Naʻe Fakatauʻatāinaʻi Kimoutolu ʻi he ʻOfa Maʻataʻatā

1, 2. ʻE lava fēfē ke tokoniʻi kitautolu ʻe he Loma 5:12?

ʻOKU pehē ʻi he Loma 5:12: “Ko e fou mai ʻi he tangata pē taha ʻa e hū ʻa e angahalá ki he māmaní pea mo e maté fakafou ʻi he angahalá, pea ko ia kuo mafola ai ʻa e maté ki he tangata kotoa pē koeʻuhi kuo nau angahala kotoa pē.” Ko e taha eni ʻi he ngaahi veesi ʻoku tau ʻiloʻi lelei pea ʻoku tau faʻa ngāueʻaki ia ʻi he taimi ʻoku tau akoʻi ai ʻa e Tohi Tapú ki he kakaí.

² ʻOku lahi hono toutou ngāueʻaki ʻa e veesi ko iá ʻi he tohi Ko e Hā ʻOku Akoʻi Moʻoni ʻe he Tohi Tapú? mo e What Can the Bible Teach Us? ʻI he taimi ʻoku tau ako ai ʻa e vahe 3, 5, mo e 6 mo ʻetau fānaú pea pehē ki he niʻihi kehé, ngalingali ʻoku tau faʻa lau ʻa e Loma 5:12. ʻOku tau ngāueʻaki nai ʻa e veesi ko ení ke tokoniʻi kinautolu ke nau mahinoʻi ʻa e ʻuhinga ʻoku ʻikai ko ha palataisi ai ʻa e māmaní, ʻuhinga ʻoku tau fiemaʻu ai ʻa e huhuʻí mo e ʻuhinga ʻoku tau mate aí. Ka ʻoku lava ke toe tokoni kiate kitautolu kotoa ʻa e veesi ko ení ke tau houngaʻia loloto ange ʻi hotau vahaʻangatae mo Sihová. ʻOku lava ke tokoni kiate kitautolu ke tau kei fakapapauʻi pē ke fakahōifuaʻi ia pea hanganaki fakatuʻamelie atu ki he ngaahi meʻa kuó ne talaʻofa maí.

3. Ko e hā kuo pau ke tau manatuʻi fekauʻaki mo hotau tuʻungá?

³ Ko e meʻa fakamamahí, ko kitautolu kotoa ko e kau angahala. ʻOku tau fai ʻa e fehālaaki ʻi he ʻaho kotoa pē. Ka ʻoku mohu meesi ʻa Sihova. ʻOkú ne ʻafioʻi ʻetau taʻehaohaoá pea ʻokú ne loto-lelei ke fakamolemoleʻi kitautolu. (Saame 103:13, 14) Naʻe tala mai ʻe Sīsū kuo pau ke tau kole ki he ʻOtuá ke ne fakamolemoleʻi ʻetau ngaahi angahalá. (Luke 11:2-4) ʻI he taimi ʻoku fakamolemoleʻi ai ʻe Sihova ʻetau angahala ʻi he kuohilí, ʻoku ʻikai fiemaʻu ia ke tau hanganaki fakakaukau ki ai. Tau sivisiviʻi angé ʻa e founga ʻoku fakamolemoleʻi ai ʻe Sihova kitautolú.

FOUNGA ʻOKU FAKAMOLEMOLEʻI AI ʻE SIHOVA KITAUTOLÚ

4, 5. (a) Ko e hā te ne tokoniʻi kitautolu ke mahinoʻi ʻa e Loma 5:12? (e) Ko e hā ʻa e ʻuhinga ʻo e “ʻofa maʻataʻataá”?

⁴ Ko e tohi ʻa Lomá tautefito ki he vahe 6, ʻoku tokoniʻi ai kitautolu ke tau mahinoʻi ʻa e founga ʻoku fakamolemoleʻi ai ʻe Sihova ʻetau ngaahi angahalá. ʻI he vahe 3, ʻoku tau ʻiloʻi ai ʻoku tau “faiangahala kotoa pē.” ʻOku fakamatalaʻi leva ʻe Paula: “Ko ha meʻaʻofa taʻetotongi ʻa hono lau ko ia ʻoku nau māʻoniʻoni ko e meʻa ʻi heʻene ʻofa maʻataʻataá fakafou ʻi he fakatauʻatāina kuo fai ʻe he huhuʻi naʻe totongi ʻe Kalaisi Sīsuú.” (Loma 3:23, 24) Ko e foʻi lea faka-Kalisi ʻoku liliu heni ki he “ʻofa maʻataʻataá” ʻoku ʻomai ai ʻa e fakakaukau fekauʻaki mo ha anga-lelei kuo fakahāhā ʻo ʻikai ʻamanekina ki ha totongi, ʻa ia ko ha meʻa ʻoku ʻikai ke taau pe tuha mo ia.

⁵ Naʻe fakamatalaʻi ʻe ha mataotao ʻe taha ʻo pehē ko e foʻi lea faka-Kalisí ʻoku faʻa ʻuhinga ia ki he meʻa kuo fai ʻe he ʻOtuá mo Kalaisi ke fakahaofi ai ʻa e faʻahinga ʻo e tangatá mei he angahalá mo e maté. Ko ia ʻi he Liliu Tohi Tapu ʻo e Māmani Foʻoú ʻo e Ngaahi Konga Tohi Tapu Faka-Kalisi Kalisitiané ʻoku liliu ʻa e foʻi lea faka-Kalisi ko ení ko e “ʻofa maʻataʻataá.” Tau vakai angé ki he meʻa kuo fai ʻe he ʻOtuá maʻa kitautolú mo e ʻaonga ʻoku tau maʻu ʻi he ʻahó ni mei heʻene ʻofa maʻataʻataá pea ʻomai mo e ʻamanaki ki he kahaʻú.

6. Ko hai ʻe lava ke maʻu ʻaonga mei he ʻofa maʻataʻatā ʻa e ʻOtuá, pea ʻoku anga-fēfē?

⁶ Koeʻuhí ko e faiangahala ʻa ʻĀtamá, kuo uesia ai ʻe he angahalá mo e maté ʻa e tangata taʻehaohaoa kotoa pē kuo moʻui mai. Ko e ʻuhinga ia ʻoku pehē ai ʻe he Tohi Tapú “kuo pule ai ʻa e maté ko e tuʻi fakafou ʻi he tokotaha ko iá.” Ka naʻe fakahāhā ʻe Sihova ʻene mātuʻaki ʻofa maʻataʻataá pea tokonaki mai mo e founga ke fakahaofi ai ʻa e kotoa ʻo e faʻahinga ʻo e tangatá fakafou ʻi he “foʻi toko taha, ko Sīsū Kalaisi.” (Loma 5:12, 15, 17) ʻOku “fou mai ʻi he talangofua ʻa e foʻi toko taha ʻo fokotuʻu ai ʻa e tokolahi ʻoku nau māʻoniʻoni.” Pea ʻoku lava ke nau fakatuʻotuʻa atu ki he “moʻui taʻengata fakafou ʻia Sīsū Kalaisi.”​—Loma 5:19, 21.

7. Ko e hā ko ha meʻaʻofa anga-ʻofa pea mo ʻofa maʻataʻatā ai mei he ʻOtuá ʻa e huhuʻí?

⁷ Fakakaukau ki heni: Naʻe ʻikai ke fiemaʻu kia Sihova ke ʻohifo hono ʻAló ko ha huhuʻi. Ka naʻá ne fakahāhā ʻa e lahi ʻene ʻofá, ʻo ne tokonaki mai ai ha founga ke fakahaofi ai kitautolu mei he angahalá mo e maté. ʻOku ʻikai ha taha ʻo kitautolu ʻe tuha mo e meʻa naʻe fai ʻe he ʻOtuá mo Sīsū maʻa kitautolú. He houngaʻia ē ko kitautolu ʻi he meʻa kuó na faí ke tau malava ai ʻo maʻu ʻa e fakamolemolé mo e moʻui taʻengatá! ʻOfa ke tau fakahāhā ʻi heʻetau founga moʻuí ʻa e lahi ʻo ʻetau houngaʻia ʻi he ʻOtuá.

HOUNGAʻIA ʻI HE ʻOFA MAʻATAʻATĀ ʻA E ʻOTUÁ

8. Ko e hā ʻa e fakakaukau kuo pau ke tau talitekeʻí?

⁸ ʻOku tau ʻiloʻi ʻoku loto-lelei ʻa e ʻOtuá ke ne fakamolemoleʻi kitautolu, naʻa mo e ngaahi angahala mamafá. Ka ʻoku totonu ke ʻoua te tau ngāueʻaki ʻa e ʻofa maʻataʻatā ʻa Sihová ko ha kalofanga ia ke tau faihala ai mo fakakaukau, ‘ʻE fakamolemoleʻi au ʻe Sihova.’ ʻI he ʻuluaki senitulí, neongo naʻe kei moʻui ʻa e kau ʻapositoló, naʻe ʻi ai ʻa e kau Kalisitiane ʻe niʻihi naʻa nau maʻu ʻa e fakakaukau ko iá. (Lau ʻa e Sute 4.) ʻI he ʻahó ni, ʻoku fiemaʻu ke tau tokanga ke ʻoua naʻa tākiekina kitautolu ʻe he niʻihi kehé pea kamata ke tau ohi ʻa e fakakaukau ko iá.

9, 10. Naʻe anga-fēfē hono fakatauʻatāinaʻi ʻa Paula mo e niʻihi kehé mei he angahalá mo e maté?

⁹ Naʻe tala ʻe Paula ki he kau Kalisitiané, ʻoku ʻikai totonu ke nau fakakaukau kapau ʻe hokohoko atu ʻenau faiangahalá, ʻe kei fakamolemoleʻi pē kinautolu ʻe he ʻOtuá. Naʻe pehē ʻe Paula, ʻoku totonu ke nau talitekeʻi ʻa e fakakaukau ko ení koeʻuhí naʻa nau “mate ʻi he fekauʻaki mo e angahalá.” (Lau ʻa e Loma 6:1, 2.) Ko e hā naʻá ne ʻuhinga ki aí?

¹⁰ Fakafou ʻi he huhuʻí, naʻe fakamolemoleʻi ai ʻe he ʻOtuá ʻa e angahala ʻa Paulá mo e kau Kalisitiane kehe ʻi he ʻuluaki senitulí. Naʻe pani kinautolu ʻe Sihova ʻaki hono laumālie māʻoniʻoní ke nau hoko ko hono ngaahi foha. Kapau naʻa nau kei faitōnunga ai pē, te nau moʻui ʻi hēvani pea pule fakataha mo Kalaisi. Kae kehe, koeʻuhí naʻa nau kei moʻui ʻi he māmaní, naʻe anga-fēfē ʻenau “mate ʻi he fekauʻaki mo e angahalá”? Naʻe ngāueʻaki ʻe Paula ha fakahoa ke fakahaaʻi ai naʻe liliu fakaʻaufuli ʻenau founga moʻuí. Naʻá ne pehē ʻi he hili ʻa e pekia ʻa Sīsuú, naʻá ne toetuʻu ko ha meʻamoʻui laumālie taʻefaʻamate. Ko e ʻuhinga ia naʻe hoko ai ʻa e maté ʻo “ʻikai ke toe pule kiate ia.” ʻI he founga meimei tatau, naʻe hangē ia naʻe mate foki mo e kau Kalisitiané. Naʻe liliu fakaʻaufuli ʻenau moʻuí koeʻuhí naʻe ʻikai ke nau toe fakaʻatā ʻenau ngaahi holi angahalaʻiá ke puleʻi kinautolu. Talu mei ai mo ʻenau fai honau lelei tahá ke moʻui ʻi ha founga naʻe fakahōifua ai ki he ʻOtuá. Naʻa nau “mate ʻi he fekauʻaki mo e angahalá kae moʻui maʻá e ʻOtuá ʻia Kalaisi Sīsū.”​—Loma 6:9, 11.

11. Kuo anga-fēfē ʻa e hoko ʻa e kau Kalisitiane ʻi he ʻaho ní ʻo “mate ʻi he fekauʻaki mo e angahalá”?

¹¹ Fēfē kitautolu? ʻOku anga-fēfē ʻetau “mate ʻi he fekauʻaki mo e angahalá”? ʻI he kuohilí naʻe lahi nai ʻetau faihalá ʻo ʻikai ke tau mahinoʻi ʻa e anga ʻo e vakai mai ʻa Sihova ki heʻetau ngaahi tōʻongá. Naʻa tau hoko ko e “kau pōpula ki he taʻemaʻá mo e maumau-laó,” ʻa ia ko e “kau pōpula ʻa e angahalá.” (Loma 6:19, 20) Ka ʻi he taimi naʻa tau ako ai mei he Tohi Tapú ʻa e founga ʻoku fiemaʻu mai ʻe he ʻOtuá ke tau moʻui aí, naʻe liliu ʻetau founga moʻuí, fakatapui kitautolu kiate ia pea hoko ʻo papitaiso. Naʻa tau maʻu ha holi mālohi ke talangofua kia Sihova pea moʻui ʻi he founga ʻoku fakahōifua kiate iá. Naʻe ‘fakatauʻatāinaʻi kitautolu mei he angahalá,’ pea ʻoku tau “hoko ai ko e kau pōpula maʻá e māʻoniʻoní.”​—Loma 6:17, 18.

12. Ko e hā ʻa e fili kuo pau ke fai ʻe kitautolu taki taha?

¹² Kae kehe, ʻoku tau kei ʻatā ke fai ha fili. Naʻe pehē ʻe Paula: “ʻOua ʻe tuku ʻa e angahalá ke hokohoko atu ʻene pule ko e tuʻi ʻi homou ngaahi sino matengofuá ʻo mou talangofua ai ki heʻenau ngaahi holí.” (Loma 6:12) ʻOku lava ke tau fakavaivai ki heʻetau ngaahi fakakaukaú mo e ngaahi holi angahalaʻiá pe ʻoku lava ke tau puleʻi ia. ʻEke hifo: ‘ʻOku ou fakaʻatā ke tupu ʻo mālohi ange ʻeku ngaahi holi fehālākí ke u fai ai ʻa e meʻa ʻoku koví? Pe ʻoku ou talitekeʻi he taimi pē ko iá?’ Kapau ʻoku tau houngaʻia moʻoni ʻi he ʻofa maʻataʻatā ʻa e ʻOtuá te tau fai hotau lelei tahá ke fakahōifuaʻi ia.

ʻE LAVA KE KE TAUʻI ʻA E ANGAHALÁ

13. Ko e hā ʻoku tau tuipau ai ʻe lava ke tau fai ʻa e meʻa ʻoku totonú?

¹³ ʻI he ʻuluaki senitulí, ko e niʻihi ʻo e kakai ʻi Kolinitoó ko e kau kaihaʻa, fakasōtoma, kau tono, kau tauhi ʻaitoli mo e kau konā naʻa nau toki ʻilo mo ʻofa kia Sihova, pea nau liliu. Naʻa nau ongoʻi mā ʻi he meʻa naʻa nau faʻa faí. (Loma 6:21; 1 Kol. 6:9-11) Naʻe toe fiemaʻu mo e kau Kalisitiane ʻi Lomá ke nau fai ʻa e ngaahi liliu meimei tatau. Naʻe tala ange ʻe Paula kiate kinautolu: “Pea ʻoua ʻe ʻoatu homou ngaahi kupú ki he angahalá ko e ngaahi meʻatau ia ʻo e taʻemāʻoniʻoní, kae ʻoatu kimoutolu ki he ʻOtuá ko e faʻahinga kuo moʻui mei he maté, pea pehē foki mo homou ngaahi kupú ki he ʻOtuá ko e ngaahi meʻatau ia ʻo e māʻoniʻoní.” (Loma 6:13) Naʻe fakapapauʻi ʻe Paula ʻe lava ke nau fai ʻa e meʻa naʻe totonú pea hokohoko atu ʻenau maʻu ʻaonga mei he ʻofa maʻataʻatā ʻa e ʻOtuá.

14, 15. Ko e hā ʻoku totonu ke tau ʻeke hifo kiate kitautolú?

¹⁴ ʻOku meimei tatau ia mo e ʻahó ni. Ko e niʻihi hotau fanga tokouá mo e fanga tuofāfiné naʻa nau moʻui ʻo hangē nai ko e faʻahinga ʻi Kolinitoó. Ka ʻi he hili ʻenau ʻiloʻi ʻa Sihová, naʻa nau liliu. Naʻe hangē ia kuo fakamaʻa kinautolu. Ke fakahōifuaʻi ʻa Sihová, ko kitautolu kotoa naʻa tau fai ʻa e ngaahi liliu ʻi heʻetau moʻuí. Naʻa mo e ʻahó ni, ʻoku tau loto ke fakahaaʻi ʻoku tau houngaʻia ʻi he ʻofa maʻataʻatā ʻa e ʻOtuá. Ko ia ʻoku tau fakapapauʻi ke tauʻi ʻetau ngaahi holi fehālākí pea ngāueʻaki ʻetau moʻuí ke tauhi kia Sihova.

¹⁵ Ko e moʻoni, kuo pau ke tau fakaʻehiʻehi mei hono fai ha ngaahi angahala mamafa ʻa ia naʻe fai ʻe he niʻihi ʻi Kolinitoó. Heʻikai lava ke tau hokohoko atu ʻi hono fai ʻa e ngaahi angahala peheé, ʻi he taimi tatau ʻoku tau ʻamanekina ʻe fakahāhā ʻe he ʻOtuá ʻene ʻofa maʻataʻataá pea fakamolemoleʻi kitautolu. Kae fēfē ʻa e ngaahi angahala ia ʻoku pehē ʻe he niʻihi ʻoku ʻikai ke fuʻu mafatukitukí? ʻOku tau fakapapauʻi ke fai hotau lelei tahá ke talangofua kia Sihova ʻi he meʻa kotoa pē?​—Loma 6:14, 17.

16. ʻOku anga-fēfē ʻetau ʻiloʻi kuo pau ke tau fakaʻehiʻehi mei he ngaahi angahala ʻoku ʻikai hā ʻi he 1 Kolinitō 6:9-11?

¹⁶ Fakakaukau ki he ʻapositolo ko Paulá. Naʻá ne tohi: “ʻOku ou fakakakano, pea kuo fakatau atu au ki he angahalá. He ʻoku ʻikai te u mahinoʻi ʻa e meʻa ʻoku ou faí. He ko e meʻa ʻoku ou loto ki aí, ko ʻeni ia ʻoku ʻikai te u tōʻongaʻakí; ka ko e meʻa ʻoku ou fehiʻa aí ko e meʻa ia ʻoku ou faí.” (Loma 7:14, 15) Neongo naʻe ʻikai ke fai ʻe Paula ʻa e ngaahi meʻa ʻoku lave ki ai ʻi he 1 Kolinitō 6:9-11, naʻá ne fakahaaʻi naʻá ne kei faiangahala pē. Naʻá ne loto ke fakahōifuaʻi ʻa Sihova, ko ia naʻá ne faitau ai mo hono fai ʻa e ngaahi meʻa naʻe halá. (Lau ʻa e Loma 7:21-23.) ʻOfa ke tau faʻifaʻitaki ki heʻene faʻifaʻitakiʻangá pea fai ʻa e kotoa ʻo ʻetau malavá ke talangofua kia Sihova.

17. Ko e hā ʻokú ke loto ai ke faitotonú?

¹⁷ Ko e fakatātaá ʻoku tau ʻiloʻi ko e tauhi kia Sihová kuo pau ke tau faitotonu. (Lau ʻa e Palōveepi 14:5; ʻEfesō 4:25.) ʻOku ʻikai ke tau loto ke hangē ko Sētané, ʻa ia “ko e tamai ia ʻo e loí.” Pea ʻoku tau manatuʻi naʻe mate ʻa ʻAnanaia mo hono uaifí koeʻuhí ko ʻena loí. Ko ia ʻoku ʻikai ke tau loi. (Sione 8:44; Ngā. 5:1-11) Ka ko e faitotonú ʻoku ʻi ai hono ʻuhinga lahi ange ia ʻi he ʻikai ke lea loi pē. Kapau ʻoku tau houngaʻia moʻoni ʻi he ʻofa maʻataʻatā ʻa e ʻOtuá, te tau toe faitotonu ʻi he ngaahi meʻa kehé foki.

18, 19. Ko e hā ʻa e ʻuhinga ʻo e hoko ʻo faitotonú?

¹⁸ ʻOku lava ke taʻefaitotonu ha taha neongo ʻoku ʻikai ke ne lea loi. Ko e fakatātaá, naʻe tala ʻe Sihova ki he kau ʻIsilelí: “ʻE tapu hoʻomou kaihaʻa, pea tapu hoʻomou kākā, pea tapu hoʻomou loi ʻi hoʻomou feangai.” Ko e hā naʻe fiemaʻu ke nau fai ai ení? Naʻe pehē ʻe Sihova: “Te mou maʻoniʻoni; he ʻoku ou maʻoniʻoni ʻa au Sihova ko homou ʻOtua.” (Liv. 19:2, 11) Neongo ʻoku ʻikai nai ke tau lea loi, ka ʻo kapau ʻoku tau ʻai ʻa e niʻihi kehé ke nau tui ki ha meʻa ʻoku ʻikai ke moʻoni, ʻoku tau hoko ai ʻo taʻefaitotonu.

¹⁹ Ko e fakatātaá, ʻoku tala ange ʻe ha tangata ki hono pulé pe faʻahinga ʻoku ngāue mo iá, ʻokú ne fiemaʻu ke tuku vave mei he ngāué koeʻuhí ʻoku ʻi ai ʻene ʻapoinimeni ke sio ki he toketaá. Ka ʻoku ʻikai ko e ʻuhinga moʻoní ia. ʻOkú ne loto pē ke tuku vave mei he ngāué. Ko hono moʻoní ko ʻene “ʻapoinimeni ke sio ki he toketaá” ko ʻene ʻalu pē ʻaʻana ki he fale tala vaí pe totongi ha moʻua ʻi he kilīnikí. ʻOkú ne faitotonu, pe ʻokú ne kākaaʻi ʻa e niʻihi kehé? Naʻe ʻai ʻe he tangata ko ení ke tui ʻa e niʻihi kehé ki ha meʻa naʻe ʻikai ke moʻoni. ʻI he taimi ʻe niʻihi, ʻoku kākaaʻi ʻe he kakaí ha niʻihi ke nau maʻu ʻa e meʻa ʻoku nau loto ki aí pe hao ai mei ha tautea. Ka ʻoku tau talangofua kia Sihova, ʻa ia naʻá ne pehē: ‘ʻE tapu hoʻomou kākā.’ ʻOku tau loto ke fai ʻa e meʻa ʻokú ne pehē ʻoku totonu mo māʻoniʻoní.​—Loma 6:19.

20, 21. Kapau ʻoku tau houngaʻia ʻi he ʻofa maʻataʻatā ʻa e ʻOtuá, ko e hā mo ha toe meʻa kuo pau ke tau fakaʻehiʻehi mei ai?

²⁰ Ko e moʻoni, ʻoku tau fakaʻehiʻehi mei he tonó, konaá mo e ngaahi angahala mafatukituki kehé. Ka ʻoku ʻoku ʻikai ke ngata pē ai, ʻoku fiemaʻu ke tau fakaʻehiʻehi mei ha meʻa pē ʻe hoko ʻo taʻefakahōifua ai kia Sihova. Ko e fakatātaá, ʻoku ʻikai ke ngata pē ʻi heʻetau fakaʻehiʻehi mei he fehokotaki fakasino taʻetāú, ka ʻoku tau toe fakaʻehiʻehi mei he fakafiefia taʻetāú. ʻOku ʻikai ke ngata pē ʻi he ʻikai ke tau konaá, ka ʻoku ʻikai ke tau inu ke aʻu ki he tuʻunga ʻo e meimei konaá. ʻOku fiemaʻu nai ke tau mātuʻaki feinga mālohi ke talitekeʻi ʻa e ngaahi ʻahiʻahi hangē ko ení, ka ʻoku malava pē ia.

²¹ ʻOku tau fokotuʻu ʻa e taumuʻa ke fai ʻa e meʻa naʻe leaʻaki ʻe Paulá: “ʻOua ʻe tuku ʻa e angahalá ke hokohoko atu ʻene pule ko e tuʻi ʻi homou ngaahi sino matengofuá ʻo mou talangofua ai ki heʻenau ngaahi holí.” (Loma 6:12; 7:18-20) Ko e moʻoni ʻoku ʻikai lava ke tau fakaʻehiʻehi mei he angahala kotoa pē. Ka ʻi he taimi ʻoku tau tauʻi ai ʻa e angahala kotoa pē, ʻoku hā mei ai ʻoku tau houngaʻia moʻoni ʻi he ʻofa maʻataʻatā kuo fakahāhā mai ʻe he ʻOtuá mo Kalaisí.

22. Ko e hā ʻa e pale ʻe lava ke tau fakatuʻotuʻa atu ki aí kapau ʻoku tau houngaʻia moʻoni ʻi he ʻofa maʻataʻatā ʻa Sihová?

²² Kuo fakamolemoleʻi ʻe Sihova ʻetau ngaahi angahalá pea ʻoku lava ke hokohoko atu ʻene fakamolemoleʻi iá. He houngaʻia ē ko kitautolu ʻi heʻene ʻofa maʻataʻataá! Ko ia ʻofa ke tau ngāue mālohi ke fakaʻehiʻehi mei hono fai ʻa e ngaahi meʻa ʻokú ne pehē ʻoku halá, neongo kapau ʻoku fakakaukau ʻa e niʻihi kehé ʻoku ʻikai ko ha angahala. Ko e hā ʻa e pale ʻe lava ke tau fakatuʻotuʻa atu ki aí kapau te tau fai pehē? Naʻe pehē ʻe Paula: “ʻI he taimí ni, koeʻuhi naʻe fakatauʻatāinaʻi kimoutolu mei he angahalá kae hoko ko e kau pōpula maʻá e ʻOtuá, ʻoku mou utu ai homou fua ko hoʻomou māʻoniʻoni, pea ko hono ikuʻangá, ko e moʻui taʻengata.”​—Loma 6:22.