Pole ʻo e Anga-Fakatōkilaló

KI HE kakai tokolahi, ʻoku hā ngali ko e anga-fakatōkilaló ʻoku ʻikai ke ʻi ai hano tuʻunga ʻona ʻi he māmani ʻo e ʻaho ní. Ko kinautolu ko ia ʻoku fakaongo ki ai ʻa e kakaí pea mo hā ngali lavameʻa tahá ko e faʻahinga ʻoku nau tuʻuaki pe kinautolu, ko e kau hīkisia, ko e faʻahinga ʻoku nau vilitaki ke maʻu ʻa e meʻa ʻoku nau fiemaʻú. ʻOku meheka ʻa e sōsaietí fakalūkufua ki he founga moʻui ʻa e tuʻumālié mo e kau ongoongoá, ʻo ʻikai ki he faʻahinga anga-fakatōkilalo mo anga-vaivaí. Ko e faʻahinga lavameʻá ʻoku nau faʻa manako ke pōlepole koeʻuhi ko ʻenau ngaahi feinga pē ʻanautolú. ʻI he ʻikai ke nau hoko ʻo fakatōkilaló, ʻoku tuku kakato ʻi he loto-hīkisia ʻenau falalá kiate kinautolu pē ʻi he taimi ʻoku nau lavameʻa aí.

Naʻe lave ha tangata faifakatotolo ʻi Kānata ki he “ʻasi ko ia ʻa e fakakaukau ‘siokitá’” ʻi hono fonuá. ʻOku ongoʻi ai ʻe he niʻihi ʻoku tau moʻui kitautolu ʻi ha sōsaieti ʻoku mahuʻinga ange ai ʻa e fakatōliʻa-kitá ʻi he moʻui fua fatongiá pea tau sio ai ko e kakai ʻo e ʻaho ní ʻoku fakautuutu ʻenau siokitá. ʻI ha māmani pehē, mahalo pē ʻe hā ngali ʻikai manakoa ai ʻa e anga-fakatōkilaló.

Ka neongo ia, ʻe loto-tatau ʻa e tokolahi pea mo e fakakaukau ko ia ko e anga-fakatōkilaló ʻoku lelei ia ki he niʻihi kehé, koeʻuhí he ko e kakai fakatōkilaló ʻoku faingofua ʻa e feohi mo kinautolú. Kae kehe, ʻi hotau māmani feʻauʻauhí, ʻoku ilifia ai ʻa e niʻihi ʻi he pehē kapau te nau ngāue fakatōkilalo ʻe vakai ange ʻa e niʻihi kehé ko e kau vaivai kinautolu.

Ko e Folofola ʻa e ʻOtuá, ʻa e Tohi Tapú, naʻe tomuʻa tala ai ʻi hotau taimí ʻe hoko ʻa e kakaí ʻo ‘fielahi mo angataʻetokaʻi.’ (2 Timote 3:​1, 2) ʻIkai nai ʻokú ke tui ko e kikite ko ení ʻoku ʻosi fakahoko? ʻOku lava nai ke ke sio ki ha mahuʻinga ʻo e hoko ʻo fakatōkilaló? Pe ʻokú ke fakakaukau koe ko ha tokotaha anga-fakatōkilalo ʻe fai ha vakai ki ai ko ha tokotaha vaivai, ʻo faingofua ke ngāueʻaki ʻe he niʻihi kehé.

Ko hono moʻoní ʻoku ʻomai ʻe he Tohi Tapú ha ngaahi ʻuhinga lelei ki hono fakamahuʻingaʻi mo fakatupulekina ko ia ʻo e anga-fakatōkilaló. ʻOku tokonaki mai ai ha vakai mafamafatatau mo pau fekauʻaki mo ia pea ʻoku fakahā ai ko e anga-fakatōkilalo moʻoní ko ha fakaʻilonga ia ʻo e mālohi, kae ʻikai ko e vaivai. Ko e kupu ʻoku hoko maí te ne fakamatalaʻi hono ʻuhingá.

[Fakatātā ʻi he peesi 3]

ʻE anga-fēfē nai ʻetau ongoʻi fekauʻaki mo ʻetau ngaahi lavameʻá?