ʻOkú Ke Manatuʻi?
Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sio angé pe ʻe lava ke ke tali ʻa e ngaahi fehuʻi ko ení:
• Ko e hā ʻa e lēsoni ʻe lava ke tau ako mei hono fakahaofi ʻe Sīsū ʻa Pita ʻi heʻene ngoto hifo ʻi he tahí? (Mt. 14:28-31)
Kapau te tau fakatokangaʻi ʻoku hā mai mei ha tokoua ha taʻetui, ʻe lava ke tau mafao atu hotau nimá ʻi he tuʻunga fakaefakatātā ʻo tokoniʻi ia ke ne toe maʻu ha tui.—9/15, peesi 8.
• Ko e hā ʻa e meʻa naʻe feilaulauʻi ʻe Sihova ke lava ai ʻa hotau fakahaofí?
Naʻe kātekina ʻe Sihova ʻa hono fakamamahiʻi mo manukiʻi ʻa hono ʻAló. Pea hangē ko ia ko hono tomuʻa fakatātaaʻi ʻe he loto-lelei ʻa ʻĒpalahame ke foaki ʻa hono fohá, naʻe kātekina ʻe Sihova ʻa hono tāmateʻi ʻa hono ʻAló ko ha tokotaha faihia.—9/15, peesi 28-29.
• ʻI he ʻuhinga fē ʻe lava ai ʻe he ʻOtuá ke ne ʻai koe ke ke koloaʻiá?
ʻI he kuohilí, naʻe tāpuakiʻi ai ʻe Sihova ha niʻihi ʻaki ʻa e ngaahi koloa fakamatelie, ʻo hangē ko ʻĒpalahame mo Solomoné. Ka ko e ngaahi koloa ʻoku fiemaʻu lahi taha ʻe he kau Kalisitiané pea ʻe lava ke tokoniʻi ʻe he ʻOtuá ha taha ke ne maʻú, ʻoku kau ki ai ʻa e tui, nonga, fiemālie pea mo e fiefia.—10/1, peesi 3-7.
• Ko e hā ʻe lava ke hoko ai ʻa hono ngāueʻaki ʻo e paʻangá ko ha palopalema ʻi he nofo malí, pea ko e hā ʻe lava ke ne tokoniʻi ʻa e ngaahi hoa malí ke nau lavameʻá?
Ko e ngaahi taʻefelotoi ʻi he paʻangá ʻoku faʻa fekauʻaki ia mo e falalá pe ilifiá, pea ko e ngaahi hoa malí ʻe kehekehe nai honau ngaahi puipuituʻá. Ko e kī eni ʻe fā ki he lavameʻá: Ako ke talanoa ʻi he anga-mokomoko fekauʻaki mo e paʻangá, felotoi ʻi he founga ke vakai ʻaki ki he paʻanga hū maí, tohiʻi ha patiseti fakafāmili, pea fakapapauʻi pe ko hai te ne fai ha meʻá.—10/1, peesi 10-12.
• Ko e hā ʻa e lēsoni ʻoku ʻomai ʻi he Palovepi 24:27 fekauʻaki mo hono ‘langa ha fale’?
Ko ha tangata ʻoku loto ke mali ʻoku totonu ke ne teuteu ki he fatongia ko iá. ʻOku kau ki heni ʻa e mateuteu ke tokonaki fakamatelie ki ha fāmili pea ke hoko ko e ʻulu fakalaumālie ʻo ha fāmili.—10/15, peesi 12.
• Ko e hā ʻa e ngaahi kī tefito ʻe tolu ki ha ako Tohi Tapu fakafāmili lavameʻá?
ʻUluakí, fai hokohoko. Fokotuʻu ha ʻaho mo e taimi pau ki he efiafi ʻo hoʻo Lotu Fakafāmilí, pea tauhi maʻu ki ai. ʻOua ʻe fakaʻatā ha fakakaukau ke fai tōmokosi ʻa e akó. Uá, ʻai ke ʻaonga. Fili ʻa e ngaahi tuʻunga-lea ʻe kaunga ki he meʻa ʻe fehangahangai mo hoʻo tamá ʻi he ngaahi ʻaho pe uike ka hoko maí. Tolú, ʻai ke fakafiefia. ʻE lava ke ke fanongo ki he taha ʻo e tulama leʻó pe sio mo lāulea ʻi he taha ʻo e ngaahi vitiō kuo faʻu ʻe he Kau Fakamoʻoni ʻa Sihová. Pe ʻe lava ke mou lau fakataha ha konga ʻo e Tohi Tapú, ʻo vaheʻi ha konga ki he mēmipa taki taha ʻo e fāmilí.—10/15, peesi 29-31.
• Naʻe anga-fēfē hono fokotuʻu ʻe Sihova mo Sīsū ha faʻifaʻitakiʻanga kiate kitautolu ʻi he ʻulungaanga leleí?
Neongo ʻa e tuʻunga māʻolunga ʻo Sihová, ʻokú ne fakafeangai ki he tangatá ʻi he anga-lelei mo e fakaʻapaʻapa. Naʻá ne folofola kia ʻĒpalahame mo Mōsese ʻo ngāueʻaki ha foʻi lea faka-Hepelū ʻoku faʻa liliu ko e “muʻa” pe kātaki. (Sen. 13:14; Eki. 4:6) ʻOku toe fanongo foki ʻa e ʻOtuá ki he tangatá. (Sen. 18:23-32) Naʻe pehē foki mo Sīsū, pea naʻá ne mateuteu mo loto-lelei ke tokoniʻi ʻa e faʻahinga takatakai ʻiate iá, naʻa mo hono faʻa ngāueʻaki honau hingoá.—11/15, peesi 25.
• Kapau ʻokú ke ako ha talanoa tuhutuhu, ʻe lava fēfē ke ke hoko ʻo toe pōtoʻi ange ʻi he talanoa tuhutuhú mo mahinoʻi ʻa e talanoá?
Neongo ʻoku ʻi ai nai ʻa e kau malanga kehe ʻoku lava ʻo fanongo ʻi hoʻo fakatahaʻangá, feinga ke ke tuhutuhu pē kae ʻoua ʻe lea. ʻE tokoni eni kia koe ke ke fakakaukau fakaetalanoa tuhutuhu, ʻa ia ko e meʻa ʻokú ke sio ki aí. ʻI he taimi ʻe niʻihi, ʻe fakataueleʻi nai koe ke ke lea kae ʻikai ke tuhutuhu. Kae kehe, ʻi hono ako ha faʻahinga lea pē, kuo pau ke ke kātaki neongo ʻene faingataʻá ka ke poto.—11/15, peesi 31.