6 ʻE Tokoni Nai?

ʻOKU ʻomai nai ʻe he lotú ha lelei kiate kitautolu? ʻOku tala mai ʻe he Tohi Tapú ʻio, ʻoku ʻaonga moʻoni ʻa e ngaahi lotu ʻa e kau sevāniti faitōnunga ʻo e ʻOtuá kiate kinautolu. (Luke 22:40; Sēmisi 5:​13) Ko hono moʻoní, ko e lotú ʻe lava ke ne tokoniʻi kitautolu fakalaumālie, fakaeongo pea naʻa mo e fakaesino. Anga-fēfē?

Tau pehē pē ʻoku ʻi ai hao kiʻi tama ʻokú ne maʻu ha meʻaʻofa. Te ke akoʻi ange kiate ia ʻoku feʻunga pē ke ongoʻi houngaʻia? Pe te ke akoʻi ia ke ne fakahaaʻi ʻene houngaʻiá? ʻI he taimi ʻoku tau fakahaaʻi ai ʻetau ngaahi ongoʻi mahuʻingá, ʻoku tau tokangataha ai ki he ngaahi ongoʻi ko iá pea aʻu ʻo tau ongoʻi lahi ange ʻa e ngaahi ongoʻi ko iá. ʻOku tatau eni mo e taimi ʻoku tau talanoa ai ki he ʻOtuá? ʻAupito! Fakakaukau ki ha ngaahi fakatātā ʻe niʻihi.

Ngaahi lotu fakamālō. ʻI heʻetau fakamālō ki heʻetau Tamaí koeʻuhi ko e ngaahi meʻa lelei ʻoku tau maʻú, ʻoku tau tokangataha ai ki hotau ngaahi tāpuakí. Ko hono olá, te tau ongoʻi houngaʻia lahi ange, fiefia lahi ange pea ongoʻi lelei lahi ange.​—Filipai 4:6.

Fakatātaá: Naʻe fakahaaʻi ʻe Sīsū ʻa e houngaʻia ki he founga naʻe fanongo mo tali ai ʻe heʻene Tamaí ʻene ngaahi lotú.​—Sione 11:41.

Ngaahi lotu ki he fakamolemole. ʻI heʻetau kole ha fakamolemole ki he ʻOtuá, ʻoku tau fakaivimālohiʻi ai hotau konisēnisí, fakalolotoʻi ʻetau fakatomalá, pea fakalahi ʻetau lāuʻilo ki he mafatukituki ko ia ʻo e angahalá. ʻOku tau toe maʻu foki mo e fakafiemālie koeʻuhi ko e mafasia ʻi he angahalá.

Fakatātaá: Naʻe lotu ʻa Tēvita ʻo fakahaaʻi ʻene fakatomala mo ʻene mamahi ʻi he meʻa naʻá ne faí.​—Saame 51.

Ngaahi lotu ki ha tataki mo e poto. Ko e kole ko ia kia Sihova ke ne tataki kitautolu pe ʻomai ʻa e poto ʻoku tau fiemaʻú ke fai ʻaki ʻa e ngaahi fili leleí ʻe lava ke ne tokoniʻi kitautolu ke tau hoko ʻo anga-fakatōkilalo moʻoni. ʻE lava ke fakamanatu mai ai kiate kitautolu hotau ngaahi fakangatangatá pea tokoniʻi kitautolu ke langa hake ʻetau falala ki heʻetau Tamai fakahēvaní.​—Palōveepi 3:​5, 6.

Fakatātaá: Naʻe kole anga-fakatōkilalo ʻa Solomone ki ha tataki mo e poto ke puleʻi ʻaki ʻa ʻIsileli.​—1 Tuʻi 3:​5-​12.

Ngaahi lotu ʻo e mamahi. Kapau te tau huaʻi atu hotau lotó ki he ʻOtuá ʻi he taimi ʻoku tau ongoʻi loto-mamahi aí, te tau ongoʻi fiemālie pea te tau falala ai kia Sihova kae ʻikai kiate kitautolu.​—Saame 62:8.

Fakatātaá: Naʻe lotu ʻa Tuʻi ʻAsa ʻi heʻene fehangahangai mo ha fili fakatuʻutāmaki.​—2 Kalonikali 14:11.

Ngaahi lotu maʻá e niʻihi kehé. Ko e ngaahi lotu peheé ʻe tokoniʻi ai kitautolu ke faitau mo e siokitá pea tupulekina ʻi he manavaʻofa mo e kaungāongoʻi.

Fakatātaá: Naʻe lotu ʻa Sīsū maʻa hono kau muimuí.​—Sione 17:​9-​17.

Ngaahi lotu fakahīkihiki. ʻI heʻetau fakahīkihikiʻi ʻa Sihova ki heʻene ngaahi ngāue fakaofó mo hono ngaahi ʻulungāngá, ʻe tupulaki ʻetau fakaʻapaʻapa mo e houngaʻia kiate iá. ʻE tokoniʻi kitautolu ʻe he ngaahi lotu peheé ke ʻunuʻunu ofi ange ki hotau ʻOtuá mo e Tamaí.

Fakatātaá: Naʻe fakahīkihikiʻi loto-māfana ʻe Tēvita ʻa e ʻOtuá ki heʻene fakatupú.​—Saame 8.

Ko e toe tāpuaki ʻe taha ʻoku felāveʻi mo e lotú “ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē.” (Filipai 4:7) Ko hono maʻu ʻa e nonga ʻi he māmani fonu palopalema ko ení ko ha tāpuaki hāhāmolofia moʻoni. ʻOku toe ʻi ai foki mo hono ngaahi ʻaonga fakaesino. (Palōveepi 14:30) Ka te tau maʻu ia ʻi heʻetau ngaahi feinga pē ʻatautolú? Pe ʻoku kaunga ki ai ha meʻa mahuʻinga ange?