Naʻe hoko ʻa Sīsū Kalaisi ko e Tuʻi ʻi hēvani ʻi he taʻu 1914.a (Taniela 7:​13, 14) ʻI he hili pē ʻene maʻu ʻa e mafai ʻo e Puleʻangá, naʻe fai ʻe Sīsū ha ngāue. ʻOku tala mai ʻe he Tohi Tapú: “Naʻe hoko ha tau ʻi he langi: ko Maikeli mo ʻene kau ʻangelo naʻa nau fai tau mo e Talakoni, pea naʻe tau ʻa e Talakoni mo ʻene kau ʻangelo aʻana.” (Fakahā 12:7) “Ko Maikeli, ko e angelo-pule,” ko Sīsū Kalaisi ia ʻi hono tuʻunga fakahēvaní.b (Siutasi 9; 1 Tesalonaika 4:​16) Ko e talākoní ko Sētane ko e Tēvoló. Ko e hā ʻa e ikuʻanga ʻi he fepaki ko ení kia Sētane mo hono kau muimui ko e kau ʻāngelo fulikivanu ʻa ia ʻoku ui ko e kau tēmenioó? Naʻa nau foʻi ʻi he tau ko iá pea naʻe “li” hifo pe kapusi kinautolu mei hēvani ki he māmaní. (Fakahā 12:9) Tuʻunga ʻi he meʻá ni ko e “ngaahi langi, mo [kinautolu] ʻoku nofo tapanekale ʻi ai,” ʻa ia ko e ngaahi foha fakalaumālie faitōnunga ʻo e ʻOtuá, naʻa nau fiefia. Neongo ia, ko e faʻahinga ʻo e tangatá kuo ʻikai te nau aʻusia ha fiefia pehē. “Ka ʻoiaue ʻa e fonua,” ko e tomuʻa tala ia ʻe he Tohi Tapú, “he kuo hoko hifo ʻa e Tevolo kiate kimoua, ʻoku ne ʻita lahi, ko ʻene ʻilo, ʻoku toesiʻi pe hono taimi.”—Fakahā 12:12.

Ko Sētane, ʻi heʻene ʻitá, kuó ne ʻomai ʻa e ʻoiauē—ʻa ia ko e faingataʻaʻia mo e mamahi—ki he faʻahinga ʻoku nofo ʻi he māmaní. Kae kehe, ko e ʻoiauē ko iá ʻe nounou, ko ha ‘taimi siʻi.’ ʻOku lave ʻa e Tohi Tapú ki he taimi ko ení ko e “kuonga fakamui.” ʻE lava ke tau fiefia he kuo vavé ni ke fakangata ʻosi ʻa hono tākiekina ʻe he Tēvoló ʻa e māmaní. Ka ko e hā ʻa e fakamoʻoni ʻoku tau moʻui ʻi he kuonga fakamuí?

[Fakamatala ʻi lalo]

[Maʻuʻanga ʻo e Tā ʻi he peesi 2]

TAKAFI: ʻI muʻá: © Chris Stowers/Panos Pictures; ʻi muí: FAROOQ NAEEM/AFP/Getty Images