Fetuʻutaki mo e Nofoʻanga Laumālié
KUO vaheʻi ʻe he ʻOtua Māfimafi-Aoniú ʻa e ngaahi fatongia pau ki ha ngaahi meʻamoʻui laumālie ʻe niʻihi. Ko e fakatātaá, kuó ne tuku ʻa e pule ki he māmaní ki he nima ʻo Sīsū Kalaisí, pea kuó ne fakanofo ʻa e kau ʻāngelo faitōnunga ke nau tokoni ʻi he tataki ʻa hono talaki ʻa e ongoongo leleí. (Fakahā 14:6) Kae kehe, ʻoku kehe ʻa e ngaahi lotú ia. Kuo ʻikai ke ne vaheʻi ki ha taha ke fanongo ki he ngaahi lotú. Ko ʻetau ngaahi lotú ʻoku fai fakahangatonu pē ia ki he ʻOtuá tonu.
Ko Sihová ʻokú ne “ogoʻi ae lotu.” (Sāme 65:2, PM) ʻOkú ne fanongo ki heʻetau ngaahi lotú, pea ʻokú ne tali ia. ʻI he fekauʻaki mo e lotú, naʻe tohi ʻe he ʻapositolo ko Sioné ki he kaungā sevāniti ʻa Sihová: “Ka tau ka kole ha mea o fakatatau ki hono finagalo, oku ne ogoʻi [ʻe he ʻOtuá] akitautolu: Bea kabau oku tau ilo oku ne ogoʻi akitautolu, koia kotoabe oku tau kolea, oku tau ilo oku tau maʻu ae gaahi kole naa tau holi ai kiate ia.”—1 Sione 5:14, 15, PM.
Ko e kau ʻāngelo faitōnungá ʻoku ʻikai te nau loto ke tau ui pe lotu ange kia kinautolu. ʻOku nau mahinoʻi pea ngāue fāitaha mo e fokotuʻutuʻu ʻa e ʻOtuá ki he lotú, ʻa ia ʻoku kaunga fakahangatonu he taimi ʻe niʻihi kia kinautolu. ʻI he founga fē? Sai, ʻi he taimi naʻe lotu ai ʻa e palōfita ko Tanielá kia Sihova fekauʻaki mo e fakaʻauha ʻo Selusalemá, naʻe tali ʻe he ʻOtuá ʻa e lotu ʻa Tanielá ʻaki hono fekau atu ʻa e ʻāngelo ko Kepalelí mo ha pōpoaki fakalototoʻa.—Taniela 9:3, 20-22.
Ngaahi Pōpoaki mei he Kau Maté?
ʻOku totonu ke tau feinga ke fetuʻutaki mo e faʻahinga ko ia kuo nau maté? Ko e ngaahi talanoa lahi ʻoku fakamatala ai fekauʻaki mo e ngaahi fetalanoaʻaki kuo fai tokua ʻe he kakaí mo e ngaahi laumālie ʻo e kau maté. Ko e fakatātaá, naʻe fetuʻutaki ha tokotaha fakahaʻele faʻahikehe ki ha fefine ʻi ʻAilani, ʻa ia naʻá ne pehē ʻi he pō ki muʻá, naʻá ne fetalanoaʻaki ai mo Fred, ko e husepāniti ʻo e fefiné. Ka kuo mate ʻa Fred ia ʻi ha ngaahi uike siʻi ki muʻa ange. Ko e taula faʻahikehé, naʻá ne hoko atu ʻo fakamatala ki he meʻa naʻe leaʻaki ʻe “Fred,” ko e ngaahi meʻa naʻe tui ʻa hono uaifí ko ia pē tokotaha naʻá ne ʻiló. He mei faingofua ē kiate ia ke ne fakaʻosiʻaki naʻe moʻui ʻa Fred ʻi he māmani laumālié pea naʻá ne feinga ke fetuʻutaki mai kiate ia fakafou ʻi he solá. Kae kehe, ko e fakamulituku ko iá, ʻe fepaki ia mo e meʻa ʻoku leaʻaki mahino ʻe he Tohi Tapú fekauʻaki mo e tuʻunga ʻo e kau maté.—Sio ki he puha ʻi laló.
ʻE lava fēfē leva ke fakamatalaʻi ʻa e ngaahi talanoa hangē ko ení? Ko e meʻangāue fakahala ʻe taha ʻoku ngāueʻaki ʻe he fanga tēmenioó ko ʻenau fakangalingali ko e kau maté, ʻi he tuʻunga ko ení, ko Fred. Ko e hā ʻa e taumuʻá? Ke fakatafokiʻi ʻa e kakaí mei he meʻa ʻoku akoʻi ʻe he Tohi Tapú pea ke fakavaivaiʻi ʻa e tui mo e falala kia Sihová. ʻOku ʻikai toe fehuʻia, ko Sētane mo e fanga tēmenioó ʻoku nau kākaaʻi ʻa e kakaí “ʻaki ʻa e ngaahi faʻahinga mana kehekehe, mo e meʻa fakaʻilonga mo e meʻa fakaofo ka ko e koto loi pe; mo e fai ʻaki ʻa e faʻahinga fakahekeheke kotoa pe ki he kakai, ka ko e koto kākā: ʻio ʻo fai ki he kakai ʻoku fakatau ki mala.”—2 Tesalonaika 2:9, 10.
Ke fakapapauʻí, ʻoku ʻi ai ʻa e kau taula faʻahikehe mo e faʻahinga ʻoku fakafekauʻaki kia kinautolu ʻoku nau tui moʻoni ʻoku nau fetuʻutaki mo e kakai kuo nau maté. Ko hono moʻoní, kapau ʻoku nau fetuʻutaki mo ha taha, ʻoku nau fetuʻutaki ai mo e kau laumālie ʻa ia ʻoku nau fakafepaki kia Sihova. Pehē foki, ʻoku ʻi ai ʻa e faʻahinga ʻoku nau tui ʻoku nau lotu ki he ʻOtuá ka ʻoku nau maʻuhala. Ko e ʻapositolo ko Paulá naʻe fakamānavaʻi ke ne tohi ʻa e fakatokanga mālohi ko ení: “Ko e ngaahi feilaulau ʻoku ʻatu ʻe he hiteni, ʻoku nau ʻatu ki he ngaahi faʻahikehe, ʻo ʻikai ki he ʻOtua.”—1 Kolinito 10:20, 21.
ʻI hono ʻiloʻi ʻoku lava ke tau lotu ki he Tokotaha Aoniu, ʻa ia ʻokú ne ʻofa mo tokanga mai kia kitautolú, ko e hā ka tau ka loto ai ke lotu ki ha toe tokotaha kehe? Hili angé, ʻoku ʻomai ʻe he Tohi Tapú ʻa e fakapapau ko ení: “Ko e ongo foʻi fofonga ʻo e ʻEiki ʻoku feleleaki ʻi mamani katoa, ke taukapoʻi ʻa e kakai ʻoku haohaoa loto kiate ia.”—2 Kalonikali 16:9.
[Fakamatala ʻi he peesi 9]
ʻI hono ʻiloʻi ʻoku lava ke tau lotu ki he Tokotaha Aoniu, ʻa ia ʻokú ne ʻofa mo tokanga mai kia kitautolú, ko e hā ka tau ka loto ai ke lotu ki ha toe tokotaha kehe?
[Puha/Fakatātā ʻi he peesi 8]
Moʻoni mo e Loi
MOʻONI: KO SĒTANÉ KO HA TOKOTAHA MOʻONI
“Naʻa mo Setane ʻoku ne ʻai ʻa e anga ʻo ha angelo mei he maama.”—2 Kolinito 11:14.
“Mou laka fakaʻehiʻehi, mou ʻā: ko homou fili ko e Tevolo ʻoku ne ʻalu fano ʻo hange ko ha laione ngungulu, heʻene kumi ha taha ke ne matuʻaki folo.”—1 Pita 5:8.
“Ko ia ʻoku fai angahala ko e tupu-mei-he-Tevolo ia; he ko e Tevolo ko e fai angahala ia mei he kamataʻanga.”—1 Sione 3:8.
“Mou fakavaivaiʻi kimoutolu ki he ʻOtua. Ka mou tali tekeʻi ʻa e Tevolo, pea te ne hola meiate kimoutolu.”—Semisi 4:7.
“Ko e Tevolo, . . . ko e tamate-tangata mei he kamataʻanga, pea naʻe ʻikai te ne tuʻunga ki he moʻoni, koeʻuhiā ʻoku ʻikai ha moʻoni ʻiate ia. ʻO ka lea loi hamou toko taha, ko ʻene leaʻaki mei hono faʻahinga: he ko e loi ia, pea pehē mo ʻene tamai.”—Sione 8:44.
LOI: ʻI HE MATÉ ʻOKU HOKO KOTOA ATU AI KI HE NOFOʻANGA LAUMĀLIÉ
“Te ke kai hoʻo meʻakai ʻi he kakava ʻo ho mata, kaeʻoua ke ke foki ki he kelekele ʻa ia naʻe toʻo koe mei ai: he ko e efu koe, pea ko e efu te ke foki ki ai.”—Senesi 3:19.
“Ko e kau moʻui ʻoku nau ʻilo ai pe te nau pekia: ka ko e kau pekia ʻoku ʻikai te nau ʻilo ha momoʻi meʻa”—Koheleti 9:5.
“Ko ia kotoa ʻoku ʻilo ʻe ho nima te ne mafai, fai ʻaki ho ivi; he ʻoku ʻikai ha ngaue, pe ha fakakaukau, pe ha ʻilo, pe ha poto ʻi Lolofonua [ko e faʻitoká], ʻa e feituʻu ʻoku ke fononga ki ai.”—Koheleti 9:10.
“ʻOku mole ʻene manava, ʻoku ne foki ki hono kelekele; ko e ʻaho pe ko ia ko ʻene ngaahi fakakaukau ʻoku mate.”—Sāme 146:4.
MOʻONI: ʻOKU TOKANGA MAI KIA KITAUTOLU ʻA E KAU ʻĀNGELO FAITŌNUNGÁ
“ʻOku ʻapitanga ʻa e angelo ʻa Sihova takatakai ki heʻene kau ʻapasia, ke fai honau fakahaofia.”—Sāme 34:7; 91:11.
“ʻIkai ko e kau laumalie [kau ʻāngelo] ngaue ʻa kinautolu fuape, ʻoku kouna atu ke fai ha lakanga, koeʻuhi ko kinautolu te nau hokosi ʻa e fakamoʻui?”—Hepelu 1:14.
“Pea u vakai ha angelo ʻe taha, ʻoku ne puna ʻi he loto langi, pea ʻoku ne ʻalu mo ia ʻa e Kosipeli taʻengata ke malangaʻaki kiate kinautolu ʻoku nofo ʻi he fonua, pea ki he puleʻanga kotoa pē, mo e matakali, mo e lea, mo e faʻahinga; ʻo ne lea leʻo lahi ʻo pehē, Mou manavahē ki he ʻOtua, pea tuku kololia kiate ia.”—Fakahā 14:6, 7.
LOI: ʻOKU TATAU ʻA SĪSŪ MO E ʻOTUÁ
“ʻOku ou loto ke mou ʻilo, ko e ʻulu ʻo e tangata kotoa pe ko Kalaisi; pea ko e ʻulu ʻo e fefine ko e tangata; pea ko e ʻulu ʻo Kalaisi ko e ʻOtua.”—1 Kolinito 11:3.
“ʻOka lava ʻa e tuku ki lalo ʻo e meʻa kotoa pe kiate ia, pea ʻe toki tuku ki lalo, ʻa e ʻAlo ʻe ia kiate ia naʻa ne fai ʻa e tuku ki lalo ʻo e meʻa kotoa pe kiate ia; koeʻuhiā ke tāfataha ʻa e ʻOtua ʻi he meʻa kotoa pe.”—1 Kolinito 15:28.
“Ko au e, ko au e, ʻoku ou tala atu, ʻOku ʻikai lava ʻe he ʻAlo ke fai ʻiate ia ha momoʻi meʻa, ngata pe ʻi he meʻa ʻoku ne vakai ʻoku fai ʻe he Tamai.”—Sione 5:19.