Naʻe Pekia Moʻoni ʻa Sīsū Koeʻuhi ko Au?

ʻOKU fonu ʻi he Tohi Tapú ʻa e ngaahi fakahāhā loto-moʻoni mei he kau tangata naʻa nau “maʻu ʻa e ngaahi ongo ʻo hangē pē ko kitautolú.” (Sēm. 5:17) Ko e fakatātaá, ʻe lava ke tau mahinoʻi lelei ʻa e ʻuhinga ʻa Paula ʻi heʻene leaʻaki ʻa e ngaahi lea ʻoku hiki ʻi he Loma 7:21-24: “ʻI he taimi ʻoku ou loto ai ke fai ʻa e meʻa ʻoku totonú, ʻoku ʻiate au ʻa e hehema ke fai ʻa e meʻa ʻoku koví. . . . He toki tangata fakaʻofa ē ka ko au!” ʻI heʻetau faitau mo ʻetau ngaahi taʻehaohaoá tonu ʻoku fakafiemālie ke ʻilo naʻe maʻu ʻe Paula ʻa e ongoʻi tatau.

Naʻe toe fakahaaʻi ʻe Paula ʻa e ngaahi ongoʻi loto-moʻoni kehe. ʻI he Kalētia 2:20, naʻá ne fakahaaʻi ʻene tuipau ko Sīsū naʻá ne “ʻofeina [ia] peá ne tuku atu ia koeʻuhi ko [ia]” tonu! ʻOku fakamatalaʻi ai “ʻa e ngaahi ongo ʻo hangē pē ko kitautolú”? Mahalo ʻoku ʻikai ke pehē maʻu pē.

Kapau ʻoku tau kei ongoʻi kovi koeʻuhi ko ʻetau ngaahi fehālaaki ʻi he kuohilí, heʻikai nai ke tau tui ʻoku ʻofa ʻa Sihova ʻiate kitautolu pea fakamolemoleʻi kitautolu, pea ʻe lava ke mātuʻaki faingataʻa ke vakai ki he feilaulau huhuʻí ko ha meʻaʻofa fakafoʻituitui kiate kitautolu. ʻOku loto moʻoni ʻa Sīsū ke tau vakai ki he huhuʻí ʻi he founga ko iá? Kapau ko ia, ko e hā ʻe lava ke tokoni kiate kitautolu ke fai iá? Tau sivisiviʻi angé ʻa e ongo fehuʻi ko iá.

VAKAI ʻA SĪSŪ KI HEʻENE FEILAULAÚ

ʻIo, ʻoku loto ʻa Sīsū ke tau vakai ki heʻene feilaulaú ko ha meʻaʻofa fakafoʻituitui. ʻE lava fēfē ke tau fakapapauʻi ia? Sioloto atu ki he meʻa ʻoku hiki ʻi he Luke 23:39-43. Naʻe tautau ha tangata ʻi ha ʻakau fakamamahi ofi kia Sīsū. Naʻá ne fakahaaʻi ange ʻokú ne ongoʻi halaia ʻi heʻene ngaahi fehālaaki he kuohilí. Kuo pau pē ko e faihia mafatukituki koeʻuhi ko e tautea anga-fakamamahi ko ení naʻe fai pē ki he kau faihia mātuʻaki kovi peheé. ʻI he hohaʻa ki he meʻa naʻe hokó, naʻe kōlenga ʻa e tangatá kia Sīsū: “Manatuʻi au ʻi hoʻo hoko ki ho Puleʻangá.”

Naʻe anga-fēfē tali ʻa Sīsū? Sioloto atu ki he langa lahi ʻi heʻene feinga ke hanga hake ki he tangatá. Neongo ʻa e langá, naʻá ne feinga ke malimali loto-māfana pea fakapapauʻi ki he tangatá: “ʻOku ou tala moʻoni atu kiate koe ʻi he ʻahó ni, te ke ʻi Palataisi mo au.” Kuo pau pē naʻe fakamanatu ange ʻe Sīsū ki he tangatá “ko e Foha ʻo e tangatá, naʻe . . . haʻú . . . ke foaki ʻene moʻuí ko ha huhuʻi ko e fetongi ʻo e tokolahi.” (Māt. 20:28) Ka naʻá ke fakatokangaʻi naʻe fakamamafaʻi anga-ʻofa ʻe Sīsū ʻa e natula fakafoʻituitui ʻene feilaulaú? Naʻá ne anga-fakakaumeʻa pea ngāueʻaki ʻa e fetonginauna fakafoʻituitui ko e “te ke” mo e “au.” Pea naʻá ne ʻai ia ke ʻi ha tuʻunga fakafoʻituitui ʻi heʻene lave ki he ʻamanaki ʻa e tangatá, ke moʻui ʻi ha palataisi ʻi he māmaní.

ʻOku ʻikai ha veiveiua, naʻe loto ʻa Sīsū ke tali ʻe he tangata ko ení ʻene feilaulaú ko ha meʻaʻofa fakafoʻituitui. Kapau naʻe ongoʻi peheni ʻa Sīsū fekauʻaki mo ha faihia naʻe teʻeki ke ne maʻu ha faingamālie ke tauhi ki he ʻOtuá, ko e moʻoni te ne ongoʻi peheni fekauʻaki mo ha Kalisitiane ʻosi papitaiso kuó ne ʻosi tauhi ki he ʻOtuá. Ko e hā leva ʻe lava ke tokoni kiate kitautolu ke fakatupulekina ha ongoʻi lelei fekauʻaki mo kitautolu neongo ʻetau ngaahi angahala ʻi he kuohilí?

MEʻA NAʻE TOKONI KIA PAULÁ

Naʻe tākiekina ʻe he ngāue fakafaifekau ʻa Paulá ʻa e anga ʻene vakai ki he feilaulau ʻa Sīsuú. Anga-fēfē? Naʻá ne fakamatala: “ʻOku ou fakafetaʻi kia Kalaisi Sīsū ko hotau ʻEikí, ʻa ia naʻá ne ʻomi kiate au ʻa e mālohi, koeʻuhí naʻá ne lau au ʻoku ou faitōnunga ʻaki ʻene vaheʻi au ki ha ngāue toputapu, neongo naʻá ku hoko ki muʻa ko ha tokotaha laukovi ki he ʻOtuá pea ko ha tokotaha fakatanga pea ko ha tangata anga-taʻetokaʻi.” (1 Tīm. 1:12-14) Ko e vāhenga-ngāue ʻa Paulá naʻe fakapapauʻi ange ai kiate ia ʻa e meesi, ʻofa mo e falala ʻa Sīsū kiate ia fakafoʻituituí. Naʻe toe ʻomai foki ʻe Sīsū kiate kitautolu taki taha ha ngāue fakafaifekau. (Māt. 28:19, 20) ʻE lava ke kaunga ia kiate kitautolu ʻi ha founga meimei tatau?

Ko Albert, ʻa ia naʻá ne foki mai ki muí ni kia Sihova hili hono tuʻusi ʻi he meimei taʻu ʻe 34, ʻokú ne fakamatala: “ʻOku ʻi muʻa maʻu pē ʻiate au ʻa ʻeku angahalá. Ka ʻi heʻeku ʻi he ngāue fakafaifekaú, ʻoku ou ongoʻi, ʻo hangē ko e ʻapositolo ko Paulá, kuo ʻomai kiate au ha ngāue toputapu meia Sīsū. ʻOku langa hake ai au pea ʻai ke u hanganaki maʻu ha fakakaukau pau fekauʻaki mo au tonu, ko ʻeku moʻuí mo hoku kahaʻú.”—Saame 51:3.

Ko Allan, ʻa ia naʻá ne faihia mo anga-fakamālohi ki muʻa ke ne ako ʻa e moʻoní, ʻokú ne pehē: “ʻOku ou kei fakakaukau pē ki he kotoa ʻo e maumau naʻá ku fakatupunga ki he kakaí. ʻI he taimi ʻe niʻihi, ʻoku ʻai ai au ke u ongoʻi loto-mafasia. Ka ʻoku ou fakamālō kia Sihova ʻi heʻene fakaʻatā ha tokotaha angahala hangē ko aú ke ʻoatu ʻa e ongoongo leleí ki he niʻihi kehé. ʻI heʻeku sio ki he tali ʻa e kakaí ki he ongoongo leleí, ʻoku fakamanatu mai ai ʻa e lelei mo e anga-ʻofa ʻa Sihová. ʻOku ou ongoʻi ʻokú ne ngāueʻaki au ke tokoni ki he niʻihi kehe ʻoku nau fāinga mo ha puipuituʻa meimei tatau.”

Ko ʻetau ngāue fakafaifekaú tonu ʻoku fakaʻatā ai kitautolu ke fakahangataha hotau iví ki he ngaahi ngāue mo e fakakaukau paú. ʻOku fakapapauʻi mai ai ʻa e meesi, ʻofa mo e falala mai ʻa Sīsū kiate kitautolú.

ʻOKU LAHI ANGE ʻA SIHOVA ʻI HOTAU LOTÓ

ʻI he teʻeki aʻu ki he taimi ʻe fakaʻauha ʻosi ai ʻa e fokotuʻutuʻu fulikivanu ʻa Sētané, ko hotau lotó ʻe hokohoko atu nai ʻene fakahalaiaʻi kitautolú koeʻuhi ko ʻetau fehālaaki ʻi he kuohilí. Ko e hā ʻe tokoni kiate kitautolu ke tauʻi ʻa e ngaahi ongoʻi peheé?

“ʻOku ou saiʻia ʻi he pehē ko ia ʻoku ‘lahi ange ʻa e ʻOtuá ʻi hotau lotó,’” ko e lau ia ʻa Jean, ʻa ia ʻokú ne fāinga maʻu pē mo e ongoʻi halaia koeʻuhi ko ʻene moʻui lōua ʻi heʻene kei siʻí. (1 Sio. 3:19, 20) Ko kitautolu foki ʻe lava ke tau maʻu ʻa e fiemālie ʻi hono ʻiloʻi ʻoku mahinoʻi lelei ange ʻe Sihova mo Sīsū hotau tuʻunga angahalaʻiá ʻiate kitautolu. Manatuʻi, naʻá na tokonaki anga-ʻofa mai ʻa e huhuʻí, ʻo ʻikai maʻá e faʻahinga haohaoa ʻo e tangatá, ka maʻá e faʻahinga angahala fakatomalá.—1 Tīm. 1:15.

ʻOku tau fakapapauʻi ki hotau lotó ʻa e moʻoni mahuʻinga ko ení ʻi heʻetau fakalaulauloto ʻi he faʻa lotu ki he anga ʻo e fakafeangai ʻa Sīsū ki he faʻahinga ʻo e tangata taʻehaohaoá pea ʻi heʻetau fai hotau lelei tahá ke fakahoko ʻa e ngāue fakafaifekau kuó ne vaheʻi maí. ʻI he fai peheé, hangē ko Paulá, ʻe lava ke ke pehē: “[Ko Sīsū] naʻá ne ʻofeina au peá ne tuku atu ia koeʻuhi ko aú.”