Fehuʻi mei he Kau Lautohí
ʻI he Senesi 6:3, ʻoku tau lau ai: “ʻE ʻikai nofo maʻuaipe hoku Laumalie mo e tangata, ke fiu hono oʻi, he ko e kakano foki mo ia: ka ko hono fuoloa ko e taʻu ʻe teau mo e taʻu ʻe uofulu.” Naʻe fakangatangata ʻe Sihova ʻa e lōloa ʻo e moʻui ʻa e tangatá ki he taʻu ʻe 120, pea naʻe malanga ʻa Noa fekauʻaki mo e Lōmaki ka hoko maí ʻi he lōloa ko iá?
Ko e tali ki he ongo konga fehuʻí fakatouʻosi ko e ʻikai.
Ki muʻa ʻi he Lōmakí, naʻe moʻui ai ʻa e tokolahi ʻo e faʻahinga ʻo e tangatá ʻi ha ngaahi senituli. Naʻe taʻu 600 ʻa Noa ʻi he taimi naʻe hoko mai ai ʻa e Lōmakí, pea naʻá ne moʻui ʻo taʻu 950. (Sen. 7:6; 9:29) Ko e niʻihi naʻe fāʻeleʻi ʻi he hili ʻa e Lōmakí naʻa nau toe moʻui ʻo lōloa ange ia ʻi he taʻu ʻe 120. Ko ʻAfakisate naʻá ne mate ʻi hono taʻu 438 pea ko Sala ʻi hono taʻu 433. (Sen. 11:10-15) Kae kehe, ʻi he aʻu mai ki he taimi ʻo Mōsesé, ko e lōloa anga-maheni ʻo e moʻuí naʻe holo hifo ia ki he taʻu 70 pe 80. (Sāme 90:10) Ko ia ko e Senesi 6:3 naʻe ʻikai fokotuʻu pau mai ai ki he tangatá ia ha tuʻunga lōloa taha pe anga-maheni ʻo ha lōloa ʻo e moʻuí ko e taʻu ʻe 120.
Ko ia ai, ko e veesi ko iá ko ha fakamatala fakaʻotua ia kia Noa fekauʻaki mo e fakatokanga ki he niʻihi kehé ʻo kau ki he fakaʻauha ka hoko mai ʻi ha taʻu ʻe 120? ʻIkai. Naʻe folofola ʻa e ʻOtuá ʻi ha ngaahi taimi kia Noa. ʻOku tau lau ʻi he veesi ʻe hongofulu ki mui ʻi he fakamatala ko iá: “Pea folofola ʻa e ʻOtua kia Noa, Kuo ongo mai kiate au kuo aʻu ʻa e kakano kotoa pe ki hono ngataʻanga; he ko e meʻa ʻiate kinautolu kuo opeope ʻi he fonua ʻa e fakamalohi.” ʻI he ngaahi taʻu hoko mai aí, naʻe fakakakato ai ʻe Noa ʻa e ngāue kāfakafa ʻo hono langa ʻa e ʻaʻaké, pea ʻi he tuʻunga ko iá: “[Naʻe] folofola ʻa Sihova kia Noa, Hu koe mo ho famili kotoa ki he Aake.” (Sen. 6:13; 7:1) Pea ʻoku ʻi ai mo e ngaahi tuʻunga kehe ʻa ia naʻe tala ai ʻe Sihova kia Noa ʻa e ngaahi moʻoniʻi meʻa pau.—Sen. 8:15; 9:1, 8, 17.
Kae kehe, ʻoku kehe ʻa e lau ia ʻa e Senesi 6:3; ʻoku ʻikai lave ia ai kia Noa, pea ʻoku ʻikai pehē ai naʻe folofola kiate ia ʻa e ʻOtuá. ʻOku lava ke mahinoʻi ko hano fakahāhā faingofua ia ʻo e taumuʻa pe fakapapau ʻa e ʻOtuá. (Fakafehoanaki mo e Senesi 8:21.) ʻOku mahuʻinga ke ʻiloʻi, ʻi he lēkooti fakahisitōlia fekauʻaki mo e meʻa naʻe hoko fuoloa ki muʻa ʻi he taimi ʻo ʻĀtamá, ʻoku tau maʻu ai ʻa e ngaahi kupuʻi lea hangē ko e: “Pea folofola ʻa e ʻOtua . . .” (Sen. 1:6, 9, 14, 20, 24) ʻOku hā mahino, naʻe ʻikai ke folofola ʻa Sihova ki ha tangata ʻi he māmaní, he naʻe teʻeki ai ke fakatupu ʻa e tangatá.
Ko ia ai, ʻoku ʻuhinga lelei, ke fakaʻosiʻaki ʻoku fakahaaʻi ʻi he Senesi 6:3 ʻa e fakapapau ʻa e ʻOtuá ke fakangata ʻa e fokotuʻutuʻu fakameleʻi ʻo e ngaahi meʻa ʻi he māmaní. Naʻe tuku atu ʻe Sihova ha tuʻutuʻuni fakaefakamaau ke fai ia ʻi he taʻu ʻe 120, neongo naʻe teʻeki ai lāuʻilo ki ai ʻa Noa. Ka ko e hā naʻe fokotuʻu ai ha taimi fakangatangatá? Ko e hā naʻe tatali aí?
ʻOku ʻomai ʻe he ʻapositolo ko Pitá ʻa e ngaahi ʻuhingá: “ʻI he taimi naʻe tatali ʻa e Angamokomoko ʻa e ʻOtua ʻi he kuonga ʻo Noa, lolotonga ʻoku teu ʻa e Aake; ʻa ia ʻi he hu ki ai ha tokosiʻi, ko e toko valu tokua, naʻe fakamoʻui ʻaki ʻa e vai.” (1 Pita 3:20) ʻIo, ʻi he taimi naʻe fai ai ʻe he ʻOtuá ʻene fakapapau fekauʻaki mo e taʻu ʻe 120, naʻe ʻi ai ʻa e ngaahi meʻa naʻe kei toe ke fai. ʻI he taʻu ʻe 20 ki mui aí, naʻe kamata maʻu fānau ai ʻa Noa mo hono uaifí. (Sen. 5:32; 7:6) Naʻe tupu hake hona ngaahi foha ʻe toko tolú ʻo mali, ʻo ʻalu hake ai ʻa e fāmilí ki he “toko valu.” Naʻe pau leva ke nau langa ʻa e ʻaʻaké, ʻa ia naʻe ʻikai ko ha ngāue vave ʻi he fakakaukau atu ki hono lahí mo e tokolahi ʻo e fāmili ʻo Noá. ʻIo, ko e kātaki ʻa e ʻOtuá ʻi he taʻu ʻe 120 naʻe fakaʻatā ai ke fakahoko ʻa e ngaahi meʻa ko iá pea ʻai ai ʻo malava ke fakatolonga ʻa e moʻuí, ʻo fakaʻatā ai ʻa e faʻahinga faitōnunga ʻe toko valu ke “fakamoʻui ʻaki ʻa e vai.”
ʻOku ʻikai fakahaaʻi pau ʻe he Tohi Tapú ʻa e taʻu ko ia naʻe fakahaaʻi ʻe Sihova kia Noa ʻe hoko ai ʻa e Lōmakí. Koeʻuhi naʻe fanauʻi ʻa hono ngaahi fohá, ʻo nau tupu hake, pea nau mali, mahalo ko e taʻu ʻe 40 pe 50 naʻe kei toe ki muʻa ʻi he Lōmakí. Naʻe folofola leva ʻa Sihova kia Noa: “Kuo aʻu ʻa e kakano kotoa pe ki hono ngataʻanga.” Naʻá ne toe pehē naʻe pau kia Noa ke ne langa ha fuʻu ʻaʻake pea hū ki ai mo hono fāmilí. (Sen. 6:13-18) Lolotonga ʻa e ngaahi taʻu naʻe toé, naʻe fai ʻe Noa ʻa e meʻa lahi ange ʻi hono ʻomai pē ha faʻifaʻitakiʻanga ʻo e māʻoniʻoní ʻi heʻene moʻuí. Naʻá ne ngāue ʻo “malangaʻaki ʻa e maʻoniʻoni” ʻa ia naʻá ne maʻu ha pōpoaki fakatokanga māʻalaʻala ke talaki—ʻoku fakapapau ʻa e ʻOtuá ke fakaʻauha ʻa e kau fakaʻotuamate ʻo e taimi ko iá. Naʻe ʻikai ke ʻiloʻi fuoloa ki muʻa ʻe Noa ʻa e taʻu ko ia ʻe fakahoko aí, ka naʻá ne ʻiloʻi ʻe pau ke hoko mai. Pea ʻokú ke ʻilo naʻe hoko ia.—2 Pita 2:5.